༄༅།། ཕྱི་ཟླ་༣་པའི་ཚེས་༡༦་ཉིན་ཨ་རིའི་འཇོར་ཇཱི་ཡ་མངའ་སྡེའི་ཨེ་ཊི་ལན་ཊ་གྲོང་ཁྱེར་དུ་ཨེ་ཤི་ཡའི་བུད་མེད་༦་ཚུད་པའི་མི་༨་བསད། འདས་པའི་ལོ་དེར་ཨ་རིའི་རྒྱལ་ཡོངས་སུ་ཨེ་ཤི་ཡའི་མི་རིགས་ཨ་མི་རི་ཀའི་སྤྱི་དམངས་ལ་རྒོལ་རྡུང་འཕོག་རྒྱུ་བརྒྱ་ཆ་༡༥༠་ཇེ་མང་དུ་སོང་། རྒོལ་རྡུང་ཁག་ཅིག་མི་རིགས་དབྱེ་འབྱེད་ཀྱི་སྡང་ཟུག་ལ་བརྩི་ཆོག གང་ལྟར་རྒོལ་རྡུང་འདི་ཚོར་ཁྲིམས་ལུགས་སུ་བཀྲལ་བའི་མི་རིགས་དབྱེ་འབྱེད་དང་སྡང་ཟུག་གི་མཚན་ཉིད་ཚང་མིན་ལ་མ་ལྟོས་པར་ཨ་མི་རི་ཀའི་སྤྱི་ཚོགས་སུ་ཨེ་ཤི་ཡའི་མི་རིགས་ལ་སྡང་ཟུག་དང་དབྱེ་འབྱེད། ཨེ་ཤི་ཡའི་ཨ་མི་རི་ཀའི་སྤྱི་དམངས་ལ་རྒོལ་རྡུང་འཕོག་གི་ཡོད་པའི་ལོ་རྒྱུས་ནི་སྔ་མོ་ནས་འདུག་ཅེས་ཨ་རིའི་གསར་འགྱུར་ལས་ཁང་ཕལ་ཆེ་བས་གནས་ཚུལ་སྤེལ་འདུག ཉེ་བའི་ལོ་ཤས་རིང་ནས་ཨ་མི་རི་ཀར་མི་རིགས་དཀར་ནག་གི་འཐེན་འཁྱེར་དང་ཁ་ཆེ་ལ་སྡང་ཟུག ཨ་མི་རི་ཀར་ཕྱི་ལོགས་ཀྱི་སྐྱབས་བཅོལ་དུ་ཡོང་གི་ཡོད་པ་ཚོར་སྡང་ཟུག་བྱ་རྒྱུ་ཤུགས་ཆེ་རུ་ཕྱིན་པའི་དུས་འདིར་ཨེ་ཤི་ཡའི་ཨ་མི་རི་ཀའི་སྤྱི་དམངས་ལ་སྡང་ཟུག་བྱ་རྒྱུའང་ཤུགས་ཆེ་རུ་འགྲོ་བཞིན་པའི་རྣམ་པ་ཞིག་ཐོན། ད་སྔ་ཨེ་ཊི་ལན་ཊ་གྲོང་ཁྱེར་དུ་ཨེ་ཤི་ཡའི་བུད་མེད་༦་ཚུད་པའི་མི་༨་བསད་པའི་འབྱུང་རྐྱེན་ཅི་ཡིན་གསལ་པོ་ཞིག་ཤེས་རྟོགས་ཐུབ་དཀའ། མི་གསོད་ཀྱི་ཉེས་འཛུགས་བྱ་ཡུལ་མི་རིགས་དཀར་པོའི་ན་གཞོན་དེས་ཨེ་ཤི་ཡའི་མི་རིགས་ལ་སྡང་ཟུག་དང་ཕྱོགས་ལྷུང་གི་ལྟ་བ་བཟུང་མེད། ཁོ་པ་ཆགས་སྤྱོད་ལ་ངན་ལོབས་སུ་སོང་བ་ཞིག་ཡིན་ཞེས་བཤད་པ་དེ་ལ་བལྟས་ཚེ། ཁོ་པས་ཨེ་ཤི་ཡའི་བུད་མེད་རྣམས་སྨད་འཚོང་མ་ཡིན་པ་དང་ཨ་རིའི་སྤྱི་ཚོགས་སུ་ཨེ་ཤི་ཡའི་བུད་མེད་ལ་སྨད་འཚོང་མའི་ལྟ་སྟངས་ཤིག་བཟུང་ཡོད་པ། དེའི་རྗེས་འབྲེལ་དུ་ཨ་རིའི་ཨེ་ཤི་ཡའི་སྤྱི་དམངས་ལ་རྒོལ་རྡུང་འཕོག་གི་ཡོད་པ་ར་འཕྲོད།།
ཨེ་ཊི་ལན་ཊ་གྲོང་ཁྱེར་དུ་ཨེ་ཤི་ཡའི་བུད་མེད་༦་ཚུད་པའི་མི་༨་བསད་པའི་ཕུར་མཉེ་ཁྲུས་ཁང་ཞིག་གི་སྒོ་ཁར་འདས་པོ་རྣམས་ལ་མྱ་ངན་གྱི་མེ་ཏོག་ཕུལ། ༢༠༢༡།༣།༡༩
༡༨༧༥་ལོར་ཨ་རིའི་གྲོས་ཚོགས་ཀྱིས་རྒྱ་མོ་རྣམས་ཨ་མི་རི་ཀར་ཡོང་མི་ཆོག་པའི་བཅའ་ཁྲིམས་ཤིག་གཏན་ལ་ཕབ། ལོ་༡༥༠་མ་ཟིན་ཙམ་གྱི་གོང་དུ་ཨ་རིའི་གྲོས་ཚོགས་ཀྱིས་རྒྱ་མོ་བཀག་སྡོམ་གྱི་བཅའ་ཁྲིམས་གཏན་ལ་ཕབ་པ་དེར་རྒྱ་མོ་རྣམས་ཨ་མི་རི་ཀར་ཡོང་གི་ཡོད་པ་ནི་འཆལ་སྤྱོད་དང་སྨད་འཚོང་གི་དོན་དུ་ཡོང་གི་ཡོད་པ་ཡིན་མིན་ཐག་གཅོད་བྱེད་ཐུབ་རྒྱུ་ཁག་པོ་རེད་ཅེས་བཀོད། དེས་ན་ཨ་རིའི་སྤྱི་ཚོགས་སུ་ཨེ་ཤི་ཡའི་བུད་མེད་རྣམས་སྨད་འཚོང་མ་ཡིན་པའི་བག་ཆགས་ཤིག་ལོ་བརྒྱ་ལྷག་གི་སྔོན་དུ་ཐེབས་ཡོད་པར་མ་ཟད། ཨེ་ཤི་ཡའི་བུད་མེད་རྣམས་སྨད་འཚོང་མ་ཡིན་པའི་འདུ་ཤེས་ཁྱབ་སྤེལ་འགྲོ་སྟངས་དེར་ཨ་མི་རི་ཀའི་དམག་ལ་འབྲེལ་བ་འདུག དུས་རབས་༡༩་པའི་ནང་དུ་ཨ་མི་རི་ཀས་ཧྥི་ལི་ཕིན་ལ་དམག་བརྒྱབ། དུས་རབས་༢༠་པའི་ནང་དུ་ཨ་མི་རི་ཀས་ཀོ་རི་ཡ་དང་ཝྭི་ཏེ་ནམ་ལ་དམག་འཁྲུག་བརྒྱབ་སྟེ་ཨེ་ཤི་ཡའི་མི་དམངས་རྣམས་འཚོ་བ་སྐྱོ་པོ་ཡོད་པའི་གོ་སྐབས་བཟུང་ནས་ཨ་མི་རི་ཀའི་དམག་གིས་ཨེ་ཤི་ཡའི་བུད་མེད་ཁྲི་ཚོ་མང་པོ་སྨད་འཚོང་མར་བསྒྱུར། དུས་རབས་སྔོན་མའི་ལོ་རབས་༦༠་ནང་དུ་ཨ་རིའི་གཞུང་དང་ཐེ་ལན་ཌིའི་གཞུང་གིས་ཝྭི་ཏེ་ནམ་གྱི་དམག་འཁྲུག་ལ་ཞུགས་པའི་ཨ་རིའི་དམག་དཔུང་རྣམས་ཐེ་ལན་ཌིར་གུང་སེང་དང་ངལ་གསོ། སྨན་བཅོས་བྱེད་དུ་ཡོང་ཆོག་པའི་གྲོས་མཐུན་བཞག་པའི་རྗེས་སུ་ཐེ་ལན་ཌིར་སྨད་འཚོང་གི་ཚོང་ལས་ཀྱི་རྨང་གཞི་ཚུགས། ད་དུང་ཡང་ཐེ་ལན་ཌིའི་སྨད་འཚོང་གི་ཚོང་ལས་འགོག་ཐུབ་ཀྱི་མེད་པའི་ལན་ཁག་ཨ་མི་རི་ཀའི་དམག་ལ་ཡོད། དེང་སྐབས་ལོ་ལྟར་ཨ་རི་དང་ཡུ་རོབ་ཀྱི་སྐྱེས་པ་འབུམ་ཕྲག་མང་པོ་ཐེ་ལན་ཌིར་གུང་སེང་ལ་སྐྱོད་ཀྱི་ཡོད་པའང་སྨད་འཚོང་མ་བསྟེན་དུ་བསྐྱོད་ཀྱི་ཡོད་པ་རེད།།
ཨ་རིའི་གློག་བརྙན་དང་ཁ་ཤགས་སོགས་ཀྱི་ནང་དུའང་ཨེ་ཤི་ཡའི་བུད་མེད་རྣམས་སྨད་འཚོང་མ་ཡིན་པའི་འཁྲབ་སྟོན་བྱེད་ཀྱི་ཡོད་པ་ཇི་སྙེད་ཅིག་འབྱུང་། དེར་བརྟེན་ནག་ཚོང་རྒྱག་མཁན་ཚོས་ཨེ་ཤི་ཡའི་བུད་མེད་རྣམས་ཨ་མི་རི་ཀར་ལྐོག་ཏུ་ནང་འདྲེན་བྱ་རྒྱུ་ཤུགས་ཆེ་རུ་སོང་། ཁོ་ཚོ་ཕུར་མཉེ་ཁྲུས་ཁང་ཁག་ཅིག་གི་ནང་དུ་སྨད་འཚོང་མའི་ཚོང་ལས་གཉེར་དུ་འཇུག་གི་ཡོད་པས་ཨ་རིའི་སྐྱེས་པ་ཚོར་ཨེ་ཤི་ཡའི་བུད་མེད་སྲི་ཞུ་བ་ཡོད་སའི་ཕུར་མཉེ་ཁྲུས་ཁང་རྣམས་སྨད་འཚོང་ཁང་ཡིན་པའི་འདུ་ཤེས་ལོག་པ་གཅིག་གྱུར་ཞིག་ཡོད་འདུག ཨ་རིའི་ཨེ་ཤི་ཡའི་མི་རིགས་ལ་རྒོལ་རྡུང་དང་སྡང་ཟུག་བྱེད་ཀྱི་ཡོད་པའི་རྒྱུ་རྐྱེན་གཞན་ཞིག་ནི་ཨེ་ཤི་ཡའི་སྐྱེས་པ་དང་བུད་མེད་རྣམས་མི་གཉོམ་ཆུང་ཡིན་པ་དང་རྒོལ་འཛིང་མི་ཕོད་པ། ཁོ་ཚོར་འཕྲོག་བཅོམ་དང་རྡུང་རྡེག་བཏང་ནས་ཐུབ་ཚོད་བྱེད་ཆོག་ཆོག་ཅིག་ཡིན་པའི་ལྟ་སྟངས་བཟུང་སྟེ་ཕྱི་ཟླ་༢་པའི་ནང་དུ་ཨེ་ཤི་ཡའི་རྒད་པོ་ལོ་ན་༨༤་ཅན་ཞིག་ལ་མི་རིགས་དཀར་པོའི་ན་གཞོན་ཞིག་གིས་ཕུད་རྒྱག་བརྒྱབ་སྟེ་རྨས་སྐྱོན་ཕོག་ནས་འདས་གྲོངས་སུ་གྱུར། ཨེ་ཤི་ཡའི་མི་རིགས་ཀྱིས་གཉེར་པའི་ཟ་ཁང་སོགས་ལ་འཕྲོག་བཅོམ་དང་གཏོར་བཅོམ། རྒན་རྒོན་རྣམས་ལ་རྡུང་རྡེག་གཏོང་བ། ཐ་ན་ཨ་རིའི་གྲངས་ཉུང་མི་རིགས་ཀྱི་ཐོབ་ཐང་ལ་རྒྱབ་སྐྱོར་དང་ཨེ་ཤི་ཡའི་མི་རིགས་ལ་ལོ་མང་གི་འབྲེལ་བ་ཡོད་པ། ཨ་རིའི་སྲིད་དོན་པ་གྲགས་ཅན་ཁག་ཅིག་གི་བུ་ཕྲུག་རེ་ཟུང་གིས་ཀྱང་བསམ་བློའི་གཏིང་དུ་ཨེ་ཤི་ཡའི་མི་རིགས་ལ་དབྱེ་འབྱེད་དང་ཕྱོགས་ལྷུང་གི་འདུ་ཤེས་ཤིག་བཟུང་ཡོད་པ་ཕྱི་ལ་མངོན་གྱི་ཡོད་པའི་གནས་ཚུལ་ཐོན་འདུག
ཨ་མི་རི་ཀའི་ཨེ་ཤི་ཡའི་སྤྱི་དམངས་ལ་སྡང་ཟུག་འབྱུང་དགོས་པའི་རྒྱུ་རྐྱེན་གཙོ་བོ་ཞིག་ནི་༢༠༡༩་ཡི་ལོ་མཇུག་ཏུ་རྒྱ་ནག་གི་ཝུ་ཧན་གྲོང་ཁྱེར་ནས་འཛམ་གླིང་ཡོངས་ལ་ཏོག་དབྱིབས་ནད་དུག་ཁྱབ་པར་འབྲེལ་བ་ཡོད་ཅིང་། ཨ་མི་རི་ཀར་ཏོག་དབྱིབས་ནད་དུག་ཁྱབ་འགོ་ཚུགས་མ་ཐག་ཏུ་ཨ་རིའི་ཨེ་ཤི་ཡའི་སྤྱི་དམངས་ཀྱིས་གཉེར་བའི་ཟ་ཁང་ལ་གཏོར་རྒོལ། ཨ་རིའི་ཨེ་ཤི་ཡའི་མི་རིགས་ཀྱི་ཟ་ཁང་དང་ཚོང་ཁང་སོགས་ལ་ཚོང་འབྲེལ་བཅད་ནས་ངོ་རྒོལ་བྱ་རྒྱུ། སྐབས་འགར་ཨ་རིའི་ཨེ་ཤི་ཡའི་མི་རིགས་ལ་སྤྱི་སྤྱོད་རླངས་འཁོར་དང་རྒྱ་ལམ། མེ་འཁོར་སོགས་ཀྱི་ནང་དུ་ཁྱོད་ཚོས་ནད་དུག་ཁྱེར་ནས་ཡོང་བ་རེད། ཁྱོད་ཚོ་རྒྱ་ནག་ལ་ཕྱིར་ལོག་བྱོས་ཞེས་ངན་སྨོད་དང་རྡུང་རྡེག་གཏོང་བ། ཨ་རིའི་ཨེ་ཤི་ཡའི་སྤྱི་དམངས་ཐམས་ཅད་རྒྱ་ནག་པ་ཡིན་པར་ངོས་འཛིན་བྱས་ནས་སྡང་ཟུག་བྱ་རྒྱུ་མགོ་བརྩམས། ཨ་མི་རི་ཀར་ཏོག་དབྱིབས་ནད་དུག་སྔ་ཤོས་ནི་ཨེ་ཤི་ཡ་ནས་ཁྱབ་པ་མ་ཡིན་པར་ཡུ་རོབ་ནས་ཁྱབ་འདུག སྲིད་འཛིན་ཟུར་པ་ཌོ་ནལ་ཊམ་གྱིས་ཏོག་དབྱིབས་ནད་དུག་རྒྱ་ནད་རེད་ཅེས་ལན་མང་བསྒྲགས་པའི་སྟབས་ཀྱིས་ཨ་རིའི་ས་གནས་གང་སར་ཨ་མི་རི་ཀའི་སྤྱི་དམངས་ཡིན་པའི་ཨེ་ཤི་ཡའི་མི་རིགས་ལ་དབྱེ་འབྱེད་དང་མཐོང་ཆུང་། སྡང་ཟུག་གི་རྦ་རླབས་ཤིག་འཕྱུར་བཞིན་པ་ངར་ཤུགས་བསླངས་ནས་སྡུག་ཏུ་སོང་། ཌོ་ནལ་ཊམ་གྱིས་ཏོག་དབྱིབས་ནད་དུག་དང་མི་རིགས་གཉིས་འབྲེལ་བ་མཐུད་ནས་ནད་ཡམས་ཁྱབ་གདལ་གྱི་དུས་འདིར་ཨ་མི་རི་ཀའི་སྤྱི་ཚོགས་སུ་ཨེ་ཤི་ཡའི་མི་རིགས་ལ་ལས་ཀ་ཤོར་པ་དང་ཨེ་ཤི་ཡའི་མི་རིགས་ཀྱི་ཚོང་ལས་ལ་གྱོང་གུད་ཕོག་དེ་འདྲ་ཞིག་མི་རིགས་གཞན་ལ་བྱུང་མྱོང་མེད་པའི་གནས་ཚུལ་ཐོན་འདུག
ཨེ་ཤི་ཡའི་མི་རིགས་ལ་སྡང་ཟུག་བྱ་རྒྱུ་ཇེ་མང་དུ་འགྲོ་བཞིན་པ་དང་༢༠༢༠་ལོའི་ཨ་རིའི་སྲིད་འཛིན་འོས་འདེམས་ལའང་འབྲེལ་བ་ཡོད་པའི་གནས་ཚུལ་ཁག་ཅིག་ཐོན་འདུག ཨ་རིའི་ཉམས་ཞིབ་པ་ཚོས་སྔ་ལོའི་སྲིད་འཛིན་འོས་འདེམས་སྐབས་སུ་ཨ་མི་རི་ཀའི་གྲངས་ཉུང་མི་རིགས་ཁག་གིས་ཌོ་ནལ་ཊམ་ལ་འོས་ཤོག་མ་འཕངས་པར་དམངས་གཙོ་ཚོགས་པའི་སྲིད་འཛིན་འོས་མི་ཇཱོ་བྷ་ཌན་ལ་འོས་ཤོག་འཕངས། ལྷག་པར་དུ་སྔ་ལོའི་སྲིད་འཛིན་འོས་འདེམས་ལ་གནད་འགག་ཆེ་བའི་མངའ་སྡེ་དྲུག་གི་ནང་དུ་ཨེ་ཤི་ཡའི་མི་རིགས་བརྒྱ་ཆ་༨༠་ལྷག་གིས་ཇཱོ་བྷ་ཌན་དང་དམངས་གཙོ་ཚོགས་པའི་འོས་མི་ཚོར་འོས་ཤོག་འཕངས་ནས་སྤྱི་མཐུན་ཚོགས་པར་ཨ་རིའི་གྲོས་ཚོགས་གོང་མར་འཐུས་མི་གྲངས་མང་གི་རྒྱལ་ཁ་མ་ཐོབ། སྲིད་འཛིན་ཟུར་པ་ཌོ་ནལ་ཊམ་དང་ཌོ་ནལ་ཊམ་གྱི་རྒྱབ་སྐྱོར་བ་མི་རིགས་དཀར་པོ་མཆོག་འཛིན་པ་ཕལ་ཆེ་བས་ཨ་རིའི་གྲངས་ཉུང་མི་རིགས་ཁག་གིས་ཇཱོ་བྷ་ཌན་ལ་འོས་ཤོག་འཕངས་པར་ཞེ་འཁོན་བཅངས། སྔོན་ཆད་ཨ་རིའི་མི་རིགས་དཀར་པོ་མཆོག་འཛིན་པ་ཚོས་རྡུང་རྡེག་གི་དམིགས་འབེན་གཙོ་བོ་མི་རིགས་ནག་པོ་ཡིན་མོད། འོན་ཀྱང་མི་རིགས་ནག་པོའི་ཚེ་སྲོག་ལ་རིན་ཐང་ཡོད་ཅེས་ལས་འགུལ་སྤེལ་རྒྱུ་ཤུགས་ཆེ་རུ་སོང་། རྒྱལ་སྤྱིའི་ཐོག་ཏུའང་ཨ་རིའི་མི་རིགས་ནག་པོའི་ཚེ་སྲོག་ལ་རིན་ཐང་ཡོད་ཅེས་པའི་ལས་འགུལ་ལ་རྒྱབ་སྐྱོར་འཐོབ་ཀྱི་ཡོད་པས་ཨ་རིའི་མི་རིགས་དཀར་པོ་མཆོག་འཛིན་པ་ཚོས་མི་རིགས་ནག་པོར་རྡུང་རྡེག་གཏོང་གི་ཡོད་པའི་ཁ་ཕྱོགས་བསྒྱུར་ནས་ཨ་རིའི་ཨེ་ཤི་ཡའི་མི་རིགས་ཀྱི་ལ་སྡང་ཟུག་བྱེད་ཀྱི་ཡོད་པའི་རྣམ་པ་ཞིག་ཐོན་འདུག