༄༅།། ཨིཛ་རཱ་ཡེལ་ནང་ཡུལ་དེའི་མི་སེར་ཡིན་པའི་པཻ་ལིསྚིན་མི་རིགས་ས་ཡ་གཉིས་ཙམ་ཡོད་པ་དང་། ཨིཛ་རཱ་ཡེལ་གྱིས་པཻ་ལིསྚིན་མི་རིགས་དེ་ཚོར་གྷཱ་ཛའི་དམག་འཁྲུག་གི་སྐོར་སྐྱོན་བརྗོད་བྱེད་མི་ཆོག་པའི་དམ་དྲག་བྱས་ཏེ་ད་ཆ་ལོ་གཅིག་ཙམ་ཕྱིན་ཡོད་པས་ཨིཛ་རཱ་ཡེལ་ནང་གནས་སྡོད་བྱེད་མཁན་པེ་ལིསྚིན་མི་རིགས་ཚོས་གྷཱ་ཛའི་དམག་འཁྲུག་གི་སྐོར་ལ་ཅི་ཡང་མི་སྨྲ་བར་ངག་བསྡམས་ཏེ་སྡོད་དགོས་ཀྱི་ཡོད་འདུག
ཨེ་མད་ཁ་ལི་ཕཱ་ནི། སྔ་ལོའི་ཕྱི་ཟླ་༡༠པའི་ནང་གྷ་ཛའི་དམག་འཁྲུག་གི་སྐོར་ལ་ངོ་རྒོལ་བྱེད་མཁན་ཨིཛ་རཱ་ཡེལ་གྱི་མི་མང་གི་འདུ་འཛོམས་ཤིག་གི་ནང་མཉམ་ཞུཌ་བྱེད་པའི་སྐབས་ཁོ་པས་གྷཱ་ཛའི་དམག་འཁྲུག་ཐོག་ལ་ཨིཛ་རཱ་ཡེལ་ལ་སྐྱོན་བརྗོད་ཀྱི་སྐད་འབོད་བརྒྱབས་ཡོད་པའི་ནག་འཛུགས་ཀྱི་འོག་ཁོ་པ་ཟླ་བ་གསུམ་བཙོན་ཁང་ནང་སྡོད་དགོས་བྱུང་ཡོད་པ་དང་། ཨིཛ་རཱ་ཡེལ་གྱི་གྲོང་ཁྱེར་ཆེ་ཤོས་ཨང་གཉིས་པ་ཡིན་པ་ཡུལ་དེའི་དབུས་ཕྱོཌ་ཀྱི་གྲོང་ཁྱེར་ཨུམྨ་ཨལ་ཕ་ཧམ་གྱི་གྲོང་སྡེ་ལས་ཁང་གི་ལས་བྱེད་ཞིག་དང་ཁྲིམས་རྩོད་པ་ཞིག་ཡིན་པ་ཁ་ལི་ཕཱ་ཡིས་ཁོ་པར་ནག་འཛུགས་བྱས་པའི་སྐྱོན་བརྗོད་དེ་དག་གི་ཐོག་/ཁྲིམས་ཁང་གིས་མཐའ་མའི་ཐག་གཅོད་ག་རེ་བྱེད་ཀྱི་ཡོད་གསལ་པོ་མེད་པ་དང་། ཁོ་པ་ཆུ་ཚོད་༢༤འི་རིང་ཨིཛ་རཱ་ཡེལ་དབུས་ཕྱོཌ་སུ་ཡོད་པའི་རང་ཉིད་ཀྱི་སྡོད་ཁྱིམ་ནས་ཕྱོགས་ཐོན་བྱེད་མི་ཆོག་དམ་དྲག་བཀག་སྡོམས་བྱས་ཡོད་འདུག
ཨིཛ་རཱ་ཡེལ་གྱི་གྲང་ཉུང་མི་རིགས་ཀྱི་ཁྲིམས་རྩོད་པ་ཨ་རྡ་ལ་ཡིས་གསར་འགོད་པ་ཚོར་སྐད་ཆ་ཤོད་པའི་སྐབས་ ཨེ་མད་ཁ་ལི་ཕཱ་ནི། ཨིཛ་རཱ་ཡེལ་ནང་འཇིགས་བསྐུལ་རིང་ལུཌ་རྒྱུད་བསྐུལ་བྱེད་མཁན་ཡིན་པའི་སྐྱོན་བརྗོད་ཀྱི་འོག་ཨིཛ་རཱ་ཡེལ་གྱིས་ཉེན་རྟོག་པ་ཚོས་ཞིབ་འཇུག་བྱེད་བཞིན་པའི་པེ་ལིསྚིན་གྱི་མི་རིགས་བཞི་བརྒྱ་ཙམ་ཡོད་པ་ནས་གཅིག་ཡིན་པ་དང་། ཨིཛ་རཱ་ཡེལ་གྱིས་ཞིབ་འཇུག་བྱེད་བཞིན་པའི་མི་དེ་ཚོའི་ཁོངས་ནས་ཕྱེད་ཀ་ཙམ་ལ་ཁྲིམས་འགལ་གྱི་ནག་ཉེས་ཡོད་པའི་སྐྱོན་བརྗོད་ཀྱང་བྱས་ཡོད་འདུག
ཨེ་མད་ཁ་ལི་ཕས་གྲོང་ཁྱེར་ཨུམྨ་ཨལ་ཕ་ཧམགྱི་ཇ་ཁང་ཞིག་གི་ནང་གསར་འགོད་པ་ཚོར་སྐད་ཆ་ཤོད་པའི་སྐབས་ ཨིཛ་རཱ་ཡེལ་གྱིས་ང་ཚོར་ཡུལ་འདིའི་མི་སེར་ཞིག་ཡིན་པར་མ་རྩིས་པར་ང་ཚོར་དགྲ་བོར་བལྟ་གི་འདུག་ཅེས་བཤད་འདུག
ཨིཛ་རཱ་ཡེལ་དེ་སྔོན་ཕྱི་ལོ་༡༩༤༨ཀྱི་ལོར་ཇིའུ་མི་རིགས་ཀྱི་རྒྱལ་ཁབ་ཞིག་ཆགས་པའི་སྐབས་ས་གནས་དེར་པཻ་ལིསྚིན་ཡིན་པའི་ཁ་ཆེ་དང་ཡི་ཤུ་སྟོང་ཕྲག་མང་པོ་ལྷག་བསྡད་ཡོད་པ་རྣམས་ཕྱིས་སུ་ཨིཛ་རཱ་ཡེལ་གྱི་མི་སེར་ཆགས་ཏེ་དེང་སང་པེ་ལིསྚིན་དང་ཡི་ཤུའི་མི་རིགས་དེ་རྣམས་ཀྱི་མི་འབོར་དེ་ས་ཡ་གཉིས་ལྷག་ཙམ་ལོངས་ཀྱི་ཡོད་པ་དང་། ཨིཛ་རཱ་ཡེལ་གྱི་མི་སེར་ཡིན་པའི་པེ་ལིསྚིན་གྱི་མི་རིགས་དེ་རྣམས་ཀྱིས་གྷཱ་ཛ་དང་ནུབ་ཆུ་ཁའི་ཐོག་ཡོད་པའི་པཻ་ལིསྚིན་གྱི་མི་རིགས་ཚོ་དང་མཉམ་དུ་མི་རྒྱུད་གཅིག་གྱུར་དང་། རིག་གཞུང་གི་འབྲེལ་བ་མུ་མཐུད་རྒྱུན་འཛིན་བྱེད་ཀྱི་ཡོད་པ་རེད།
ཨིཛ་རཱ་ཡེལ་གྱི་བཤད་གསལ་ལ། ཡུལ་དེའི་ནང་ཡོད་པའི་པེ་ལིསྚིན་གྱི་མི་སེར་ཚོར་ཨིཛ་རཱ་ཡེལ་གྱི་མི་མང་སྤྱི་འགྲེ་སྤྱི་མཚུངས་བཞིན་འོས་བསྡུའི་ཐོབ་ཐང་འདྲ་མཉམ་ཡོད་པའི་ཐོག འཚོ་རྟེན་ལས་རིགས་མང་པོའི་ནང་པཻ་ལིསྚིན་མི་རིགས་ཚོས་ཐོབ་ཐང་འདྲ་མཉམ་གྱི་ཁེ་ཕན་ལོངས་སུ་སྤྱོད་ཀྱི་ཡོད་འདུག ཡིན་ན་ཡང་། པེ་ལིསྚིན་གྱི་མི་རིགས་ཚོས་ཁཽང་ཚོར་སྡོད་ཁང་དང་། འཚོ་རྟེན་གྱི་ལས་ཀའི་ཐོག་དབྱེ་འབྱེད་ཕྱོཌ་ལྷུངས་བྱས་ཏེ་ཁེ་ཕན་འདྲ་མཉམ་རག་གི་མེད་པའི་སྐྱོན་བརྗོད་བྱེད་ཀྱི་ཡོད་པའི་གནས་ཚུལ་ཐོན་འདུག