༄༅།། སྲིད་འཛིན་གཞོན་པ་ཀ་མ་ལ་ཧེ་རི་སིས་དམངས་གཙོ་ཚོགས་པའི་སྲིད་འཛིན་གཞོན་པའི་འོས་མི་དེར་མཱི་ནི་སོ་ཊ་མངའ་སྡེའི་སྤྱི་ཁྱབ་ཊིམ་ཝོལ་ཛི་(Tim Walz)་བདམས་ཡོད་ཅིང་། ད་ལོའི་ཕྱི་ཟླ་༡༡་པའི་སྲིད་འཛིན་འོས་བསྡུའི་སྐབས་སུ་སྤྱི་མཐུན་ཚོགས་པའི་སྲིད་འཛིན་འོས་མི་ཌོན་ནལ་ཊམ་དང་སྲིད་འཛིན་གཞོན་པའི་འོས་མི་ཇཱེ་ཌི་ཝན་སི་གཉིས་ལ་འགྲན་སྡུར་བྱས་ནས་འོས་བསྡུའི་དྲིལ་བསྒྲགས་ལས་འགུལ་སྤེལ་རྒྱུའི་ཐག་བཅད།།
དེ་རིང་གཟའ་མིག་དམར་གྱི་སྔ་དྲོར་ཧྥི་ལ་ཌལ་ཧྥི་ཡ་གྲོང་ཁྱེར་དུ་དམངས་གཙོ་ཚོགས་པའི་སྲིད་འཛིན་འོས་མི་ཀ་མ་ལ་ཧེ་རི་སིས་འོས་བསྡུའི་དྲིལ་བསྒྲགས་ལས་འགུལ་སྤེལ་བཞིན་པའི་སྐབས་སུ་སྲིད་འཛིན་གཞོན་པའི་འོས་མིའི་མིང་ཐོ་ཕྱིར་བསྒྲགས་བྱས་འདུག ཁོང་གིས་ངས་མཱི་ནི་སོ་ཊ་མངའ་སྡེའི་སྤྱི་ཁྱབ་ཊིམ་ཝོལ་ཛི་སྲིད་འཛིན་གཞོན་པའི་འོས་མིར་གདམ་རྒྱུའི་ཐག་གཅོད་བྱས་པ་ཡིན། ཊིམ་ནི་འཐབ་རྩོད་ཀྱི་ཉམས་མྱོང་ལྡན་པའི་དབུ་ཁྲིད་ཅིག་དང་མཱི་ནི་སོ་ཊ་མངའ་སྡེའི་ཁྱིམ་ཚང་ཁག་གི་མང་ཚོགས་ཀྱི་བདེ་སྡུག་ལ་གཟིགས་རྟོག་གནང་བའི་མཛད་རྗེས་གཟེངས་སུ་ཐོན་པ་སྟོན་རྒྱུ་ཡོད་པའི་མི་ཞིག་རེད། ཁོང་གིས་ང་ཚོའི་འོས་བསྡུའི་ལས་འགུལ་དང་སྲིད་འཛིན་གཞོན་པའི་ལས་གནས་སོགས་ལ་འགོ་ཁྲིད་ཀྱི་ནུས་པ་འདོན་ཐུབ་པའི་གདེང་ཚོད་ཡོད་ཅེས་རྒྱལ་སྐྱོར་བ་ཚོར་འཕྲིན་ཐུང་ཞིག་སྤྲིངས།།
མཱི་ནི་སོ་ཊ་མངའ་སྡེའི་སྤྱི་ཁྱབ་ཊིམ་ཝོལ་ཛི་དང་སྲིད་འཛིན་འོས་མི་ཧ་རེ་སི་རྣམ་གཉིས། ༢༠༢༤ ལོའི་ཟླ་གསུམ་པའི་ཚེས་༡༤ ཉིན།
ད་ལོའི་ཕྱི་ཟླ་༡༡་པའི་ནང་དུ་ཨ་མི་རི་ཀའི་མངའ་སྡེ་འགའ་ཞིག་གིས་སྲིད་འཛིན་འོས་མི་སུ་ལ་འོས་བསྡུའི་རྒྱལ་ཁ་ཐོབ་རྒྱུ་ཡིན་མིན་རྟིང་ཐག་གཅོད་རྒྱུ་ཡིན་ཞིང་། ཀ་མ་ལ་ཧེ་རི་སི་དང་དམངས་གཙོ་ཚོགས་པའི་འོས་བསྡུའི་ལས་འགུལ་བ་རྣམས་ཝི་སི་ཀོན་སན་དང་མཱི་ཆི་གྷན། ཨ་རི་ཛོ་ན་དང་ནེ་ཝ་ཌ་བཅས་སུ་ཕྱིན་ནས་འོས་བསྡུའི་དྲིལ་བསྒྲགས་ལས་འགུལ་སྤེལ་གྱི་ཡོད་པར་མ་ཟད། ཟླ་བ་སྔོན་མར་སྤྱི་མཐུན་ཚོགས་པའི་རྒྱས་འཛོམས་ཚོགས་ཆེན་ཚོགས་ནས་ཌོ་ནལ་ཊམ་གྱིས་གྲོས་ཚོགས་གོང་མའི་འཐུས་མི་ཇཱེ་ཌི་ཝན་སི་སྤྱི་མཐུན་ཚོགས་པའི་སྲིད་འཛིན་གཞོན་པའི་འོས་མིར་བདམས། གཟའ་འཁོར་འདིར་ཇཱེ་ཌི་ཝན་སི་ཨ་རིའི་རྩོད་ཡུལ་མངའ་སྡེ་ཁག་ཏུ་གྲགས་པའི་གྲས་ཀྱི་པེན་སིལ་ཝེ་ཎི་ཡ་དང་ཝི་སི་ཀོན་སན། མཱི་ཆི་གྷན་དང་བྱང་ཁེ་རོ་ལི་ན་བཞི་ལ་འོས་བསྡུའི་དྲིལ་བསྒྲགས་ལས་འགུལ་སྤེལ་དུ་སྐྱོད་ཀྱི་ཡོད་འདུག
ཟླ་བ་སྔོན་མར་ཇཱོ་བྷ་ཌན་གྱིས་ལས་དུས་གཉིས་པར་ལང་རྒྱུ་མིན་ཞེས་མི་རྣམས་ཧང་སང་དགོས་པའི་གསལ་བསྒྲགས་ཤིག་སྤེལ། ཁོང་དམངས་གཙོ་ཚོགས་པའི་སྲིད་འཛིན་འོས་མི་ནས་ཕྱིར་འཐེན་བྱས་པའི་རྗེས་སུ་ཀ་མ་ལ་ཧེ་རི་སི་དམངས་གཙོ་ཚོགས་པའི་སྲིད་འཛིན་འོས་མི་གཙོ་བོ་དེར་གྱུར། ཇཱོ་བྷ་ཌན་དམངས་གཙོ་ཚོགས་པའི་སྲིད་འཛིན་འོས་མི་ནས་ཕྱིར་འཐེན་བྱས་དོན་ནི་ཕྱི་ཟླ་༦་པའི་ཚེས་༩་ཉིན་སྲིད་འཛིན་ཟུར་པ་དང་སྤྱི་མཐུན་ཚོགས་པའི་སྲིད་འཛིན་འོས་མི་ཌོ་ནལ་ཊམ་དང་རྩོད་སྡུར་བྱས་ནས་ཡག་པོ་མ་བྱུང་བར་འབྲེལ་བ་འདུག་ཅེས་གསར་འགྱུར་ཐོན།།
ཨ་རིའི་གསར་འགྱུར་ལས་ཁང་ཁག་གིས་དམངས་གཙོ་ཚོགས་པའི་ནང་ཁུལ་དུ་ཇཱོ་བྷ་ཌན་དགུང་ལོ་བགྲེས་དྲགས་པ་དང་རྣམ་རིག་གསལ་པོ་མི་འདུག ཁོང་ངེས་པར་དུ་སྲིད་འཛིན་འོས་མི་ནས་ཕྱིར་འཐེན་བྱ་དགོས། གལ་སྲིད་ཇཱོ་བྷ་ཌན་མུ་མཐུད་དུ་སྲིད་འཛིན་འོས་མིར་ལངས་ཚེ། ཌོ་ནལ་ཊམ་ལ་སྲིད་འཛིན་འོས་བསྡུའི་རྒྱལ་ཁབ་ཐོབ་སྟེ་དམངས་གཙོ་ཚོགས་པར་གྲོས་ཚོགས་གོང་འོག་གཉིས་ཀའི་ནང་དུ་ཕམ་ཉེས་འབྱུང་ས་རེད་ཅེས་གནོན་ཤུགས་སྤྲད་ནས་ཕྱིར་འཐེན་བྱེད་དུ་བཅུག་པ་རེད་ཅེས་གནས་ཚུལ་ཐོན་འདུག