ཨ་རིའི་ནང་སྲིད་འཛིན་འོས་བསྡུ་བྱ་རྒྱུར་ཉིན་གྲངས་གཉིས་ལས་མེད་པའི་སྐབས་འདིར་སྲིད་འཛིན་འོས་མི་གཉིས་ཀས་བར་མཚམས་མེད་པར་གལ་ཆེའི་མངའ་སྡེ་ཁག་ལ་འོས་བསྡུའི་དྲིལ་བསྒྲགས་ཧུར་བསྐྱེད་ཆེན་པོས་བྱེད་ཀྱི་ཡོད་པ་མ་ཟད། འོས་མི་གཉིས་ཀས་ཕན་ཚུན་བསྙོན་འཛུགས་བྱེད་རེས་མུ་མཐུད་བྱེད་ཀྱི་ཡོད་པའི་སྐོར་རྣམ་རྒྱལ་ཤཱསྟྲཱིས་སྙན་སྒྲོན་ཞུ་ཡི་རེད།
མང་གཙོ་ཚོགས་པའི་སྲིད་འཛིན་འོས་མི་སྲིད་འཛིན་སྐུ་གཞོན་ཀ་མ་ལ་ཧ་རི་སི་དང་སྤྱི་མཐུན་ཚོགས་པའི་འོག་མི་སྲིད་འཛིན་ཟུར་པ་ཌོ་ནལ་ཌི་ཊམ་གཉིས་ཀྱིས་འོས་བསྡུའི་གྲུབ་འབྲས་ལ་འགྱུར་ལྡོག་ཆེ་བའི་མངའ་སྡེ་ཁག་གི་ནང་རྒྱབ་སྐྱོར་ཐོབ་ཐབས་ལ་མཐའ་མའི་འབད་བརྩོན་བྱེད་བཞིན་ཡོད་པ་དང་། དེ་ཡང་འོས་མི་གཉིས་ལ་འོས་བསྡུའི་ལས་འགུལ་བྱ་རྒྱུར་ཆུ་ཚོད་ ༤༨ ལས་མེད་པ་དང་། ད་ལམ་གྱི་འོས་བསྡུ་དེ་ཨ་རིའི་ལོ་རྒྱུས་ནང་གི་དམིགས་བསལ་འགྲན་རྩོད་ཆེ་བའི་སྲིད་འཛིན་འོས་བསྡུ་ཞིག་ལ་གྱུར་ཡོད་པ་རེད།
སྲིད་འཛིན་ཟུར་པ་ཊམ་གྱིས་པེན་སིལ་ཝེ་ནི་ཡ་རུ་དྲིལ་བསྒྲགས་འདུ་འཛོམས་ཀྱི་སར་བརྗོད་དོན"ང་ཚོའི་རྒྱལ་ཁབ་ཀྱི་མདུན་ལམ་ཁྱེད་ཚོའི་ལག་པར་ཡོད། གཟའ་མིག་དམར་ཉིན་ཁྱེད་ཚོས་ངེས་པར་དུ་ཡར་ལངས་དགོས།" ཞེས་གསུངས་པ་དང་ཆབས་ཅིག འོས་བསྡུའི་ནང་གཡོ་སྒྱུ་བྱས་པའི་སྐོར་ལ་རྒྱབ་རྟེན་མེད་པའི་ཉེས་འཛུགས་ཐེངས་གཉིས་པ་བྱས་འདུག
རེས་གཟའ་མིག་དམར་ཉིན་གྱི་དངོས་གཞིའི་འོས་བསྡུའི་དུས་ཚེས་ཀྱི་གོང་ད་བར་མི་གྲངས་ས་ཡ་ ༧༦ ལྷག་གིས་དུས་ཚོད་ཀྱི་སྔོན་དུ་འོས་ཤོས་འཕེན་ཟིན་འདུག་པ་དང་། ད་ཆ་འོས་བསྡུའི་འགྲན་རྩོད་མཐའ་མར་སླེབས་ཡོད་ཅིང་། དེ་སྔའི་འོས་བསྡུ་གང་ཞིག་དང་མི་འདྲ་བར་མངའ་སྡེ་མང་པོ་ཞིག་གི་ནང་འོས་བསྡུའི་སྐོར་བསམ་ཚུལ་བསྡུ་ལེན་བྱས་པའི་ནང་འོས་མི་གཉིས་ལ་རྒྱབ་སྐྱོར་བྱེད་མཁན་འདྲ་མཚུངས་ཡོང་གི་ཡོད་པ་རེད།
ད་ལོའི་སྲིད་འཛིན་འོས་བསྡུ་དེ་འགྲན་རྩོད་ཉེ་པོ་ཡོད་པ་དེ་ཧ་ཅང་ངོ་མཚར་ཆེན་པོ་ཡིན་པར་ངོས་འཛིན་བྱེད་ཀྱི་ཡོད་པ་དང་། དེའི་རྒྱུ་མཚན་ནི། འོས་བསྡུའི་ནང་གི་འགྱུར་ལྡོག་ཆེ་བ་དང་། འོས་མི་གཉིས་ཀྱི་ལས་འགུལ་བྱེད་སྟངས་དང་མ་འོངས་པའི་འཆར་སྣང་སོགས་ཧ་ལམ་མི་འདྲ་བ་ཡིན་པ་དེ་རེད་ཅེས་བརྗོད་ཀྱི་ཡོད་པ་རེད།
ནིའུ་ཡོག་ཀྲའིམྶ་ཡིས་མཐའ་མའི་བསམ་ཚུལ་བསྡུ་ལེན་བྱས་པའི་ནང་གལ་གནད་ཆེ་བའི་མངའ་སྡེ་ཁག་གི་ནང་མང་ཚོགས་ཀྱི་བློ་འདོད་ལ་འགྱུར་བ་ཕྲན་བུ་བྱུང་ཡོད་པ་གསལ་འདོན་བྱས་འདུག་ཀྱང་། མངའ་སྡེ་བདུན་ཆ་ཚང་གི་གྲུབ་འབྲས་དེ་ཕྱོགས་གང་ལའང་འགྲོ་སྲིད་པའི་ཚད་གཞིའི་ནང་གནས་ཡོད་པ་རེད།
མང་གཙོ་ཚོགས་པའི་སྲིད་འཛིན་འོས་མི་སྲིད་འཛིན་སྐུ་གཞོན་ཀ་མ་ལ་ ཧེ་རིས་ལ་མི་ཤིན་གྷན་མངའ་སྡེ་ནས་འོས་ཤོག་ཐོབ་རྒྱུ་མེད་དུ་མི་རུང་བར་བརྩིས་ནས་མངའ་སྡེའི་རྒྱལ་ས་ཌེ་ཊོ་རོ་ཡི་ཊི་ནས་འགོ་བཙུགས་ཏེ་པོན་ཊི་ཡག་ཅེས་པའི་གྲོང་ཁྱེར་བར་སྤྱི་སྤྱོད་རླང་འཁོར་ནང་བསྐོར་སྐྱོད་བྱས་རྗེས་དགོང་དྲོ་མི་ཤི་གྷན་མངའ་སྡེའི་གཙུག་ལག་སློབ་གྲྭ་ཆེན་མོར་དྲིལ་བསྒྲགས་གཏམ་བཤད་ཀྱི་འདུ་འཛོམས་བྱ་རྒྱུའི་ཆེད་དུ་ཉིན་གང་མི་ཤི་གྷན་མངའ་སྡེའི་ནང་བཏང་འདུག ལྕམ་ཀ་མ་ལ་ ཧེ་རིས་ཡིས་འོས་བསྡུའི་དྲིལ་བསྒྲགས་ལས་འགུལ་སྐབས་གསུངས་དོན་ལ་ ཁོང་ནས་སྦྲགས་ཟམ་བརྒྱུད་འོས་ཤོག་འཕེན་ཟིན་པ་ཡིན་ཞེས་གསུངས་འདུག་པ་དང་། ཁོང་ཀལ་ཕོར་ནི་ཡ་མངའ་སྡེ་ནས་ཡིན་སྟབས་རེས་གཟའ་མིག་དམར་ཉིན་དངོས་སུ་ཕེབས་ཐབས་མེད་པར་བརྟེན་སྦྲགས་ཟམ་བརྒྱུད་འོས་ཤོག་འཕེན་ཡོད་པ་རེད།
སྲིད་འཛིན་ཟུར་པ་ཊམ་གྱིས་གཟའ་ཉི་མའི་ཉིན་པེན་སིལ་ཝེ་ནི་ཡ་དང་། བྱང་ཀ་རོ་ལི་ན། ཇོར་ཇི་ཡ་བཅས་ལ་གཙོ་བོར་དམིགས་ནས་འོས་བསྡུའི་དྲིལ་བསྒྲགས་ཚོགས་འཛོམས་གནང་ཡོད་པ་དང་། དེ་དག་ནི་མངའ་སྡེའི་མི་འབོར་ལ་གཞིགས་པའི་ཤུགས་རྐྱེན་སྤྲོད་ཐུབ་པའི་"འོས་བསྡུའི་འཐུས་མི་ཚོགས་ཆུང་"ལམ་ལུགས་ཀྱི་ནང་ཤུགས་རྐྱེན་སྤྲོད་ཐུབ་པའི་མངའ་སྡེ་གསུམ་ཡིན།
ལོ་བཞིའི་གོང་བྱས་པ་བཞིན་སྲིད་འཛིན་ཟུར་པ་ཊམ་གྱིས་ད་ལོའི་འོས་བསྡུའི་ནང་ཕམ་ཉེས་བྱུང་ན་འོས་བསྡུའི་གྲུབ་འབྲས་ལ་ངོས་ལེན་བྱེད་རྩིས་མེད་པའི་ཚོད་དཔག་བྱེད་ཀྱི་འདུག་པ་དང་། རེས་གཟའ་ཉི་མའི་ཉིན་འོས་བསྡུའི་ལས་བྱེད་ཚོས་སྒྲིག་འགལ་ཆུང་ཚགས་བྱས་པའི་གནས་ཚུལ་བྱུང་བ་དེ་སྲིད་འཛིན་ཟུར་པ་ཊམ་ལ་འོས་བསྡུའི་ནང་ཡོངས་ཁྱབ་ཏུ་གཡོ་སྒྱུ་ཡོད་པའི་ཉེས་འཛུགས་ཤུགས་ཆེ་རུ་གཏང་རྒྱུར་གོ་སྐབས་བྱུང་ཡོད་པ་རེད།
པོར་ཏོ་རི་ཀན་སྤྱི་ཚོགས་ཆེན་པོ་ཡོད་པའི་པེན་སིལ་ཝེ་ནི་ཡ་མངའ་སྡེ་དེ་སྤྱི་མཐུན་ཚོགས་པར་གནོད་སྐྱོན་ཆེན་པོ་བྱེད་སྲིད་པར་བརྟེན་སྤྱི་མཐུན་ཚོགས་པས་ཚོད་འཛིན་བྱ་རྒྱུར་འབད་བརྩོན་བྱེད་བཞིན་ཡོད། ཊམ་གྱི་ནིའུ་ཡོག་གི་འདུ་འཛོམས་སུ་གཏམ་བཤད་པ་ཞིག་གིས་ཨ་རིའི་མངའ་ཁོངས་དེ་"གད་སྙིགས་ཀྱིས་ཁེངས་པའི་གླིང་ཕྲན་"རེད་ཅེས་བཤད་པ་དེས་པོར་ཏོ་རི་ཁོའི་སྤྱི་ཚོགས་ལ་ཁོང་ཁྲོ་ཆེན་པོ་སླང་ཡོད་པ་རེད།
པེན་སིལ་ཝེ་ནི་ཡ་ནང་བཞིན་མི་ཤི་གྷན་མངའ་སྡེ་ཡང་དམིགས་སུ་བཀར་ནས་དོ་སྣང་བྱེད་དགོས་པའི་འཐབ་རའི་ས་ཁུལ་བདུན་གྱི་ཁོངས་སུ་གཏོགས་ཡིན་པ་དང་། ཊམ་གྱིས་ ༢༠༡༦ ལོར་ཧི་ལ་རི་ཁི་ལིན་ཊོན་ལ་ཕམ་ཉེས་བཏང་རྗེས་དེ་སྔ་མང་གཙོ་ཚོགས་པའི་རྟེན་གཞི་ཡིན་པ་དེ་ལ་བསྒྱུར་བ་བཏང་ཡོད་ནའང་། ༢༠༢༠ ལོར་ཇོ་བྷའི་ཌེན་ལ་མངའ་སྡེ་དེ་ནས་རྒྱལ་ཁ་ཐོབ་རྗེས་སླར་ཡང་གཙོ་ཚོགས་པའི་གྲལ་དུ་ཕྱིར་ལོག་བྱས་ཡོད་པ་དེ་ནི་ལས་མིའི་མཉམ་འབྲེལ་ཚོགས་པ་དང་མི་རིགས་ནག་པོའི་སྤྱི་ཚོགས་ཆེན་པོ་ཞིག་གིས་རྒྱབ་སྐྱོར་བྱས་པ་ལས་བྱུང་ཡོད།
འོན་ཀྱང་ཐེངས་འདིར་་ཨི་སི་རལ་དང་ཧ་མས་བར་གྱི་དམག་འཁྲུག་ལ་བྷའི་ཌེན་སྲིད་གཞུང་གིས་གདོང་ལེན་བྱེད་ཕྱོགས་ལ་སྐྱོན་བརྗོད་བྱས་ནས་ཨ་རབ་མི་རིགས་ཀྱི་སྤྱི་ཚོགས་ཀྱི་མི་གྲངས་འབུམ་གཉིས་ཙམ་ཡོད་པ་དེའི་འོས་ཤོག་ལྕམ་ཧེ་རིས་ནས་ཤོར་ཉེན་ཡོད་པ་རེད།
བསམ་ཚུལ་བསྡུ་ལེན་པ་ཚོས་མང་གཙོ་ཚོགས་པའི་འོས་ཤོག་ལ་ནག་པོའི་རྒྱབ་སྐྱོར་ཉམས་ཆག་འགྲོ་བཞིན་པར་ངོས་འཛིན་བྱས་ཡོད་ལ། ཧ་རི་སིའི་ལས་རོགས་ཚོས་ཀྱང་ ༢༠༢༠ ལོར་བྷའི་ཌེན་ལ་ཐོབ་པའི་རྒྱལ་ཁ་དང་མཚུངས་པའི་ཨ་ཕི་རི་ཀའི་སྐྱེས་པ་ཕོའི་རྒྱབ་སྐྱོར་འདང་ངེས་ཤིག་འཐོན་ཐུབ་པ་བཟོ་རྒྱུར་ད་དུང་ལས་ཀ་བྱེད་དགོས་ཀྱི་ཡོད་པ་ཁས་ལེན་བྱེད་ཀྱི་ཡོད།
འོན་ཀྱང་སྐྱེ་འཕེལ་གྱི་ཐོབ་ཐང་ནི་འོས་འཕེན་པའི་སེམས་འཚབ་ཆེ་ཤོས་སུ་འགྱུར་ཡོད་པ་བཞིན་པ། ལྕམཀ་མ་ལ་ ཧེ་རིས་འོས་བསྡུའི་ལས་འགུལ་ཚོགས་པས་འོས་བསྡུའི་དུས་ཚེས་ཀྱི་གོང་འོས་འཕེན་མཁན་ཚོའི་ཁྲོད་ནས་བུད་མེད་ཀྱི་སྡེ་ཚན་ཆེན་པོ་ཞིག་ཡོད་པ་དེས་སེམས་ཤུགས་འཕར་མ་བསྐྱེད་ཀྱི་ཡོད་རེད་ཅེས་སྲིད་དོན་དབྱེ་ཞིབ་པ་ཚོས་འགྲེལ་བརྗོད་བྱེད་ཀྱི་ཡོད་པ་རེད།