༄༅།། སྲིད་འཛིན་ཟུར་པ་ཌོ་ནལ་ཊམ་ཨ་མི་རི་ཀའི་སྲིད་འཛིན་༤༧་པར་འདེམས་ཐོན་བྱུང་བར་འཛམ་གླིང་རྒྱལ་ཁབ་ཁག་གི་འགོ་ཁྲིད་ཚོས་རྟེན་འབྲེལ་ཞུས། ཕྱི་ཟླ་༦་པའི་ཚེས་༦་ཉིན་སི་བི་ཨེ་སི་གསར་ཁང་གིས་གནས་ཚུལ་སྤེལ་བ་ལྟར་ན། ཨི་སི་རལ་གྱི་སྲིད་བློན་ནེ་ཐན་ཡ་ཧུས་(Netanyahu)་ཌོ་ནལ་ཊམ་ལ་འོས་བསྡུའི་རྒྱལ་ཁ་ཐོབ་པ་ནི་ལོ་རྒྱུས་ཀྱི་རྒྱལ་ཁ་ཆེན་པོ་ཞིག་རེད། སྐུ་ཉིད་བསྐྱར་དུ་ཕོ་བྲང་དཀར་པོར་ཕེབས་ནས་ཨ་རི་དང་ཨི་སི་རལ་གྱི་མཛའ་འབྲེལ་གོང་འཕེལ་དང་སྲ་བརྟན་གཏོང་རྒྱུའི་རེ་བ་ཡོད་ཅེས་བསྔགས་བརྗོད་ཀྱི་མེ་ཏོག་གཏོར། སྲིད་འཛིན་བྷ་ཌན་དང་སྲིད་བློན་ནེ་ཐན་ཡ་ཧུ་གཉིས་འབྲེལ་བ་ཡག་པོ་མ་བྱུང་བར་སེམས་ཐག་རིང་དུ་སོང་། ཌོ་ནལ་ཊམ་གྱིས་གྷ་ཛའི་དམག་འཁྲུག་ཡག་པོ་ཡོང་གི་མི་འདུག་ཅེས་སྲིད་བློན་ནེ་ཐན་ཡ་ཧུར་སྐྱོན་བརྗོད་བྱས་ཀྱང་ཨི་རི་སལ་གྱི་འགོ་ཁྲིད་དེས་ཨ་རིའི་སྲིད་འཛིན་ཟུར་པ་ཌོ་ནལ་ཊམ་ལ་སླར་ཡང་འོས་བསྡུའི་རྒྱལ་ཁ་ཐོབ་རྒྱུའི་རེ་ལྟོས་བཅངས་པར་དོན་འབྲས་སོན།།
ཡུ་རོབ་རྒྱལ་ཁབ་ཧང་གྷ་རིའི་སྲིད་བློན་ཝིཀ་ཊོར་ཨོར་བྷན་
ཡུ་རོབ་རྒྱལ་ཁབ་ཧང་གྷ་རིའི་སྲིད་བློན་ཝིཀ་ཊོར་ཨོར་བྷན་(Victor Orban)་གྱིས་ཌོ་ནལ་ཊམ་ལ་རྒྱལ་ཁ་ཐོབ་པ་ནི་ཨ་རིའི་ཆབ་སྲིད་ཀྱི་ལོ་རྒྱུས་ནང་དུ་བྱུང་མྱོང་མེད་པའི་རྒྱལ་ཁ་ཞིག་རེད། ངས་སྤྲོ་སེམས་རབ་ཏུ་འཁོལ་ནས་སྐུ་ཉིད་ལ་རྟེན་འབྲེལ་ཞུ་རྒྱུ་ཡིན་ཞེས་ཨེཀ་སི་དྲྭ་ཚིགས་སུ་འཕྲིན་ཐུང་ཞིག་སྤེལ། སྲིད་བློན་ཨོར་བྷན་གྱིས་ཌོ་ནལ་ཊམ་དང་འདྲ་བར་ཕྱི་མི་གཞིས་ཆགས་པ་ཚོར་སྡང་ཟུག་དང་ར་ཤི་ཡའི་སྲིད་འཛིན་ཕུ་ཊིན་ལ་འབྲེལ་བ་དམ་ཟབ་བཙུགས། ཡུ་རོབ་མཉམ་འབྲེལ་གྱིས་ཡུཀ་རེན་ལ་རྒྱབ་སྐྱོར་བྱེད་ཀྱི་ཡོད་པ་འགོག་ཐབས་ཀྱི་སྲིད་ཇུས་ཁག་ལག་ལེན་བསྟར། སྲིད་བློན་ཨོར་བྷན་གྱི་སྲིད་ཇུས་མང་ཆེ་བ་ཡུ་རོབ་མཉམ་འབྲེལ་གྱི་ལྟ་བ་དང་ལངས་ཕྱོགས་ལ་རྒྱབ་འགལ་བྱུང་སྟེ་ཁོ་པ་ཡུ་རོབ་རྒྱལ་ཁབ་ཁག་གི་འགོ་ཁྲིད་ཚོའི་གྲས་སུ་ཕོ་རོག་དཀར་པོ་ལྟར་དུ་གྱུར། ཨོར་བྷན་གྱིས་ཌོ་ནལ་ཊམ་ནི་ཨ་རི་གཅིག་པུ་མིན་པར་འཛམ་གླིང་གི་རླབས་ཆེན་དབུ་ཁྲིད་ཅིག་རེད་ཅེས་བསྟོད་པ་འཐེན་ནས་ཌོ་ནལ་ཊམ་ཤིན་ཏུ་དགའ།།
ར་ཤི་ཡའི་སྲིད་འཛིན་ཟུར་པ་དང་ཕུ་ཊིན་གྱི་བློས་ཐུབ་གྲོགས་པོ་མེ་ཌ་ཝེ་ཌེབ་
ར་ཤི་ཡའི་སྲིད་འཛིན་ཟུར་པ་དང་ཕུ་ཊིན་གྱི་བློས་ཐུབ་གྲོགས་པོ་མེ་ཌ་ཝེ་ཌེབ་(Dmitry Medvedev)་ཀྱིས་ཨ་རིའི་འོས་བསྡུའི་གྲུབ་འབྲས་ལ་གཞིགས་ན་ར་ཤི་ཡས་ཁྱིམ་མཚེས་རྒྱལ་ཁབ་ཡུཀ་རེན་ལ་དམག་འཁྲུག་རྒྱག་གི་ཡོད་པར་ཕན་ཐོགས་འབྱུང་སྲིད་ཅེས་འཕྲིན་ཐུང་ཞིག་སྤེལ། མེ་ཌ་ཝེ་ཌེབ་ཀྱིས་ཐད་ཀར་ཌོ་ནལ་ཊམ་ལ་འོས་བསྡུའི་རྒྱལ་ཁ་ཐོབ་པར་རྟེན་འབྲེལ་མ་ཞུས་ཀྱང་ཨ་རིའི་གྲོས་ཚོགས་སུ་སྲིད་དོན་ཚོགས་པ་གཉིས་ཀས་ར་ཤི་ཡ་དགྲ་རུ་འཛིན་པའི་སྟོབས་ཤུགས་ཆེན་པོ་འདུག ཡིན་ནའང་ཌོ་ནལ་ཊམ་གྱི་ཁྱད་ཆོས་དེ་ང་ཚོར་ཕན་ཐོགས་ཡོད། ཁོང་ནི་བླུན་རྨོངས་མཐུན་གྲོགས་ཚོའི་དོན་དུ་དངུལ་སྒོར་འགྲོ་གྲོན་གཏོང་མཁན་ཞིག་མ་རེད་ཅེས་བཀྲལ། སྲིད་འཛིན་ཕུ་ཊིན་གྱི་ནང་ཚགས་ར་ཤི་ཡའི་སྲིད་དོན་པ་དང་ཚོང་པ། གྲོས་ཚོགས་འཐུས་མི་སོགས་ཀྱིས་ཌོ་ནལ་ཊམ་ཨ་རིའི་སྲིད་འཛིན་ལ་འདེམས་ཐོན་བྱུང་སྟེ་ཕྱོགས་གཉིས་ཀྱི་འབྲེལ་བ་ཡག་ཏུ་འགྲོ་རྒྱུའི་རེ་ལྟོས་འཆང་ཡོད་པའི་གནས་ཚུལ་ཐོན་འདུག
ཡུཀ་རེན་གྱི་སྲིད་འཛིན་ཛེ་ལན་སི་ཀིས་་སྲིད་འཛིན་ཊམ་
ཕྱི་ཟླ་༡༡་པའི་ཚེས་༦་ཉིན་རོ་ཡེ་ཊར་སི་གསར་ཁང་གིས་གནས་ཚུལ་སྤེལ་བ་ལྟར་ན། ཡུཀ་རེན་གྱི་སྲིད་འཛིན་ཛེ་ལན་སི་ཀིས་(Zelenskiy)་སྲིད་འཛིན་ཊམ་གྱིས་སྟོབས་ཤུགས་བཀོལ་ནས་འཛམ་གླིང་ལ་ཞི་བདེ་བསྐྲུན་རྒྱུའི་ཆོད་སེམས་བཙུགས་ཡོད་པར་རྗེས་སུ་ཡི་རང་ཡོད། འདི་ནི་ཡུཀ་རེན་ལ་དོན་དམ་གྱི་ཞི་བདེ་བསྐྲུན་ཐབས་འབའ་ཞིག་རེད་ཅེས་ཨེཀ་སི་དྲྭ་ཚིགས་སུ་འཕྲིན་ཐུང་ཞིག་སྤེལ། ཡུ་རོབ་མཉམ་འབྲེལ་གྱི་གཙོ་འཛིན་ཨུར་སུ་ལཱ་ཝོན་ཌར་ལེན་(Ursula von der Leyen)་གྱིས་ཌོ་ནལ་ཊམ་ལ་འོས་བསྡུའི་རྒྱལ་ཁ་ཐོབ་པར་བཀྲ་ཤིས་བདེ་ལེགས་ཀྱི་འཚམས་འདྲི་རྒྱུ་ཡིན། ཡུ་རོབ་དང་ཨ་རི་གཉིས་མཉམ་འབྲེལ་བྱས་ནས་ནུབ་རྒྱ་མཚོ་ཆེན་མོའི་ཕ་རོལ་ཚུ་རོལ་གྱི་འབྲེལ་བ་སྲ་བརྟན་གཏོང་དགོས། ཨ་རི་དང་ཡུ་རོབ་མཉམ་འབྲེལ་ལ་མི་དམངས་དུང་ཕྱུར་༨་ཡོད་པ་རྣམས་མཛའ་འབྲེལ་གྱིས་བཅིངས་ཡོད། ང་ཚོས་ལས་དོན་མཉམ་སྒྲུབ་བྱས་ནས་ཕྱོགས་གཉིས་ཀྱི་སྤྱི་དམངས་ཚོའི་རེ་བ་བསྐང་དགོས་ཞེས་ནན་གྱིས་བསྐུལ།།
དབྱིན་ཇིའི་སྲིད་བློན་སི་ཊར་མེར་
དབྱིན་ཇིའི་སྲིད་བློན་སི་ཊར་མེར་(Keir Starmer)་གྱིས་ཌོ་ནལ་ཊམ་ལ་ལོ་རྒྱུས་ཀྱི་དོན་སྙིང་ལྡན་པའི་འོས་བསྡུའི་རྒྱལ་ཁ་ཐོབ་པར་རྟེན་འབྲེལ་ཞུ་རྒྱུ་ཡིན། ཨ་དབྱིན་རྒྱལ་ཁབ་གཉིས་ཀྱི་ཐུན་མོང་མ་ཡིན་པའི་འབྲེལ་བ་རྒྱུན་འཁྱོངས་དང་མ་འོངས་པའི་ལོ་ཟླའི་ནང་དུ་མཉམ་ལས་བྱེད་ཐུབ་པའི་རེ་བ་ཡོད། ང་ཚོ་མཐུན་གྲོགས་ཡིན་པའི་སྟབས་ཀྱིས་རང་དབང་དང་དམངས་གཙོ། ཁེ་ལས་དང་ལྟ་གྲུབ་རྣམས་སྲུང་སྐྱོབ་བྱེད་པར་འགན་འཁྲི་ལེན་དགོས་ཞེས་བསྒྲགས། ཧྥ་རན་སིའི་སྲིད་འཛིན་མེཀ་རོན་(Macron)་གྱིས་ཌོ་ནལ་ཊམ་ལ་འོས་བསྡུའི་རྒྱལ་ཁ་ཐོབ་པར་འཚམས་འདྲི་དང་རྟེན་འབྲེལ་ཞུ་རྒྱུ་ཡིན། ཧྥ་རན་སིའི་གཞུང་ལ་ལས་དོན་མཉམ་སྒྲུབ་བྱ་རྒྱུའི་གྲ་སྒྲིག་ཡོད་ཅེས་འཕྲིན་ཐུང་ཞིག་སྤེལ། ཡིན་ནའང་ཕྱིས་སུ་སྲིད་འཛིན་མེཀ་རོན་དང་འཇར་མན་གྱི་སྲིད་བློན་ཨོ་ལཱབ་ཤོལ་ཛི་(Olaf Sholz)་གཉིས་ཀྱིས་ཨ་མི་རི་ཀར་མཉམ་འབྲེལ་བྱས་ནས་ཡུ་རོབ་སྔར་ལས་རྡོག་རྩ་གཅིག་སྒྲིལ་དང་བདག་དབང་སྲ་བརྟན། རང་གི་ཁེ་ཕན་དང་ལྟ་གྲུབ་སྲུང་སྐྱོབ་བྱེད་ཐུབ་པ་ཞིག་ཏུ་བསྒྱུར་རྒྱུ་ཡིན་ཞེས་ཟུང་འབྲེལ་འཕྲིན་ཐུང་ཞིག་སྤེལ།།
ནུབ་ཆིངས་ཀྱི་སྤྱི་ཁྱབ་དྲུང་ཆེ་གསར་པ་རུ་ཐེས་(Mark Rutte)་ངས་ཌོ་ནལ་ཊམ་ལ་འོས་བསྡུའི་རྒྱལ་ཁ་ཐོབ་པར་རྟེན་འབྲེལ་ཞུས་ཟིན། ནུབ་ཆིངས་ཀྱི་སྟོབས་ཤུགས་རྒྱུན་འཁྱོངས་བྱེད་པར་ཌོ་ནལ་ཊམ་གྱི་ལམ་སྟོན་དབུ་ཁྲིད་གནད་འགག་ཆེན་པོ་ཡིན། ང་ཚོས་སྟོབས་ཤུགས་བཀོལ་ནས་ཞི་བདེ་བསྐྲུན་དགོས། ངས་ཌོ་ནལ་ཊམ་གྱི་ལྷན་དུ་ལས་དོན་མཉམ་སྒྲུབ་བྱ་རྒྱུར་ངང་སྒྲུག་བྱེད་བཞིན་ཡོད་ཅེས་འཕྲིན་ཐུང་ཞིག་སྤེལ། ཌོ་ནལ་ཊམ་གྱིས་ཡུ་རོབ་རྒྱལ་ཁབ་ཁག་གིས་དམག་དོན་འགྲོ་གྲོན་གཏོང་གི་མི་འདུག ཨ་མི་རི་ཀས་ཡུ་རོབ་ཀྱི་བདེ་འཇགས་སྲུང་སྐྱོབ་བྱེད་ཐུབ་རྒྱུ་ཁག་པོ་རེད་ཅེས་བཤད་མྱོང་ཡོད་པར་མ་ཟད། ༢༠༢༤་ལོའི་འོས་བསྡུའི་དྲིལ་བསྒྲགས་སུའང་ཡུ་རོབ་རྒྱལ་ཁབ་ཁག་གིས་དམག་དོན་འགྲོ་གྲོན་གཏང་རྒྱུ་མང་དུ་གཏོང་དགོས་ཞེས་ནན་གྱིས་བརྗོད། ཌོ་ནལ་ཊམ་གྱི་ལས་དུས་དང་པོའི་སྐབས་སུ་ཨ་མི་རི་ཀ་ནུབ་ཆིངས་ཁོངས་ནས་ཕྱིར་འཐེན་བྱ་སྲིད་ཅེས་ནུབ་ཕྱོགས་རྒྱལ་ཁབ་ཁག་ལ་གནོན་ཤུགས་སྤྲད།།
ཕྱི་ཟླ་༡༡་པའི་ཚེས་༦་ཉིན་གཏམ་གླེང་གསར་ཁང་གིས་གནས་ཚུལ་སྤེལ་བ་ལྟར་ན། ཌོ་ནལ་ཊམ་ལ་སྲིད་འཛིན་འོས་འདེམས་དང་སྤྱི་མཐུན་ཚོགས་པར་གྲོས་ཚོགས་གོང་མའི་ནང་དུ་འཐུས་མི་གྲངས་མང་གི་གདན་གྲངས་ཐོབ། ད་དུང་གྲོས་ཚོགས་འོག་མའི་ནང་དུའང་སྤྱི་མཐུན་ཚོགས་པར་འཐུས་མི་གྲངས་མང་ཐོབ་རྒྱུའི་རྟགས་མཚན་མངོན། ནོ་ཌལ་ཊམ་གྱིས་ཡུཀ་རེན་ལ་གནོན་ཤུགས་སྤྲད་ནས་ར་ཤི་ཡས་ཕྲོགས་ཟིན་པའི་ས་ཆ་རྣམས་བློས་བཏང་སྟེ་དམག་འཁྲུག་མཚམས་འཇོག་བྱེད་དུ་བཅུག དེ་བཞིན་ར་ཤི་ཡའི་སྲིད་འཛིན་ཕུ་ཊིན་གྱིས་ཡུཀ་རེན་ནུབ་ཆིངས་ཁོངས་སུ་ཞུགས་མི་ཆོག་ཅེས་ཆ་རྐྱེན་བཏོན་པར་མོས་མཐུན་བྱས་ནས་དམག་འཁྲུག་མཚམས་འཇོག་བྱེད་དུ་འཇུག་སྲིད། ཌོ་ནལ་ཊམ་དང་ར་ཤི་ཡའི་སྲིད་འཛིན་ཕུ་ཊིན་གཉིས་འབྲེལ་བ་བཟང་པོ་ཡོད་པས་ཝ་ཤིང་ཊོན་དང་མོ་སི་ཀོའི་འབྲེལ་བ་ཡག་ཏུ་འགྲོ་རྒྱུའི་གོ་སྐབས་འབྱུང་སྲིད།།
ཌོ་ནལ་ཊམ་གྱི་ལས་དུས་གཉིས་པ་འདིར་ཨ་མི་རི་ཀས་རྒྱ་ནག་གི་དངོས་ཟོག་ལ་སྒོ་ཁྲལ་སྤར་སྲིད་ཀྱང་ཞིས་ཅིན་ཕིང་ལ་ནང་ཚོང་བརྒྱབ་ནས་རྒྱ་ནག་ལ་ནང་འགྲིག་བྱེད་མི་སྲིད་པའི་ངེས་པ་མེད། ཌོ་ནལ་ཊམ་གྱིས་བཅར་འདྲི་ཞིག་གི་སྐབས་སུ་ཨ་མི་རི་ཀས་ཐེ་ཝན་ལ་སྲུང་སྐྱོབ་བྱ་དགོས་ཚེ། ཐེ་ཝན་གྱིས་ཨ་མི་རི་ཀར་སྲུང་སྐྱོབ་གླ་ཡོན་སྤྲོད་དགོས་ཞེས་བཤད་མྱོང་ཡོད་པས་མཚོ་གླིང་དེར་སྔར་བཞིན་ཨ་མི་རི་ཀས་སྲུང་སྐྱོབ་བྱ་རྒྱུ་ཡིན་མིན་ངེས་གཏན་བྲལ། ཌོ་ནལ་ཊམ་གྱི་ལས་དུས་གཉིས་པའི་སྐབས་སུ་ཧྥི་ལི་ཕིན་དང་ལྷོ་ཀོ་རི་ཡ། ཉི་ཧོང་བཅས་ཀྱི་བདེ་འཇགས་སྲུང་སྐྱོབ་ལ་ཉེན་ཁ་འཕྲད་སྲིད། ལོ་རྗེས་མར་ཌོ་ནལ་ཊམ་ཕོ་བྲང་དཀར་པོར་ཕྱིར་ལོག་བྱས་པའི་རྗེས་སུ་བྱང་ཀོ་རི་ཡར་འབྲེལ་བ་གང་འདྲ་ཞིག་འཛིན་རྒྱུ་ཡིན་མིན་བཤད་དཀའ། ར་ཤི་ཡས་བར་འདུམ་བྱས་ནས་ཨ་མི་རི་ཀས་བྱང་ཀོ་རི་ཡ་རྡུལ་ཕྲན་མཚོན་ཆའི་སྟོབས་ཤུགས་ལྡན་པའི་རྒྱལ་ཁབ་ཅིག་ལ་ངོས་འཛིན་བྱེད་དུ་འཇུག་སྲིད་ཅེས་གནས་ཚུལ་སྤེལ་འདུག