༄༅། ཤར་ཡུ་རོབ་རྒྱལ་ཁབ་འཇོ་ཇི་ཡའི་སྲིད་འཛིན་ལྕམ་ཛུ་ར། བྷི་ཆི་ཝི་ལི་ཡིས་གཟའ་ཟླ་བའི་ཉིན་ཡུ་རོབ་རྒྱལ་ཁབ་ཁག་གིས་ཁོང་གི་ཡུལ་དེ་ཨུ་རུ་སུའི་ཤུགས་རྐྱེན་འོག་མ་ཚུད་པ་བྱེད་ཐབས་ནང་རྒྱབ་བསྐྱོར་གནང་རོགས་ཅེས་སྐུལ་མ་ཞུས་གནང་འདུག་པས་ ཁོང་གི་གནང་ཕྱོགས་དེ་ནི་འཇོ་ཇི་ཡ་རྨི་ལམ་ཚོགས་པས་འཛིན་སྐྱོང་བྱེད་བཞིན་པའི་རང་གཞུང་དེའི་བྱ་སྤྱོད་དང་སྲིད་ཇུས་དང་མི་མཐུན་པ་ཞིག་ཆགས་ཡོད་པ་རེད། ཡང་ཁོང་གི་རེ་སྐུལ་དེ་ནི་འདས་པའི་ཚན་བཞི་བསྟུད་མར་ འཇོ་ཇི་ཡའི་ཕྱོགས་འགལ་ཚོགས་པས་སྣེ་ཁྲིད་དེ་མི་མང་སྟོང་ཚོ་མང་པོས་རང་གཞུང་གི་གྲོས་ཚོགས་མདུན་སར་འཛོམས་ནས་ངོ་རྒོལ་རྒྱུན་མ་ཆད་པ་ཞིག་བྱས་པ་དང་དུས་མཚུངས་གནང་བ་ཞིག་ཆགས་ཀྱི་ཡོད་པ་རེད། མི་མང་དེ་དག་གིས་འཇོ་ཇི་ཡའི་གཞུང་ལ་ངོ་རྒོལ་བྱེད་བའི་རྒྱུ་མཚན་དེ་ནི་གཞུང་དེ་ཡིས་འཇོ་ཇི་ཡ་ཡུ་རོབ་མཉམ་སྦྲེལ་མཐུན་ཚོགས་ཀྱི་ཚོགས་མིར་འཛུལ་ཞུགས་བྱེད་ཕྱོགས་ཀྱི་གྲོས་མོལ་ཁག་རེ་ཞིག་རིང་བར་མཚམས་བཞག་པ་དེ་ཡིན་པ་རེད།
གཞུང་གི་གནང་ཕྱོགས་དེར་མི་མང་སྟོང་ཚོ་མང་པོས་གཟའ་སྤེན་པ་ནས་འགོ་འཛུགས་ཏེ་ཡུལ་གྱི་རྒྱལ་ས་ཏ་སྦི་ལི་སི་ནང་རྟེན་གཞི་བྱས་པའི་གྲོས་ཚོགས་ཀྱི་མདུན་སར་ངོ་རྒོལ་རྣོ་ངར་ལྡན་པའི་རིགས་བྱས་པ་མ་ཟད་ ངོ་རྒོལ་བ་ཁག་ཅིག་གིས་ཚན་གང་དེར་བསྡད་ནས་ཉེན་རྡོག་པར་བྲག་རྡོ་ཞུས་པ་དང་དངོས་རྗས་ཁག་ཅིག་མེ་བསྲེགས་བཏང་བ་སོགས་བྱས་པར་ཉེན་རྡོག་པས་ངོ་རྒོལ་ལས་འགུལ་བའི་ཐོག་ཆུ་མདའ་རྒྱབ་པ་དང་མི་ཆུ་ཐོན་ཆེད་ཀྱི་དུག་རླང་ཕངས་པ་སོགས་བྱས་ཏེ་ལན་འདེབས་བྱས་པར་རྟེན་འཁོན་འཁྲུག་དྲག་ཟིང་གང་ཙམཞིག་བྱུང་དང་འབྱུང་བཞིན་ཡོད་འདུག་ལ་ དོན་རྐྱེན་དེ་ཚོའི་སྐབས་སུ་ཕྱོགས་འགལ་བའི་འགོ་ཁྲིད་ཛུ་རབ། འཇའ་པ། རི་ཛི་ཞུ་བ་དེ་ཡང་ཉེན་རྡོག་པས་བཀག་ཉར་བྱས་པ་བྱུང་འདུག་ཀྱང་རྗེས་སུ་མི་དེ་གློད་བཀྲོལ་བྱུང་ཡོད་པ་རེད།
ངོ་རྒོལ་བ་དེ་དག་དང་དགུང་གྲངས་༧༢ལ་ཕེབས་པ་སྲིད་འཛིན་ལྕམ་ཛུ་ར། བྷི་ཆི་ཝི་ལི་ཡིས་དགོངས་ཚུལ་སྟོན་པའི་ནང་ ད་ལྟའི་འཇོ་ཇི་ཡ་གཞུང་དེ་བཞིན་ཨུ་རུ་སུ་ལ་ཉེ་ཕྱོགས་འཛིན་གྱི་ཡོད་པའི་ཉེས་འཛུགས་བྱས་འདུག་ཀྱང་དེར་གཞུང་དེས་ངོས་ལེན་མེད་ཅེས་ལན་འདེབས་བྱས་གཞག། ཡང་མི་མང་གིས་ད་ལྟའི་འཇོ་ཇི་ཡ་གཞུང་ལ་ངོ་རྒོལ་ཤུགས་ཆེ་བྱེད་བཞིན་པའི་ཐོག་ཡུལ་དེའི་སྲིད་བློན་ཨི་ར་ཀིལ། ཀོ་བྷ་ཁི་ཛི་ཡིས་ཁྲིམས་ལུགས་ལ་རྩིས་མེད་རྡོག་རོལ་གཏོང་མཁན་ཚོར་ཁྲིམས་ཐོག་ནས་ཉེས་ཆད་ལྕི་པོ་འགེལ་རྒྱུ་ཡིན་པ་དང་ ཡང་དེ་འདྲའི་ཉེས་ཆད་ནི་དངོས་སུ་ངོ་རྒོལ་ནང་ཞུགས་མཁན་དང་ཁོང་ཚོར་ངན་སློང་སྤེལ་མཁན་ཆབ་སྲིད་ཀྱི་འགོ་ཁྲིད་ཁག་གི་ཐོག་ལའང་འགེལ་རྒྱུ་ཡིན་ཞེས་སྡིག་སྐུལ་བྱས་ཡོད་པ་རེད། ཡང་དེའི་ཐོག་ལ་ད་ཡོད་འཇོ་ཇི་ཡའི་གཞུང་གིས་ད་རེས་ཡུ་རོབ་མཉམ་སྦྲེལ་མཐུན་ཚོགས་ནང་འཇོ་ཇི་ཡ་འཛུལ་ཞུགས་ཀྱི་གྲོས་མོལ་བར་མཚམས་བཞག་པའི་རྒྱུ་མཚན་དེ་ནི་འཇོ་ཇི་ཡ་མཉམ་སྦྲེལ་དེའི་ནང་འཛུལ་རྒྱུར་འདོད་མོས་མུ་མཐུད་བཅང་བཞིན་ཡོད་ཀྱང་ ཡུ་རོབ་མཉམ་སྦྲེལ་གྱིས་འཇོ་ཇི་ཡ་ཐོག་ངོ་ཚ་ཁྲེལ་མེད་སྒོ་ནས་དབང་ཡོད་བཤད་ཡོད་སྟབས་དེ་ཡིས་དངོས་འབྲེལ་ང་ཚོའི་རྒྱལ་ཁབ་འདི་ཡུ་རོབ་མཉམ་སྦྲེལ་ནང་ཟླ་བསྒྲིལ་གཏོང་རྒྱུར་འཚབ་ཆེའི་འགོག་རྐྱེན་བཟོས་ཡོད་ཅེས་ཕར་སྐྱོན་བརྗོད་བྱེད་ཀྱི་ཡོད་པ་རེད། དེ་ཡང་འཇོ་ཇི་ཡ་གཞུང་གིས་འཇོ་ཇི་ཡ་ཡུ་རོབ་མཉམ་སྦྲེལ་ནང་འཛུལ་ཞུགས་བྱེད་ཕྱོགས་ཀྱི་གྲོས་མོལ་བར་མཚམས་འཇོག་གི་ཡོད་ཅེས་གསལ་བསྒྲགས་བྱུང་བ་དེ་ནི་ ཡུ་རོབ་གྲོས་ཚགོས་ཀྱིས་ཕྱི་ཟླ་བཅུ་པའི་ནང་བྱས་པའི་འཇོ་ཇི་ཡའི་གྲོས་ཚོགས་ཀྱི་འོས་བསྡུ་དེ་བཞིན་དྲང་བདེན་དང་རང་དབང་བཅས་གང་ཡང་མེད་པ་ཞིག་བྱུང་སོང་ཞེས་སྐྱོན་བརྗོད་གསལ་བའི་གྲོས་ཆོད་ཤིག་བཞག་པའི་རྗེས་ཙམ་དེར་བྱས་པ་ཞིག་ཆགས་ཡོད་པ་རེད།
དེ་ཡང་འཇོ་ཇི་ཡའི་གྲོས་ཚོགས་ཀྱི་འོས་བསྡུ་དེ་བཞིན་དྲང་བདེན་བྱུང་མ་སོང་ཞེས་ཡུལ་གྱི་ཕྱོགས་འགལ་བས་ཀྱང་སྐྱོན་བརྗོད་ཤུགས་ཆེ་བྱས་ཏེ་ད་བར་གྲོས་ཚོགས་དེའི་ནང་མ་ཞུགས་བར་གནས་ཡོད་པ་དང་ཕྱོགས་མཚུངས་ཨ་རི་དང་ཡུ་རོབ་མཉམ་སྦྲེལ་གྱིས་ཀྱང་མི་འབོར་ས་ཡ་གསུམ་དང་ཚགས་༧་ཡོད་པའི་ལྷོ་ཁོ་ཁ་སི་སི་ཡི་རྒྱལ་ཁབ་འཇོ་ཇི་ཡ་ནང་བྱས་པའི་འོས་བསྡུ་དེ་དྲང་པོ་དང་རང་དབང་ལྡན་པ་ཞིག་བྱུང་མེད་པའི་རྣམ་འགྱུར་དང་བཅས་ཡུལ་དེའི་དམངས་གཙོར་ཉམས་ཆག་འགྲོ་གི་འདུག་ཅེས་ཉེན་བརྡ་གསལ་སྟོན་བྱས་ཡོད་པ་རེད། གནས་ཚུལ་འདི་ཕྱོགས་བསྒྲིགས་དང་སྙན་སྒྲོན་ཞུ་མཁན་པདྨ་བདེ་ཆེན་ཡིན།