༄༅།། བལ་ཡུལ་གྱི་ནང་སྲིད་ལྷན་ཁང་དང་ས་གནས་ཉེན་རྟོག་ལས་ཁུངས་ཀྱིས་ཆོག་མཆན་བཀོད་དེ་རྒྱལ་སྤྱི་དང་བལ་ཡུལ་གྱི་གནའ་རྫས་རྟོག་ཞིབ་མཁས་པའི་རུ་ཁག་ཅིག་གློ་སྨོན་ཐང་དུ་འབྱོར་ཏེ་ཉིན་བཅུའི་རིང་ལ་ས་གནས་ཁག་ཅིག་ཏུ་རྐོ་འདོན་བྱས་ནས་གཤིན་པོའི་ལྷག་རོ་འཚོལ་ཞིབ་དང་པར་འདེབས། ས་ཁྲ་འབྲི་བ་སོགས་ཀྱི་ལས་དོན་བསྒྲུགས་ཀྱང་ས་གནས་ཡུལ་མི་ཚོས་གཤིན་པོའི་དུར་ས་རྐོ་འདོན་བྱེད་ན་ཡུལ་ལྷ་གཞི་བདག་དང་ལྷ་ཀླུ་གཉན་གསུམ་འཁྲུག་གི་རེད་ཅེས་སྐྲག་སྣང་བྱས་ནས་གནའ་རྫས་རྟོག་ཞིབ་རུ་ཁག་དེར་ངོ་རྒོལ་བྱས་ནས་ལས་མཚམས་འཇོག་དུ་བཅུག་འདུག ཕྱི་ཟླ་༡༠་པའི་ཚེས་༦་ཉིན་བལ་ཡུལ་གྱི་གནའ་རྫས་རྟོག་ཞིབ་ལས་ཁུངས་ཀྱི་དྲུང་ཆེ་འོག་མ་སུ་བྷ་དྷ་ར་བྷ་ཏ་ར་ཡེ་ཞེས་པ་ཞིག་གིས་ཨ་ན་པུར་ན་གསར་འགྱུར་ལས་ཁང་ལ་བཤད་པ་ལྟར་ན། གློ་སྨོན་ཐང་གི་ཡུལ་མི་ཚོས་གཤིན་པོའི་དུར་ས་སྔོག་ན་ལྷ་ཀླུ་གཉན་གསུམ་འཁྲུགས་ཏེ་མི་ལ་ན་ཚ་དང་ཕྱུགས་ལ་གོད་ཁ་སོགས་ཀྱི་གནོད་འཚེ་འབྱུང་སྲིད་པའི་སྐྲག་སྣང་བྱས་ནས་གནའ་རྫས་རྟོག་ཞིབ་ཀྱི་ལས་དོན་དེར་མོས་མཐུན་བྱེད་ཀྱི་མི་འདུག དེར་བརྟེན་ང་ཚོས་གཤིན་པོའི་ལྷག་རོ་རྐོ་འདོན་གྱི་ལས་དོན་རྒྱུན་འཁྱོངས་བྱེད་དཀའ། ང་ཚོས་ཉི་མ་བཅུའི་རིང་དུ་ས་རྐོ་རྡོ་སློག་བྱས་ནས་ཅ་དངོས་རྙེད་པ་ཚང་མ་ས་གནས་སྲིད་གཞུང་ལ་རྩིས་སྤྲོད་བྱས་ནས་དུར་ཁུང་ནང་དུ་བསྐྱར་དུ་ས་རྡོ་བརྒྱངས་ཏེ་ཁ་བཀང་ཡོད་ཅེས་བཀྲལ། གློ་སྨོན་ཐང་གི་ཡུལ་མི་ཚོས་རྒྱལ་སྤྱི་དང་བལ་ཡུལ་གྱི་གནའ་རྫས་རྟོག་ཞིབ་མཁས་པ་ཚོར་གཤིན་པོའི་དུར་ས་སྔོག་ན་ཡུལ་ལྷ་གཞི་བདག་དང་ཆོས་སྐྱོང་སྲུང་མ་རྣམས་ཁྲོས་ནས་ཐོག་འཕེན་པ་དང་སེར་བ་འབེབས་པ། ཐན་པ་བྱུང་བ་དང་ལོ་ཏོག་བསྡུ་རྒྱུ་མེད་པར་མུ་གེ་འབྱུང་རྒྱུའི་ཉེན་ཁ་ཡོད་པ་རེད་ཅེས་རྒྱུ་ཚན་བགྲངས།།
ཉེ་ཆར་ཕྱི་ཟླ་༩་པའི་ཚེས་༡༨་ཉིན་བལ་ཡུལ་གྱི་མདུན་སྐྱོད་ཉིན་རེའི་གསར་ཤོག་ལ་གནས་ཚུལ་ཐོན་པ་ལྟར་ན། གློ་སྨོན་ཐང་ནི་བལ་ཡུལ་གྱི་ས་གནས་གཞན་ཁག་དང་མ་འདྲ་བར་ཕུགས་ན་གངས་རི་ཡོད་པ་སོགས་ཡུལ་ཁྱད་པར་ཅན་དང་ཐུན་མོང་མ་ཡིན་པ་ཞིག་རེད། ༡༣༨༠་ལོར་ཨ་མེ་དཔལ་ཞེས་བྱ་བས་གློ་སྨོན་ཐང་གི་རྒྱལ་ཁམས་བཙུགས་ཏེ་སྲིད་བསྐྱངས། ༢༠༠༨་ལོར་གློ་སྨོན་ཐང་གི་རྒྱལ་ལྡན་ལམ་ལུགས་མཇུག་བསྒྲིལ། ས་གནས་དེར་ནང་པའི་གྲྭ་བཙུན་དང་དགོན་པ། སྔ་མོའི་མཁར་རྫོང་དང་བྲག་ཕུག གཡག་དང་འབྲི། མཛོ་དང་མཛོ་མོ་སོགས་ཕྱུགས་ཟོག་མ་འདྲ་བ། ཡུལ་མི་ཚོས་ནས་དང་སྲན་མ། བྲ་བོ་སོགས་སྟོན་འབྲས་མ་འདྲ་བ་འདེབས་པ་དང་གཡང་གཟར་ངོས་སུ་ལོ་༢༥༠༠་ལྷག་གི་བྱུང་རབས་ཅན་གྱི་བྲག་ཕུག་མང་པོ་ཡོད་པ་རྣམས་ལྐོག་འགྱུར་གྱི་ཞིང་ཁམས་ཤིག་རེད་ཅེས་གནས་ཚུལ་སྤེལ། གློ་སྨོན་ཐང་ལ་འགྲིམ་འགྲུལ་བྱ་རྒྱུ་སྟབས་བདེ་པོ་མེད་པ་དང་གནམ་གཤིས་གྲང་མོ། བོད་ཀྱི་མཐའ་མཚམས་སུ་ཆགས་ཡོད་པ་བཅས་ཀྱིས་བལ་ཡུལ་ནས་གློ་སྨོན་ཐང་དུ་འགྲིམ་འགྲུལ་བ་མང་པོ་འབྱོར་ཐུབ་ཀྱི་མེད་ཅིང་། གློ་སྨོན་ཐང་ལ་དུས་རབས་མང་པོའི་སྔོན་ནས་བོད་བརྒྱུད་ནང་བསྟན་དར་ཏེ་བྲག་དཀར་ཐེག་ཆེན་གླིང་དང་བྱམས་པ་དགོན། ཐུབ་ཆེན་དགོན་པ་གསུམ་ནི་གློ་སྨོན་ཐང་གི་དགོན་སྡེ་ཆེ་ཁག་གསུམ་དང་བྱམས་པ་དགོན་ནི་རྙིང་ཤོས་རེད། དགོན་ཁག་དེ་དག་གི་བཟོ་བཀོད་ཁྱད་དུ་འཕགས་དང་འདུ་ཁང་སོགས་ཀྱི་ནང་དུ་སངས་རྒྱས་ཀྱི་མཛད་པ་རྣམ་ཐར་བཀོད་པའི་ཐང་ཀ་གསེར་བྲིས་མ་དང་རིན་པོ་ཆེའི་རིགས་རྣམས་བཏུལ་ཏེ་རྡོ་ཚོན་གྱིས་བྲིས་པའི་ཐང་ཀ་རྩ་ཆེན་གྱིས་བརྒྱན། དགོན་པའི་ཕྱི་ནང་གཉིས་སུ་སེར་མོ་བ་དང་ཁྱིམ་པ་སོགས་ཀྱིས་ལག་ཐོགས་མ་ཎི་འཁོར་ལོ་བསྐོར་ནས་འཚོ་གནས་བྱེད་བཞིན་པར་བལྟས་ཚེ། དུས་ཚོད་ཀྱི་འཁོར་སྐྱོད་འགགས་ནས་སྔ་མོའི་འཇིག་རྟེན་ཞིག་ལ་ཕྱིར་ལོག་བྱས་པ་ལྟར་གྱི་ཚོར་བ་ཞིག་སྟེར་གྱི་འདུག་ཅེས་གསར་འགྱུར་སྤེལ་འདུག
གློ་སྨོན་ཐང་གི་གྲོང་རྡལ་ཕྱི་ལོགས་ཀྱི་གཡང་གཟར་ངོས་སུ་བྲག་ཕུག་ཁག་ཅིག་ཡོད་པ་དེ་དག་ལ་ལོ་༡༠༠༠༠་ནས་༨༠༠༠་ཡས་མས་ཤིག་གི་ལོ་རྒྱུས་ཡོད་པར་མ་ཟད། ལྗོངས་ཀྱི་ཆོ་གསར་བྲག་ཕུག་ལ་ཐོག་བརྩེགས་ལྔ་དང་ཁང་མི་༤༠་ཐམ་པ། འོག་ཞོལ་ནས་ཐོག་ཁང་དུ་བསྐྱོད་པར་སྐས་འཛེགས་འགའ་རེ་བཙུགས་ཡོད་ཀྱང་གནའ་རྫས་རིག་རྟོག་ཞིབ་པ་ཚོས་བྲག་ཕུག་དེ་དག་གི་དགོས་མཁོ་ངོ་མ་ཅི་ཡིན་རྩོད་གཅོད་མ་ཐུབ། བྲག་ཕུག་མང་དག་ཅིག་གི་ནང་དུ་དཔེ་ཆ་རྙིང་པ་གང་སར་ཐོར་ནས་སྤུངས་ཡོད་པ་དེ་དག་གི་གྲས་སུ་བོན་པོའི་དཔེ་ཆ་དང་སངས་རྒྱས་ཆོས་ལུགས་ཀྱི་དཔེ་ཆ་གཉིས་ཀ་རྙེད། ད་དུང་བྲག་ཕུག་ཁག་ཅིག་གི་ལྡེབས་བྲིས་ལ་ཉམས་ཆག་མ་བྱུང་བར་ལུས་ཡོད་པ་རྣམས་ལྷ་ཚོགས་དང་སངས་རྒྱས་བྱང་སེམས། ཁྲོ་བོ་ཁྲོ་མོའི་སྐུ་བརྙེན་གྱི་ལྡེབས་རིས་ཡིན་ཞིང་། བྲག་ཕུག་རེ་ཟུང་གི་ནང་དུ་སྐབས་འགར་དམར་གདུང་བཞག་ཡོད་པའང་རྙེད་ཀྱི་ཡོད་འདུག མཚམས་རེར་ཕྱི་རྒྱལ་གྱི་ཡུལ་སྐོར་སྤྲོ་འཆམ་པ་ཚོས་ས་གནས་ཀྱི་ཡུལ་མི་ཕོ་གསར་འགའ་རེར་དངུལ་སྒོར་སྤྲད་ནས་བྲག་ཕུག་དེ་དག་གི་ནང་ལ་ཁྲིད་དུ་བཅུག ཁོ་ཚོས་དཔེ་ཆ་ཐོར་བུ་རྣམས་དང་ལྡེབས་བྲིས་ཁག་ཅིག་བཀོག་ནས་འཁྱེར་གྱི་ཡོད་ཀྱང་ཡུལ་མི་ཚོས་རྟག་ཏུ་ཕྱི་རྒྱལ་བ་དང་ས་གནས་ཀྱི་ཡུལ་མི་ཚོར་བྲག་ཕུག་ནང་དུ་རྐོ་འདོན་བྱེད་དུ་མི་འཇུག་པར་བཀག་འགོག་བྱེད་ཀྱི་ཡོད་པའི་གློག་བརྙན་ཡང་མཐོང་རྒྱུ་ཡོད་པ་རེད།།