སྤྱི་ལོ་༢༠༢༤ ལོའི་ཟླ་བ་༡ ཚེས་༡༣ ཉིན་གྱི་ཐེ་ཝན་གྱི་སྲིད་འཛིན་འོས་བསྡུའི་དུས་ཚོད་སླེབས་ལ་ཉེ་མཚམས་སུ། མི་དམངས་ཀྱི་འདོད་བློ་ཚོད་རྩིས་ལས་གསལ་དོན་ལྟར་ན། ད་ཕན་མི་མང་འོས་ཤོག་འཕེན་མཁན་གྱི་ནང་ནས་རྒྱབ་སྐྱོར་མང་ཤོས་ཐོབ་མཁན་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་དང་ཁ་གཏད་འོས་མི་ཚོའི་བར་རྒྱབ་སྐྱོར་བྱེད་མཁན་གྱི་ཁྱད་པར་ཆུང་དུ་འགྲོ་བཞིན་པ་དང་བསྟུན་ནས་འོས་བསྡུའི་འགྲན་རྩོད་རྣོ་ངར་ཆེ་རུ་འགྲོ་བཞིན་ཡོད་པ་དང་། འོས་བསྡུའི་གནས་སྟངས་དེ་བཞིན་ཐེ་ཝན་ནང་ཁུལ་དུ་དོ་སྣང་ཆེན་པོ་སླེབས་བཞིན་པར་མ་ཟད། ཐག་ཉེ་རིང་ཅི་རིགས་སུ་གནས་པའི་རྒྱལ་ཁབ་ཁག་སྟེ། དཔེར་ན། རྒྱ་ནག་དང་ཨ་མེ་རི་ཀ། ཉི་ཧོང་སོགས་ཀྱིས་འོས་བསྡུའི་མཇུག་འབྲས་དང་། དེས་ས་ཁུལ་གྱི་སྒྲིག་སྲོལ་ལ་ཐེབས་པའི་ཤུགས་རྐྱེན་སོགས་ཀྱི་ཐད་ལ་དོ་སྣང་ཆེན་པོ་སླེབས་བཞིན་པ་རེད།
འོས་བསྡུའི་མཇུག་འབྲས་ཅི་ཞིག་ཆགས་ཀྱང་ཐེ་ཝན་མཚོ་འགག་ཕྱོགས་གཉིས་ཀྱི་ད་ཡོད་ཀྱི་གནས་སྟངས་ལ་རྩ་བའི་ཆ་ནས་འགྱུར་ལྡོག་ཆེན་པོ་ཡོང་མི་སྲིད་ཀྱང་། གནད་དོན་དབྱེ་ཞིབ་པ་ཚོས། རྒྱ་ནག་དམར་ཤོག་གཞུང་གིས་ཅིག་བྱས་ན་ཐེ་ཝན་གྱི་འོས་བསྡུའི་མཇུག་འབྲས་ལ་གཞིགས་ནས་དེ་ལ་དེ་མཚུངས་ཀྱི་བྱེད་ཐབས་ལག་བསྟར་གྱིས་གནོན་ཤུགས་སྤྲོད་སྲིད་པའི་ཚོད་དཔག་བྱེད་བཞིན་འདུག།
སིངྒ་ཕོར་གཞུང་གཉེར་གཙུག་ལག་སློབ་གྲྭ་ཆེན་མོའི་ཆེད་མཁས་པ་ཀྲང་ཅཱ་ཡེན་ལགས་ཀྱིས་ཨ་རིའི་རླུང་འཕྲིན་ཁང་གི་བཅར་འདྲི་དང་ལེན་གནང་སྐབས་སུ་གསུངས་དོན་དུ། དོན་དམ་ལ་སུར་རྒྱལ་ཁ་ཐོབ་ཀྱང་། རྒྱ་ནག་གིས་ཐེ་ཝན་ལ་སྤྲད་དང་སྤྲོད་བཞིན་པའི་གནོན་ཤུགས་དེ་ཆུང་དུ་འགྲོ་མི་སྲིད། རྒྱུ་མཚན་ཅི་ལགས་ཞེ་ན། རྒྱ་ནག་གི་མཐར་ཐུག་གི་དམིགས་ཡུལ་དེ་ཐེ་ཝན་ལ་སྟངས་འཛིན་བྱ་རྒྱུ་དེ་རེད། གལ་སྲིད་དམངས་གཙོ་ཡར་ཐོན་ཚོགས་པར་རྒྱལ་ཁབ་ཐོབ་ཚེ། རྒྱ་ནག་གཞུང་གིས་སྡིགས་སྐུལ་རྣམ་པའི་བྱེད་སྒོ་ཤུགས་ཆེ་རུ་གཏང་རྒྱུ་དང་། གོ་མིན་ཏང་ལ་རྒྱལ་ཁབ་ཐོབ་པ་ཡིན་ན། ཐེ་ཝན་དེ་བཞིན་རྒྱ་ནག་ལ་མང་བ་བསྙེས་དགོས་པའི་སྲིད་ཇུས་ཤིག་འཛིན་ཐབས་བྱ་རྒྱུ་རེད། ཅེས་དང་། ཡང་རྒྱལ་སྤྱིའི་ཉེན་ཁའི་སྒྲིག་འཛུགས་ཀྱི་ཆེས་མཐོའི་ཉམས་ཞིབ་པ་ཞའོ་ཡན་རན་ལགས་ཀྱིས་ཨ་རིའི་རླུང་འཕྲིན་ཁང་ལ། ཝ་ཤིན་ཊོན་དང་པེ་ཅིང་གཉིས་ཀས་ཐེ་ཝན་གྱི་འོས་བསྡུ་ཡིས་རྐྱེན་ལས་གནས་སྟངས་ཛ་དྲག་ཆགས་བཞིན་པའི་ཐད་ཚོར་བ་སྐྱེན་པོ་ཡིན་པ་དེ་བཞིན། ཉེ་ལམ་ཨ་རི་དང་རྒྱ་ནག་གི་འགོ་ཁྲིད་རྣམ་གཉིས་སན་ཧྥུ་རན་སེ་སི་ཁོར་སྐོང་འཚོགས་གནང་བའི་APEC ལྷན་ཚོགས་སུ་གནས་སྟངས་ཞི་འཇམ་ཡོང་ཐབས་གནང་དགོས་དོན་ཡང་དེ་དོན་ཡིན་པ་རེད་ཅེས་གསུངས་འདུག། ཐེ་ཝན་གྱི་གནད་དོན་ནི་ཨ་རི་དང་རྒྱ་ནག་དབར་ཚོར་སྣང་སྐྱེན་ཤོས་ཀྱི་གནད་དོན་ཞིག་ཡིན་ཙ་ན། སྲིད་དོན་ཆེད་མཁས་ཚོས་འབྲེལ་འདྲིས་གྲོས་མོལ་གྱི་ཐབས་ལམ་ལ་བརྟེན་རྒྱུ་དེ་ཝ་ཤིན་ཊོན་དང་པེ་ཅིང་གཉིས་བར་གྱི་འབྲེལ་ལམ་ཛ་དྲག་མི་ཆགས་པའི་འགག་རྩ་ཞིག་ཏུ་འདོད་བཞིན་པ་རེད།
རྒྱ་ནག་ལ་དམངས་གཙོ་ཡར་ཐོན་ཚོགས་པས་མུ་མཐུད་ནས་སྲིད་བསྐྱང་རྒྱུར་འདོད་མོས་མེད་པ།
དམངས་གཙོ་ཡར་ཐོན་ཚོགས་པས་སྤྱི་ལོ་༢༠༡༦ ལོར། སླར་ཡང་ཐེ་ཝན་གྱི་སྲིད་དབང་བསྐྱངས་པ་ནས་བཟུང་། མཚོ་འགག་ཕྱོགས་གཉིས་བར་གྱི་འབྲེལ་བ་ཧ་ལམ་རྩ་ཆད་ལ་ཕྱིན་ཞིང་། རྒྱ་ནག་དམར་ཤོག་གཞུང་གིས་ཐེ་ཝན་ལ་གཞུང་འབྲེལ་གྱི་འབྲེལ་ལམ་ཡོད་ཚད་བཅད་ཡོད་པ་རེད། སིངྒ་ཕོར་གཞུང་གཉེར་གཙུག་ལག་སློབ་གྲྭ་ཆེན་མོའི་ཆེད་མཁས་པ་ཀྲང་ཅཱ་ཡེན་ལགས་ཀྱིས་རྒྱ་ནག་གཞུང་གིས་ཐེ་ཝན་གྱི་འོས་བསྡུའི་ཐད་བློ་འཚབ་ཆེ་ཤོས་ཤིག་ནི། དམངས་གཙོ་ཡར་ཐོན་ཚོགས་པར་སྲིད་འཛིན་གྱི་འོས་བསྡུར་རྒྱལ་ཁ་འཐོབ་རྒྱུ་ཙམ་མ་ཟད། གྲོས་ཚོགས་ནས་ཀྱང་གདན་གྲངས་ཕྱེད་ཀའི་ཡན་ལ་འཐོབ་སྲིད་པ་དེ་ཡིན་པ་རེད། ངས་བྱས་ན། དེ་ནི་པེ་ཅིང་ལ་མཚོན་ན་མཐོང་མི་འདོད་པའི་མཇུག་འབྲས་སྡུག་ཤོས་དེ་རེད། རྒྱུ་མཚན་ནི་དེས་ཁོ་ཚོས་ཐེ་ཝན་གྱི་གནད་དོན་ཐད་ཅི་བྱ་བརྟོལ་མེད་ཡིན་པའི་གནས་བབས་ཤིག་གསལ་པོ་ཆགས་ཀྱི་རེད། ཅེས་ཨ་རིའི་རླུང་འཕྲིན་ཁང་ལ་གསུངས་འདུག། ཁོང་གིས་ད་ལན་ཐེ་ཝན་གྱི་འོས་བསྡུའི་ནང་རྒྱ་ནག་གཞུང་གིས་དམངས་གཙོ་ཡར་ཐོན་ཚོགས་པར་ངོ་རྒོལ་བྱེད་མཁན་གྱི་ཁ་གཏད་འོས་མི་ཆེ་ཤོས་ཤིག་གི་དོན་དུ་འོས་ཤོག་ཐོབ་ཐབས་ཀྱི་འབད་བརྩོན་བྱེད་བཞིན་པ་འདོད་ཀྱི་ཡོད་པ་རེད།
འདས་པའི་བདུན་ཕྲག་འགའ་ཤས་རིང་། རྒྱ་ནག་གཞུང་གིས་སྡིགས་སྐུལ་གྱི་ངོ་བོ་ལྡན་པའི་བྱེད་ཐབས་ཅི་རིགས་ཤིག་ལག་བསྟར་བཏང་སྟེ། ཐེ་ཝན་གྱི་འོས་བསྡུར་ཤུགས་རྐྱེན་ངན་པ་སྤྲོད་ཐབས་བྱེད་བཞིན་པའི་ཁོངས་ལས། ཐེ་ཝན་ཉེ་འཁྲིས་ཀྱི་མཁའ་དབྱིངས་སུ་དམག་གི་གནམ་གྲུ་དང་ལྒང་ཕུག་བཏང་ཡོད་པར་མ་ཟད། བདུན་ཕྲག་སྔོན་མར་རྒྱ་ནག་གཞུང་གིས་ཐེ་ཝན་གྱི་རྫས་འགྱུར་དངོས་ཟོག་རྣམ་གྲངས་༡༢ ལ་སྔར་ལམ་སྒོ་ཁྲལ་ཆག་ཡང་ཡིན་པ་དེ་བཞིན་མེད་པར་བཏང་སྟེ་ཚོང་ལས་ལ་གནོན་ཤུགས་སྤྲད་ཡོད་པ་རེད།
ཀྲང་ཅཱ་ཡེན་ལགས་ཀྱིས་གསུངས་དོན་ལྟར་ན། གལ་སྲིད་ལེ་ཆིང་ཏེ་ལགས་སུ་འོས་བསྡུའི་རྒྱལ་ཁ་ཐོབ་ཀྱང་། དམངས་གཙོ་ཡར་ཐོན་ཚོགས་པར་གྲོས་ཚོགས་སུ་གདན་གྲངས་ཕྱེད་ཀའི་ཡན་ཐོབ་མ་ཐུབ་པ་ཡིན་ན། རྒྱ་ནག་གཞུང་གིས་གནོན་ཤུགས་ཆེན་པོ་སྤྲད་དེ་ལེ་ཆིང་ཏེ་ལགས་སུ་ཕྱག་ལས་ནོར་འཁྲུག་ཤོར་བཅུག་རྗེས། མི་མངོན་པའི་ཚུལ་དུ་གྲོས་ཚོགས་ནས་ལྟག་ལོག་བརྒྱབ་འཇུག་སྲིད་པ་དང་། ཡང་དེ་བཞིན་པེ་ཅིང་གིས་དམར་ཐིག་གང་ལ་འཐེན་དགོས་མིན་ཉང་གནོན་རྟོག་ཞིབ་བགྱི་རྒྱུ་ཙམ་ཟད། ལེ་ཆིང་ཏེ་ལགས་ཀྱིས་ཡུལ་དང་དུས། གནས་སྐབས་གང་འདྲ་ཞིག་ལ་ནོར་འཁྲུལ་ཤོར་སྲིད་པའི་ཆ་ལ་ལྟ་རྟོགས་ཉན་རྣ་བྱས་ནས་ཉང་ཞིབ་མཐའ་གསལ་བྱ་སྲིད་པ་རེད།
ཨ་རིའི་གཞུང་ལ་ནི་མ་འོངས་པར་ཚོད་དཔག་ཐིག་ཐུབ་པའི་མི་ཞིག་དགོས་པ་རེད།
རྒྱ་ནག་དམར་ཤོག་གཞུང་གིས་དམངས་གཙོ་ཡར་ཐོན་ཚོགས་པར་ལོ་རྒྱུས་ཐོག་སྔར་བྱུང་མྱོང་མེད་པའི་སྲིད་འཛིན་ལས་དུས་གསུམ་པ་དེ་འཐོབ་འཇུག་འདོད་མེད་པར་ཐབས་བརྒྱ་ཇུས་སྟོང་གིས་བཀག་འགོག་ཡོང་ཐབས་བྱེད་བཞིན་པ་དང་དུས་མཚུངས་སུ། གནད་དོན་དབྱེ་ཞིབ་པ་ཚོས་དཔྱད་ཞིབ་བྱས་པ་ལྟར་ན། ཨ་རིའི་གཞུང་གིས་ཀྱང་འོས་མི་རྣམས་ཀྱིས་ཨ་རི་དང་ཐེ་ཝན་དབར་གྱི་འབྲེལ་ལམ་དང་། མཚོ་འགག་ཕྱོགས་གཉིས་བར་གྱི་འབྲེལ་ལམ་ཐད་སྲིད་ཇུས་ལངས་ཕྱོགས་ཅི་ཞིག་འཛིན་གྱི་ཡོད་མེད་སྐོར་ལ་དོ་སྣང་ཆེན་པོ་བྱེད་བཞིན་པ་རེད། ཐེ་ཝན་རྒྱལ་གཉེར་སྲིད་དོན་གཙུག་ལག་སློབ་གྲྭ་ཆེན་མོའི་སྲིད་དོན་ཆེད་མཁས་པ་ནཱན་ཡེ་ལགས་ཀྱིས་ཞལ་པར་བརྒྱུད་ནས་ཨ་རིའི་རླུང་འཕྲིན་ཁང་ལ་གསུངས་དོན་དུ། ཐེ་ཝན་གྱི་སྲིད་འཛིན་འོས་མི་གསུམ་པོ་ལས་ཚང་མས་གཞི་རྩའི་རྩ་དོན་དེ་ཨ་རི་དང་ཐེ་ཝན་གཉིས་དབར་གྱི་འབྲེལ་ལམ་ཐད་མངོན་ཡོད་ཅིང་། “ང་ཚོ་ཚང་མ་ལྕམ་ཚའེ་དབྱིང་ཝན་ལགས་ཀྱི་ཕྱེད་ཀ་ཡིན་པ་”དེས་ཚད་ངེས་ཅན་ཞིག་གི་ཐོག་ནས་ཨ་རིར་བློ་བདེ་བག་ཕེབས་སུ་བཅུག་ཡོད་པ་རེད།
དེ་ལྟར་ལགས་ཀྱང་། གོ་མིན་ཏང་གི་སྲིད་འཛིན་གཞོན་པའི་འོས་མི་ཀྲའོ་ཞའོ་ཁང་ལགས་ཀྱིས་འོས་བསྡུའི་འགྲན་རྩོད་ཁྲོད་ཨ་རིར་དོགས་པ་ཟ་བའི་གཏམ་བརྗོད་སྤེལ་བ་དེར། གནད་དོན་དབྱེ་ཞིབ་པ་ཚོས་ཨ་རིའི་གཞུང་གི་ངོས་ནས་ཀྱང་དེ་དོན་ལ་དམིགས་པའི་ཞིབ་ཕྲའི་ཇུས་ཤིག་བཏིང་སྟེ། ཨ་རི་དང་ཐེ་ཝན་དབར་གྱི་ཁས་ལེན་ཁག་ལ་བློ་དོགས་ཡོད་པའི་གཞུང་ཞིག་སླེབས་ཚེ་དེ་ལ་དེ་བསྟུན་གྱི་འབྲེལ་འདྲིས་བྱེད་ཐབས་ཤིག་ཨང་གསར་བྱེད་བཞིན་ཡོད་སྲིད་པ་རེད། ཅེས་གསུངས་འདུག།ཨ་རིར་དོགས་པ་ཟ་བའི་གཏམ་བརྗོད་ཅེས་པ་ནི་ཅི་ཞིག་རེད་སྙམ་ན། བརྗོད་ཚུལ་དེ་ནི་ཐེ་ཝན་གྱིས་ཨ་རི་དང་མཉམ་དུ་འབྲེལ་འདྲིས་བྱེད་ཚེ་གཟབ་གཟབ་བྱ་དགོས་པའི་འདོད་ཚུལ་ཞིག་རེད། རྒྱུ་མཚན་འདོད་ཚུལ་དེ་ལས་ཨ་རི་ནི་གཉོད་ཆུང་ནུས་མེད་དང་རང་ཁོ་ན་གཅེས་འཛིན་བྱེད་མཁན་ཞིག་ཏུ་མཐོང་གི་ཡོད་པ་རེད། ཞིབ་འཇུག་བྱས་ནས་ཤེས་རྟོགས་བྱུང་བ་ལྟར་ན། ཨ་རིར་དོགས་པ་ཟ་བའམ་ཨ་རི་དོགས་ཡོད་དུ་སྨྲ་བའི་ཤོད་སྟངས་དེའི་འབྱུང་ཁུངས་གཙོ་བོ་ཐེ་ཝན་ནས་ཡོང་གི་ཡོད་ཀྱང་། རྒྱ་ནག་དང་ཨུ་རུ་སུ་གཉིས་ཀྱི་ནང་དུའང་དེའི་རིགས་བརྒྱུད་སྒྲོག་བྱེད་མཁན་ཡོད་འདུག། སི་མི་སེན་སློབ་གླིང་གི་སྲིད་དོན་མཁས་པ་སཱ་ར་ནིའུ་ལན་ཌི་ལགས་ཀྱིས་ཡིག་ཐོག་ནས་ཨ་རིའི་རླུང་འཕྲིན་ཁང་ལ་གསུངས་གསལ་དུ། གལ་སྲིད་ཀྲའོ་ཞའོ་ཁང་གིས་སྲིད་འཛིན་གཞོན་པའི་མཚན་ཐོག་ནས་གོ་མིན་ཏང་གི་ཚོགས་པའི་ཁོངས་སུ་ཨ་རིར་དོགས་པ་ཟ་བའི་ཤོད་སྟངས་དེར་ཡིད་ཆེས་སླེབས་ཐབས་བྱས་ཚེ། ཨ་རིའི་གཞུང་གི་ངོས་ནས་སྔོན་གྱི་སྲིད་འཛིན་ཟུར་པ་མཱ་དབྱིངས་ཇུའུ་དང་ད་ལྟའི་སྲིད་འཛིན་ལས་ཐོག་ལྕམ་ཚའེ་དབྱིང་ཝན་གཉིས་ཀྱི་སྲིད་གཞུང་ལས་ཀྱང་ཨ་རིར་ངོ་རྒོལ་བྱེད་མཁན་གྱི་མཐུན་གྲོགས་ཤིག་ལ་འབྲེལ་ལམ་འཛུགས་དགོས་འཁེལ་གྱི་རེད། དེ་བཞིན་ཆེད་མཁས་པ་ནཱན་ཡེ་ལགས་ཀྱིས་གལ་ཏེ་ཐེ་ཝན་གྱི་སྲིད་འཛིན་རྗེས་མ་དེའི་ཕྱག་ལས་གནང་ཕྱོགས་ཐད་ཚོད་དཔག་ཐིག་ཁག་པོ་ཆགས་པ་དང་ད་ཡོད་ཀྱི་ཨ་མེ་རི་ཀ་དང་ཐེ་ཝན་དབར་གྱི་འབྲེལ་ལམ་གྲུབ་འབྲས་ལྡན་པ་དེའི་ཐད་ལེགས་སྐྱེས་འབུལ་རྒྱུའི་ཚབ་ལ་ལམ་ལོག་པར་ཕྱིན་པ་ཡིན་ན་ཨ་རིའི་གཞུང་གི་ངོས་ནས་དེ་དོན་ཐུགས་ཁུར་ཡོད་པའི་རྗེས་གནོན་གཏང་རྒྱུ་ཡིན་པ་རེད།
ཉི་ཧོང་གིས་མཚོ་འགག་ཕྱོགས་གཉིས་དབར་ད་ཡོད་གནས་སྟངས་སོར་གནས་ཡོང་རྒྱུར་མོས་མཐུན།
ཨ་རི་དང་རྒྱ་ནག་གཉིས་ལས་གཞན་ཉི་ཧོང་གིས་ཀྱང་ཐེ་ཝན་གྱི་འོས་བསྡུར་དོ་སྣང་ཆེན་པོ་བྱེད་བཞིན་པ་དང་། སྤྱི་ལོ་༢༠༢༢ ལོ་ནས་བཟུང་། ཐེ་ཝན་དང་ཉི་ཧོང་ཉེ་འཁོར་གྱི་གནས་སྟངས་ཛ་དྲག་ཏུ་ཕྱིན་པ་དང་བསྟུན་ནས། ཉི་ཧོང་གིས་སྒྱུ་མ་མཁན་གྱིས་ཟློས་གར་འཁྲབ་པ་ལྟར་དུས་ཡུན་ཐུང་ངུའི་ནང་རྒྱལ་སྲུང་དང་བདེ་འཇགས་ཀྱི་སྲིད་ཇུས་ལ་འགྱུར་བ་བཏང་ཟིན་པ་རེད། ཉི་ཧོང་གཞུང་འཛིན་གྱི་ངོས་ནས་སྲུང་སྐྱོབ་ཀྱི་ནུས་པ་མཐོར་འདེགས་སུ་གཏོང་བའི་རྩོལ་བ་ལྷུར་ལེན་བཞིན་ཡོད་པ་དེ་ལྟར་ལགས་ཀྱང་། གནད་དོན་དབྱེ་ཞིབ་པ་འགས་གསལ་སྟོན་གནང་དོན་ལྟར་ན། ཉི་ཧོང་གཞུང་གི་ངོས་ནས་འོས་བསྡུའི་རྒྱལ་ཁ་དེ་གང་ཟག་སུ་ལ་ཐོབ་མིན་ལ་མ་ལྟོས་པར། ཐེ་ཝན་མཚོ་འགག་ཕྱོགས་གཉིས་ཀྱི་ད་ཡོད་གནས་སྟངས་སོར་གནས་ཡོང་བར་རྒྱབ་སྐྱོར་ཡོད་པའི་ཁས་ལེན་གནང་ཡོད་པ་རེད། དེ་དོན་ཐད་ཉི་ཧོང་རྒྱལ་སྤྱིའི་ཡེ་ཤུའི་གཙུག་ལག་སློབ་གྲྭ་ཆེན་མོའི་ཆེད་མཁས་པ་སི་ཐེ་ཧྥེན་ནཱ་ཇི་ལགས་ཀྱིས་ཞལ་པར་བརྒྱུད་ནས་ཨ་རིའི་རླུང་འཕྲིན་ཁང་ལ་ཉི་ཧོང་གཞུང་གིས་འོས་བསྡུར་ཞུགས་པའི་སྲིད་འཛིན་འོས་མི་ཚོས་རྒྱ་ནག་དང་འབྲེལ་འདྲིས་བྱེད་པའི་ལངས་ཕྱོགས་ཐད་དོ་སྣང་ཆེན་པོ་བྱེད་ཀྱི་རེད། ཅེས་གསུངས་འདུག། ཁོང་ལྟར་ན་ཉི་ཧོང་གཞུང་གི་ངོས་ནས་ཐེ་ཝན་དང་ཕྱོགས་གཉིས་ཀྱི་འབྲེལ་ལམ་ཡར་རྒྱས་གཏང་འདོད་ཡོད་མོད། ཡིན་ནའང་ཁོང་ཚོས་གནད་དོན་ཚོར་བ་སྐྱེན་པོ་དེའི་ཐད་ལ་གཟབ་ནན་དཔེ་མེད་ཅིག་གནང་རྒྱུ་ཡིན་པ་དང་། ཉི་ཧོང་གིས་རྒྱ་ནག་གཅིག་ཅེས་པའི་རྒྱབ་ལྗོངས་དེར་རྒྱབ་འགལ་བྱ་འདོད་མེད་པར་མ་ཟད། ཁོང་ཚོས་རྒྱ་ནག་གིས་བཏོན་པའི་དམར་ཐིག་སྐོར་ཆ་རྒྱུས་ཆེན་པོ་ཡོད་པ་རེད་ཅེས་ཀྱང་གསུངས་འདུག།
གོང་ཞུས་ཐེ་ཝན་དུ་གནས་བཞུགས་ཆེད་མཁས་པ་ནཱན་ཡེ་ལགས་ལྟར་ན། གལ་སྲིད་གོ་མིན་ཏང་ལ་རྒྱལ་ཁ་ཐོབ་པའི་དབང་དུ་བཏང་ན་ཐེ་ཝན་གྱི་ཛ་དྲག་གནས་སྟངས་ཅུང་ཟད་ཞི་ལྷོད་ཡོང་སྲིད་ཀྱང་། དེས་རྒྱ་ནག་གཞུང་གིས་ཨེ་ཤེ་ཡའི་ས་ཁུལ་གཞན་ལ་བཙན་འཛུལ་རང་བཞིན་གྱི་དམག་དོན་གྱི་བྱེད་སྒོ་མཚམས་བྱས་ཟིན་པ་མཚོན་གྱི་མེད་པ་རེད། ཁོང་གིས་ཐེ་ཝན་གྱི་འོས་བསྡུའི་མཇུག་འབྲས་ཀྱིས་ས་ཁུལ་ལ་ཤུགས་རྐྱེན་ཅི་ཐེབས་དེ་རྒྱ་ནག་གཞུང་གིས་ཐེ་ཝན་མཚོ་ཁུལ་དུ་གཉེར་བའི་བྱེད་བབས་ལ་རག་ལས་པ་རེད་ཅེས་དང་། ས་ཁུལ་གྱི་ཛ་དྲག་གི་གནས་སྟངས་ཞི་ལྷོད་ཡོང་སྲིད་ཀྱང་། ས་གནས་ཀྱི་ཛ་དྲག་གནས་སྟངས་ཡོངས་རྫོགས་རང་སར་ཞི་ཐུབ་རྒྱུ་ཁག་པོ་རེད་ཅེས་ཨ་རིའི་རླུང་འཕྲིན་ཁང་ལ་གསུངས་འདུག།