༄༅།། ཨ་མི་རི་ཀའི་གསར་འགྱུར་ལས་ཁང་ཁག་གི་མི་མང་ལ་བསམ་ཚུལ་དྲིས་པའི་གྲུབ་འབྲས་ཁག་འགའ་ཞིག་གི་ནང་དུ་སྲིད་འཛིན་ལས་ཐོག་ཇཱོ་བྷ་ཌན་ལ་མི་མང་འོས་འཕེན་མཁན་ཉུང་དུ་སོང་། སྲིད་འཛིན་ཟུར་པ་ཌོ་ནལ་ཊམ་ལ་མི་མང་འོས་ཤོག་འཕེན་མཁན་མང་དུ་འགྲོ་བཞིན་པའི་གནས་ཚུལ་ཐོན་འདུག ཕྱི་ཟླ་༡༡་པའི་ཚེས་༧་ཉིན་དངུལ་རྩའི་ཚགས་པར་ལ་གནས་ཚུལ་ཐོན་པ་ལྟར་ན། དམངས་གཙོ་ཚོགས་པའི་ཐབས་ཇུས་བ་ཚོས་སྲིད་འཛིན་ཟུར་པ་ཌོ་ནལ་ཊམ་ལ་ཁྲིམས་གཏུག་གི་ཁ་མཆུ་མང་པོ་ཡོད་ཀྱང་ལོ་རྗེས་མར་སྲིད་འཛིན་བྷ་ཌན་དང་ཌོ་ནལ་ཊམ་གཉིས་བསྐྱར་དུ་སྲིད་འཛིན་འོས་བསྡུར་འགྲན་ཞུགས་བྱ་དགོས་ཐུག་སྲིད་པའི་རྣམ་པ་ཞིག་འདུག དེང་སྐབས་ཨ་རིའི་རྒྱལ་ཡོངས་སུ་སྲིད་འཛིན་བྷ་ཌན་ལ་མི་མང་འོས་ཤོག་འཕེན་མཁན་བརྒྱ་ཆ་༤༠་ཐམ་པ་དང་སྲིད་འཛིན་ཟུར་པ་ཌོ་ནལ་ཊམ་ལ་མི་མང་འོས་ཤོག་འཕེན་མཁན་བརྒྱ་ཆ་༤༤་འདུག སྲིད་འཛིན་བྷ་ཌན་ལ་མི་མང་འོས་ཤོག་འཕེན་མཁན་མང་དུ་གཏོང་ཐབས་ཡག་པོ་ཞིག་མ་རྙེད་པར་དམངས་གཙོ་ཚོགས་པས་བློ་འཚབ་བྱེད་ཀྱི་ཡོད་པའི་གནས་ཚུལ་ཐོན་འདུག
དེ་རིང་གཟའ་མིག་དམར་ཉིན་ཨ་རིའི་ཝིར་ཇཱི་ཎི་ཡ་དང་ཨོ་ཧ་ཡོ། ཀན་ཊ་ཀི་དང་པེན་སིལ་ཝེ་ཎི་ཡ་བཅས་ལ་མངའ་སྡེ་གྲོས་ཚོགས་ཀྱི་འཐུས་མི་འོས་བསྡུ་བྱེད་ཀྱི་ཡོད་ཅིང་། མངའ་སྡེ་དེ་དག་གི་འོས་བསྡུའི་གྲུབ་འབྲས་ཀྱིས་༢༠༢༤་ལོའི་ཨ་རིའི་སྲིད་འཛིན་འོས་འདེམས་ཁ་ཕྱོགས་གང་འདྲ་ཞིག་ལ་འགྱུར་རྒྱུ་ཡིན་མིན། ཨ་མི་རི་ཀའི་སྲིད་དོན་ཚོགས་པ་གཉིས་ཀྱི་གང་ལ་སྲིད་འཛིན་དང་གྲོས་ཚོགས་གོང་འོག་གི་འཐུས་མིའི་འོས་བསྡུའི་རྒྱལ་ཁ་འཐོབ་རྒྱུ་ཡིན་མིན་ཚོད་དཔག་གང་འཚམ་ཞིག་བྱེད་ཐུབ། ལྷག་པར་དུ་མངའ་སྡེ་གྲོས་ཚོགས་ཀྱི་འཐུས་མིའི་འོས་བསྡུ་བརྒྱུད་ནས་ཨ་མི་རི་ཀའི་མི་དམངས་རྣམས་སྲིད་འཛིན་བྷ་ཌན་གྱི་རྒྱལ་ཁབ་འཛིན་སྐྱོང་ལ་བློ་ཁ་ཚིམས་ཡོད་མེད་ཤེས་རྟོགས་ཐུབ། མི་མང་གི་འོས་ཤོག་འཕེན་སྟངས་ལ་ངེས་གཏན་མེད་པའི་མངའ་སྡེ་ཁག་ཏུ་སྤྱི་མཐུན་ཚོགས་པར་རྒྱལ་ཁ་ཐོབ་ན་དམངས་གཙོ་ཚོགས་པར་སྔར་ལས་གནོན་ཤུགས་ཆེ་རུ་འགྲོ་རྒྱུ་གདོན་མི་ཟ། ཨ་མི་རི་ཀའི་སྲིད་དོན་ཚོགས་པ་གཉིས་ཀས་མངའ་སྡེ་ཁག་གི་འོས་བསྡུའི་གྲུབ་འབྲས་ལ་དོ་སྣང་ཆེན་པོ་བྱེད་ཀྱི་ཡོད་པའི་གནས་ཚུལ་ཐོན་འདུག
སྲིད་འཛིན་ཟུར་པ་ཨོ་བྷ་མའི་ཆབ་སྲིད་ཐབས་ཇུས་བ་ཌེ་ཝི་ཌི་ཨེག་སེལ་རོ་ཌིས་
གཟའ་མཇུག་དེར་སྲིད་འཛིན་ཟུར་པ་ཨོ་བྷ་མའི་ཆབ་སྲིད་ཐབས་ཇུས་བ་ཌེ་ཝི་ཌི་ཨེག་སེལ་རོ་ཌིས་དངུལ་རྩའི་ཚགས་པར་གྱི་གསར་འགོད་པར་སྲིད་འཛིན་བྷ་ཌན་སླར་ཡང་འདེམས་ཐོན་ཐུབ་རྒྱུ་ཐེ་ཚོམ་རེད། ཁོང་སྲིད་འཛིན་འོས་མིའི་ཁོངས་ནས་ཕྱིར་འཐེན་བྱ་དགོས། སྲིད་འཛིན་བྷ་ཌན་རྩིས་ལོག་ཐེབས་ཀྱི་ཡོད་པར་ང་ཚོས་སྣང་ཆུང་གཏོང་མི་ཉན་ཞེས་ཨེག་སི་དྲྭ་ཚིགས་སུ་འཕྲིན་ཐུང་ཞིག་སྤེལ། ནེའུ་ཡོག་དུས་བབ་ཚགས་པར་དང་སི་ཡ་ན་མཐོ་སློབ་ཁང་གིས་མི་མང་ལ་སྐད་ཆ་དྲིས་ནས་སྙན་ཐོ་བཏོན་པ་ལྟར་ན། ༢༠༢༠་ལོའི་སྲིད་འཛིན་འོས་བསྡུ་དེ་མཐའ་མཇུག་མངའ་སྡེ་དྲུག་གིས་ཐག་བཅད། ད་ལྟ་མངའ་སྡེ་དྲུག་པོ་དེའི་མངའ་སྡེ་ལྔའི་ནང་དུ་ཌོ་ནལ་ཊམ་ལ་མི་མང་འོས་ཤོག་འཕེན་མཁན་མང་བ་ཡོད་པའི་གནས་ཚུལ་ཐོན། ཨོ་བྷ་མའི་དུས་ཀྱི་འོས་བསྡུའི་ཐབས་ཇུས་བ་ཇིམ་མེ་སི་ནས་སྲིད་འཛིན་འོས་བསྡུ་ལོ་རྗེས་མའི་ཕྱི་ཟླ་༡༡་པར་བྱེད་ཀྱི་ཡོད་པ་རེད། ལོ་གཅིག་གི་སྔོན་དུ་མི་མང་ལ་སྐད་ཆ་དྲིས་ནས་སྲིད་འཛིན་འོས་བསྡུའི་གྲུབ་འབྲས་ཤེས་རྟོགས་མི་ཐུབ་ཅེས་དགག་པ་བརྒྱབ།།
ཨོ་བྷ་མའི་དུས་ཀྱི་འོས་བསྡུའི་ཐབས་ཇུས་བ་ཇིམ་མེ་སི་ནས་
ཕྱི་ཟླ་༡༡་པའི་ཚེས་༦་ཉིན་ཝ་ཤིང་ཊོན་ཡིག་ཟམ་ཚགས་པར་ལ་གནས་ཚུལ་སྤེལ་བ་ལྟར་ན། དམངས་གཙོ་ཚོགས་པའི་ནང་ཁུལ་དུ་སྲིད་འཛིན་བྷ་ཌན་དགུང་ལོ་བགྲེས་དྲགས་པ་དང་སྲིད་འཛིན་གཞོན་པར་འཇོན་ཐང་མི་འདུག ཁོང་གཉིས་བསྐྱར་དུ་སྲིད་འཛིན་གཙོ་གཞོན་གྱི་འོས་མིར་མ་ལངས་ན་ལེགས། དམངས་གཙོ་ཚོགས་པས་འོས་མི་གསར་པ་གཉིས་གདམ་རྒྱུ་ཐབས་མཁས་ཡིན་པའི་གླེང་སློང་བྱ་རྒྱུ་ཤུགས་ཆེ་རུ་ཕྱིན་ཡོད་པར་མ་ཟད། ཉམས་ཞིབ་པ་ཁག་ཅིག་གིས་སྲིད་འཛིན་བྷ་ཌན་ལ་མི་མང་འོས་ཤོག་འཕེན་མཁན་མང་དུ་འགྲོ་རྒྱུ་ཁག་པོ་རེད། ལོ་རྗེས་མར་ཌོ་ནལ་ཊམ་བསྐྱར་དུ་སྲིད་འཛིན་ལ་འདེམས་ཐོན་འབྱུང་རྒྱུའི་གོ་སྐབས་འདུག་ཅེས་བསྟན། ནེའུ་ཡོག་དུས་བབ་ཚགས་པར་དང་སི་ཡ་ན་མཐོ་སློབ་ཁང་གིས་མི་མང་སྐད་ཆ་འདྲི་ཡུལ་དེ་ཚོར་ཇཱོ་བྷ་ཌན་མ་ཡིན་པའི་དམངས་གཙོ་ཚོགས་པའི་སྲིད་འཛིན་འོས་མི་གཞན་ཞིག་བྱུང་ན་འོས་ཤོག་འཕེན་རྒྱུ་ཡིན་ནམ་ཞེས་དྲིས། མི་མང་སྐད་ཆ་འདྲི་ཡུལ་དེ་དག་གི་གྲས་སུ་དམངས་གཙོ་ཚོགས་པའི་འོས་མི་གཞན་པ་དེར་ཌོ་ནལ་ཊམ་ལས་འོས་ཤོག་འཕེན་མཁན་མི་གྲངས་བརྒྱ་ཆ་༡༢་མང་བ་ཡོད་པའི་གནས་ཚུལ་ཐོན་འདུག
མཱི་ཤཱི་གྷན་མངའ་སྡེའི་སྤྱི་ཁྱབ་གྷ་ར་ཆིན་ཝི་ཊི་མན
ཨ་མི་རི་ཀའི་ལམ་སྲོལ་ལ་སྲིད་འཛིན་ལས་ཐོག་དེ་བསྐྱར་དུ་སྲིད་འཛིན་འོས་བསྡུར་འགྲན་ཞུགས་བྱེད་ཆོག་པ་དང་སྲིད་འཛིན་བྷ་ཌན་གྱིས་རང་མོས་ཐོག་ཏུ་སྲིད་འཛིན་འོས་མིའི་ཁོངས་ནས་ཕྱིར་འཐེན་མ་བྱས་ཚེ། དམངས་གཙོ་ཚོགས་པས་སྲིད་འཛིན་བྷ་ཌན་ལ་བཙན་སྐུལ་བྱས་ནས་སྲིད་འཛིན་འོས་མི་ནས་ཕྱིར་འཐེན་བྱེད་དུ་འཇུག་དཀའ། སྲིད་འཛིན་བྷ་ཌན་གྱིས་ལོ་འདིའི་ཕྱི་ཟླ་༨་པ་ནས་བསྐྱར་དུ་སྲིད་འཛིན་འོས་བསྡུར་འགྲན་ཞུགས་བྱ་རྒྱུ་ཡིན་ཞེས་བསྒྲགས། ཉམས་ཞིབ་པ་ཁག་ཅིག་གིས་སྲིད་འཛིན་བྷ་ཌན་ཕྱིར་འཐེན་བྱས་ན་ཚབ་དེར་ཁེ་ལི་ཧྥོར་ཎི་ཡ་མངའ་སྡེའི་སྤྱི་ཁྱབ་གྷེ་ཝིན་ནེའུ་སོམ་དང་མཱི་ཤཱི་གྷན་མངའ་སྡེའི་སྤྱི་ཁྱབ་གྷ་ར་ཆིན་ཝི་ཊི་མན་སོགས་གདམ་ཆོག ནེའུ་སོམ་དང་ཝི་ཊི་མན་གཉིས་ཀར་ཌོ་ནལ་ཊམ་ལས་འོས་ཤོག་འཕེན་མཁན་མང་འབྱུང་གི་རེད། ད་སྔ་ཇི་ལྟར་བྱས་ཀྱང་དམངས་གཙོ་ཚོགས་པར་སྲིད་འཛིན་གཙོ་གཞོན་གཉིས་ཀྱི་འོས་མི་ལོ་ན་རྒས་དྲགས་པ་མ་ཡིན་པ་དང་མི་མང་གི་ཡིད་སེམས་འགུགས་ཐུབ་པའི་འོས་མི་ཞིག་རྙེད་ཀྱི་མེད་པའི་གནས་ཚུལ་ཐོན་འདུག
ཁེ་ལི་ཧྥོར་ཎི་ཡ་མངའ་སྡེའི་སྤྱི་ཁྱབ་གྷེ་ཝིན་ནེའུ་སོམ
ནེའུ་ཡོག་དུས་བབ་ཚགས་པར་དང་སི་ཡ་ན་མཐོ་སློབ་ཁང་གིས་མི་མང་སྐད་ཆ་འདྲི་ཡུལ་དེ་ཚོར་ཌོ་ནལ་ཊམ་མ་ཡིན་པའི་སྤྱི་མཐུན་ཚོགས་པའི་སྲིད་འཛིན་འོས་མི་གཞན་ཞིག་ལ་འོས་ཤོག་འཕེན་རྒྱུ་ཡིན་ནམ་ཞེས་དྲིས། མི་མང་སྐད་ཆ་འདྲི་ཡུལ་དེ་དག་གི་གྲས་སུ་ཌོ་ནལ་ཊམ་མ་ཡིན་པའི་སྤྱི་མཐུན་ཚོགས་པའི་འོས་མི་གཞན་པ་དེར་འོས་ཤོག་འཕེན་མཁན་མི་གྲངས་བརྒྱ་ཆ་༡༦་མང་བ་ཡོད་པ་ཤེས་རྟོགས་བྱུང་ཞིང་། ཌོ་ནལ་ཊམ་མེད་ན་སྤྱི་མཐུན་ཚོགས་པར་དགེ་མཚན་ཆེ་བ་ལྟར་ཇཱོ་བྷ་ཌན་མེད་ན་དམངས་གཙོ་ཚོགས་པ་ལའང་ཕན་ཐོགས་ཡོད་པའི་གནས་ཚུལ་ཐོན་འདུག སྤྱི་མཐུན་ཚོགས་པར་མཚོན་ན་ལྷོ་ཁེ་རོ་ལེ་ན་མངའ་སྡེའི་སྤྱི་ཁྱབ་ཟུར་པ་ཎི་ཀི་ཧེ་ལི་(Nikki Haley)་སོགས་གདམ་ཀ་གཞན་པ་ཡོད་ཀྱང་དམངས་གཙོ་ཚོགས་པའི་ཁོངས་ནས་སྲིད་འཛིན་བྷ་ཌན་གྱི་ཁ་གཏད་དུ་ལངས་ཕོད་མཁན་མ་ཐོན། ཨ་རིའི་རྒྱལ་ཡོངས་སུ་ཎི་ཀི་ཧེ་ལིར་སྲིད་འཛིན་བྷ་ཌན་ལས་འོས་ཤོག་བརྒྱ་ཆ་༤་དང་སྲིད་འཛིན་ཟུར་པ་ཌོ་ནལ་ཊམ་ལས་འོས་ཤོག་བརྒྱ་ཆ་༨་མང་བ་ཐོབ་ཀྱི་ཡོད་པ་བསམ་ཚུལ་འདྲི་ཞིབ་ཁག་བྱས་ནས་ཤེས་རྟོགས་བྱུང་འདུག
ལྷོ་ཁེ་རོ་ལེ་ན་མངའ་སྡེའི་སྤྱི་ཁྱབ་ཟུར་པ་ཎི་ཀི་ཧེ་ལི་
སྤྱི་མཐུན་ཚོགས་པའི་སྲིད་འཛིན་འོས་མི་གཞན་པ་ཞིག་ནི་རོན་ཌི་སན་ཊི་སི་ཡིན་ཞིང་། ཁོང་༢༠༢༢་ལོར་ཧྥུ་ལོ་རི་ཌ་མངའ་སྡེའི་སྤྱི་ཁྱབ་ལ་འོས་འདེམས་བྱུང་། སྤྱི་མཐུན་ཚོགས་པའི་ཚོགས་མི་ཚོས་རོན་ཌི་སན་ཊི་སི་༢༠༢༤་ལོར་སྤྱི་མཐུན་ཚོགས་པའི་སྲིད་འཛིན་འོས་མིར་འདེམས་བསྐོ་བྱ་དགོས། ཁོང་གིས་སྲིད་འཛིན་བྷ་ཌན་ཕམ་ཉེས་གཏོང་ཐུབ་རྒྱུའི་ཚོད་དཔག་བྱས་མོད། ད་ལྟ་ཨ་རིའི་རྒྱལ་ཡོངས་སུ་རོན་ཌི་སན་ཊི་ལ་སྲིད་འཛིན་བྷ་ཌན་ལས་མི་མང་འོས་ཤོག་འཕེན་མཁན་བརྒྱ་ཆ་གཅིག་ཡས་མས་ཤིག་མ་གཏོགས་མང་བ་མེད་པ་ར་འཕྲོད། སྤྱི་མཐུན་ཚོགས་པའི་སྲིད་འཛིན་འོས་མི་འདེམས་བསྐོ་བྱས་པའི་དུས་སུ་ཎི་ཀི་ཧེ་ལི་གདམ་རྒྱུ་ཡིན་མིན་ནི་སུ་གཅིག་ཀྱང་བཤད་མི་ཐུབ་པའི་གནད་དོན་ཞིག་ཏུ་གྱུར། ཨ་མི་རི་ཀའི་གྲོང་གསེབ་ཁག་དང་ཡེ་ཤུའི་ཆོས་ལུགས་ཀྱི་ལྟ་བ་མཁྲེགས་འཛིན་པ། མི་རིགས་དཀར་པོ་མཆོག་འཛིན་པ་དང་ཕྱི་མི་གཞིས་ཆགས་པ་ཚོར་སྡང་ཟུག་བྱེད་མཁན་ཚོའི་གྲས་སུ་ཌོ་ནལ་ཊམ་ལ་རྒྱབ་སྐྱོར་ཤུགས་ཆེན་པོ་ཡོད་པའི་གནས་ཚུལ་ཐོན་འདུག
ཧྥུ་ལོ་རི་ཌ་མངའ་སྡེའི་སྤྱི་ཁྱབ་རོན་ཌི་སན་ཊི་སི་
ཕྱི་ཟླ་༡༡་པའི་ཚེས་༧་ཉིན་ཨ་རིའི་པོ་ལི་ཊི་ཀོ་གསར་ཁང་གིས་གནས་ཚུལ་སྤེལ་བ་ལྟར་ན། དམངས་གཙོ་ཚོགས་པའི་འོས་བསྡུའི་ཐབས་ཇུས་བ་ཚོས་བྷ་ཌན་གྱི་འོས་བསྡུའི་ལས་འགུལ་ཁང་དང་དམངས་གཙོ་ཚོགས་པའི་རྒྱལ་ཡོངས་ལྷན་ཚོགས་ལ་ལོ་འདིར་ཨ་སྒོར་ས་ཡ་༧་འགྲོ་གྲོན་བཏང་ནས་བརྙན་འཕྲིན་ནང་དུ་སྲིད་འཛིན་བྷ་ཌན་གྱི་བྱས་རྗེས་དང་གྲུབ་འབྲས་སོགས་བཟང་ཕྱོགས་ཀྱི་དྲིལ་བསྒྲགས་བྱ་དགོས། ཌོ་ནལ་ཊམ་ཞེས་མིང་བཏོན་ནས་སྐྱོན་བརྗོད་དང་ཉེས་སྐྱོན་ཐེར་འདོན་གྱི་དྲིལ་བསྒྲགས་བྱ་རྒྱུར་ཨ་སྒོར་འབུམ་༡་ལས་ཉུང་བ་ཐོངས་ཞེས་ཐབས་ཇུས་བསླབས། ད་ལོའི་འགོ་སྟོད་ནས་སྲིད་འཛིན་བྷ་ཌན་གྱི་འོས་བསྡུའི་དྲིལ་བསྒྲགས་ལས་འགུལ་རུ་ཁག་གིས་ཌོ་ནལ་ཊམ་ལ་རྩོད་པ་བརྒྱབ་ནས་དྲིལ་བསྒྲགས་བྱ་རྒྱུ་དགོས་པ་མི་འདུག སྲིད་འཛིན་བྷ་ཌན་གྱིས་ཨ་རིའི་དཔལ་འབྱོར་སླར་གསོ་དང་པྲོག་དབྱིབས་ནད་ཡམས་བཀག་སྡོམ། ཨ་མི་རི་ཀས་འགོ་ཁྲིད་ནས་འཛམ་གླིང་གི་དམངས་གཙོའི་ལམ་ལུགས་སྲ་བརྟན། ཕུ་ཊིན་དང་ཞིས་ཅིན་ཕིང་སོགས་འཛམ་གླིང་གི་སྲིད་དབང་སྒེར་གཅོད་པ་ཚོར་ཁ་གཏད་བཅག་པ་རྣམས་གཙོ་འཛོན་བྱས་ནས་དྲིལ་བསྒྲགས་བྱ་དགོས་པའི་ཐབས་ཇུས་གཏན་འབེབས་བྱས་ཡོད་པའི་གནས་ཚུལ་ཐོན་འདུག