རྒྱ་ནག་གཞུང་གིས་བོད་མིའི་སྡོད་ཁྱིམ་མང་པོའི་མཆོད་ཁང་སྔོག་བཤེར་གྱིས་༧གོང་ས་མཆོག་གི་སྐུ་དཔར་བཙན་འཕྲོག

རྒྱ་ནག་གཞུང་གིས་བོད་མིའི་སྡོད་ཁྱིམ་མང་པོའི་མཆོད་ཁང་སྔོག་བཤེར་གྱིས་༧གོང་ས་མཆོག་གི་སྐུ་དཔར་བཙན་འཕྲོག

བོད་ནས་གནས་ཚུལ་མཁོ་སྤྲོད་བྱས་དོན་ལ་ དེང་སྐབས་བོད་ནང་གི་ཡུལ་སྡེ་འཚོ་བ་ཁ་ཤས་ནང་རྒྱ་ནག་གཞུང་གི་མི་སྣ་སླེབས་ནས་མཆོད་ཁང་སྔོག་བཤེར་བྱེད་བཞིན་པ་མ་ཟད། དགེ་འདུན་པའི་ལག་འཁྱེར་ཁ་པར་ཐོ་འགོད་སོགས་བྱེད་ཀྱི་འདུག་ཅེས་འགྲེལ་བརྗོད་བྱས་འདག

དེ་ཡང་བོད་ནས་བདེ་འཇགས་ཆེད་མིང་སྨོས་བྱེད་འདོད་མེད་མཁན་ཞིག་གིས་འདི་ག་ཨ་རིའི་རླུང་འཕྲིན་ཁང་ལ་བརྗོད་དོན་ལྟར་ན་འབའ་རྫོང་དང་རྩི་ཀོར་ཐང་རྫོང་སོགས་སུ་ས་གནས་རྫོང་ཉེན་རྟོག་པ་གཙོས་སྲིད་གཞུང་ལས་བྱེད་མི་སྣས་བསྐོར་བ་བྱས་ནས་བཞུགས་སྒམ་ཅན་གྱི་རླུང་འཁོར་སྐོར་ཡོང་ནས་བོད་རིགས་སྡོད་ཁྱིམ་ཚང་མའི་མཆོད་ཁང་ལ་སྔོག་བཤེར་བྱེད་ཀྱི་འདུག་པ་དང་། མཆོད་ཁྲིའི་ནང་༧གོང་ས་༧སྐྱབས་མགོན་ཆེན་པོ་མཆོག་སྐུ་ན་ཕྲ་བའི་དུས་ཀྱི་སྐུ་དཔར་དང་། ཡང་ན་ཉེ་དུས་ཀྱི་སྐུ་དཔར་ཡོད་པ་ཚང་མ་བཙན་འཕྲོག་བྱས་ནས་འཁྱེར་གྱི་འདུག་ཅེས་འགྲེལ་བརྗོད་བྱས་འདུག

མུ་མཐུད་བརྗོད་དོན། སྤྱིར་ན་སྔར་ལོར་དགུན་ཁའི་དུས་སུ་དེ་ལྟར་ཐེངས་གཅིག་སྔོག་བཤེར་བྱས་ཏེ་སྐུ་དཔར་ཚང་མ་བཙན་འཕྲོག་བྱས་ཡོད་པ་དང་། ད་ལྟ་ཡང་བསྐྱར་སྔོག་བཤེར་བྱེད་ཀྱི་འདུག འདི་ནི་རྒྱ་ནག་སྲིད་གཞུང་གོང་རིམ་ནས་བཀའ་ཕབ་སྟེ་ལག་བསྟར་བྱས་པའི་སྲིད་ཇུས་ཤིག་ཡིན་མིན་གསལ་ཁ་མིན་འདུག་ཀྱང་། མང་ཚོགས་ནང་གླེང་སློང་བྱས་བ་ལྟར་ན། ཁུལ་དང་རྫོང་རིམ་པའི་དཔོན་རིགས་ཚོའི་དེ་ལྟར་མང་ཚོགས་ཀྱི་ལག་ནས་བཙན་འཕྲོག་བྱས་བའི་སྐུ་དཔར་དེ་དག་སྲིད་གཞུང་གི་ཁང་པའི་ནང་བཞག་སྟེ་གོང་རིམ་ལ་ང་ཚོས་ཧུར་ཐག་གིས་བྱ་བ་བསྒྲུབས་ཡོད་ལུགས་དང་། དེ་འབྲེལ་གྱི་གཞུང་བཞེས་བྱས་པའི་ཅ་དངོས་རྣམས་དཔར་བླངས་ནས་གོང་རིམ་ལ་ཡར་ཞུ་བྱས་བ་ཡིན་ན་རང་ཉིད་ཀྱི་གོ་གནས་མཐོ་རུ་འགྲོ་བའམ་ཡང་ན་གོང་རིམ་ནས་བསྟོད་སྔགས་ཐོབ་ཆེད་རེད་ཅེས་བརྗོད་ཀྱི་འདུག གང་ལྟར་མང་ཚོགས་ཀྱི་ངོ་ལོག་མ་བྱས་བར་ཁོང་ཚོའི་འདོད་པ་ལྟར་རང་རང་གི་མཆོད་ཁང་ནང་སྔོག་བཤེར་བྱེད་མི་འཇུག་ཐབས་མེད་རེད་ཅེས་དང་།

ཁོང་གིས་མུ་འཐད་བརྗོད་དོན་ལྟར་ན་ད་དུང་བྲག་དཀར་སྤྲེལ་རྫོང་དགོན་པ་དང་། འབའ་ཤིང་ཁྲི་དགོན་པ། ཨ་ཚོགས་དགོན་པ་སོགས་མཚོ་སྔོན་ཞིང་ཆེན་གྱི་ཁྱབ་ཁོངས་བོད་ཀྱི་དགོན་སྡེ་ཡོངས་སུ་ཉིན་འདི་གར་སྲིད་ཇུས་གསར་བ་ཞིག་སླེབས་འདུག སྲིད་ཇུས་དེ་ནི་དགོན་པའི་དགེ་འདུན་པ་དང་སྔགས་པ་ཚང་མའི་ལག་འཁྱེར་ཁ་པར་ཐོ་འགོད་བྱེད་ཀྱི་འདུག དཔེར་ན། སྐར་གསུམ་རྟགས་ཅན་དང་དཔའ་བྰེ་རྟགས་ཅན། བེའུ་བོ་རྟགས་ཅན་དང་། ཞོའུ་མུས་རྟགས་ཅན་སོགས་ལག་འཁྱེར་ཁ་པར་གང་བེད་སྤྱོད་གཏོང་གི་ཡོད་པ་དེ་དག་རེ་རེ་བཞིན་ཐོ་འགོད་བྱས་དང་བྱེད་བཞིན་པའི་སྒང་རེད། དེ་དང་ལྷན་དུ་རང་རང་གི་སྤྱི་མང་ཐོབ་ཐང་ཐོག་བཟོས་བའི་ཁ་པར་བྱང་བུའི་ཨང་གྲངས་ཚང་མ་ཐོ་འགོད་ཀྱང་བྱས་སོང་། ཡིན་ནའང་དམིག་གསལ་ལག་འཁྱེར་ཁ་པར་བཟུང་ཆོག་མིན་དང་ཡང་ན་ཁོང་ཚོའི་ཐོ་འགོད་བྱེད་དགོས་དོན་ཇི་ཡིན་གསལ་བཤད་བྱེད་ཀྱི་མིན་འདུག་ཅེས་འགྲེལ་བརྗོད་བྱེད་ཀྱི་འདུག

གནས་ཚུལ་མཁོ་སྤྲོད་པས་བརྗོད་དོན། དགོན་པར་ཞུགས་པའི་གྲ་པ་དང་སྔགས་པ་ཚང་མས་ཐོ་འགོད་ངེས་བར་བྱེད་དགོས་ཀྱི་འདུག་པར་བརྟེན་རྒྱུན་སྤྱོད་ལག་འཁྱེར་ཁ་པར་མང་པོ་ཞིག་བེད་སྤྱོད་གཏོང་རྒྱུར་ཡང་འཛེམས་ཟོན་བྱེད་ཀྱི་འདུག སྤྱིར་ན་ཁྲིམས་འགལ་གྱི་བྱ་བ་སུས་ཀྱང་སྒྲུབ་གི་ཡོད་པ་མ་རེད་མོད། འདི་འདྲའི་དམ་བསྒྲགས་ཀྱི་གནས་ལ་སླེབས་དུས་དོན་དངོས་ལ་བསམ་ཡུལ་དུ་མི་བཤོང་བ་ཞིག་ཡིན་པ་དང་། གནས་ཚུལ་འདི་ནི་ཁ་སང་དེ་རིང་བྱུང་དང་བྱུང་བཞིན་པའི་གནས་སྟངས་ཤིག་ཡིན་པ་དང་མ་འོངས་བར་འདི་ལས་ལྷག་པའི་དམ་བསྒྲགས་ཀྱི་གནས་ཚུལ་ཅི་འདྲ་ཞིག་ཡོང་མིན་སུས་ཀྱང་བཤད་ཐུབ་ཀྱི་མ་རེད། དོན་དམ་ལོ་རེ་ནས་ལོ་རེར་རྒྱལ་ཁབ་ཀྱི་མི་མང་ལ་དམ་བསྒྲགས་ཅེ་ཆེ་རེད་འདུག་ཅེས་སོགས་བརྗོད་ཀྱི་འདུག

གནས་ཚུལ་མཁོ་སྤྲོད་པས་བཤད་ལས་བཏུས།

གསར་འགོད་པ། ཀུན་བཟང་བསྟན་འཛིན།

ཞུ་དག་རྩོམ་སྒྲིག་པ། རྣམ་རྒྱལ་ཤཱསྟྲཱི།