༄༅།། བོད་ལྗོངས་ནག་ཆུ་ཕྱོགས་སུ་བོད་པ་ལས་བྱེད་པ་དང་དམར་ཤོག་ཚོགས་པའི་ཚོགས་མི་ཚོ་ཆོས་ལུགས་ཀྱི་བྱེད་སྒོ་ཁག་ལ་མཉམ་ཞུགས་བྱེད་མི་ཆོག་པ་དང་གྲྭ་བཙུན་སྔགས་གསུམ་གྱི་སྤུན་མཆེད་ཡོད་མཁན་ཚོར་དོགས་ཟོན་ནན་པོ་བྱེད་ཀྱི་ཡོད་པའི་གནས་ཚུལ་ཐོན་འདུག ཉེ་ཆར་རྒྱ་ནག་གཞུང་གིས་བོད་ནང་གི་མཚོ་སྔོན་ཞིང་ཆེན་ཐུན་ཏེ་རྫོང་ངམ། གད་པ་སུམ་མདོ་རྫོང་གི་སྤྱི་བདེ་ལས་ཁུངས་ཀྱི་ཆབ་སྲིད་འཐུས་མི་ལྕགས་ཐར་འབུམ་དང་བོད་ལྗོངས་ནག་ཆུ་གྲོང་ཁྱེར་སྒྲིག་ཁྲིམས་ལྟ་ཞིབ་ཁང་། གྲོང་ཁྱེར་རང་བྱུང་ཐོན་ཁུངས་ལས་ཁུངས་ཀྱི་འགོ་ཁྲིད་གཞོན་པ་ཟླ་བ་དོན་གྲུབ། དིང་རི་རྫོང་དམར་ཤོག་ཚོགས་པའི་རྒྱུན་ལས་དང་འཐབ་ཕྱོགས་གཅིག་གྱུར་ཁང་གི་འགོ་ཁྲིད་བུ་ཆུང་ཚེ་རིང་བཅས་བོད་པ་འགོ་ཁྲིད་གསུམ་རྒྱ་ནག་དམར་ཤོག་ཚོགས་པར་བློ་སེམས་དཀར་པོ་མིན་པ་དང་དྲང་པོ་མིན་པ། ཆབ་སྲིད་ཀྱི་རྩ་དོན་མེད་པ་དང་ཆབ་སྲིད་ཀྱི་མཐའ་ཚད་ལས་བརྒལ་བ། ཁོ་ཚོས་ཆོས་ལ་དད་པ་བྱེད་ཀྱི་ཡོད་པ་སོགས་ཀྱི་ནག་ཉེས་བཙུགས་ནས་ལས་གནས་ནས་ཕྱིར་འབུད་དང་རྒྱུ་དངོས་ཀྱང་གཞུང་བཞེས་བཏང་ཡོད་པའི་གནས་ཚུལ་ཐོན།།
ད་ལྟ་གསར་དུ་བོད་ལྗོངས་ནག་ཆུ་ཁུལ་གྱི་བོད་པ་མིང་དངོས་སུ་བརྗོད་འདོད་མེད་པ་ཞིག་གིས་འདི་ག་རླུང་འཕྲིན་ཁང་གི་གསར་འགོད་པར་བརྗོད་དོན་ལྟར་ན། བོད་ལྗོངས་ནག་ཆུ་ས་ཁུལ་གྱི་བོད་པ་རྒྱ་གཞུང་གི་ལས་བྱེད་པ་དང་དམར་ཤོག་ཚོགས་པའི་ཚོགས་མི་ཡིན་པའི་ཁྱིམ་ཚང་ཁག་གི་རྒྱབ་རྟེན་ལ་དགེ་འདུན་པ་དང་བཙུན་མ། སྔགས་པ་སོགས་ཡོད་ན་དམར་ཤོག་ཚོགས་པའི་ཁོངས་ནས་ཕྱིར་འབུད་གཏོང་རྒྱུའི་གནས་ཚུལ་མང་པོ་འབྱུང་གི་འདུག ལྷག་པར་དུ་ནག་ཆུ་གྲོང་ཁྱེར་སྒྲིག་ཁྲིམས་ལྟ་ཞིབ་ལས་ཁུངས་དང་གྲོང་ཁྱེར་རང་བྱུང་ཐོན་ཁུངས་ལས་ཁུངས་ཀྱི་འགོ་ཁྲིད་གཞོན་པ་ཟླ་བ་དོན་གྲུབ་འཛིན་བཟུང་བྱས་པར་མ་ཟད། ད་ལྟའི་བར་དུ་གནས་ཚུལ་དེའི་རིགས་རྒྱུན་ཆད་མེད་པར་བྱུང་དང་འབྱུང་གི་འདུག ཟླ་བ་དོན་གྲུབ་ལས་གནས་ནས་ཕྱིར་འབུད་དང་འཛིན་བཟུང་བྱས་དོན་ནི་སྤུན་མཆེད་ཅིག་གྲྭ་པ་ཡིན་པའི་རྐྱེན་གྱི་རེད་ཅེས་མང་ཚོགས་ཀྱིས་གླེང་སློང་བྱེད་བཞིན་འདུག མི་འཛིན་བཟུང་གི་གནས་ཚུལ་རྣམས་ཕྱིར་བསྒྲགས་མ་བྱས་པར་གསང་བ་དམ་པོ་བྱེད་ཀྱི་འདུག་ཅེས་བརྗོད་སོང་།།
བོད་ཀྱི་འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་ལྟེ་ཁང་གིས་སྤེལ་བའི་གནས་ཚུལ་ལྟར་ན། ཉེ་ལམ་རྒྱ་ནག་གཞུང་གིས་དབྱེ་བགོ་བྱེད་ཡོད་པའི་མཚོ་སྔོན་ཞིང་ཆེན་གྱི་མགོ་ལོག་ཁུལ། དར་ལག་རྫོང་ཁོངས་ཀྱི་བོད་པ་ལས་བྱེད་པ་ཚོས་ལག་ཏུ་ཕྲེང་བ་འཛིན་མི་ཆོག་པ་དང་ཕྱག་འཚལ་བ། ཆོས་ཞུ་བ་སོགས་བྱེད་མི་ཆོག་ཅིང་། ཁུལ་དེའི་བོད་པ་ལས་བྱེད་པ་ཚོའི་ཁྱིམ་དུ་སྔོག་བཤེར་ནན་པོ་བྱས་ཤིང་། ཁོ་ཚོའི་གཞུག་ལ་ལྐོག་ཏུ་སོ་མྱུལ་བཏང་སྟེ་ལས་བྱེད་པ་ཚོའི་འགྲོ་འདུག་སྤྱོད་གསུམ་ལ་ལྟ་རྟོག་དང་ཉུལ་ཞིབ་ནན་པོ་བྱེད་ཀྱི་ཡོད་པ་འཁོད་འདུག ཉམས་ཞིབ་པ་ཉི་མ་འོད་གསལ་གྱིས་རྒྱ་གཞུང་གིས་ལག་བསྟར་བྱེད་བཞིན་པའི་སྲིད་ཇུས་དེའི་རྒྱབ་ལྗོངས་དང་གནད་འགག་སོགས་གསལ་བཀྲོལ་བྱས་འདུག་པའི་སྐོར། བལ་ཡུལ་ནས་འདི་གའི་གསར་འགོད་པ་ཀུན་བཟང་བསྟན་འཛིན་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།
Your browser doesn’t support HTML5
བོད་པ་དམར་ཤོག་ཚོགས་མི་ཚོ་ཆོས་ལུགས་བྱེད་སྒོར་ཞུགས་མི་ཆོག་པ།