༄༅།ཟླ་ཉིང་ཕྱི་ཟླ་༡༡པའི་ནང་ཨ་རིའི་གྲོང་ཁྱེར་སཱན་ཕཱེན་སི་སི་ཀོའི་ནང་དུ་ཨ་རིའི་སྲིད་འཛིན་ཇཱོ་བྷ་ཌན་དང་མཇལ་འཕྲད་ཀྱི་སྐབས་སུ་རྒྱ་ནག་གི་འགོ་ཁྲིད་ཞི་ཅིན་ཕིང་གིས་ཐེ་ཝན་སྐོར་གྱི་ཨ་རིའི་གཞུང་གི་གསལ་བསྒྲགས་ཁག་ནང་ཐེ་ཝན་གྱི་ད་ལྟའི་གནས་བབ་ལ་འགྱུར་བ་གཏོང་མི་རུང་ཟེར་བ་སོགས་པའི་ ནང་དོན་གྱི་ཚབ་ཏུ་ཐེ་ཝན་རང་བཙན་ལ་ངོ་རྒོལ་ཡོད་ཅེས་གསལ་སྟོན་དགོས་པའི་རེ་བསྐུལ་ཞུས་ཡོད་པའི་སྐོར་སྲིད་འཛིན་བྷ་ཌན་དང་ཞི་ཅིན་ཕིང་གི་མཇལ་འཕྲད་སྐབས་ཀྱི་ནང་མོལ་གྱི་གནས་ཚུལ་མཁྱེན་རྟོགས་ཡོད་པའི་ཨ་རིའི་གཞུང་འབྲེལ་མི་སྣ་གཉིས་ཀྱིས་ཕྱི་བསྒྲགས་གནང་ཡོད་པ་རེད།
དངོས་སུ་མིང་འདོན་མ་གནང་བའི་ཨ་རིའི་མཐོ་རིམ་མི་སྣ་གཉིས་ཀྱིས་སྐབས་དེར་ཞི་ཅིན་ཕིང་དང་རྒྱ་ནག་གི་གཟིགས་སྐོར་ཚོགས་པའི་ཁོངས་སུ་ཡོད་པའི་རྒྱ་ནག་གི་གཞུང་འབྲེལ་མི་སྣ་ཚོས་ཨ་རིའི་གཞུང་ནས་ཐེ་ཝན་རང་བཙན་ལ་ངོ་རྒོལ་ཡོད་ཅེས་གསལ་སྟོན་དགོས་པའི་རེ་བ་ཞུས་པ་མ་ཟད་དེ་ནས་བཟུང་རྒྱ་ནག་གི་འགོ་ཁྲིད་ཚོས་སྐབས་དེའི་རེ་བསྐུལ་ལྟར་ལག་ལེན་དགོས་པའི་སྐོར་ནན་བསྐུལ་ཡང་ཡང་བྱེད་ཀྱི་ཡོད་པ་སོགས་ཕྱི་བསྒྲགས་གནང་བ་དང་།
འོན་ཀྱང་ཨ་རིའི་གཞུང་ནས་རྒྱ་ནག་གི་རེ་འདུན་དེར་ཁས་ལེན་གནང་མེད་པ་སོགས་རོ་ཌ་སེ་གསར་ཁང་གིས་འབྲེལ་ཡོད་མི་སྣ་གཞན་ཞིག་གིས་ར་འཕྲོད་གནང་བ་སོགས་ལུང་འདྲེན་གྱིས་གནས་ཚུལ་སྤེལ་ཡོད་པ་རེད།
གནད་དོན་དེའི་སྐོར་ཕོ་བྲང་དཀར་པོས་ལན་འདེབས་ཆེད་ཀྱི་གསལ་བསྒྲགས་ཤིག་སྤེལ་བའི་ནང་སྲིད་འཛིན་ཇཱོ་བྷ་ཌན་དང་སྲིད་འཛིན་སྐུ་གཞོན་ཁཱ་མ་ལཱ་ཧཱ་རེ་སེའི་གཞུང་འཛིན་ལྷན་ཁང་ནས་རྒྱ་ནག་གཅིག་ལ་ངོས་འཛིན་དང་ཐེ་ཝན་རང་བཙན་ལ་རྒྱབ་སྐྱོར་མེད་པའི་ཨ་རིའི་གཞུང་གི་དུས་ཡུན་རིང་པོའི་སྲིད་ཇུས་དེ་ཚོར་འགྱུར་བ་མེད་ཅེས་བཀོད་ཡོད་པ་ལས་ཐེ་ཝན་རང་བཙན་ལ་ངོ་རྒོལ་ཡོད་ཅེས་རྒྱ་ནག་གི་དགོས་འདུན་ལྟར་གསུངས་མེད་པ་རེད།
རྒྱ་ནག་གཞུང་གི་ཕྱི་སྲིད་ལྷན་ཁང་ནས་དེའི་སྐོར་གསར་འགོད་པའི་དྲི་བ་ལ་ལན་འདེབས་བྱེད་སྐབས་དེའི་སྐོར་ཨ་རིའི་གཞུང་ནས་ལན་འདེབས་ཁ་གསལ་ཞིག་བྱེད་དགོས་པ་ལས་རྒྱ་ནག་གཞུང་གི་ཐེ་ཝན་ཐད་ཀྱི་ལངས་ཕྱོགས་ནི་ཁ་གསལ་དང་འགྱུར་བ་མེད་ཅེས་བརྗོད་ཡོད་པ་རེད།
༡༩༤༩ལོར་རྒྱ་ནག་ནང་དམར་ཤོག་གུང་ཁྲན་ཏང་གིས་སྲིད་དབང་བཟུང་བའི་རྗེས་སུ་ཐེ་ཝན་མཚོ་གླིང་ནང་གནས་སྤོས་བྱས་སྟེ་རྒྱ་ནག་མི་སེར་རྒྱལ་ཁབ་ཞེས་འབོད་པའི་ཐོག་ནས་ཐེ་ཝན་ནི་བདག་དབང་དང་རང་བཙན་ལྡན་པ་ཞིག་ཡིན་ཞིང་རྒྱ་ནག་ལ་ཐེ་ཝན་ཐོག་ཐེ་བྱུས་བྱེད་དབང་མེད་ཅེས་ཐེ་ཝན་གཞུང་ནས་བརྗོད་ཀྱི་ཡོད་པ་རེད།
རྒྱ་ནག་གཞུང་གིས་ལོ་མང་རིང་ཨ་རིའི་གཞུང་ལ་ཐེ་ཝན་རང་བཙན་ལ་རྒྱབ་སྐྱོར་དང་ཐེ་ཝན་དང་ཕྱི་འབྲེལ་བཙུགས་མི་ཆོག་པའི་གནོན་ཤུགས་སྤྲོད་ཀྱི་ཡོད་ནའང་ཡུལ་གཉིས་ཀྱི་ཆེས་མཐོའི་འགོ་ཁྲིད་ཀྱི་མཇལ་འཕྲད་སྐབས་སུ་ཐེ་ཝན་རང་བཙན་ལ་ངོ་རྒོལ་ཡོད་པ་གསལ་སྟོན་བྱེད་དགོས་ཅེས་ཐད་ཀར་རེ་འདུན་ཞུས་པ་ལྟ་བུ་བྱུང་མྱོང་མེད།
ཨ་རིའི་གཞུང་ནས་༡༩༧༩ལོར་ཐེ་ཝན་དང་ཕྱི་འབྲེལ་མཚམས་འཇོག་བྱས་ཡོད་ཀྱང་ཐེ་ཝན་གྱི་དམངས་གཙོ་དང་རང་དབང་སྲུང་སྐྱོབ་བྱ་རྒྱུའི་ཞལ་བཞེས་ཀྱིས་ཐེ་ཝན་ལ་རང་སྲུང་ཆེད་ཀྱི་གོ་མཚོན་རོགས་རམ་སོགས་གནང་གི་ཡོད་པས་དེར་རྒྱ་ནག་ནས་མི་འདོད་པའི་ངོ་རྒོལ་ཤུགས་ཆེ་བྱེད་ཀྱི་ཡོད་པ་དང་།ཐེ་ཝན་མཚོ་གླིང་ཁུལ་དུ་སྡིག་སྐུལ་ཆེད་དུ་དྲག་པོའི་དམག་སྦྱོང་རིམ་པ་ཞིག་བྱེད་ཀྱི་ཡོད་པ་དང་།ལྷག་པར་དུ་ཞི་ཅིན་ཕིང་གི་གཞུང་འཛིན་བྱས་པའི་རྗེས་སུ་ཐེ་ཝན་རང་བཙན་ཤོག་ཁག་ལ་ཁ་གཏད་ཆེད་དུ་དམིགས་ནས་དམག་གི་སྡིག་སྐུལ་ཁག་ཤུགས་ཆེ་རུ་བཏང་གི་ཡོད་པ་རེད།