༄༅།། གཟའ་ལྷག་པའི་ཉིན་ཨ་རིའི་སྲིད་འཛིན་ཇཱོ་བྷ་ཌན་དང་རྒྱ་ནག་གི་འགོ་ཁྲིད་ཞིས་ཅིན་ཕིང་གཉིས་སན་ཧྥ་རན་སེ་སི་ཀོ་གྲོང་ཁྱེར་དུ་འཚོགས་བཞིན་པའི་ཨེ་ཤི་ཡ་དང་ཞི་བདེ་རྒྱ་མཚོའི་མངའ་ཁུལ་གྱི་ཡུལ་གྲུ་མཉམ་འབྲེལ་མཐུན་ཚོགས་ཀྱི་ཚོགས་ཆེན་ཞོར་དུ་ཐུག་འཕྲད་གྲོས་མོལ་བྱེད་ཀྱི་ཡོད་ཅིང་། ཕྱི་ཟླ་༡༡་པའི་ཚེས་༡༤་ཉིན་ཝ་ཤིང་ཊོན་ཡིག་ཟམ་ཚགས་པར་ལ་གནས་ཚུལ་ཐོན་པ་ལྟར་ན། རྒྱ་ནག་གི་དཔལ་འབྱོར་ཉམས་རྒུད་དང་ན་གཞོན་ལས་ཤོར་བའི་གྲངས་འབོར་ཇེ་མང་། ཨ་རི་དང་ནུབ་ཕྱོགས་རྒྱལ་ཁབ་ཁག་གིས་རྒྱ་ནག་ལ་ཚོང་འབྲེལ་བཅད། གཟའ་འཁོར་འདིའི་ཨ་རྒྱའི་ཆེས་མཐོའི་འགོ་ཁྲིད་ཟུང་གི་ཐུག་འཕྲད་གྲོས་མོལ་ནི་སྲིད་འཛིན་བྷ་ཌན་ལས་ཀྱང་ཞིས་ཅིན་ཕིང་ལ་དགོས་གལ་ཤིན་ཏུ་ཆེ། ཞིས་ཅིན་ཕིང་གིས་སྲིད་དབང་བཟུང་ནས་ལོ་༡༡་གི་རིང་དུ་ཕྱི་ནང་གཉིས་སུ་བྱུང་མྱོང་མེད་པའི་དཀའ་ངལ་ཞིག་འཕྲད་ཀྱི་འདུག ཁོ་པས་ཨ་རི་དང་ནུབ་ཕྱོགས་རྒྱལ་ཁབ་ལ་འབྲེལ་བ་ཡར་རྒྱས་གཏོང་དགོས་ཞེས་རྒྱལ་ནང་དུ་གནོན་ཤུགས་ཆེན་པོ་སྤྲོད་ཀྱི་ཡོད་པའི་གནས་ཚུལ་སྤེལ་འདུག
སན་ཧྥ་རན་སེ་སི་ཀོ་གྲོང་ཁྱེར་གྱི་ཚོགས་འདུ་དེ་ཞིས་ཅིན་ཕིང་གིས་རྒྱ་ནག་ལ་འཛིན་སྐྱོང་བྱེད་ཐུབ་ཀྱི་ཡོད་པ་དང་རྒྱ་ནག་གི་ཕྱི་འབྲེལ་ནང་དུ་གཙིགས་སུ་འཛིན་པའི་ཨ་མི་རི་ཀར་འབྲེལ་བ་ཡག་པོ་འཛིན་ཐུབ་ཀྱི་ཡོད་པ་སྟོན་པའི་གོ་སྐབས་ཤིག་རེད། ཞིས་ཅིན་ཕིང་ནས་གནད་དོན་ཁག་ཅིག་གི་ཐོག་ཏུ་སྲིད་འཛིན་བྷ་ཌན་ལ་གུ་བཤངས་བྱ་སྲིད། མེག་ཁེ་ན་མཐོ་སློབ་ཀྱི་སྲིད་དོན་ཚན་རིག་པ་པེ་མིན་ཞིན་ནས་ཞིས་ཅིན་ཕིང་གིས་རང་ལ་རྒྱལ་སྤྱིའི་ཐོག་ཏུ་མཐོང་འཇོག་ཐོབ་ཀྱི་ཡོད་པ་དང་དབང་ཐང་ཉམས་མེད་པ་སྟོན་དགོས་ཀྱི་ཡོད་པ་རེད། དེས་ན་གཟའ་འཁོར་འདིའི་ཆེས་མཐོའི་དབུ་ཁྲིད་གཉིས་ཀྱི་ཐུག་འཕྲད་དེ་ཞིས་ཅིན་ཕིང་ལ་དགོས་མཁོ་ཆེ་བ་འདུག ན་ནིང་གི་ཕྱི་ཟླ་༡༡་པ་དང་བསྡུར་ན་དེང་སྐབས་ཞིས་ཅིན་ཕིང་ཧ་ཅང་ཐབས་རྡུགས་ཀྱི་གནས་སྟངས་ཤིག་གི་འོག་ཏུ་ལྷུང་འདུག་ཅེས་བསྟན། ན་ནིང་ལོ་མཇུག་དེར་རྒྱ་ནག་མི་དམངས་ཀྱིས་ཞིས་ཅིན་ཕིང་གི་ནད་འགོག་སྲིད་ཇུས་ལ་ངོ་རྒོལ་བྱས་པ་ནི་༡༩༨༩་ལོར་གནམ་བདེ་སྒོ་མོ་ཆེའི་ཐང་དུ་སློབ་ཕྲུག་ཚོས་དམངས་གཙོའི་ལས་འགུལ་སྤེལ་བའི་རྗེས་སུ་བྱུང་མྱོང་མེད།།
ཚན་རིག་པ་པེ་མིན་ཞིན་
ད་ལོ་རྒྱ་ནག་དམར་ཤོག་གི་མཐོ་རིམ་འགོ་ཁྲིད་ཚོ་པེ་ཐེ་ཧེར་ཚོགས་འདུ་ཚོགས་ཏེ་ཞིས་ཅིན་ཕིང་གི་སྲིད་ཇུས་ལ་སྐྱོན་བརྗོད་དྲག་པོ་ཕོག ཟླ་ཤས་གོང་དུ་རྒྱ་ནག་གི་ཕྱི་སྲིད་བློན་ཆེན་ཆིང་ཀང་དང་དེའི་རྗེས་སུ་རྒྱལ་སྲུང་བློན་ཆེན་ལི་ཧྲང་ཧྥུ་གོ་གནས་ནས་ཕྱུང་། རྒྱ་ནག་གི་འཕུར་མདེལ་དང་མེ་སྒྱོགས་དཔུང་སྡེའི་འགོ་ཁྲིད་ཁག་ཅིག་འཛིན་བཟུང་བྱས་ནས་དམར་ཤོག་ཚོགས་པའི་ནང་ཁུལ་དུ་འཐབ་རྩོད་དྲག་པོ་ལངས། ཟླ་བ་སྔོན་མར་རྒྱ་ནག་གི་སྲིད་བློན་ཟུར་པ་ལི་ཁེ་ཆང་གྲོངས་པའི་རྒྱུ་རྐྱེན་ལ་དོགས་སློང་སྣ་ཚོགས་ཤིག་བྱེད་ཀྱི་ཡོད་པ་བཅས་ཀྱིས་ཞིས་ཅིན་ཕིང་ཀླུང་རྟ་ཆག་པའི་དུས་ཤིག་རེད། ཡིན་ནའང་ཞིས་ཅིན་ཕིང་གི་དཀའ་ངལ་གཙོ་བོ་རྒྱ་ནག་གི་ས་ཁང་ཚོང་ལས་མ་རྩ་བརྡིབས། དེ་བཞིན་ས་གནས་དངུལ་ཁང་མང་པོ་སྦོ་ལུག་སྟེ་མང་ཚོགས་ཀྱི་བཅོལ་དངུལ་རྣམས་སྤྲོད་རྒྱུ་མེད། རྒྱ་ནག་གི་ན་གཞོན་ཚོ་ལེབ་ཉལ་བྱས་པའམ། ཡང་ན་གཉེན་སྒྲིག་མི་བྱེད་པར་མཐའ་མཇུག་གི་མི་རབས་དེ་བྱ་དགོས་ཞེས་རྒྱ་ནག་གཞུང་ལ་ཞི་བའི་ངོ་རྒོལ་གྱི་ལས་འགུལ་སྤེལ་གྱི་ཡོད་པ་རེད་ཅེས་གནས་ཚུལ་སྤེལ་འདུག
ཝ་ཤིང་ཊོན་ཡིག་ཟམ་ཚགས་པར་ལ་མུ་མཐུད་དུ་གནས་ཚུལ་ཐོན་པ་ལྟར་ན། རྒྱ་ནག་གཞུང་གིས་སྒེར་པ་དང་ཕྱི་རྒྱལ་གྱི་བཟོ་ཚོང་ལས་ཁང་ཁག་ལ་དམ་དྲག་བྱ་རྒྱུ་ཤུགས་ཆེ་རུ་བཏང་སྟེ་སྒེར་པ་ཚོ་མགོ་མནན། ཕྱི་རྒྱལ་གྱི་བཟོ་ཚོང་ལས་ཁང་ཁག་ལ་གསང་ཉུལ་གྱི་ནག་ཉེས་བཙུགས་ནས་རྒྱ་ནག་གི་ཁྲོམ་རའི་ནང་དུ་ཚོང་ལས་གཉེར་དཀའ་བ་ཞིག་ཏུ་གྱུར། དེར་བརྟེན་ཕྱི་རྒྱལ་གྱི་བཟོ་ཚོང་ལས་ཁུངས་ཁག་རྒྱ་གར་དང་ཝི་ཏེ་ནམ། ཐེ་ཝན་དང་མེག་སི་ཀོ ལྷོ་ཤར་ཨེ་ཤི་ཡའི་རྒྱལ་ཁབ་ཁག་ལ་སྤོས་ནས་ཚོང་ལས་གཉེར། ༢༠༢༣་ལོའི་ཀོང་ཀྲུག་གི་ཚོང་འདུས་སྐབས་སུ་ཨ་རི་དང་ནུབ་ཕྱོགས་རྒྱལ་ཁབ་ཁག་ནས་རྒྱ་ནག་ལ་ཚོང་འབྲེལ་འཛུགས་མཁན་བརྒྱ་ཆ་༨༠་ཉུང་དུ་ཕྱིན་འདུག ལོ་འདིའི་ཀོང་ཀྲུག་གི་ཚོང་འདུས་ལ་ཞུགས་པའི་ཚོང་ཤག་མང་ཆེ་བ་ནི་ཨེ་ཤི་ཡ་དང་ལྷོ་ཨ་མི་རི་ཀ ཨ་ཧྥི་རི་ཀའི་རྒྱལ་ཁབ་ཁག་རེད། རྒྱ་ནག་གཞུང་གིས་དཔལ་འབྱོར་བརྒྱ་ཆ་༥་འཕེལ་རྒྱས་གཏོང་རྒྱུའི་དམིགས་འབེན་བཟུང་ཡོད་པ་འགྲུབ་དཀའ་བར་སྣང་། རྒྱ་ནག་གི་ཕྱིར་ཚོང་སྔར་ལས་ཉམས་རྒུད་ཕྱིན་འདུག་ཅེས་དཔྱད་ཞིབ་ཀྱི་གནས་ཚུལ་སྤེལ་འདུག
ཕྱི་ཟླ་༡༡་པའི་ཚེས་༡༤་ཉིན་ནེའུ་ཡོག་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། སྲིད་འཛིན་བྷ་ཌན་གྱིས་ཞིས་ཅིན་ཕིང་ལ་ཨ་རིའི་མཁའ་དབྱིངས་སུ་རྒྱ་ནག་གི་གསང་ཉུལ་ལྒང་བུ་བཏང་བ་དང་རྒྱ་ནག་གིས་རྡུལ་ཕྲན་མཚོན་ཆ་བཟོ་རྒྱུ་མང་དུ་གཏོང་གི་ཡོད་པ། ཨ་མི་རི་ཀས་རྒྱ་ནག་ལ་ཡར་ཐོན་གྱི་གློག་ཀླད་སྙིང་ཆས་བཙོང་གི་མེད་པ་དང་ཐེ་ཝན། ལྷོ་རྒྱ་ནག་རྒྱ་མཚོ་དང་ཡུག་ཀེ་རེན་གྱི་དམག་འཁྲུག ཨི་སི་རལ་དང་ཧ་མ་སི་ཤོག་ཁག་གི་དམག་འཁྲུག་སོགས་གནད་དོན་མང་པོ་ཞིག་གླེང་སློང་བྱ་རྒྱུའི་རྟགས་མཚན་འདུག རྒྱ་ནག་གི་ལས་སྣེ་ཚོས་སྲིད་འཛིན་བྷ་ཌན་དང་ཞིས་ཅིན་ཕིང་གཉིས་ཐུག་འཕྲད་གྲོས་མོལ་བྱ་ཡུལ་ཁག་ཏུ་ངོ་རྒོལ་བྱེད་མཁན་མེད་པར་གཏོང་དགོས། ཞིས་ཅིན་ཕིང་གིས་གོམ་པ་སྤོས་ནས་ཡོང་བ་དང་སྲིད་འཛིན་བྷ་ཌན་ལ་ལག་པ་བཏང་སྟེ་རྐུབ་བཀྱག་ཐོག་ཏུ་བསྡད། ཨ་རྒྱའི་འགོ་ཁྲིད་གཉིས་ཀྱི་ཐུག་འཕྲད་གྲོས་མོལ་གྱི་དུས་ཚོད་རྣམས་སྐར་མ་རེ་རེ་བཞིན་བསྒྲིགས་ནས་ཐུག་འཕྲད་ཀྱི་རྣམ་པ་དེ་ཡག་པོ་ཞིག་ཐོན་རྒྱུར་ནན་ཏན་བྱེད་ཀྱི་འདུག བྷ་ཌན་དང་ཞིས་ཅིན་ཕིང་གཉིས་ཐུག་འཕྲད་གྲོས་མོལ་བྱས་ནས་གྲུབ་འབྲས་ཆེན་པོ་ཞིག་ཐོན་རྒྱུའི་རྟགས་མཚན་དབེན་ཞེས་གནས་ཚུལ་ཐོན་འདུག
སྲིད་འཛིན་བྷ་ཌན་གྱི་སློབ་སྟོན་པ་ཚོས་སྔ་ལོ་ཨ་རིའི་གྲོས་ཚོགས་ཀྱི་ཚོགས་གཙོ་ནན་སི་ཕེ་ལོ་སི་དང་སྐུ་ཚབ་ཚོགས་པ་ཞིག་ཐེ་ཝན་ལ་ཕེབས་ནས་ཨ་རྒྱའི་དམག་གི་འབྲེལ་བ་ཆད་པ་སླར་གསོ་ཐུབ་རྒྱུའི་རེ་བ་ཡོད་སྲིད། ད་དུང་ཨ་རྒྱའི་རྡུལ་ཕྲན་མཚོན་ཆ་སོགས་བཅོས་རིག་ལ་སྟངས་འཛིན་བྱེད་དུ་འཇུག་མི་ཉན་པའི་གྲོས་གྲོས་མཐུན་འབྱུང་སྲིད་ཅེས་རེ་ལྟོས་འཆང་། རྒྱ་ནག་ཕྱོགས་ནས་ཞིས་ཅིན་ཕིང་གིས་སྲིད་འཛིན་བྷ་ཌན་ལ་ཨ་མི་རི་ཀས་གྲང་དམག་གསར་པ་ཞིག་སློང་རྒྱུ་མིན་པའི་ཁག་ཁག་ཐེག་བྱེད་དུ་འཇུག་རྒྱུ། ཨ་མི་རི་ཀས་འགོ་ཁྲིད་པའི་ནུབ་ཕྱོགས་རྒྱལ་ཁབ་ཁག་གིས་གྲང་དམག་གསར་པ་ཞིག་སློང་གི་འདུག་ཅེས་སྐྱོན་བཙུགས། བྷ་ཌན་དང་ཞིས་ཅིན་ཕིང་གཉིས་ཀས་ཐེ་ཝན་གྱི་གནད་དོན་ཐོག་ཏུ་ཕན་ཚུན་ཉམས་ཚོད་ལེན་རེས་བྱ་ཤས་ཆེ། བྷ་ཌན་གྱིས་ཞིས་ཅིན་ཕིང་ལ་གྲོས་མོལ་བྱས་ནས་རྒྱ་ནག་གིས་ཐེ་ཝན་ལ་དམག་རྒྱག་རྒྱུ་ཡིན་མིན་ཤེས་ཐབས་བྱ་རྒྱུ་དང་ཞིས་ཅིན་ཕིང་གིས་བྷ་ཌན་ལ་གྲོས་མོལ་བྱས་ནས་རྒྱ་ནག་གིས་ཐེ་ཝན་ལ་དམག་བརྒྱབ་ན་ཨ་མི་རི་ཀ་ཐེ་ཝན་གྱི་རྒྱབ་རྩར་ལང་རྒྱུ་ཡིན་མིན་ཤེས་ཐབས་བྱ་རྒྱུ་རེད་ཅེས་གནས་ཚུལ་སྤེལ་འདུག
ཕྱི་ཟླ་༡༡་པའི་ཚེས་༡༣་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གིས་ཐེ་ཝན་ལ་བཙན་འཛུལ་བྱ་རྒྱུའི་ཉེན་ཁ་ཆེ་རུ་འགྲོ་བཞིན་པར་ཨ་མི་རི་ཀས་བློ་འཚབ་བྱེད་ཀྱི་ཡོད་པར་མ་ཟད། ཨ་མི་རི་ཀས་རྒྱ་ནག་ལ་ཨུ་རུ་སུར་གནོན་ཤུགས་སྤྲད་ནས་དམག་འཁྲུག་མཚམས་འཇོག་བྱེད་དུ་འཇུག་དགོས་ཞེས་སྐུལ་ལྕག་གཏོང་ངེས་རེད། ཨ་རྒྱའི་ཚོང་ལས་ནི་གྲོས་མཐུན་ཡོང་དཀའ་བའི་གནད་དོན་ཞིག་ཡིན་ཞིང་། ༢༠༢༤་ལོར་ཨ་མི་རི་ཀར་སྲིད་འཛིན་འོས་འདེམས་བྱེད་ཀྱི་ཡོད་པ་དང་ཨ་མི་རི་ཀ་བ་བརྒྱ་ཆ་༨༣་ལ་རྒྱ་ནག་གི་ཐོག་ཏུ་ལྟ་ཚུལ་བཟང་པོ་མེད་པས་བྷ་ཌན་གྱིས་ཨ་རིའི་ལངས་ཕྱོགས་མཁྲེགས་པོ་འཛིན་དགོས་པར་འགྱུར། ༢༠༢༥་ལོར་ཨ་རིའི་སྲིད་འཛིན་གསར་པ་སུས་སྲིད་དབང་འཛིན་རྒྱུ་ཡིན་མིན་ཤེས་རྟོགས་མ་ཐུབ་པར་རྒྱ་ནག་གིས་ཨ་མི་རི་ཀར་ཕུགས་རྒྱང་རིང་པོའི་གྲོས་མཐུན་ཞིག་འཇོག་རྒྱུ་ཁག་པོ་རེད། གལ་སྲིད་ཨ་རྒྱའི་འབྲེལ་བ་ཡག་ཏུ་འགྲོ་ན་༢༠༢༤་ལོར་ཨ་མི་རི་ཀར་སྲིད་འཛིན་འོས་འདེམས་བྱས་པའི་རྗེས་སུ་འགྲོ་ཡི་རེད་ཅེས་གནས་ཚུལ་སྤེལ་འདུག
རྒྱ་ནག་གི་མི་དམངས་སློབ་གྲྭ་ཆེན་མོའི་རྒྱལ་སྤྱིའི་འབྲེལ་ལམ་རིག་པའི་སློབ་དཔོན་ཧྲི་དབྱིན་ཧུང་
ཕྱི་ཟླ་༡༡་པའི་ཚེས་༡༣་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཐེ་ཝན་མཚོ་འགག་ཏུ་དམག་འཁྲུག་ལང་རྒྱུའི་ཉེན་ཁ་ཡོད་པ་དང་ལྷོ་རྒྱ་ནག་རྒྱ་མཚོའི་ནང་དུ་རྒྱ་ནག་དང་ཧྥི་ལིན་ཕིན་གྱི་འཁྲུག་རྩོད་ཆེ་རུ་སོང་། སྲིད་འཛིན་བྷ་ཌན་དང་ཞིས་ཅིན་ཕིང་གཉིས་ཐུག་འཕྲད་གྲོས་མོལ་བྱས་ན་ཐེ་ཝན་མཚོ་འགག་དང་ལྷོ་རྒྱ་ནག་རྒྱ་མཚོའི་ནང་གི་འཁྲུག་རྩོད་ཅུང་ཙམ་ཞི་འཇམ་འགྲོ་ཐུབ། རྒྱལ་སྤྱིའི་འབྲེལ་ལམ་དང་འཐབ་ཇུས་ཞིབ་འཇུག་ཁང་གི་ཉམས་ཞིབ་པ་ཇུ་ཌི་བྷ་ལན་ཆེས་སྲིད་འཛིན་བྷ་ཌན་དང་ཞིས་ཅིན་ཕིང་གཉིས་ཐུག་འཕྲད་བྱས་ནས་འགག་སྒྲོལ་ཆེན་པོ་ཞིག་མ་བྱུང་ཡང་མ་འོངས་པར་ཨ་རྒྱ་གཉིས་ཀྱིས་གནད་དོན་འགའ་ཞིག་གི་ཐོག་ཏུ་ལྷག་བསམ་རྣམ་དག་གིས་གྲོས་མོལ་བྱ་རྒྱུའི་རྣམ་འགྱུར་སྟོན་རྒྱུ་གནད་འགག་ཆེ་ཟེར། རྒྱ་ནག་གི་མི་དམངས་སློབ་གྲྭ་ཆེན་མོའི་རྒྱལ་སྤྱིའི་འབྲེལ་ལམ་རིག་པའི་སློབ་དཔོན་ཧྲི་དབྱིན་ཧུང་གིས་ཨ་མི་རི་ཀས་དམག་འཁྲུག་སློང་བ་དང་རྒྱ་ནག་ལ་འཕྲུལ་རིག་ལག་རྩལ་བཀག་ནས་འབྲེལ་བ་ཡར་རྒྱས་གཏོང་ཐུབ་རྒྱུ་ཁག་པོ་རེད་ཅེས་བཤད་འདུག