རྒྱ་ནག་དང་འབྲེལ་ལམ་ཡག་པོ་འཛུགས་རྒྱུར་ལྟ་ཚུལ་འདོན་གི་ཡོད་པའི་ཐེ་ཝན་གྱི་ཆབ་སྲིད་ཚོགས་པ་གཙོ་བོ་གཉིས་ཀྱི་སྲིད་འཛིན་འོས་མི་གཉིས་ཀྱི་ནུས་པ་མཉམ་སྤུངས་ཀྱིས་ཨ་མེ་རི་ཀའི་མཐུན་གྲོགས་ཡིན་པ། ད་ལྟའི་ཐེ་ཝན་གཞུང་འཛིན་གྱི་སྲིད་འཛིན་འོས་མི་ལ་ཁ་གཏད་མཉམ་དུ་བཅག་རྒྱུའི་རྒྱ་ནག་གི་རེ་བ་དེ་སྟོད་ཟད་དུ་གྱུར་འདུག
ཁ་གཏད་ཆབ་སྲིད་ཚོགས་པ་གོ་མིན་ཏང་དང་མི་མང་ཚོགས་པ། ཚོགས་པ་རང་དབང་ཅན་བཅས་ཀྱི་སྲིད་འཛིན་འོས་མི་ལ་བཞེངས་མཁན་ཚོས་མཉམ་འབྲེལ་ངང་། རྒྱ་ནག་དང་འབྲེལ་ལམ་ཡར་རྒྱས་གཏོང་རྒྱུའི་ལྟ་བ་འདིའི་ཐོག་ནུས་པ་མཉམ་སྤུངས་བྱེད་རྒྱུར་གྲོས་མོལ་གྱི་ཆེད་དུ་ཚོགས་འདུ་འཚོགས་ཀྱང་ལམ་ལྷོང་མ་བྱུང་བ་མ་ཟད། སྤྱི་ཟླ་༡༡་ཚེས་༢༤་ཉིན་མོ་ནི་ཐེ་ཝན་སྲིད་འཛིན་འོས་མི་ལ་གཞུང་འབྲེལ་ཐོ་འགོད་བྱེད་པའི་ཉིན་མཐའ་མ་དེ་ཡིན་པས། ཉིན་མཐའ་མར་མི་མང་ཚོགས་པའི་སྲིད་འཛིན་འོས་མི་ཁེ་ཝེན་ཀྲེད་ཀྱིས་ཕྱག་རོགས་སྲིད་འཛིན་གཞོན་པའི་འོས་མི་ཝུ་ཞིན་ཡེན་དང་མཉམ་དུ་སྲིད་འཛིན་འོས་མིར་བཞེངས་རྒྱུའི་ཐོ་འགོད་བྱས་པ་དང་། དེའི་རྗེས་གོ་མིན་ཏང་ཚོགས་པའི་སྲིད་འཛིན་འོས་མི་ཧུ་ཡུ་ཡི་ཡིས་ཕྱག་རོགས་སྲིད་འཛིན་གཞོན་པའི་འོས་མི་ཀྲོ་ཧྲོ་ཁཱང་དང་མཉམ་དུ་ཐོ་འགོད་བྱས་འདུག ཡང་ཚོགས་པ་རང་དབང་ཅན་ཏེ་མི་སྒེར་སྲིད་འཛིན་འོས་མི་ལ་བཞེངས་མཁན་འབྱོར་ལྡན་ཚོང་བ་གོ་ཐེ་མེན་གྱིས་གཞུང་འབྲེལ་ཐོ་འགོད་བྱེད་མེད་པས་རང་བཞིན་གྱིས་སྲིད་འཛིན་འོས་མིའི་ཁོངས་ནས་ཕྱིར་འཐེན་བྱེད་པར་རྩིས་འདུག དེ་བཞིན་ད་ལྟའི་ཐེ་ཝན་གཞུང་འཛིན་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ལེ་ཆིན་ཏེན་དང་སྲིད་འཛིན་གཞོན་པའི་འོས་མི་ཞོ་མེན་ཆིན་གཉིས་ཀྱིས་ཉིན་ཤས་སྔོན་ནས་ཐོ་འགོད་བྱས་ཟིན་པ་བཅས་ད་ལྟ་གཞུང་འབྲེལ་ཁྲིམས་མཐུན་གྱིས་ཐོ་འགོད་བྱེད་ཟིན་པའི་སྤྱི་ལོ་༢༠༢༤་ལོའི་ཐེ་ཝན་སྲིད་འཛིན་འོས་མི་ལ་ཆབ་སྲིད་ཚོགས་པ་གསུམ་གྱི་འོས་མི་གསུམ་གཏན་འཁེལ་བྱུང་ཡོད།
མི་མང་ཚོགས་པའི་སྲིད་འཛིན་འོས་མི།
མི་མང་ཚོགས་པའི་སྲིད་འཛིན་ཁེ་ཝེན་ཀྲེད་ཀྱིས་ཚེས་༢༤་ཉིན་ལ་གསར་འགོད་པ་ཚོར་བརྗོད་དོན་བྱེད་ན། སྤུན་ཟླ་མཉམ་དུ་རི་བོར་འཛེགས་པར་རང་རང་ས་ནས་འབད་བརྩོན་བྱེད་དགོས་ཞེས་དང་། ཐེངས་འདིར་མཉམ་འབྲེལ་བྱེད་མ་ཐུབ་ཀྱང་འོས་བསྡུའི་དྲིལ་བསྒྲགས་སྐབས་སུ་ཐུན་མོང་ལ་ཁེ་ཕན་ལྡན་པའི་མཉམ་ལས་བྱ་དགོས་པ་དེ་འདྲ་ཡོང་སྲིད་པས། ཕན་ཚུན་ཁ་གཏད་དུ་འགྱུར་དགོས་དོན་མེད་སྐོར་བཤད་འདུག ཡང་ཁོ་རང་ཉིད་དམངས་གཙོ་ཡར་ཐོན་ཚོགས་པར་རྒྱབ་སྐྱོར་བ་ཞིག་ཡིན་ཡང་ད་ལྟ་དམངས་གཙོ་ཡར་ཐོན་ཚོགས་པའི་སྲིད་ཇུས་མང་པོ་ཞིག་མི་མང་གི་མངོན་འདོད་དང་ཁ་ཐག་ཇེ་རིང་ལ་འགྲོ་བཞིན་ཡོད་པས་རང་ཉིད་སྲིད་འཛིན་ལ་མ་ལངས་རང་ལངས་ཆགས་ཡོད་ཚུལ་ཀྱང་བརྗོད་འདུག ཁོས་འདེམས་པའི་སྲིད་འཛིན་གཞོན་པའི་འོས་མི་ཝུ་ཞིན་ཡེན་ནི་ད་ལྟ་ལོ་ན་༤༥་ཙམ་དང་མི་མང་ཚོགས་པའི་གྲོས་ཚོགས་འཐུས་མི་ཡིན་ཞིང་།ཚོང་བའི་ཁྱིམ་རྒྱུད་ཀྱི་བུད་མེད་ཅིག་ཡིན་པ་ལས་ཆབ་སྲིད་ཁོར་ཡུག་ཏུ་འབྱོར་ནས་ལོ་བཞི་ཙམ་ལས་སོང་མེད་ཀྱང་། ཁེ་ཝེན་ཀྲེད་གྱིས་བཏོན་པའི་ཆ་རྐྱེན་གསུམ་སྟེ་བུད་མེད་ཡིན་པ། ཚོང་ལས་ཀྱི་རྒྱབ་ལྗོངས་ལྡན་པ། རྒྱལ་སྤྱིའི་མཉམ་མྱོང་ཡོད་པ་བཅས་འཛོམས་ཡོད་འདུག
གོ་མིན་ཏང་གི་སྲིད་འཛིན་འོས་མི།
གོ་མིན་ཏང་ཚོགས་པའི་སྲིད་འཛིན་འོས་མི་ཧུ་ཡུ་ཡི་ཡིས་རྒྱུན་རིང་ལ་མི་མང་ཚོགས་པའི་སྲིད་འཛིན་འོས་མི་ཁེ་ཝེན་ཀྲེད་སྲིད་འཛིན་གཞོན་པའི་འོས་མི་ལ་ངོས་ལེན་བྱེད་རྒྱུའི་མཉམ་ལས་ལ་རེ་བ་བཟུང་ཡང་། ཚེས་༢༤་ཉིན་རེ་བ་སྟོང་ཟད་དུ་གྱུར་བས། ཁོས་རང་གི་ཕྱག་རོགས་སྲིད་འཛིན་གཞོན་པའི་འོས་མི་ལ་གྲོས་ཚོགས་འཐུས་མི་ཟུར་བ་དང་ད་ལྟའི་ཐེ་ཝན་གསར་ཁང་ཀྲུང་ཀཱང་བཟོ་ལས་ཁང་གི་འགན་འཛིན་ཀྲོ་ཧྲོ་ཁཱང་ངོ་སྤྲོད་ཀྱིས་ཁོ་གཉིས་མཉམ་དུ་སོང་ནས་དེ་རིང་ཉིན་མཐའ་མར་ཐོ་འགོད་བྱེད་ཡོད། ཧུ་ཡུ་ཡི་ཡིས་གསར་འགོད་པ་ཚོར་བརྗོད་དོན་ལས་ཁོ་དང་ཀྲོ་ཧྲོ་ཁཱང་གཉིས་ཀྱིས་ཆེས་མཐའ་མའི་རྒྱལ་ཁ་ཐོབ་རྒྱུར་བློ་ཐག་ཆོད་པོས་མཉམ་ལས་འབད་བརྩོན་བྱེད་རྒྱུ་ཡིན་པ་རེད། དེ་མིན་ཀྲོ་ཧྲོ་ཁཱང་ཡིས་གསར་འགོད་པ་ཚོར་བརྗོད་ན་ཁོས་དང་བོ་ཁ་གཏད་ཆབ་སྲིད་ཚོགས་པ་ཚོ་མཉམ་ལས་བྱེད་རྒྱུའི་རེ་བ་བཟུང་ཡོད་ཀྱང་རེ་བ་དེ་ལམ་ལྷོང་མ་བྱུང་བར་བརྟེན། ད་ལྟ་འོས་བསྡུ་ལ་ཉིན་༥༠་ལས་ལྷག་མེད་པའི་སྐབས་འདིར་སྲིད་འཛིན་གཞོན་པའི་འོས་མིའི་བཀོད་ཁྱབ་དང་ལེན་གྱིས་རྒྱལ་ཁ་ཐོབ་རྒྱུའི་དམིགས་ཡུལ་གཅིག་པུ་བཟུང་ཡོད་ཚུལ་བརྗོད་འདུག གོ་མིན་ཏང་གིས་སྲིད་འཛིན་གཞོན་པའི་འོས་མི་ལ་གསལ་བསྒྲགས་བསྐྱངས་པའི་ལོ་༧༣་ཡིན་པ་་ཀྲོ་ཧྲོ་ཁཱང་ནི་དམག་མིའི་ཁྱིམ་རྒྱུད་ནས་ཡིན་ཞིང་ལོ་རབས་བརྒྱད་བཅུའི་ནང་ལ་ཆབ་སྲིད་སྐྱོང་མཁས་པའི་བསྟོད་བསྔགས་བྱེད་ས་ཞིག་ཡིན་འདུག དེ་སྔོན་ཐེངས་གཉིས་ལ་གོ་མིན་ཏང་གི་ཐེ་པེ་གྲོང་ཁྱེར་གྱི་འཐུས་མི་དང་ཁྲིམས་བཟོ་ལྷན་ཚོགས་ཀྱི་འཐུས་མི་ཐེངས་གསུམ་ལ་གནང་མྱོང་བའི་ཆབ་སྲིད་པ་རྒན་པ་ཞིག་ཡིན་འདུག ད་ལྟ་ཁོས་ཐེ་ཝན་གྱི་གསར་ཁང་ཞིག་གི་འགན་འཛིན་གནང་བཞིན་པ་ཡིས་གསར་ལམ་ཁག་གི་འབྲེལ་བ་དང་ཆབ་སྲིད་པའི་ཉམས་མྱོང་བཅས་ལས་ཁོས་གོ་མིན་ཏང་གི་འོས་བསྡུའི་དྲིལ་བསྒྲགས་ལ་རོགས་ཕན་ཆེན་པོ་ཡོང་ངེས་པར་ཚོད་དཔག་བྱེད་བཞིན་འདུག
ཚོགས་པ་རང་དབང་ཅན་སྲིད་འཛིན་འོས་མི།
མི་སྒེར་བའི་ངོས་ནས་སྲིད་འཛིན་འོས་མིར་བཞེངས་མཁན་འབྱོར་ལྡན་ཚོང་བ་གོ་ཐེ་མེན་འོས་ཁོངས་ནས་ཕྱིར་འཐེན་བྱས་པ་དེ་ལ་མི་རྣམས་ཀྱིས་དཔྱད་བརྗོད་སྤེལ་བཞིན་པ་ལྟར་ན། ཁོ་ལ་མ་གཞི་ནས་རྒྱབ་སྐྱོར་བ་ཧ་ཅང་ཉུང་ཉུང་ཡིན་པ་དང་ཁོའི་ཕྱིར་འཐེན་དེ་ཡིས་འོས་བསྡུ་ལ་ཤུགས་རྐྱེན་ཆེན་པོ་ཐེབས་ཀྱིན་མེད་པ་རེད། ཡང་གོ་ཐེ་མེན་གྱིས་སྲིད་འཛིན་གཞོན་པའི་འོས་མིར་གསལ་བསྒྲགས་བསྐྱངས་པའི་ལེ་ཕེ་ཞཱ་ཡིས་ངོ་དེབ་ཐོག་ལ་སྤྱི་ལོ་༢༠༢༤ལོའི་འོས་ཤོག་ཏུ་ང་ཚོ་མེད་ཅེས་པའི་ཡི་གེ་ཞིག་སྤེལ་བ་དེའི་ནང་དུ། ང་དང་གོ་ཐེ་མེན་གཉིས་སྲིད་འཛིན་འོས་མིའི་དྲིལ་བསྒྲགས་ལ་མཉམ་ཞུགས་བྱེད་དོན་ནི་ཐེ་ཝན་མི་མང་མཐུན་སྒྲིལ་ཡོང་བར་སྐུལ་སློང་བྱེད་རྒྱུའི་ཆེད་དུ་ཡིན། མཐུན་སྒྲིལ་དང་མཉམ་ལས་ལ་བྱམས་བརྩེ་དང་དམ་ཚིག བསྟུན་མཁས་བཅས་དགོས་མོད། ཁ་སང་ཚང་མའི་མཐོང་ལམ་དུ་མངོན་པ་ལྟར་ནུས་པ་མཉམ་སྤུངས་ཀྱི་ཚོད་ལྟ་ལམ་ལྷོང་བྱུང་མེད་པ་དེར་བློ་ཕམ་ཆེན་པོ་བྱུང་། ཞེས་བཀོད་འདུག
ཁ་གཏད་ཆབ་སྲིད་ཚོགས་པ་ཚོས་མཉམ་ལས་གྲོས་མོལ།
ཚེས་༢༣་ཉིན་ལ་གོ་ཐེ་མེན་གྱིས་མི་མང་ཚོགས་པའི་ཁེ་ཝེན་ཀྲེད་དང་གོ་མིན་ཏང་གི་ཧུ་ཡུ་ཡི་བཅས་སྲིད་འཛིན་འོས་མི་གཉིས་ཀྱིས་ནུས་པ་མཉམ་སྤུངས་ངང་དམངས་གཙོ་ཡར་ཐོན་ཚོགས་པར་ཁ་གཏད་བཅག་རྒྱུའི་ཡོངས་གྲགས་གྲོས་མོལ་གྱི་གཙོ་སྐྱོང་གནང་ཡང་། མི་མང་གི་མདུན་ནས་ཕན་ཚུན་རྩོད་པ་ཤོར་བ། ད་དུང་འོས་མི་ཕན་ཚུན་བར་ལ་སྒེར་གྱི་འཕྲིན་ཐུང་སྐུར་བ་རྣམས་ཕྱི་བསྒྲགས་བྱས་པ་སོགས་ཕན་ཚུན་སྐྱོན་བརྗོད་དང་ཁ་རྩོད་ཤོར་བ་བཅས་བྱུང་ཡོད། གོ་ཐེ་མེན་གྱིས་དེ་ནི་གོ་མིན་ཏང་ལན་པ་དང་གོ་མིན་ཏང་ཚིག་ཐོག་ལ་མ་བསྡད་པ། ལྷག་པར་དུ་གོ་མིན་ཏང་གི་སྲིད་འཛིན་ཟུར་བ་མཱ་ཡོན་ཅོན་གདན་འདྲེན་ཞུས་མེད་ཀྱང་། མ་བོས་མགྲོན་པོ་ལྟར་ཚོགས་འདུར་དེར་བཅར་བ་བཅས་ལ་སྐྱོན་བརྗོད་བྱེད་འདུག དབྱེ་ཞིབ་པ་ཚོས་ཁ་སང་ཚོགས་འདུ་དེ་ནི་ཐེ་ཝན་གྱི་ཆབ་སྲིད་ལོ་རྒྱུས་ནང་གི་ཆབ་སྲིད་པ་ཚོའི་རྣམ་འགྱུར་སྐྱུག་བྲོ་ཤོས་ཤིག་ཏུ་གྱུར་བར་དཔྱད་བརྗོད་སྤེལ་བཞིན་ཡོད།
དམངས་གཙོ་ཡར་ཐོན་ཚོགས་པ།
དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ལེ་ཆེན་ཏེ་ཡིས་སྔ་ས་ནས་སྲིད་འཛིན་གཞོན་པའི་འོས་མི་ཞཱོ་མེན་ཆིན་གསལ་བསྒྲགས་དང་མཉམ་དུ་འོས་བསྡུའི་ཁྲོད་དུ་ཞུགས་རྒྱུར་ཁྲིམས་མཐུན་ཐོ་འགོད་བྱེད་ཚར་བ་ལྟར། ད་ལྟ་རང་རང་སར་དྲིལ་བསྒྲགས་ལས་འགུལ་ཚ་ཚ་འུར་འུར་གྱིས་སྤེལ་བཞིན་པ་རེད། ད་ལྟའི་ཆར་ཐེ་ཝན་དུ་ཨ་མེ་རི་ཀ་གཙོས་པའི་ནུབ་ཕྱོགས་རྒྱལ་ཁབ་ཁག་དང་འབྲེལ་ལམ་ཡར་རྒྱས་གཏོང་རྒྱུ་དང་། རྒྱ་ནག་དང་ཐེ་ཝན་དེ་ཕན་ཚུན་ལ་ཐེ་ཇུས་མི་བྱེད་པའི་གནས་བབ་རྒྱུད་འཛིན་བྱེད་རྒྱུའི་ཆབ་སྲིད་ལྟ་བ་འཛིན་མཁན་ནི་ད་ལྟའི་གཞུང་འཛིན་དམངས་གཙོ་ཡར་ཐོན་ཚོགས་པ་ཁོ་ན་ཡིན་པ་ལས། ཚོགས་པ་གཞན་རྣམས་ཀྱིས་རྒྱ་ནག་དང་འབྲེལ་ལམ་ཡར་རྒྱས་གཏོང་འདོད་བྱེད་བཞིན་པ་རེད། གང་ལྟར་སྤྱི་ལོ་༢༠༢༤་ལོའི་ཐེ་ཝན་གྱི་རྒྱལ་ཡོངས་འོས་བསྡུ་འདི་ལ་ཨ་རི་དང་རྒྱ་ནག་གཉིས་ཀྱིས་དོ་སྣང་ཆེན་པོ་བྱེད་ས་ཞིག་ཆགས་ཡོད།