༄༅།། རྒྱ་ནག་གཞུང་གིས་ཏོག་དབྱིབས་ནད་དུག་འགོས་པའི་ནད་པ་གཅིག་ཀྱང་མེད་པར་གཏོང་རྒྱུའི་སྲིད་ཇུས་རྒྱུན་འཁྱོངས་བྱེད་ཀྱི་ཡོད་ཀྱང་ན་ནིང་ཕྱི་ཟླ་༡༠་པའི་ཟླ་དཀྱིལ་ནས་རྒྱ་ནག་གི་ས་གནས་ཁག་ཏུ་ཏོག་དབྱིབས་ནད་དུག་ཁྱབ་གདལ་འགྲོ་རྒྱུ་མཚམས་མ་ཆད། དེ་རིང་གཟའ་པ་སངས་ཉིན་བྷུ་ལུམ་བྷག་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཐེན་ཅིན་གྲོང་ཁྱེར་ནི་རྒྱ་ནག་ལ་ཨོ་མི་ཁོ་རོན་ཞེས་འབོད་པའི་ངོ་བོ་མང་འགྱུར་གྱི་ཏོག་དབྱིབས་ནད་དུག་ཁྱབ་ཡུལ་དང་པོ་དེར་གྱུར། ད་ལྟའི་བར་དུ་གྲོང་ཁྱེར་དེའི་མི་༡༥༠་ལྷག་ལ་ནད་དུག་འགོས་ནས་གྲོང་མི་ས་ཡ་༡༤་ལ་བརྟག་དཔྱད་བྱ་དགོས་བྱུང་ཞིང་། ཐེན་ཅིན་ནས་ཧོ་ནན་ཞིང་ཆེན་གྱི་ཨན་དབྱང་གྲོང་ཁྱེར་ལ་ཁྱབ་སྟེ་མི་གཅིག་ལ་ཨོ་མི་ཁོ་རོན་ཏོག་དབྱིབས་ནད་དུག་འགོས་ཡོད་པ་ངེས་གཏན་བྱུང་། འོན་ཀྱང་རྒྱ་ནག་གཞུང་གིས་ཨན་དབྱང་གྲོང་ཁྱེར་ལ་མི་འབོར་ས་ཡ་༥་དང་འབུམ་༥་ཡོད་པ་རྣམས་རང་ཁྱིམ་དུ་བཀག་ནས་སྒོ་རྒྱ་བསྡམས། ད་དུང་ཡང་ཨན་དབྱང་གྲོང་ཁྱེར་ལ་ཉིན་ལྟར་ནད་པ་གསར་པ་ཐོན། དེ་བཞིན་ཐེན་ཅིན་གྲོང་ཁྱེར་ནས་རྒྱ་ནག་གི་བྱང་ཤར་མངའ་ཁུལ་གྱི་ལེའོ་ཉིང་ཞིང་ཆེན་གྱི་ཏ་ལཱེན་གྲོང་ཁྱེར་དུ་ཁྱབ། ད་དུང་རྒྱ་ནག་གི་ཀྲེ་ཅང་ཞིང་ཆེན་གྱི་ཉཱིང་པའོ་གྲོང་ཁྱེར་དུ་ཌལ་ཊ་ཞེས་འབོད་པའི་ངོ་བོ་ཉིས་འགྱུར་གྱི་ཏོག་དབྱིབས་ནད་ཁྱབ་ནས་ནད་འགོག་གི་ཐབས་ཇུས་ནན་པོ་བསྟེན། ཉེ་དུས་ཤིག་ནས་རྒྱ་ནག་གི་ཧྲང་ཧེ་གྲོང་ཁྱེར་ལའང་ཨོ་མི་ཁོ་རོན་ཏོག་དབྱིབས་ནད་དུག་ཁྱབ། ཧྲང་ཧེའི་སློབ་ཕྲུག་ཅིག་ཕྱི་རྒྱལ་ནས་རང་ཡུལ་དུ་ལོག་སྟེ་མི་༥་ལ་ཏོག་དབྱིབས་ནད་དུག་བགོས། སློབ་ཕྲུག་དེ་ཟུར་འགོག་བྱས་ནས་གློད་གྲོལ་བཏང་བའི་རྗེས་སུ་ནད་རྟགས་ཐོན་ཡོད་པས་ཧྲང་ཧེ་གྲོང་ཁྱེར་གཞུང་གིས་ཨོ་མི་ཁོ་རོན་ཏོག་དབྱིབས་ནད་དུག་ཁྱབ་གདལ་འགྲོ་རྒྱུ་འགོག་གང་ཐུབ་བྱེད་ཀྱིན་ཡོད་པའི་གནས་ཚུལ་ཐོན་འདུག
ཁ་སང་གཟའ་ཕུར་བུའི་ཉིན་ཧྲང་ཧེ་ཏོག་དབྱིབས་ནད་དུག་འགོག་བཅོས་རུ་ཁག་གི་འགན་འཛིན་ཀྲང་ཝེན་ཧུང་གིས་རོ་ཡེ་ཊར་སི་གསར་འགྱུར་ལས་ཁང་ལ་བཤད་པ་ལྟར་ན། ཧྲང་ཧེ་གྲོང་ཁྱེར་དུ་ཁྱབ་ཀྱི་ཡོད་པའི་ཏོག་དབྱིབས་ནད་དུག་ཕྱི་རྒྱལ་ནས་ཡོང་བའི་མི་ལ་འབྲེལ་བྱུང་ནས་བགོ་བཞིན་འདུག ཕྱི་ཟླ་དང་པོ་འགོ་ཚུགས་ནས་ཉིན་བཅུའི་རིང་ལ་ནད་དུག་འགོ་ཁྱབ་བྱུང་བའི་གྲངས་འབོར་ནི་ཕྱི་ཟླ་༡༢་པ་ཧྲིལ་པོར་འགོ་ཁྱབ་བྱུང་བའི་གྲངས་འབོར་ལས་བརྒལ་སོང་། ཧྲང་ཧེ་གྲོང་ཁྱེར་ལ་ཨོ་མི་ཁོ་རོན་ཏོག་དབྱིབས་ནད་དུག་འགོས་ཡོད་པའི་མི་ཅི་ཙམ་ཡོད་མེད་ནི་ཚོད་དཔག་བྱེད་དཀའ་བ་ཞིག་རེད་ཅེས་བསྟན། དེར་བརྟེན་རྒྱ་ནག་གཞུང་གིས་ཨ་མི་རི་ཀ་དང་ཡུ་རོབ་སོགས་ནས་ཧྲང་ཧེ་གྲོང་ཁྱེར་ལ་འཕུར་སྐྱོད་བྱེད་ཀྱི་ཡོད་པའི་འགྲུལ་སྐྱེལ་གནམ་གྲུ་ཕལ་མོ་ཆེ་བཀག་ཡོད་ཅིང་། རྒྱ་ནག་ལ་ཨོ་མི་ཁོ་རོན་ཏོག་དབྱིབས་ནད་དུག་ཁྱབ་པའི་རྗེས་སུ་ཉི་ཧོང་གི་ཊོ་ཡོ་ཊ་དང་འཇར་མན་གྱི་ཝོལ་སི་ཝེ་གྷན་རླངས་འཁོར་ལྷུ་སྒྲིག་བཟོ་གྲྭ་རྣམས་ཀྱང་སྒོ་བརྒྱབ། ཧོ་ནན་ཞིང་ཆེན་གྱི་ཨན་དབྱང་གྲོང་ཁྱེར་གཞུང་གིས་འབྲེལ་ཡོད་ལས་སྣེ་༡༡་ལ་ཏོག་དབྱིབས་ནད་དུག་སྔོན་འགོག་བྱ་རྒྱུ་འཐུས་ཤོར་བཏང་བའི་ནག་ཉེས་བཙུགས་ནས་ཉེས་ཆད་བཅད། གཟའ་ཕུར་བུའི་ཉིན་ཞི་ཨན་གྲོང་ཁྱེར་གཞུང་གིས་སྨན་ཁང་གཉིས་ཀྱིས་ཟླ་བ་གསུམ་ལ་ལས་མཚམས་འཇོག་དགོས། སྨན་ཁང་དེ་དག་གིས་མི་མང་ལ་དགོས་ངེས་ཀྱི་སྨན་བཅོས་བྱ་རྒྱུ་འཐུས་ཤོར་སོང་འདུག་ཅེས་ཉེས་ཆད་བཀལ། སྨན་ཁང་གཅིག་གིས་ཏོག་དབྱིབས་ནད་དུག་སྔོན་འགོག་གི་སྒྲིག་ཁྲིམས་ཚུལ་བཞིན་ལག་ལེན་བསྟར་ནས་ནད་པ་ཛ་དྲག་ཅན་ཞིག་ལ་དུས་ཐོག་ཏུ་སྨན་བཅོས་བྱེད་མ་ཐུབ་པར་འཆི་སྐྱོན་བྱུང་བར་བཟོད་གསོལ་ཞུ་དགོས་བྱུང་འདུག རྒྱ་ནག་གི་གྲོང་ཁྱེར་འགའ་ཞིག་གིས་ཉེ་ཆར་ཐེན་ཅིན་དང་ཨན་དབྱང་གྲོང་ཁྱེར་ལ་ཕྱིན་ཡོད་པ་ཡོད་ན་ངེས་པར་ཟུར་འགོག་བྱེད་དགོས་ཞེས་བཀའ་ཕབ།།
མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། པེ་ཅིང་གཙོས་རྒྱ་ནག་གི་གྲོང་ཁྱེར་མང་ཆེ་བས་ཕྱི་ཟླ་༢་པའི་ཚེས་༡་ནས་རྒྱ་ནག་པ་ཚོས་ལོ་སར་གྱི་ཡོད་པས་མི་དམངས་རྣམས་ཕྱི་ལ་འབུད་མི་ཆོག ལྷག་པར་དུ་ཕྱི་ཟླ་༢་པའི་ཚེས་༤་ནས་པེ་ཅིང་ལ་རྒྱལ་སྤྱིའི་དགུན་དུས་ཀྱི་ཨོ་ལིམ་ཕིཀ་རྩེད་འགྲན་འཚོགས་ཀྱི་ཡོད་པར་བར་ཆད་མི་འབྱུང་བ་དང་རྩེད་འགྲན་དུས་སུ་ནད་དུག་མི་ཁྱབ་པའི་ཆེད་དུ་མི་དམངས་རྣམས་རང་ཁྱིམ་དུ་འཛུལ་དགོས་ཞེས་བཀོད་ཁྱབ་བཏང་ཡོད་པར་མ་ཟད། རྒྱ་ནག་གཞུང་གིས་ཨོ་ལིམ་ཕིཀ་རྩེད་འགྲན་འཚོགས་ཡུལ་གྱི་མཐའ་འཁོར་སྤྱི་ལེ་མང་པོར་ལྕགས་རི་བསྐོར་ནས་མི་རྣམས་ཉེ་འཁྲིས་སུ་བཅར་མི་ཐུབ་པ་དང་རྩེད་འགྲན་འཚོགས་ཡུལ་ཁག་གི་བདེ་འཇགས་སྲུང་སྐྱོབ་པ་དང་སྨན་པ། འཕྲོད་བསྟེན་ལས་སྣེ་དང་གཙང་སྦྲ་བྱེད་མཁན་སོགས་སྲི་ཞུ་བ་རྣམས་ཨོ་ལིམ་ཕིཀ་རྩེད་འགྲན་མ་གྲོལ་བར་དུ་ལྕགས་རིའི་ནང་ལོགས་ནས་ཕྱི་ལ་འབུད་མི་ཆོག་པ། རྒྱ་ནག་རྒྱལ་ཡོངས་སུ་མི་གྲངས་ས་ཡ་༢༠་ལྷག་རང་ཁྱིམ་དུ་འགོག་པའམ། ཡང་ན་རང་རང་གི་གྲོང་གླིང་བརྒལ་ནས་རྒྱང་ལ་བསྐྱོད་མི་ཆོག་ཅེས་སྒོ་རྒྱ་བསྡམས། ཐེན་ཅིན་གྲོང་ཁྱེར་གཞུང་གིས་ཞི་ཨན་ལྟར་འགྲོ་འོང་བཀག་ནས་དམ་དྲག་བྱེད་ཀྱི་མེད་ཀྱང་རྒྱ་ལམ་དང་སློབ་ཆེན་ཁག་ཅིག་སྒོ་བརྒྱབ། པེ་ཅིང་དང་ཐེན་ཅིན་དབར་གྱི་མེ་འཁོར་འགྲིམ་འགྲུལ་མཚམས་བཞག་པ་དང་རྒྱ་ལམ་འགའ་ཞིག་བཀག གཟའ་ལྷག་པའི་ཉིན་ཐེན་ཅིན་གྲོང་གཞུང་གིས་མི་གྲངས་ས་ཡ་༡༤་ལ་བརྟག་དཔྱད་བྱས་ཟིན། མི་དམངས་ལ་ནད་རྟགས་མེད་པའི་བརྡ་ཐོ་མ་འབྱོར་བར་དུ་རང་ཁྱིམ་དུ་འཛུལ་དགོས་ཞེས་བསྒྲགས། པེ་ཅིང་དང་ཐེན་ཅིན་གཉིས་ཧ་ཅང་གི་བར་ཐག་ཉེ་པོ་ཡིན་པས་རྒྱ་ནག་གཞུང་གིས་དེ་བས་ཀྱང་དོགས་ཟོན་དང་བློ་འཚབ་བྱས་ནས་ཨོ་ལིམ་ཕིཀ་རྩེད་འགྲན་ལ་བར་ཆད་མི་འབྱུང་བའི་ཆེད་དུ་འགྲིམ་འགྲུལ་འགོག་གི་ཡོད་པ་རེད།།
མཉམ་འབྲེལ་གསར་ཁང་གིས་རྒྱ་གར་གྱི་ཡིག་ཟམ་དང་པོའི་གནས་ཚུལ་ལུང་འདྲེན་བྱས་ནས་གསར་འགྱུར་སྤེལ་བར་གཞིགས་ན། ཞི་ཨན་གྲོང་ཁྱེར་གཞུང་གིས་ཐང་སྟོང་ཞིག་ལ་གསང་སྤྱོད་དང་ཁྲུས་ཁང་རང་འགྲིགས་སུ་ཡོད་པའི་ལྕགས་སྒྲོམ་ཁང་ཆུང་སྟོང་ཕྲག་མང་པོ་བསྒྲིགས། ཐང་སྟོང་དེའི་མཐའ་འཁོར་ཡོངས་སུ་ལྕགས་དྲྭ་འཐེན་ནས་ཕྱི་ལོགས་ཀྱི་མི་རྣམས་ནང་དུ་མི་ཐར་པ་དང་ནང་ལོགས་ཀྱི་ནད་པ་རྣམས་ཕྱི་ལ་བྲོས་བྱོལ་དུ་ཐར་ས་མེད་པ་ཞིག་བཟོས་ཏེ་ལྕགས་སྒྲོམ་ཁང་ཆུང་དེ་དག་གི་ནང་དུ་ཏོག་དབྱིབས་ནད་དུག་འགོས་ཡོད་པའི་ནད་པ་རྣམས་བཅུག ཞི་ཨན་གྲོང་ཁྱེར་གྱི་ནད་འགོག་གྱོན་གོས་དཀར་པོ་གོན་པའི་འཕྲོད་བསྟེན་ལས་སྣེ་ཚོས་སྐྱེས་པ་ཞིག་རང་ཁྱིམ་ནས་ཟུར་འགོག་གཞིས་སྒར་ལ་བཙན་ཁྲིད་བྱེད་ཀྱི་ཡོད་པ་དང་སྐྱེས་པ་དེས་བཟའ་བཏུང་བྱེད་ཚར་དུ་ཆུགས། ཁོ་པར་ཁ་པར་ལེན་དུ་ཆུགས་ཞེས་ཞུ་བ་འཐེན་ཡང་འཕྲོད་བསྟེན་ལས་སྣེ་ཚོས་སྐྱེས་པ་དེར་བཟའ་བཏུང་མཚམས་འཇོག་བྱེད་དུ་མ་བཅུག་པ་དང་ཁ་པར་ཡང་ལེན་དུ་མ་བཅུག་པར་བཙན་གྱིས་སྲང་ལམ་ནང་དུ་ཁྲིད་ནས་ཁ་རས་གཡོགས་པ་བརྙན་ཐུང་དུ་གསལ། དབྱིན་ཇིའི་བྷི་བྷི་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཞི་ཨན་གྲོང་ཁྱེར་གཞུང་གི་ལས་སྣེ་ཚོས་རྒྱ་ནག་གི་ལོ་སར་གྱི་གནམ་གང་གི་དགོང་མོའི་མཚན་དཀྱིལ་ནས་གྲོང་མི་ཟུར་འགོག་བྱེད་དགོས་པ་རྣམས་རང་ཁྱིམ་དུ་འདུག་མི་ཆོག་པར་ཟུར་འགོག་གཞིས་སྒར་དུ་སྤོར་དགོས་ཞེས་བརྡ་ཁྱབ་བཀྲམ། མི་ཞིག་གིས་སྤྱི་སྤྱོད་རླངས་འཁོར་༣༠་ཐམ་པའི་ནང་དུ་མི་རྣམས་ཟུར་འགོག་གཞིས་སྒར་ལ་སྐྱེལ་འདྲེན་བྱས་པ་མཐོང་སོང་ཟེར། མི་གཞན་ཞིག་གིས་ཟུར་འགོག་གཞིས་སྒར་དེར་མི་སྟོང་ཕྲག་མང་པོ་བཀག་ཉར་བྱས་འདུག ང་ཚོར་ལྟ་རྟོག་བྱེད་མཁན་སུ་གཅིག་མེད་པ་དང་མཐུན་རྐྱེན་སོགས་ཅི་ཡང་མི་འདུག་ཅེས་འཁང་ར་བཤད།།
ཨ་རིའི་ཆི་ཁ་གྷོ་སློབ་གྲྭ་ཆེན་མོའི་རྒྱ་ནག་གི་སྲིད་དོན་ཉམས་ཞིབ་པ་དབྱང་ཏ་ལིས་གསར་འགོད་པ་ཚོར་བཤད་པ་ལྟར་ན། རྒྱ་ནག་གིས་ཏོག་དབྱིབས་ནད་དུག་སྔོན་འགོག་གི་ཐབས་ཇུས་ཅི་ཙམ་བསྟེན་ཡང་ཨོ་མི་ཁོ་རོན་ཏོག་དབྱིབས་ནད་དུག་འགོག་ཐུབ་རྒྱུ་ཁག་པོ་རེད། རྒྱ་ནག་གི་མི་འབོར་བརྒྱ་ཆ་༨༥་ལྷག་ལ་སྔོན་འགོག་སྨན་ཁབ་བརྒྱབ་ཟིན་ཡོད་ཀྱང་ཕན་ཐོགས་མ་བྱུང་བ་རེད་ཅེས་བཀྲལ། ཉམས་ཞིབ་པ་ཚོས་པེ་ཅིང་གི་ཨོ་ལིམ་ཕིཀ་རྩེད་འགྲན་བརྒྱུད་ནས་རྒྱ་ནག་ལ་ཨོ་མི་ཁོ་རོན་ཁྱབ་གདལ་འགྲོ་སྲིད་ཅེས་སྐྲག་སྣང་བྱེད་ཀྱི་པ་སྟེ། རྩེད་འགྲན་པ་དང་རྒྱལ་སྤྱིའི་གསར་འགོད་པ། རྒྱ་ནག་གིས་གདན་འདྲེན་ཞུས་པའི་ཕྱི་རྒྱལ་གྱི་སྐུ་མགྲོན་རྣམས་དང་རྒྱ་གཞུང་གི་ལས་སྣེ་སོགས་མགྲོན་ཁང་ནས་ཕར་ཚུར་འགྲོ་སྐྱོད་བྱེད་དགོས་པས་ནད་དུག་བགོ་ཁྱབ་གཏོང་སྲིད། ན་ནིང་དབྱར་དུས་ཉི་ཧོང་ལ་ཨོ་ལིམ་ཕིཀ་རྩེད་འགྲན་ཚོགས་པའི་སྐབས་དེར་ཏོག་དབྱིབས་ནད་དུག་ཚབས་ཆེན་ཞིག་བགོ་ཁྱབ་བྱུང་ཞིང་། བདུན་ཕྲག་སྔོན་མར་ཞིས་ཅིན་ཕིང་རྩེད་འགྲན་འཚོགས་ཡུལ་ལ་ལྟ་ཞིབ་བསྐྱོད་ནས་འཛམ་གླིང་ཡོངས་ཀྱིས་རྒྱ་ནག་ལ་བལྟས་བསྡད་ཡོད་པ་རེད། རྒྱ་ནག་གྲ་སྒྲིག་ཡོད་ཅེས་གཏམ་བཤད་བྱས་ནས་ཏོག་དབྱིབས་ནད་དུག་སྔོན་འགོག་བྱ་རྒྱུ་སྔར་ལས་ཤུགས་ཆེ་རུ་བཏང་འདུག ཕྱི་ཟླ་༡་ཚེས་༡༣་ཉིན་རྒྱ་ནག་གི་རྒྱལ་ཡོངས་འཕྲོད་བསྟེན་ལྷན་ཁང་གིས་ཏོག་དབྱིབས་ནད་དུག་འགོས་པའི་ནད་པ་༡༢༤་བྱུང་སོང་། ནད་པ་དེ་དག་གི་གྲས་ཀྱི་༧༦་ཧོ་ནན་ཞིང་ཆེན་དུ་ཐོན་ཡོད་པ་དང་ཐེན་ཅིན་གྲོང་ཁྱེར་དུ་ནད་པ་གསར་པ་༤༡་ཐོན་སོང་ཞེས་བསྒྲགས། ཡིན་ནའང་རྒྱ་གཞུང་གིས་བཀྲམ་པའི་ནད་པའི་གྲངས་འབོར་དང་འཆི་སྐྱོན་གྲངས་འབོར་རྣམས་ཡིད་རྟོན་རུང་བ་ཞིག་མ་རེད་ཅེས་ཉམས་ཞིབ་པ་རྣམས་བློ་ཁ་གཅིག་ཏུ་མཐུན། ཨོ་མི་ཁོ་རོན་ཏོག་དབྱིབས་ནད་དུག་ནི་ལྡབ་གསུམ་གྱི་ཁྱབ་གདལ་མྱུར་བ་ཡོད་པའི་གནས་ཚུལ་ཐོན་འདུག