༄༅།། རྒྱ་ནག་གིས་ཕྱི་ལོ་གསར་པའི་ཚེས་༡་ནས་བཟུང་སྟེ་ཐེ་ཝན་གྱི་རྫས་འགྱུར་ཐོན་སྐྱེད་རྣམ་གྲངས་༡༢་ལ་སྒོ་ཁྲལ་ཆག་ཡང་མེད་པར་གཏོང་རྒྱུ་ཡིན་ཞེས་གསལ་བསྒྲགས་སྤེལ། ཕྱི་ཟླ་༡༢་པའི་ཚེས་༢༡་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གི་ནོར་སྲིད་ལྷན་ཁང་ནས་ཐེ་ཝན་གྱིས་རྒྱ་ནག་གི་དངོས་ཟོག་ལ་སྒོ་ཁྲལ་སྤར་ཏེ་༢༠༡༠་ལོར་མཚོ་འགག་ཕྱོགས་གཉིས་ཀྱིས་མིང་རྟགས་བཀོད་པའི་སྒོ་ཁྲལ་ཆག་ཡང་གི་གྲོས་མཐུན་ལ་འགལ་འཛོལ་བྱུང་སོང་། ཐེ་ཝན་གྱིས་རྒྱ་ནག་གི་དངོས་ཟོག་ལ་སྒོ་ཁྲལ་སྤར་ཡོད་པ་ཕྱིར་འཐེན་བྱ་རྒྱུའི་རེ་བ་ཡོད་ཅེས་བསྒྲགས། ༢༠༢༤་ལོའི་ཕྱི་ཟླ་དང་པོའི་ཚེས་༡༣་ཉིན་ཐེ་ཝན་ལ་སྲིད་འཛིན་དང་རྒྱལ་ཡོངས་གྲོས་ཚོགས་ཀྱི་འཐུས་མི་འོས་འདེམས་བྱེད་ཀྱི་ཡོད་ཅིང་། ཐེ་ཝན་གཞུང་དང་དམངས་གཙོ་ཡར་ཐོན་ཚོགས་པས་རྒྱ་ནག་གིས་རྟག་ཏུ་དཔལ་འབྱོར་དང་ཚོང་ལས། དམག་དཔུང་གིས་འཇིགས་སྐུལ་བྱས་ནས་གནོན་ཤུགས་སྤྲད། ཐེ་ཝན་གྱི་འོས་བསྡུའི་གྲུབ་འབྲས་དེ་རྒྱ་ནག་གི་འདོད་པར་མཐུན་པ་ཞིག་ཡོང་ཐབས་བྱེད་ཀྱི་འདུག་ཅེས་སྐྱོན་བཙུགས།།
གཟའ་ཕུར་བུའི་ཉིན་ཐེ་ཝན་གྱི་ཚོང་དོན་ལྷན་ཁང་གི་མགྲིན་ཚབ་པ་ཀྲན་ཀྲི་ཧུང་གིས་རྒྱ་ནག་གི་ཐབས་ཇུས་དེ་དཔལ་འབྱོར་གྱི་བཙན་གནོན་ཞིག་རེད། རྒྱ་ནག་གིས་ཆབ་སྲིད་ཀྱི་དམིགས་ཡུལ་འབའ་ཞིག་བཅངས་ནས་ལག་བསྟར་བྱས་པའི་ཐབས་ཇུས་དེ་དག་ངེས་པར་དུ་མཚམས་འཇོག་བྱ་དགོས། ང་ཚོས་འཛམ་གླིང་ཚོང་དོན་སྒྲིག་འཛུགས་ཀྱི་སྒྲིག་གཞི་ལྟར་གྲོས་མོལ་བྱས་ཡོད། རྒྱ་ནག་དང་ཐེ་ཝན་གཉིས་ཀ་འཛམ་གླིང་ཚོང་དོན་སྒྲིག་འཛུགས་ཀྱི་ཚོགས་མི་རེད། རྒྱ་ནག་གིས་དྲང་སྙོམས་དང་རྒྱལ་སྤྱིའི་སྒྲིག་སྲོལ་ལ་མཐུན་པའི་ཐག་གཅོད་ཅིག་བྱ་དགོས། ཐེ་ཝན་གྱིས་རྒྱ་ནག་གི་དངོས་ཟོག་ལ་སྒོ་ཁྲལ་སྤར་བ་རེད་ཟེར་བའི་གནད་དོན་ཐད་ཞིབ་འཇུག་བྱ་དགོས་ཀྱང་ང་ཚོར་གྲོས་སྡུར་ཙམ་ཡང་བྱས་མ་བྱུང་། འདི་ནི་དཔལ་འབྱོར་གྱི་གནད་དོན་ཞིག་མིན་པར་ཆབ་སྲིད་ཀྱི་གནད་དོན་ཞིག་རེད། རྒྱ་ནག་གིས་ཐེ་ཝན་ལ་འཕྲལ་ཕུགས་གཉིས་སུ་དཔལ་འབྱོར་དང་ཆབ་སྲིད་ཀྱི་བཙན་གནོན་བྱ་རྒྱུ་མཚམས་འཇོག་བྱེད་མི་སྲིད་ཅེས་གསལ་བསྒྲགས་སྤེལ།།
ཐེ་ཝན་གྱི་རྒྱལ་ཡོངས་འཛུགས་སྐྲུན་ལྷན་ཁང་གི་བློན་ཆེན་གུང་མཱིང་ཞིན་
ཐེ་ཝན་གྱི་རྒྱལ་ཡོངས་འཛུགས་སྐྲུན་ལྷན་ཁང་གི་བློན་ཆེན་གུང་མཱིང་ཞིན་ནས་རྒྱ་ནག་གིས་དངོས་ཟོག་ལ་སྒོ་ཁྲལ་སྤར་ཡང་མཚོ་གླིང་འདིའི་དཔལ་འབྱོར་འཕེལ་རྒྱས་ལ་ཤུགས་རྐྱེན་ཐེབས་མི་ཐུབ། ང་ཚོས་ལོ་རྗེས་མའི་དཔལ་འབྱོར་ཐོན་སྐྱེད་ཀྱི་ཚོད་དཔག་དམའ་རུ་གཏོང་རྒྱུ་མིན། ཐེ་ཝན་གྱི་དཔལ་འབྱོར་ཡར་རྒྱས་བརྒྱ་ཆ་༣་ལྷག་འགྲོ་ཐུབ་ས་རེད་ཅེས་བཀྲལ། རྒྱ་ནག་སྐམ་ས་ཆེན་མོའི་ཐེ་ཝན་ལས་དོན་ལྷན་ཁང་གིས་ཐེ་ཝན་གྱི་གཞུང་འཛིན་དམངས་གཙོ་ཡར་ཐོན་ཚོགས་པ་རང་བཙན་གྱི་འཆི་ལམ་དུ་སྐྱོད་ཀྱི་འདུག དེར་བརྟེན་རྒྱ་ནག་གཞུང་གིས་གནད་དོན་དེར་འོས་འཚམས་ཀྱི་སྒོ་ནས་ཐག་གཅོད་བྱེད་ཐུབ་རྒྱུ་ཁག་པོ་རེད། ཐེ་ཝན་གྱི་སྲིད་འཛིན་གཞོན་པ་དང་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ལེ་ཆིང་ཏེ་ནི་རང་བཙན་འཐབ་རྩོད་པ་ཞིག་རེད་ཅེས་ལན་ཁག་དཀྲིས། ལེ་ཆིང་ཏེས་རྒྱ་ནག་ལ་མཚོ་འགག་ཕྱོགས་གཉིས་ཀྱིས་གྲོས་མོལ་བྱ་དགོས། ཐེ་ཝན་མི་དམངས་ལ་རང་གི་མདུན་ལམ་ཐག་གཅོད་བྱེད་དུ་འཇུག་དགོས་ཞེས་འབོད་སྐུལ་ཞུས།།
ཕྱི་ཟླ་༡༢་པའི་ཚེས་༡༥་ཉིན་ཕྱི་འབྲེལ་དུས་དེབ་ལ་གནས་ཚུལ་ཐོན་པ་ལྟར་ན། ཐེ་ཝན་ལ་རྒྱལ་ཡོངས་འོས་བསྡུ་བྱ་རྒྱུར་དུས་ཡུན་ཟླ་བ་གཅིག་ཀྱང་མེད་པའི་མཚམས་འདིར་རྒྱ་ནག་གིས་གསང་ཉུལ་དང་འཁྱོག་བཤད། དྲིལ་བསྒྲགས་ལོག་པ་བྱས་ནས་ཐེ་ཝན་གྱི་འོས་བསྡུར་ཐེ་ཇུས་བྱ་རྒྱུ་ཤུགས་ཆེ་རུ་བཏང་ཞིང་། དེས་ན་ཐེ་ཝན་གཞུང་གིས་ཀྱང་དེ་ལ་འགོག་རྒོལ་བྱ་རྒྱུ་ཤུགས་ཆེ་རུ་གཏོང་དགོས་པར་གྱུར། ཐེ་ཝན་གྱི་རྒྱལ་སྲུང་ལྷན་ཁང་གིས་རྒྱ་ནག་ནས་ཉིན་ལྟར་ཐེ་ཝན་གྱི་མཚོ་ཁོངས་དང་མཁའ་དབྱིངས་སུ་དཔུང་འཛུལ་བྱས་ནས་འཇིགས་སྐུལ་བྱེད་ཀྱི་ཡོད་པར་མ་ཟད། ཟླ་བ་འདིར་རྒྱ་ནག་གི་གསང་ཉུལ་གྱི་ལྒང་བུ་ཞིག་ཐེ་ཝན་གྱི་མཁའ་དབྱིངས་སུ་བཏང་འདུག ཡིན་ནའང་ཐེ་ཝན་གྱི་འོས་བསྡུའི་སྔོན་ལ་རྒྱ་ནག་གིས་དཔུང་འཇུག་བྱ་རྒྱུའི་ཉེན་ཁ་ཆུང་ཞེས་གསལ་བསྒྲགས་སྤེལ། རྒྱ་ནག་གིས་ཐེ་ཝན་ལ་འཇིགས་སྐུལ་ཅི་ཙམ་བྱས་ན་ཐེ་ཝན་མི་དམངས་ཀྱིས་རང་བཙན་ཤོག་ཁག་གི་འོས་མི་ཚོར་འོས་ཤོག་འཕེན་ཤས་ཆེ། ཐེ་ཝན་གྱི་གཞུང་འཛིན་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ལེ་ཆིང་ཏེ་དང་སྲིད་འཛིན་གཞོན་པའི་འོས་མི་ཞའོ་མིང་ཆིང་གཉིས་ལ་འོས་བསྡུའི་རྒྱལ་ཁ་ཐོབ་སྲིད་པའི་གནས་ཚུལ་ཐོན་འདུག
ཐེ་ཝན་གྱི་འབྱོར་ལྡན་པ་གོ་ཐེ་མཱིང་
ཉེ་ཆར་རྒྱ་ནག་གཞུང་གིས་ཐེ་ཝན་གྱི་རྩོམ་པ་པོ་ལིའོ་མེང་ཡན་འཛིན་བཟུང་བྱས་པའི་གསལ་བསྒྲགས་སྤེལ་བའང་ཐེ་ཝན་གྱི་འོས་བསྡུར་ཐེ་ཇུས་དང་ཐེ་ཝན་པ་ཚོར་སྡིགས་ར་བསྐུལ་བ་ཞིག་ཏུ་བརྩི་ཆོག ལིའོ་མེང་ཡན་ནི་ཆགས་སྲེད་བརྩམས་ཆོས་ཀྱི་རྩོམ་པ་པོའི་རིགས་སུ་གཏོགས། ཁོ་པ་རྒྱ་ནག་གིས་དམག་རྒྱག་དགོས་ཀྱང་མཚོ་ཕྱོགས་གཉིས་གཅིག་གྱུར་བྱ་དགོས་པའི་ལངས་ཕྱོགས་འཛིན་མཁན་ཞིག་ཡིན་རུང་རྒྱ་ནག་གིས་ལོ་༡༢་གྱི་བཙོན་འཇུག་གི་ཁྲིམས་བཅད། ཐེ་ཝན་གྱི་གོ་མིན་ཏང་དང་ཐེ་ཝན་མི་དམངས་ཚོགས་པ་ཞེས་རྒྱ་ནག་གི་ཕྱོགས་གཏོགས་སྲིད་དོན་ཚོགས་པ་ཁག་གི་འོས་མི་གཉིས་ལངས། རྒྱ་ནག་གཞུང་གིས་ཚོང་ལས་ཀྱི་གནོན་ཤུགས་སྤྲད་ནས་ཐེ་ཝན་གྱི་འབྱོར་ལྡན་པ་གོ་ཐེ་མཱིང་སྲིད་འཛིན་འོས་མིའི་ཁོངས་ནས་ཕྱིར་འཐེན་བྱེད་དུ་བཅུག ཐེ་ཝན་གྱི་བཅོས་རིག་ཞིབ་འཇུག་ཁང་ནས་རྒྱ་ནག་གི་དྲྭ་ལམ་ཁག་ཏུ་གོ་མིན་ཏང་གི་འོས་མི་ཧུག་ཡུག་དབྱི་ལ་རྒྱབ་སྐྱོར་དང་ཐེ་ཝན་མི་དམངས་ཚོགས་པའི་འོས་མི་ཀོ་ཝེན་ཅེ་ལ་སྐྱོན་བརྗོད་ཀྱི་རྩོམ་ཡིག་སྤེལ་གྱི་རྩད་གཅོད་བྱུང་འདུག
སྲིད་འཛིན་ཚེ་དབྱིན་ཝེན་གྱི་གཞུང་གིས་འོས་འདེམས་དྲང་སྙོམས་དང་ཕྱིའི་ཐེ་ཇུས་མེད་པ། རྒྱ་ནག་གི་འཁྱོག་བཤད་དང་དྲིལ་བསྒྲགས་ལོག་པ་སོགས་འགོག་པར་མི་༤༠་ཐམ་པ་བཀག་ཉར་བྱས་ཤིང་། ཐེ་ཝན་གྱི་ཁྲིམས་འཛིན་ལྷན་ཁང་གིས་མི་དེ་ཚོར་དྲྭ་ལམ་ནས་དྲིལ་བསྒྲགས་ལོག་པ་དང་འཁྱོག་བཤད་བྱས་པའི་ནག་ཉེས་བཙུགས་ཏེ་ངོ་དེབ་ཀྱི་དྲྭ་ཐོ་༨༠༠་ལྷག་སྒོ་བརྒྱབ། ཐེ་ཝན་གྱི་འོས་བསྡུར་དྲིལ་བསྒྲགས་ལོག་པ་དང་འཁྱོག་བཤད་མང་ཆེ་བ་ངོ་དེབ་དང་ཡུག་ཊུབ། རྒྱ་ནག་གི་ཊིག་ཊོག་དང་སྐད་འཕྲིན་སོགས་ལས་བྱུང་། སྤྱི་ཚོགས་དྲྭ་ལམ་ཁག་ཏུ་ཐེ་ཝན་གྱི་གཞུང་འཛིན་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ལེ་ཆིང་ཏེ་ལ་སྐྱོན་བརྗོད་དང་ཉེས་སྐྱོན་ཐེར་འདོན་གང་ཐུབ་བྱེད་ཀྱི་ཡོད་པའི་རྣམ་པ་ཞིག་མངོན། པྲོག་དབྱིབས་ནད་ཡམས་དུས་སུ་སྤྱི་ཚོགས་དྲྭ་ལམ་དེ་དག་གི་ནང་དུ་ཐེ་ཝན་ལ་སྒོ་ང་དང་ཟས་རིགས་རྣམས་ཆད་འདུག པན་ཆའོ་སློབ་གྲྭའི་དགེ་རྒན་ཚོས་སྔོན་འགྲོ་སློབ་དེའི་སློབ་ཕྲུག་ཚོར་དུག་སྟེར་གྱི་འདུག་ཅེས་དཀྲོག་གཏམ་སྤེལ།།
རྒྱ་ནག་གིས་ཐེ་ཝན་གྱི་ལྡིང་དཔོན་གཞོན་པ་རུས་མིང་ཞན་ཞེས་པ་ཞིག་ལ་ཨ་རིའི་ཐད་འཕུར་གནམ་གྲུ་བཏང་ནས་སྐམ་ས་ཆེན་པོ་བྲོས་ཡོང་ཚེ། ཁོ་པར་མི་ཚེ་ཧྲིལ་པོར་ཟླ་བ་རེར་ཨ་སྒོར་༦༤༠༠་རེ་གླ་ཕོགས་སྤྲོད་དགོས། མཚོ་འགག་ཕྱོགས་གཉིས་བར་དུ་དམག་འཁྲུག་ལངས་ཀྱང་ཐེ་ཝན་དུ་ལུས་པའི་དམག་དཔོན་དེའི་བཟའ་མི་ཚོར་སྲུང་སྐྱོབ་བྱ་དགོས་ཞེས་གྲོས་འགོ་བཏོན། ཐོག་མར་ཐེ་ཝན་གྱི་ལྡིང་དཔོན་གཞོན་པ་ཞན་གྱིས་མ་མཉན་ཡང་ཐད་འཕུར་གནམ་གྲུའི་རིན་གོང་ཕྱེད་ཀ་སྟེ། ཨ་སྒོར་ས་ཡ་༡༥་སྤྲོད་དགོས་ཟེར་བས་མོས་མཐུན་བྱས་པ་རེད་ཅེས་གནས་ཚུལ་ཐོན། དེ་ནས་ཐེ་ཝན་གྱི་རྒྱལ་སྲུང་ལྷན་ཁང་གིས་ལྡིན་དཔོན་གཞོན་པ་ཞན་འཛིན་བཟུང་བྱས་པ་ཡིན། ཐེ་ཝན་གཞུང་གིས་གནས་ཚུལ་སྦས་གསང་གང་ཡང་བྱེད་ཀྱི་མེད་ཅེས་གསར་འགོད་པའི་དྲི་བ་ཁག་ལ་ལན་བཏབ། ཉམས་ཞིབ་པ་ཚོས་རྒྱ་ནག་གི་དམག་ལ་ཨ་རིའི་Ch-47 Chinook་ལྟ་བུའི་ཐད་འགནམ་གྲུ་མེད་པ་དང་རྒྱ་ནག་གི་ཐད་འཕུར་གནམ་དེ་རྣམས་རྒྱུ་སྤུས་ཡག་པོ་མ་རེད། ཐེ་ཝན་ནས་ཨ་རིའི་ཐད་འཕུར་གནམ་གྲུ་ཞིག་ལེན་ཐུབ་ན་རྒྱ་ནག་གི་དམག་མའི་ཐད་འཕུར་གནམ་གྲུ་ཡག་ཏུ་གཏོང་ཐུབ་རྒྱུའི་རྩིས་བརྒྱབ་པ་རེད་ཅེས་བསྟན།།
ཕྱི་འབྲེལ་དུས་དེབ་ལ་མུ་མཐུད་དུ་གནས་ཚུལ་ཐོན་པ་ལྟར་ན། ཕྱི་ཟླ་༡༡་པའི་ཚེས་༡༠་ཉིན་ཐེ་ཝན་གྱི་དམག་དཔོན་ཟུར་པ་དང་ལས་ཐོག་བཅས་མི་༡༠་ལ་གསང་ཉུལ་གྱི་ནག་ཉེས་བཙུགས་ནས་འཛིན་བཟུང་བྱས། དམག་དཔོན་ཁག་ཅིག་ཐེ་ཝན་གྱི་བྱང་ཕྱོགས་དང་ཤར་ཕྱོགས་ཀྱི་མཚོ་ཁ་སྲུང་སྐྱོབ་དམིགས་བསལ་དཔུང་སྡེའི་བཀོད་འདོམས་པ་ཚོ་ཡིན་འདུག ཐེ་ཝན་གྱི་དམག་ཤོག་༦༠༡་གི་ཁོངས་སུ་ཐད་འཕུར་གནམ་གྲུའི་དཔུང་སྡེ་ཡང་འདུས། དམག་དཔོན་གཉིས་ཀྱིས་མཚོ་འགག་ཕྱོགས་གཉིས་བར་དུ་དམག་འཁྲུག་ལངས་ན་རྒྱ་ནག་ལ་མགོ་འདོགས་འདོད་ཡོད་ཅེས་བརྙན་འཕྲིན་ཕབ། དམག་དཔོན་གསུམ་གསང་བའི་ཚོགས་པ་འཛུགས་རྒྱུའི་གྲོས་མཐུན་བྱུང་། དམག་དཔོན་བཞི་ལ་ཐེ་ཝན་གྱི་དམག་དོན་གསང་བའི་གནས་ཚུལ་རྒྱ་ནག་ལ་སྤྲད་པའི་ནག་ཉེས་ཕོག དམག་དོན་གསང་བའི་ཡིག་ཆའི་ནང་དུ་རྒྱ་ནག་གི་བཙན་འཛུལ་བྱུང་ན་ཐེ་ཝན་གྱིས་འགོག་རྒོལ་ཇི་ལྟར་བྱ་དགོས་མིན་རྣམས་འཁོད་འདུག་ཟེར། ཐེ་ཝན་གྱི་རྒྱལ་སྲུང་ལྷན་ཁང་གིས་གསར་འགྱུར་དེ་གནད་འགག་ཆེན་པོ་མ་རེད་ཅེས་འགྲེལ་ཐབས་བྱེད་ཀྱི་ཡོད་པའི་གནས་ཚུལ་ཐོན་འདུག