རྒྱ་ནག་གིས་ཚོཊ་ཆེན་གཉིས་གྲོལ་རྗེས་ཀྱི་སྲིད་བློན་གྱི་གསར་འགོད་ལྷན་ཚོཊ་མེད་པར་བཟོས་འདུག

སྤྱི་ཟླ་༣ པའི་ཚེས་༤ ཡི་ཉིན། རྒྱ་ནག་མི་དམངས་འཐུས་མི་ཚོགས་ཆེན་ཞེས་པའི་མགྲིན་ཚབ་པ་ལའོ་ཆིན་ཅིན་གྱིས་གསལ་བསྒྲགས་བྱས་པ་ལྟར་ན། ད་ལོའི་རྒྱ་ནག་མི་དམངས་འཐུས་མི་ཚོགས་ཆེན་ཞེས་པ་དེ་སྤྱི་ཟླ་༣ པའི་ཚེས་༡༡ ཉིན་ལ་གྲོལ་བའི་རྗེས་སུ། སྲིད་བློན་ལི་ཆང་གི་གསར་འགོད་ལྷན་ཚོགས་དེ་མེད་པར་བཟོས་ཡོད་པར་མ་ཟད། སླད་མར་ཡང་ལོ་ངོ་འགའ་ཤས་རིང་ལ་སྤེལ་རྒྱུ་མིན་པ་རེད། ལི་ཆང་གི་ལས་དོན་སྙན་ཐོ་དང་ཚོགས་འདུའི་རིང་སྡེ་ཚན་སོ་སོས་ཁྱབ་སྤེལ་བྱས་པའི་ནང་དོན་ཁག་གིས་ཕྱི་ལོགས་སུ་དགོས་ངེས་ཀྱི་གནས་ཚུལ་མཁོ་སྤྲོད་བྱས་ཟིན་པའི་རྒྱུ་མཚན་བཀོད་འདུག་ཀྱང་། དེའི་ཐད་གནད་དོན་དབྱེ་ཞིབ་པ་ཚོས་དེ་ནི་རྒྱལ་སྲིད་སྤྱི་ཁྱབ་ཁང་དང་སྲིད་བློན་གྱི་གོ་གནས་ནུས་མེད་དུ་གཏོང་བ་དང་། བཅོས་བསྒྱུར་སྒོ་འབྱེད་ཀྱི་སྲིད་ཇུས་བསྡུ་གསོག་བརྒྱབ་པ། རྒྱ་ནག་གཞུང་གི་ཕྱི་གསལ་ནང་གསལ་གྱི་ཚད་ལ་བསྐྱར་དུ་དོགས་པ་འཕར་མ་ཟ་དགོས་པ་ཞིག་བཟོས་པ་ཙམ་མ་ཟད། མ་འོངས་པར་ལི་ཆང་གིས་ཞི་ཅིན་ཕིང་གི་ཅི་གསུང་བཀའ་སྒྲུབ་ཞུ་རྒྱུ་ཡིན་པ་མངོན་གསལ་དུ་ཕྱིན་པའི་མཚོན་རྟགས་ཤིག་ཏུ་འདོད་བཞིན་པ་རེད།

རྒྱ་ནག་གི་རྒྱལ་ཡོངས་མི་དམངས་འཐུས་མིའི་ཚོགས་ཆེན་ཞེས་པའི་རྗེས་སུ་རྒྱ་ནག་གི་སྲིད་བློན་གྱིས་གསར་འགོད་ལྷན་ཚོགས་བསྐོང་བའི་ལམ་སྲོལ་དེ། ༡༩༩༡ ལོ་ནས་འགོ་ཚུགས་ཤིང་༡༩༩༣ ལོའི་རྗེས་ནས་སྒྲིག་གཞི་ལྡན་པ་དང་རྒྱུན་ལྡན་དུ་ཅན་ཆགས། སྤྱི་ལོ་༡༩༩༠ གོ་གྲངས་ཀྱི་སྟོད་ཙམ་ནས་བཟུང་སྟེ། ལོ་རེར་འཆར་ཅན་ལྟར་རྒྱ་ནག་རྒྱལ་ཡོངས་མི་དམངས་འཐུས་མི་ཚོགས་ཆེན་ཞེས་གྲོལ་བའི་ཉིན་དེར། མི་དམངས་ཚོགས་ཁང་ཆེན་མོའི་ནང་སྲིད་བློན་གྱིས་ཕྱི་ནང་གི་གསར་འགོད་པ་ཚོར་གསར་འགོད་ལྷན་ཚོགས་ཤིག་བསྐོང་སྲོལ་ཡོད་པ་ལས། རྒྱ་ནག་དང་ཕྱིའི་རྒྱལ་ཁབ་ཀྱི་གསར་འགྱུར་བརྒྱུད་ལམ་ཁག་གི་གསར་འགོད་པ་ཉུང་ཤས་ཤིག་ལ་རྒྱ་ནག་གི་སྲིད་བློན་དང་ལྷན་དུ་ཕན་ཚུན་ངོ་འཕྲད་ཀྱིས་རྒྱ་ནག་གི་སྣེ་ཡོད་མི་སྣ་ཨང་གཉིས་པར་རྒྱང་ཐག་ཉེ་ས་ནས་རྟོག་ཞིབ་བྱ་བའི་གོ་སྐབས་ཤིག་ཡོད་མོད། དེ་ལྟའང་། རྒྱ་ནག་གི་འགོ་ཁྲིད་ཞི་ཅིན་ཕིང་སྲིད་ཀྱི་སྡིངས་ཆར་སླེབས་པ་ནས་བཟུང་རྒྱུན་སྲོལ་ལྟ་བུའི་འགྲོ་སྟངས་མང་པོ་ཞིག་ལ་བཅོས་བསྒྱུར་བཏང་བར་བརྟེན། སྲིད་བློན་གྱི་གསར་འགོད་ལྷན་ཚོགས་དེའང་དེ་བཞིན་ལོ་རྒྱུས་དེབ་ཐེར་གྱི་ཀློང་ལ་བསྐྱལ་རན་པ་སྨོས་མེད་རེད།

སྤྱིར་ལོ་རེའི་རྒྱལ་ཡོངས་མི་དམངས་འཐུས་མི་ཚོགས་ཆེན་དབུ་འབྱེད་ཀྱི་སྐབས་སུ། རྒྱ་ནག་གི་སྲིད་བློན་གྱིས་འདས་པའི་ལོ་གཅིག་རིང་གི་གཞུང་གི་ལས་དོན་སྙན་ཐོའི་གཏམ་བཤད་ཡིག་ཐོག་འཁོད་པ་ཞིག་ཇི་མ་ཇི་བཞིན་དུ་སྒྲོག་སྦྱངས་བྱས་ཐོག་མ་འོངས་པའི་ལས་དོན་ལ་འཆར་འགོད་བྱ་སྲོལ་ཡོད་པ་དེ་ཡང་། ཡིག་ཐོག་གི་སྙན་ཐོ་སྒྲོག་སྦྱངས་ལས་གཞན། ལོ་རེའི་གསར་འགོད་ལྷན་ཚོགས་དེར་མི་ཚོས་དོ་སྣང་ཤུགས་ཆེ་སླེབས་ཀྱི་ཡོད་པ་རེད། གང་ལགས་ཞེ་ན། སྲིད་བློན་གྱིས་ཡུལ་དངོས་སུ་གསར་འགོད་པའི་དྲི་བར་ལན་འདེབས་བྱེད་ཅིང་། དྲི་བ་དང་བརྗོད་གཞི་སྣ་མིན་སྣ་ཚོགས་ཡོང་སྲིད་པས། སྲིད་བློན་ཀྱི་བློ་རིག་དང་སྲིད་དོན་ལ་རྒྱུས་ལོན་པའི་གནས་ཚད་སོགས་ལ་ཚོད་བགམ་བྱེད་ཀྱི་ཡོད་པའི་རྐྱེན་གྱིས། ལོ་རེའི་ཚོགས་ཆེན་གཉིས་སུ་གྲགས་པའི་ཆ་ཤས་གལ་ཆེན་ཞིག་ཡིན་པར་མ་ཟད། རྒྱ་ནག་གི་སྲིད་བློན་གྱིས་སོ་སོའི་སྒེར་གྱི་འཇོན་ཐང་ངོམ་སའི་སྡིངས་ཆ་འགངས་ཆེན་ཞིག་ཀྱང་ཡིན་པ་རེད། ད་ལན་སྐབས་འདིའི་རྒྱལ་ཡོངས་མི་དམངས་འཐུས་མིའི་ཚོགས་ཆེན་ཞེས་པའི་སྲིད་བློན་གྱི་གསར་འགོད་ལྷན་ཚོགས་མེད་པར་བཟོས་པ་དེས་ཐ་ན་ཚོགས་ཐོག་ཏུ་ཡོད་པའི་རྒྱལ་ཡོངས་སྲིད་གྲོས་ཞེས་པའི་འཐུས་མི་ཚོར་ཡང་ཧ་ལས་ཧང་སངས་སུ་བཅུག་ཡོད་པའི་གནས་ཚུལ་ཐོན་འདུག།

ཞི་ཅིན་ཕིང་གིས་ན་ནིང་ལོའི་སྤྱི་ཟླ་༣ པའི་ནང་ལས་ཡུན་གསུམ་པ་དེ་འགོ་ཚུགས་རྗེས། རྒྱལ་སྲིད་སྤྱི་ཁྱབ་ཁང་གི་ལས་དོན་སྒྲིག་གཞིའི་བསྐྱར་བཅོས་གསར་པ་དེར། རྒྱལ་སྲིད་སྤྱི་ཁྱབ་ཁང་གིས་རང་འགུལ་གྱི་སྒོ་ནས་རྒྱ་ནག་དམར་ཤོག་གཞུང་གི་ཐག་གཅོད་གང་བྱས་པ་དང་། སྤྱི་ཁྱབ་དྲུང་ཆེ་ཞི་ཅིན་ཕིང་གིས་བཀོད་ཁྱབ་གང་བཏང་བ་ཡོད་ཚད་མཐའ་གཅིག་ཏུ་ལག་བསྟར་བྱ་རྒྱུར་ནན་བརྗོད་བྱས་པ་དེས། སྲིད་བློན་ལི་ཆང་དང་རྒྱལ་སྲིད་སྤྱི་ཁྱབ་ཁང་སྤྱིའི་ནུས་པ་ཉམས་ཆག་བཏང་བ་དང་། ཆབ་སྲིད་འཛིན་སྐྱོང་དབང་ཆ་དེ་དམར་ཤོག་དབུས་གཞུང་གི་ཕྱོགས་སུ་སྔར་ལས་ལྷག་པར་གཅིག་སྡུད་བྱས་པའི་མཚོན་རྟགས་ཤིག་ཡིན་པ་རེད།

བརྗོད་གཞི་ཚོར་བ་སྐྱེན་པོ་ཡིན་རྐྱེན་མཚན་གསུང་འདོད་མེད་པའི་རྒྱ་ནག་གི་ཉམས་ཞིབ་པ་ཞིག་གིས་ཨ་རིའི་རླུང་འཕྲིན་ཁང་ལ། རྒྱ་ནག་གི་སྲིད་བློན་གྱིས་ཚོགས་ཆེན་གཉིས་ཀྱི་རྗེས་སུ་གསར་འགོད་ལྷན་ཚོགས་བསྐོང་བའི་ལམ་སྲོལ་དེ། ཐོག་མར་༡༩༨༨ ལོའི་སྲིད་བློན་ཟུར་པ་ལི་ཕུང་གི་དུས་སྐབས་ནས་འགོ་ཚུགས་ནས། ༡༩༩༣ ལོར་རྒྱུན་ལྡན་ཅན་དུ་ཆགས་ཤིང་། ད་ཕན་ལོ་ངོ་༣༠ ཐམ་པའི་ལོ་རྒྱུས་ཡོད་པ་རེད། ད་ལན་ལམ་སྲོལ་འདི་བཞིན་མེད་པར་བཟོས་པ་དེ་ནི་རྒྱ་ནག་དམར་ཤོག་གི་ཚོགས་ཆེན་ཉི་ཤུ་ཐམ་པ་ཚོགས་པ་ཚུན་ཆད་ཆབ་སྲིད་ཀྱི་ཁ་ཕྱོགས་འགྱུར་བའི་མཚམས་རྟགས་གལ་འགངས་ཆེ་ཤོས་ཤིག་ཏུ་ངེས་ཤིང་། བཅོས་བསྒྱུར་སྒོ་འབྱེད་བྱས་ནས་ལོ་ངོ་༤༠ ལྷག་རིང་ལ་རྒྱ་ནག་གི་སྲིད་དོན་གྱི་ནང་ལ་ཕྱི་གསལ་ནང་གསལ་དང་རང་དབང་གི་ཕྱོགས་སུ་བསྐྱོད་པའི་ལམ་ཁ་ཡོད་ཚད་འགག་པ་དང་ཁྱོན་ཡོངས་ལ་རྫོགས་ཚིག་བཀོད་པ་ཞིག་ཏུ་མཚོན་གྱི་ཡོད་པ་རེད། ད་ལྟའི་ཆར་རྒྱ་ནག་གི་དཔལ་འབྱོར་ཉམས་རྒུད་དུ་ཕྱིན་ཏེ་དཀའ་ངལ་ཆེན་པོའི་ནང་ལྷུང་ཡོད་ཅིང་། རྒྱལ་སྤྱིའི་ཐོག་གྲོགས་མེད་ཁེར་རྐྱང་ཆགས་པ་སོགས་ཕྱི་ནང་གི་རྒྱུ་རྐྱེན་དུ་མའི་དབང་གིས་ཡུལ་དངོས་སུ་ཕྱི་ནང་གི་དྲི་བར་ལན་འདེབས་བྱེད་པའི་སྤོབས་པ་མེད་པར་མ་ཟད། རྒྱ་ནག་དམར་ཤོག་ལ་མ་གཞི་ནས་རྒྱལ་སྤྱིའི་གསར་འགྱུར་བརྒྱུད་ལམ་ཁག་ལ་ངོ་གདོང་གཏོད་མི་ཕོད་པའི་འཇིགས་སྣང་ཞིག་རང་ཆས་སུ་ཡོད་པ་རེད། ཐ་ན་སྔ་ས་ནས་གྲ་སྒྲིག་ཨང་གསར་བྱས་ཟིན་པའི་དྲི་བ་དྲིས་ལེན་ཡང་དང་ལེན་བྱ་འདོད་མེད་པ་དེས་ད་ལྟའི་རྒྱ་ནག་ནང་གི་ཆབ་སྲིད་འཛིན་སྐྱོང་གི་ཕྱི་གསལ་ནང་གསལ་གྱི་ཚད་དེ་རིག་གནས་གསར་བརྗེ་ཆེན་མོའི་སྐབས་ལས་ཀྱང་སྡུག་ཏུ་ཕྱིན་ཡོད་པ་ངེས་གཏན་རེད་ཅེས་བརྗོད་འདུག།

China in a surprise announcement says it is eliminating annual news conference by premier