༄༅།། ཉེ་ཆར་མཚོ་སྔོན་ཞིང་ཆེན་གྱི་ཡུལ་ཤུལ་ཁུལ་དུ་བོད་ཀྱི་དགོན་སྡེ་ཁག་ལ་ཆོས་ཞུགས་བྱེད་ཡོད་པའི་གྲྭ་བཙུན་ལོ་ན་༡༨་ལ་མ་སོན་པ་ཚོ་རྒྱ་གཞུང་གིས་བཙུགས་པའི་སློབ་གྲྭ་ཁག་འགྲིམ་དགོས་པའི་སྲིད་ཇུས་ཤིག་ལག་བསྟར་བྱེད་བཞིན་པའི་གནས་ཚུལ་རྣམས་བོད་ཕྱི་ལོགས་ཀྱི་གསར་འགྱུར་བརྒྱུད་ལམ་ཁག་ཏུ་ཐོན་ཡོད་ཅིང་། ད་ལྟ་གསར་འགོད་པས་སླར་ཡང་གནས་ཚུལ་ཤེས་རྟོགས་བྱུང་བར་གཞིགས་ན། རྒྱ་ནག་གཞུང་གིས་སི་ཁྲོན་ཞིང་ཆེན་གྱི་ཁོངས་སུ་དབྱེ་བགོ་བྱེད་ཡོད་པའི་བོད་ས་ཁག་ཏུའང་སྲིད་ཇུས་གཅིག་མཚུངས་ཤིག་ལག་ལེན་བསྟར་གྱི་ཡོད་པ་རེད། དེ་ཡང་ཕྱི་ཟླ་༧་པའི་ཚེས་༢༡་ཉིན་གསར་འགྱུར་མཁོ་སྤྲོད་པས་འགྲེལ་བརྗོད་བྱས་པ་ལྟར་ན། རྒྱ་ནག་གཞུང་གིས་དཀར་མཛེས་ཁུལ་གྱི་བོད་པའི་དགོན་སྡེ་ཁག་ཏུ་གྲྭ་བཙུན་ལོ་ན་༡༨་ལ་མ་སོན་པ་ཆོས་ཞུགས་བྱེད་ཡོད་པ་རྣམས་སྲིད་གཞུང་གི་བཀའ་རྒྱ་ལྟར་གཞུང་གཉེར་སློབ་གྲྭ་ཁག་འགྲིམ་དགོས། ཁོ་ཚོས་ལུས་ལ་སྐྱ་ཆས་གྱོན་དགོས་ཞེས་བཙན་བཀའ་བཏང་ཡོད་པའི་གནས་ཚུལ་ཐོན་འདུག
གསར་འགྱུར་མཁོ་སྤྲོད་པའི་སྐད་ཆ་དེ་ཚོར་བསམ་ཞིབ་བྱེད་ཚེ། ད་ལྟ་རྒྱ་ནག་གཞུང་གིས་བོད་ཀྱི་མདོ་ཁམས་ཕྱོགས་སུ་ལག་ལེན་བསྟར་བཞིན་པའི་སྲིད་ཇུས་འདི་བོད་ས་ཁག་ལ་གསར་དུ་ལག་ལེན་བསྟར་གྱི་ཡོད་པའི་སྲིད་ཇུས་ཤིག་མིན་པ་དཔོགས་ནུས། རྒྱ་ནག་གཞུང་གིས་ཐོག་མཐའ་བར་གསུམ་དུ་བོད་ནང་ལ་སྲིད་ཇུས་འདྲ་མིན་ཞིག་ལག་ལེན་བསྟར་ནས་ལས་འགུལ་རབ་དང་རིམ་པ་ཞིག་སྤེལ་བཞིན་པའི་གྲས་ཤིག་ཡིན་པ་གསལ་རྟོགས་ཐུབ། ཉམས་ཞིབ་པ་ཚོས་བོད་ཀྱི་དགོན་སྡེ་ཁག་དང་གྲྭ་བཙུན་ཚོས་བོད་པའི་ཆོས་དང་རིག་གཞུང་། མི་རིགས་ཀྱི་ངོ་བོ་གཅེས་འཛིན་བཅས་ལ་ནུས་པ་ཆེན་པོ་ཞིག་འཐོན་གྱི་ཡོད་པས་རྒྱ་ནག་གཞུང་གིས་དམིགས་འབེན་དུ་འཛིན་གྱི་འདུག་ཅེས་བཤད།།
རྒྱ་ནག་གཞུང་གིས་གྲྭ་བཙུན་ལོ་ཆུང་རྣམས་གཞུང་གཉེར་སློབ་གྲྭ་ཁག་འགྲིམ་དགོས་ཞེས་སྲིད་ཇུས་ཤིག་ལག་ལེན་བསྟར་ཡུལ་དགོན་སྡེ་ཁག་ནི་ཁྲོམ་བཀྲ་ཤིས་དགོན་དང་སྤྱི་འདུལ་སྐལ་བཟང་དགོན། སྣ་ཐ་སེངས་གྲགས་དགོན་དང་ཁྲོན་རྡོ་དཀར་དགོན། སྡེ་དགེ་རྩ་ར་དགོན་བཅས་ཡིན་ཞིང་། ཉིན་འདི་དག་གི་རིང་དུ་བོད་ཀྱི་དགོན་སྡེ་དེ་ཚོར་རྒྱལ་ཁབ་ཀྱི་སྲིད་ཇུས་དེ་ལག་བསྟར་བྱས་དང་བྱེད་བཞིན་པའི་སྒང་ཡིན་པས་གནས་སྟངས་ཅུང་ཙམ་ཛ་དྲག་ཅན་དུ་གྱུར་ཡོད་པའི་རྣམ་པ་ཞིག་ཐོན་འདུག་ཅེས་བཀྲལ།།
རྒྱ་གར་རྡ་རམ་ས་ལར་གནས་འཁོད་བོད་ཀྱི་འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་ལྟེ་གནས་ཁང་གི་ཉམས་པ་ཞིབ་པ་པད་མ་རྒྱལ་གྱིས་རྒྱ་ནག་གཞུང་གིས་འོས་འགན་སློབ་གསོ་ཞེས་བའི་མིང་ཐོག་ཏུ་བོད་ཀྱི་ནང་བསྟན་ཆོས་ལུགས་ཀྱི་རིག་གནས་འདི་རྩ་མེད་གཏོང་རྒྱུའི་ཐབས་ཇུས་འདྲ་མིན་ཞིག་ལག་ལེན་བསྟར་གྱི་འདུག ཁོ་ཚོས་མིང་བྱང་འདྲ་མིན་ཞིག་བཀོད་ནས་རྒྱ་ནག་དམར་ཤོག་ཚོགས་པའི་སྲིད་ཇུས་འདི་ལག་བསྟར་བྱས་དང་བྱེད་བཞིན་པ་རེད། བོད་ཀྱི་ཆོས་ལུགས་དེ་ཀྲུང་གོ་ཅན་དུ་བསྒྱུར་དགོས་ཞེས་བའི་དམིགས་ཡུལ་བསྒྲུབ་ཐབས་རེད། དེ་སྔ་བོད་ནང་གི་ཡ་ཆེན་སྒར་དང་གསེར་རྟ་བླ་རུང་ཆོས་སྒར་སོགས་ཀྱི་གནས་སྟངས་ལ་གཞིགས་ན་ར་སྤྲོད་གསལ་པོ་འབྱུང་ཐུབ་ཅེས་བརྗོད་ཡོད་པའི་སྐོར། བལ་ཡུལ་ནས་འདི་གའི་གསར་འགོད་པ་ཀུན་བཟང་བསྟན་འཛིན་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།
Your browser doesn’t support HTML5
བོད་པའི་གྲྭ་བཙུན་ལོ་ན་༡༨་ལ་མ་སོན་པ་ཚོ་སློབ་གྲྭར་འགྲིམ་དགོས་པ