ཨ་རིའི་རླུང་འཕྲིན་ཁང་གི་གསར་འགོད་པ་བྱེ་གཞོང་བློ་བཟང་ཚུལ་ཁྲིམས་ལགས་རྒྱུན་རིང་གཟུགས་ཁམས་མི་བདེ་བ་བྱུང་རྗེས་རེས་གཟའ་ཉི་མའི་དགོང་དྲོར་རང་ཁྱིམ་དུ་འདས་གྲོངས་སོང་བའི་ཡིད་སྐྱོའི་གནས་ཚུལ་བྱུང་འདུག བྱེ་གཞོང་བློ་བཟང་ཚུལ་ཁྲིམས་ལགས་དམ་པ་དེ་༢༠༠༩ ལོར་ཨ་རིའི་རླུང་འཕྲིན་ཁང་གི་གསར་འགོད་པར་ཞུགས་ཤིང་ལོ་རྒྱུན་དེའི་རིང་གཙོ་བོ་བརྙན་འཕྲིན་ཞུ་སྒྲིག་གི་ལས་འགན་ཐོག་སོ་ཡ་ལ་ཞེས་པའི་བོད་ཀྱི་གནའ་དེང་གི་གླུ་གཞས་ལས་རིམ་གཙོ་སྐྱོང་གནང་། ཨ་རིའི་རླུང་འཕྲིན་ཁང་གི་གསར་འགོད་པར་མ་ཞུགས་གོང་ལོ་ངོ་སུམ་ཅུ་ཉེ་བར་བཙན་བྱོལ་གཞུང་གི་གཞུང་ཞབས་ཁོངས་རྒན་དྲུང་ནས་དྲུང་ཡིག་ཆེན་མོའི་བར་ཐེམ་པ་རིམ་འཛེགས་ཀྱི་ལས་འཁུར་ཞུས་ཤིང་། བོད་གཞུང་དྲིལ་བསྒྲགས་ལས་ཁུངས་སུ་ས་བཀྲ་བཟོ་བཀོད་ཀྱི་ལན་འགན་ཐོག་བོད་ཀྱི་གཞུང་འབྲེལ་ས་བཀྲ་དང་པོ་བཟོ་འགོད་གནང་བ་མ་ཟད། རིམ་བཞིན་སྒྲ་བརྙན་སྡེ་ཚན་གྱི་འགན་འཁུར་རྐང་ལེན་གྱིས་ ༡༩༨༧ ནས་ ༡༩༩༠ བར་བོད་ནང་ཞི་རྒོལ་ཆེན་མོ་བྱུང་སྐབས་ཀྱི་དངོས་བྱུང་གློག་བརྙན་ཕྱོགས་བསྒྲིགས་ཀྱིས་གཙོས་༧གོང་ས་མཆོག་གི་མཛད་འཆར་སོགས་བོད་དང་བོད་མིའི་སྐོར་ལ་དངོས་བྱུང་གློག་བརྙན་རིམ་པར་ཕྱོགས་བསྒྲིགས་གནང་། གཞུང་ཞབས་ཁོངས་ཕྱི་དྲིལ་ལས་ཁུངས་ནས་གནས་སྤོས་ཀྱིས་སྤྱི་ཁྱབ་འོས་བསྡུ་ལས་ཁང་གི་དྲུང་ཆེ་ལས་འཕར་དང་དེ་རྗེས་ཆོས་རིག་ལས་ཁུངས་ཀྱི་དྲུང་ཡིག་ཆེ་མོའི་ལས་འཁུར་ཞུས། གཞུང་ཞབས་གནང་མུར་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཁོངས་སུ་ཞུགས་ནས་རྡ་རམ་ས་ལ་ས་གནས་གཞོན་ནུའི་ཚོགས་གཙོ་དང་། དེ་རྗེས་སྤྱི་ཁྱབ་དབུས་རྒྱུན་ལས་ལ་ཐེངས་གཉིས་འདེམས་ཐོན་བྱུང་ནས་རིག་གཞུང་འགན་འཛིན་དང་དྲིལ་བསྒྲགས་འགན་འཛིན་གནང་བ་མ་ཟད། བོད་ཀྱི་གཞོན་ནུ་ལྷན་ཚོགས་ཀྱི་རང་བཙན་དུས་དེབ་ཀྱི་བོད་ཡིག་གི་རྩོམ་སྒྲིག་པ་གནང་།
བློ་བཟང་ཚུལ་ཁྲིམས་ལགས་དམ་པ་དེས་གཞུང་ཞབས་ནས་གཡར་པོ་ཞུས་ནས་ནོར་ཝེ་བོད་ཀྱི་རླུང་འཕྲིན་ཁང་གི་སྤྱི་ཁྱབ་རྩོམ་སྒྲིག་འགན་འཛིན་གནང་རྒྱུན་རླུང་འཕྲིན་ཁང་གི་སྒྲོམ་གཞི་དང་གསར་འགོད་ཀྱི་སྤུས་ཚད་སོགས་ལ་ཡར་རྒྱས་བཏང་བ་སོགས་མདོར་ན་མི་ལོ་ལྔ་བཅུ་ལ་ཉེ་བའི་རིང་བོད་གཞུང་དང་བོད་མིའི་སྤྱི་ཚོགས་ནང་ཞབས་ཞུ་ཧུར་བསྐྱེད་ཆེན་པོ་གནང་མཁན་གཅིག་ལ་ངོས་འཛིན་བྱེད་ཀྱི་ཡོད། ཁོང་ནི་མི་གཤིས་བཟང་ལ་ལས་རོགས་སོགས་ལ་མཐུན་ལམ་ཆེ་བ། ནང་ཆོས་གཙོ་བོར་གྱུར་བའི་བོད་ཀྱི་ལོ་རྒྱུས་དང་རིག་གནས་ལ་དོ་སྣང་ཆེན་པོ་གནང་མཁན་གཅིག་རེད།
བློ་བཟང་ཚུལ་ཁྲིམས་ལགས་དམ་པ་དེ་ ༡༩༥༦ ཟླ་ ༧ ཚེས་ ༡ ཉིན་བོད་ཀྱི་ས་ཁུལ་རྩེ་གདོང་དུ་འཁྲུངས་ཤིང་། ༡༩༥༩ ལོར་ཕ་མ་ཚོའི་ལྷན་དུ་རྒྱ་གར་ལ་བཙན་བྱོལ་ལ་འབྱོར་རྗེས་ཐོག་མར་མ་སུ་རི་གཏན་འཇགས་སློབ་གྲྭ་ནས་གཞི་རིམ་སློབ་གྲྭ་དང་། དེ་རྗེས་ཅན་དྷི་གྷར་མཐོ་རིམ་སློབ་གྲྭར་ས་ཁམས་རིག་པར་ཉེ་བའི་གཙུག་ལག་སློབ་སྦྱོང་ཐོན། མཐོ་རིམ་སློབ་གྲྭ་ཐོན་མ་ཐག་བཙན་བྱོལ་བོད་གཞུང་གི་གཞུང་ཞབས་ཁོངས་ཡིག་རྒྱུགས་བཏང་སྟེ་ཚུད། ཁོང་ལ་ད་ལྟ་ཤུལ་ལུས་སྐུ་ཟླ་དབྱངས་ཅན་སྒྲོལ་དཀར་ལགས་དང་བུ་བཞི་ཡོད།
གསར་འགོད་པ། རྣམ་རྒྱལ་ཤཱསྟྲཱི།