༄༅།། ཐེ་ཝན་ལ་མི་འབོར་ས་ཡ་༢༣་ཡོད་པ་དེའི་ཁོངས་ནས་མི་གྲངས་ས་ཡ་༡༩་ལྷག་གིས་འོས་ཤོག་འཕངས་ནས་སྲིད་འཛིན་དང་གྲོས་ཚོགས་འཐུས་མི་རྣམས་འདེམས་བསྐོ་བྱེད་ཆོག་པའི་ལོ་ཚད་ལོན། ཕྱི་ཟླ་༡༢་པའི་ཚེས་༢༥་ཉིན་ཉི་ཧོང་དུས་བབ་ཚགས་པར་ལ་གནས་ཚུལ་སྤེལ་བ་ལྟར་ན། ཕྱི་ཟླ་དང་པོའི་ཚེས་༡༣་ཉིན་ཐེ་ཝན་མི་དམངས་ཀྱིས་མཚོ་གླིང་དེའི་ཕྱི་ནང་གི་ལས་དོན་གང་ལེགས་སྒྲུབ་ཐུབ་པའི་མི་ཞིག་སྲིད་འཛིན་ལ་གདམ་དགོས། སྲིད་འཛིན་འོས་བསྡུའི་གྲུབ་འབྲས་ནི་མཚོ་གླིང་དེའི་དཔལ་འབྱོར་དང་བདེ་འཇགས་སྲུང་སྐྱོབ་ལ་འབྲེལ་བ་ཤིན་ཏུ་ཆེ། ཐེ་ཝན་གྱི་གཞུང་འཛིན་དམངས་གཙོ་ཡར་ཐོན་ཚོགས་པ་དང་ཕྱོགས་འགལ་གོ་མིན་ཏང་། ཐེ་ཝན་མི་དམངས་ཚོགས་པ་བཅས་སྲིད་དོན་པ་གསུམ་གྱི་འོས་མི་སུ་ལ་སྲིད་འཛིན་འོས་བསྡུའི་རྒྱལ་ཁ་ཐོབ་ཀྱང་མཚོ་འགོག་ཕྱོགས་གཉིས་ཀྱི་འབྲེལ་བ་བརྟན་པོ་དང་ཡག་པོ་ཞིག་འཛིན་རྒྱུ་གཙིགས་སུ་འཛིན་དགོས། མཚོ་འགག་ཕྱོགས་གཉིས་ཀྱི་འབྲེལ་བ་དེས་ཨ་རི་དང་རྒྱ་ནག་གི་འབྲེལ་བ་ལའང་ཤུགས་རྐྱེན་ཐེབས་ཐུབ་ཅེས་གནས་ཚུལ་སྤེལ་འདུག
ཐེ་ཝན་གྱི་ཆགས་ཡུལ་ནི་ཨ་རི་དང་རྒྱ་ནག་གཉིས་ཀར་དམག་དོན་འཐབ་ཇུས་ཐོག་ཏུ་གནད་འགག་ཆེ་ཞིང་། ཉེ་དུས་ཤིག་ནས་ཐེ་ཝན་མཚོ་འགག་ཏུ་དམག་འཁྲུག་ཆེན་པོ་ཞིག་ལང་སྲིད་པའི་ཉེན་ཁ་ཆེ་རུ་འགྲོ་བཞིན་ཡོད་པ་སྟེ། ཟླ་བ་སྔོན་མར་སྲིད་འཛིན་བྷ་ཌན་དང་ཞིས་ཅིན་ཕིང་གཉིས་སན་ཧྥ་རན་སེ་སི་ཀོ་གྲོང་ཁྱེར་དུ་ཐུག་འཕྲད་གྲོས་མོལ་བྱས་པའི་སྐབས་སུ་ཞིས་ཅིན་ཕིང་ནས་རྒྱ་ནག་གིས་ཐེ་ཝན་ལ་བཙན་འཛུལ་བྱ་རྒྱུའི་འཆར་གཞི་མེད། ནམ་ཞིག་མཚོ་འགག་ཕྱོགས་གཉིས་གཅིག་གྱུར་བྱ་དགོས་པའི་སྲིད་ཇུས་ལ་འགྱུར་བ་མེད་ཅེས་བསྐྱར་དུ་བཟློས། རྒྱ་ནག་གིས་འཕྲལ་དུ་ཐེ་ཝན་ལ་དམག་བརྒྱབ་ནས་བཙན་འཛུལ་བྱ་རྒྱུའི་ཉེན་ཁ་མེད་མོད། འོན་ཀྱང་རིམ་བཞིན་ཨ་མི་རི་ཀས་ཐེ་ཝན་ལ་བདེ་འཇགས་སྲུང་སྐྱོབ་ཀྱི་འབྲེལ་བ་སྲ་བརྟན་བཙུགས་ཏེ་མཚོ་འགག་ཕྱོགས་གཉིས་ཀྱི་གནས་བབ་ལ་འགྱུར་བ་གཏོང་རྒྱུ་རེད་ཅེས་རྒྱ་ནག་གི་བློ་འཚབ་ཆེ་རུ་སོང་། རྒྱ་ནག་གིས་ཐེ་ཝན་གྱི་དམངས་གཙོ་ཡར་ཐོན་ཚོགས་པ་རང་བཙན་ཕྱོགས་སུ་སྐྱོད་ཀྱི་འདུག་ཅེས་སྐྱོན་བརྗོད་བྱས་པའི་གནས་ཚུལ་ཐོན་འདུག
སྲིད་འཛིན་གཞོན་པ་ལེ་ཆིང་ཏེ་དམངས་གཙོ་ཡར་ཐོན་པའི་སྲིད་འཛིན་འོས་མིར་ལངས།
ཨ་རིའི་ས་ཁམས་ཆབ་སྲིད་དང་གསང་བའི་གནས་ཚུལ་ཉམས་ཞིབ་ཁང་གི་ཤར་ཨེ་ཤི་ཡའི་ཉམས་ཞིབ་པ་ཆེ་སི་བྷ་ལ་ཛག་གིས་ཐེ་ཝན་གྱི་འོས་བསྡུའི་ཤུགས་རྐྱེན་དེ་ཨེ་ཤི་ཡ་དང་ཞི་བདེ་རྒྱ་མཚོའི་མངའ་ཁུལ་ཡོངས་སུ་ཁྱབ་ཀྱི་འདུག དེ་ནི་དམག་འཁྲུག་གཅིག་པུའི་ཉེན་ཁ་ཞིག་མིན་པར་དངོས་ཟོག་སྐྱེལ་འདྲེན་རྒྱུན་ཆད་མེད་པ་དང་ཨ་རྒྱའི་འབྲེལ་བ་སོགས་ལ་ཤུགས་རྐྱེན་ཐེབས་ཐུབ། འོས་མི་སུ་ཞིག་ལ་རྒྱལ་ཁ་ཐོབ་ཀྱང་ཨ་རི་དང་རྒྱ་ནག་གཉིས་ལ་འབྲེལ་བ་བརྟན་པོ་དང་སྙོམས་པོ་ཞིག་བཟུང་སྟེ་ཛ་དྲག་ཞི་འཇམ་གཏོང་རྒྱུ་གནད་འགག་ཆེན་པོ་རེད་ཅེས་བཀྲལ། ཚེ་དབྱིན་ཝེན་གྱིས་ལོ་༨་ལ་སྲིད་དབང་བཟུང་བའི་རྗེས་སུ་འཕོ་འགྱུར་འགྲོ་རྒྱུ་ཡིན་པས་སྲིད་འཛིན་གཞོན་པ་ལེ་ཆིང་ཏེ་དམངས་གཙོ་ཡར་ཐོན་པའི་སྲིད་འཛིན་འོས་མིར་ལངས། ད་ལྟའི་ཆར་གོ་མིན་ཏང་དང་ཐེ་ཝན་མི་དམངས་ཚོགས་པའི་སྲིད་འཛིན་འོས་མི་གཉིས་ལས་ལོ་ན་༦༤་ལ་སོན་པའི་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ལེ་ཆིང་ཏེ་ལ་མི་མང་འོས་ཤོག་འཕེན་མཁན་རྒྱབ་སྐྱོར་བ་མང་བ་ཡོད་པའི་གནས་ཚུལ་ཐོན་འདུག
ཐེ་པེ་གསར་པའི་སྤྱི་ཁྱབ་ཧུག་ཡུག་དབྱིས་
ཐེ་པེ་གསར་པའི་སྤྱི་ཁྱབ་ཧུག་ཡུག་དབྱིས་གཞུང་འཛིན་དམངས་གཙོ་ཡར་ཐོན་ཚོགས་པས་རྒྱ་ནག་ལ་འཁྲུག་རྩོད་སློང་གི་འདུག གོ་མིན་ཏང་ལ་སྲིད་འཛིན་འོས་བསྡུའི་རྒྱལ་ཁ་འཐོབ་ན་རྒྱ་ནག་ལ་འབྲེལ་བ་ཡར་རྒྱས་གཏོང་རྒྱུ་ཡིན། སྲིད་འཛིན་ཟུར་པ་མ་དབྱིན་ཇུག་གིས་རྒྱ་ནག་ལ་བཟུང་བའི་སྲིད་ཇུས་དེ་རྣམས་སླར་གསོ་བྱ་རྒྱུ་ཡིན་ཞེས་བསྒྲགས། ཐེ་ཝན་མི་དམངས་ཚོགས་པའི་སྲིད་འཛིན་འོས་མི་ཁེ་ཝན་ཀྲི་(Ko Wen-je)་ཆབ་སྲིད་པ་གསར་པ་ཞིག་ཡིན་ཞིང་། ཁོ་པས་ཐེ་ཝན་མི་དམངས་རྣམས་གཞུང་འཛིན་དམངས་གཙོ་ཡར་ཐོན་ཚོགས་པ་དང་ཕྱོགས་འགལ་གོ་མིན་ཏང་གཉིས་ལ་འདོད་པ་ཚིམས་མེད་པའི་གོ་སྐབས་བཟུང་སྟེ་སྲིད་དོན་ཚོགས་པ་གསར་པ་ཞིག་བཙུགས། ཁོ་པས་གོ་མིན་ཏང་ལྟར་རྒྱ་ནག་ལ་འབྲེལ་བ་དམ་ཟབ་འཛིན་པའམ། ཡང་ན་གཞུང་འཛིན་དམངས་གཙོ་ཡར་ཐོན་ཚོགས་པ་ལྟར་རང་བཙན་གྱི་ཕྱོགས་སུའང་མ་ལྷུང་། ཁེ་ཝེན་ཀྲིས་དབུ་མའི་ལམ་གྱི་ལངས་ཕྱོགས་ཤིག་བཟུང་ནས་རྒྱ་ནག་ལ་འབྲེལ་བ་བཙུགས་ཏེ་དམག་འཁྲུག་འགོག་པར་པེ་ཅིང་ལ་གྲོས་མོལ་བྱ་རྒྱུ་དང་མཚོ་འགག་ཕྱོགས་གཉིས་བར་དུ་ཞི་བདེ་བསྐྲུན་རྒྱུ་ཡིན་ཞེས་ཁས་བླངས།།
་ཝན་མི་དམངས་ཚོགས་པའི་སྲིད་འཛིན་འོས་མི་ཁེ་ཝན་ཀྲི་
གོ་མིན་ཏང་དང་ཐེ་ཝན་མི་དམངས་ཚོགས་པ་གཉིས་གཅིག་སྒྲིལ་མ་བྱུང་བའི་སྟབས་ཀྱིས་དམངས་གཙོ་ཡར་ཐོན་ཚོགས་པ་ཕམ་ཉེས་གཏོང་ཐུབ་རྒྱུ་ཡིན་མིན་ཐེ་ཚོམ་གྱི་གནས་སུ་ཟད། ད་ནས་ཟླ་བ་རྗེས་མའི་ཚེས་༡༣་བར་དུ་ཐེ་ཝན་མི་མང་འོས་ཤོག་འཕེན་མཁན་ཚོའི་བསམ་བློར་འགྱུར་བ་མ་ཐེབས་ཚེ། ཐེ་ཝན་གྱི་ཕྱོགས་འགལ་ཚོགས་པ་གཉིས་ལ་སྲིད་འཛིན་འོས་འདེམས་ཀྱི་རྒྱལ་ཁ་འཐོབ་རྒྱུ་དཀའ། ཨ་རི་དང་རྒྱ་ནག་གི་འབྲེལ་བའི་ནང་དུ་ཐེ་ཝན་རྩོད་གཞི་ཆེན་པོ་ཞིག་ཏུ་གྱུར་ཡོད་པ་སེལ་ཐུབ་རྒྱུ་དཀའ་བར་སྣང་། ཉམས་ཞིབ་པ་ཚོས་ཐེ་ཝན་གྱི་གོ་མིན་ཏང་དང་ཐེ་ཝན་མི་དམངས་ཚོགས་པ་སོགས་ཕྱོགས་འགལ་ཚོགས་པ་ཁག་ལ་རྒྱལ་ཡོངས་གྲོས་ཚོགས་སུ་འཐུས་མི་གྲངས་མང་གི་གདན་གྲངས་ཐོབ་ན་ལེ་ཆིང་ཏེ་ལ་དཀའ་ངལ་འཕྲད་སྲིད། སིངྒ་པུར་གྱི་རྒྱལ་ཡོངས་སློབ་གྲྭ་ཆེན་མོའི་སྲིད་དོན་ཚན་རིག་སློབ་དཔོན་ཨི་ཡན་ཅོང་གིས་རྒྱ་ནག་གིས་ཐེ་ཝན་ལ་དམག་དང་ཆབ་སྲིད་ཀྱི་གནོན་ཤུགས་སྤྲོད་རྒྱུ་ཤུགས་ཆེ་རུ་བཏང་སྟེ་ལེ་ཆིང་ཏེའི་གཞུང་ལ་དཀའ་ངལ་འཕྲད་དུ་འཇུག་ཆེ་ཤས་ཆེ་ཞེས་བསྟན།།
སིངྒ་པུར་གྱི་རྒྱལ་ཡོངས་སློབ་གྲྭ་ཆེན་མོའི་སྲིད་དོན་ཚན་རིག་སློབ་དཔོན་ཨི་ཡན་ཅོང་
ཕྱི་ཟླ་༡༢་པའི་ཚེས་༢༥་ཉིན་ཨ་རིའི་རླུང་འཕྲིན་ཁང་གིས་གནས་ཚུལ་སྤེལ་བ་ལྟར་ན། ཐེ་ཝན་ལ་སྲིད་འཛིན་འོས་འདེམས་བྱེད་པར་དུས་ཡུན་བདུན་ཕྲག་གསུམ་ཡང་མི་འདུག གཟའ་འཁོར་འདིར་འོས་མི་ཚོར་མི་མང་འོས་ཤོག་འཕེན་མཁན་རྒྱབ་སྐྱོར་བ་མང་ཉུང་གི་ཁྱད་པར་ཇེ་ཆུང་དུ་གྱུར། རྒྱ་ནག་གིས་ཐེ་ཝན་གྱི་སྲིད་འཛིན་འོས་བསྡུར་ཤུགས་རྐྱེན་ཐེབས་ཐབས་དང་དོ་སྣང་ཆེན་པོ་བྱེད་ཀྱི་ཡོད་པར་མ་ཟད། གོ་མིན་ཏང་ལ་སྲིད་འཛིན་འོས་འདེམས་ཀྱི་རྒྱལ་ཁ་མ་ཐོབ་ཀྱང་ཐེ་ཝན་གྱི་གྲས་ཚོགས་སུ་གོ་མིན་ཏང་ལ་འཐུས་མི་གྲངས་མང་གི་རྒྱལ་ཁ་འཐོབ་ཐུབ་པའི་ཐབས་སུ་འབད། གཟའ་འཁོར་སྔོན་མར་རྒྱ་ནག་གཞུང་གིས་ཐེ་ཝན་གྱི་རྫས་འགྱུར་དངོས་ཟོག་རྣམ་གྲངས་༡༢་ལ་སྒོ་ཁྲལ་ཆག་ཡང་མེད་པར་བཏང་སྟེ་ཚོང་ལས་ཀྱི་གནོན་ཤུགས་སྤྲད། གལ་སྲིད་དམངས་གཙོ་ཡར་ཐོན་ཚོགས་པར་འོས་བསྡུའི་རྒྱལ་ཁ་ཐོབ་ན་རྒྱ་ནག་གིས་ཐེ་ཝན་ལ་དམག་གིས་སྡིགས་ར་བསྐུལ་རྒྱུ་ཤུགས་ཆེ་རུ་འགྲོ་རྒྱུ་དང་གོ་མིན་ཏང་ལ་རྒྱལ་ཁ་ཐོབ་ན་ཐེ་ཝན་ལ་སྲིད་ཇུས་འཇམ་པོ་ཞིག་འཛིན་སྲིད་པའི་རྣམ་པ་ཐོན།།
ཕྱི་ཟླ་༡༢་པའི་ཚེས་༢༣་ཉིན་ཐེ་ཝན་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཐེ་ཝན་གཞུང་ནས་དྲྭ་ལམ་གསར་འགོད་པ་རུས་མིང་ལིན་ཞེས་པ་ཞིག་གིས་རྒྱ་ནག་གི་འདོད་མོས་ལྟར་འོས་བསྡུའི་བསམ་ཚུལ་བསྡུས། ཁོ་པས་གོ་མིན་ཏང་གི་སྲིད་འཛིན་འོས་མི་ཧུག་ཡུག་དབྱི་ལ་མི་མང་འོས་ཤོག་འཕེན་མཁན་མང་བ་འདུག་ཅེས་གནས་ཚུལ་ལོག་པ་སྤེལ་ནས་འཛིན་བཟུང་བྱས་འདུག ཐེ་ཝན་གྱི་གསར་འགྱུར་མང་ཆེ་བའི་ནང་དུ་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ལེ་ཆིང་ཏེ་ལ་མི་མང་འོས་ཤོག་འཕེན་མཁན་རྒྱབ་སྐྱོར་མང་བ་འདུག་ཅེས་གནས་ཚུལ་ཐོན། གསར་འགོད་པ་ལིན་གྱིས་ངས་ཏུང་ཧེ་སློབ་གྲྭ་ཆེན་མོའི་སློབ་དཔོན་སུ་ཞེས་པ་ཞིག་ལ་མི་༣༠༠་ཐམ་པར་ཁ་པར་བཏང་ནས་སྐད་ཆ་འདྲི་རུ་བཅུག་པ་ཡིན། ཧུག་ཡུག་དབྱི་ལ་མི་མང་འོས་ཤོག་འཕེན་མཁན་བརྒྱ་ཆ་༣༣.༠༥་འདུག ལེ་ཆིང་ཏེ་ལ་མི་མང་འོས་ཤོག་འཕེན་མཁན་བརྒྱ་ཆ་༣༢.༡༩་ལས་མི་འདུག ཐེ་ཝན་མི་དམངས་ཚོགས་པའི་འོས་མི་ཁེ་ཝེན་ཀྲི་ལ་མི་མང་འོས་ཤོག་འཕེན་མཁན་བརྒྱ་ཆ་༡༨.༣༨་འདུག་ཅེས་གནས་ཚུལ་སྤེལ་ཏེ་འོས་བསྡུར་ཤུགས་རྐྱེན་ཐེབས་ཐབས་བྱས་འདུག
ཕྱི་ཟླ་༡༢་པའི་ཚེས་༢༥་ཉིན་ཐེ་པེ་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། ཕྱི་རྒྱལ་གྱི་གསར་འགྱུར་ལས་ཁུངས་ཁག་གིས་ཐེ་ཝན་གྱི་འོས་བསྡུར་དོ་སྣང་བྱེད་འགོ་ཚུགས། དཔེར་ན་ཆེག་སྤྱི་མཐུན་རྒྱལ་ཁབ་ཀྱི་ཨཀ་ཏུ་ཝལ་ནེ་གསར་ཁང་གིས་ཐེ་ཝན་མི་དམངས་རྣམས་གླ་ཕོགས་མ་འཕར་བ་དང་ཁང་གླ་འཕར་ཏེ་འཚོ་བའི་དཀའ་ངལ་འཕྲད་བཞིན་པ་སྲིད་འཛིན་རྗེས་མས་སེལ་ཐབས་བྱ་རྒྱུའི་རེ་ལྟོས་འཆང་གི་འདུག་ཅེས་གནས་ཚུལ་སྤེལ། སུད་སིའི་སྤྱི་དམངས་རྒྱང་སྲིང་ཁང་གིས་འཛམ་གླིང་རྒྱལ་ཁབ་གཞན་ལྟར་ཐེ་ཝན་མི་དམངས་ཀྱིས་ཀྱང་རྒྱལ་ནང་གི་གནད་དོན་ལ་དོ་སྣང་བྱེད་ཀྱི་འདུག་ཅེས་གནས་ཚུལ་སྤེལ། ཌན་མག་གི་གསར་འགོད་པ་ཞིག་གིས་ཐེ་ཝན་གྱི་ན་གཞོན་ཚོས་དམངས་ཡར་ཐོན་ཚོགས་པར་འཇོན་ཐང་མི་འདུག་ཟེར་གྱི་འདུག་ཅེས་གསར་འགྱུར་སྤེལ། ཧོང་ཀོང་གི་གསར་འགོད་པ་ཞིག་གིས་ཐེ་ཝན་པ་ཚོ་སྲིད་དོན་ཚོགས་པ་ཁག་གི་འཐབ་རྩོད་ལ་དོ་སྣང་མི་འདུག ཁོ་ཚོ་ཉིན་རེའི་འཚོ་བའི་དཀའ་ངལ་ལ་མགོ་འཁོར་འདུག་ཟེར། ཧྤི་ལི་ཕིན་གྱི་བརྙན་འཕྲིན་ཁང་གིས་ཐེ་ཝན་གྱི་སྲིད་འཛིན་འོས་མི་ཚོས་མཚོ་གླིང་དེར་ཕྱི་མི་ངལ་རྩལ་བ་འབུམ་༧་དང་ཁྲི་ཚོ་༤་ལྷག་ཡོད་པ་དེ་དག་གི་བདེ་སྡུག་གླེང་སློང་བྱེད་ཀྱི་མི་འདུག་ཅེས་གསར་འགྱུར་སྤེལ་བའི་གནས་ཚུལ་ཐོན་འདུག