ཨ་རིའི་སྤྱི་མཐུན་སྲིད་དོན་ཚོགས་པའི་སྲིད་འཛིན་འོས་མིའི་འགྲན་ཞུགས་པ་དག སྤྱི་ཟླ་༡༡་པའི་ཚེས་༨་ཉིན་གྱི་རྩོད་འགྲན་ཐེངས་གསུམ་པར་ཞུགས་ཤིང་། རྒྱལ་ཁབ་ཕྱི་ལ་ཕྱོགས་པའི་སྲིད་ཇུས་ཀྱི་ངོས་ནས་བཤད་ན། ཐེངས་འདིའི་རྩོད་འགྲན་ལ་ཞུགས་པའི་སྤྱི་མཐུན་སྲིད་དོན་ཚོགས་པའི་འགྲན་ཞུགས་པ་མི་ལྔ་ཡི་ངོས་ནས། ཆ་རྐྱེན་ཅི་ཡང་མེད་པའི་སྒོ་ནས་ཨི་ཟི་རེལ་ལ་རྒྱབ་སྐྱོར་བྱ་དགོས་པའི་ངོས་འཛིན་བྱེད་བཞིན་པ་དང་། ཡང་རྒྱ་ནག་གི་ངོས་ནས་བཤད་ན། འགྲན་ཞུགས་པ་ཕལ་ཆེ་བས་ལངས་ཕྱོགས་བརྟན་པོ་འཛིན་གྱི་ཡོད་དེ། ཁྱད་པར་དུ་རྒྱ་ནག་གི་དྲ་རྒྱའི་བརྒྱུད་ལམ་ཁྲེ་ཁི་ཁྲོ་ཁི་Tiktok ནི་ཐེངས་འདིའི་རྩོད་འགྲན་སྐབས་ཀྱི་བརྗོད་གཞི་གཙོ་བོར་གྱུར་ནས། འགྲན་ཞུགས་པ་མང་ཆེ་བས་གལ་ཏེ་སྲིད་འཛིན་ལ་འོས་འདེམས་བྱུང་ཚེ། ཁྲེ་ཁི་ཁྲོ་ཁི་ཅེས་པའི་བཀོལ་སྤྱོད་བསྒྲིགས་རིམ་ཨ་རིའི་ནང་ཡོངས་སུ་བཀག་འགོག་བྱ་རྒྱུའི་ཁས་ལེན་བྱས་འདུག
སྤྱི་མཐུན་སྲིད་དོན་ཚོགས་པའི་སྲིད་འཛིན་འོས་མིའི་ཐོག་མའི་འོས་འདེམས་ཀྱི་རྩོད་གླེང་ཚོགས་འདུ་ཐེངས་གསུམ་པ་དེ་ཨ་རིའི་ཧྥུ་ལོ་རོས་ཊ་མངའ་སྡེའི་མཱད་ཨ་མས་གྲོང་ཁྱེར་དུ་འཚོགས་ལ། ཧྥུ་ལོ་རོས་ཊ་མངའ་སྡེའི་སྤྱི་ཁྱབ་སྦྲས་སཱན་ཁྲེ་སི་དང་བཅས་པའི་འགྲན་ཞུགས་མི་སྣ་ལྔ་ཡོད་པ་དག་ནི། ཨ་རིའི་མཉམ་འབྲེལ་རྒྱལ་ཚོགས་སུ་གནས་སྡོད་གཞུང་ཚབ་ཆེན་མོ་ཟུར་པ་ནཱེ་ཁས་ཧེ་ལེ་དང་། ཨ་རིའི་ནིའུ་ཇིར་སས་མངའ་སྡེའི་སྤྱི་ཁྱབ་ཟུར་པ་ཁཱི་རོས་སི་ཁྲས། ཁེ་ལས་པ་རཱ་མ་སི་ཝ་མེ། བྱང་ཁཱ་རོ་ལེ་ནཱ་མངའ་སྡེ་ནས་ཡིན་པའི་ཨ་རིའི་གྲོས་ཚོགས་གོང་མའི་འཐུས་མི་ཁྲེམ་སི་ཁོ་ཐྲི་བཅས་ཡིན་པ་རེད།
སྲིད་འཛིན་འོས་མིར་མིང་འདོན་གྱི་འོས་འདེམས་ཐེངས་དང་པོ་བྱ་རྒྱུར་དུས་ཡུན་ཟླ་གཉིས་ལས་མེད་པའི་སྐབས་འདིར། འདེམ་སྒུག་པ་མི་ལྔ་ཡི་ངོས་ནས་རྩོད་གླེང་དྲག་པོ་བྱེད་ཀྱི་ཡོད་ནའང་། སྤྱི་མཐུན་སྲིད་དོན་ཚོགས་པའི་འགྲན་ཞུགས་པའི་གྲས་ཀྱི་རྒྱབ་སྐྱོར་བ་མང་ཤོས་ཡིན་པའི་སྲིད་འཛིན་ཟུར་པ་ཌོ་ནལ་ཊམ་ད་ཐེངས་ཀྱི་རྩོད་འགྲན་ལ་ཡང་ཞུགས་མི་འདུག
ཐེངས་འདིའི་རྩོད་འགྲན་སྐབས་ཀྱི་མདོ་འཛིན་པས། ཉེ་ཆར་ཨ་རིའི་གྲོས་ཚོགས་འོག་མའི་རྒྱ་ནག་དང་འབྲེལ་བའི་ཐབས་ཇུས་འགྲན་རྩོད་ཐད་ཀྱི་དམིགས་བསལ་ལྷན་ཚོགས་ཀྱི་འགན་འཛིན་མཱད་ཁི་གྷ་ལི་གྷིར་ཡིས། ཨ་རིར་བེད་སྤྱོད་གཏོང་བཞིན་པའི་རྒྱ་ནག་གི་དྲ་རྒྱའི་སྙི་ཆས་ཁྲེ་ཁི་ཁྲོ་ཁི་Tiktok ཡི་སྟེང་དུ། ཧ་མ་སི་ལ་རྒྱབ་སྐྱོར་གྱི་དྲིལ་སྒྲོག་གི་རིགས་ཁྱབ་ཀྱི་འདུག་ཅེས་བཤད་པའི་སྐད་ཆ་དེ་ལུང་འདྲེན་བྱས་ནས། འགྲན་ཞུགས་པ་དག་ལ་འདིའི་ཐད་བསམ་ཚུལ་ཅི་ཡོད་དང་། འདིའི་ཐད་གདོང་ལེན་ཅི་ལྟར་བྱ་རྒྱུ་ཡིན་མིན་གྱི་དྲི་བ་བཏོན་པར།
འགྲན་ཞུགས་པ་ཁཱི་རོས་སི་ཁྲས་ཡིས། ཁོ་རང་མཱད་ཁི་གྷ་ལི་གྷིར་ཡི་ལངས་ཕྱོགས་ལ་བརྒྱ་ཆའི་བརྒྱ་ཡིས་མོས་མཐུན་ཡོད་ཅེས་ཐོག་མར་ལན་འདེབས་བྱས་ཤིང་། ཁྲེ་ཁི་ཁྲོ་ཁི་བཀག་སྡོམ་བྱ་འོས་ལ། ཁོ་རང་སྲིད་འཛིན་དུ་འོས་འདེམས་བྱུང་ཚེ་གཟའ་འཁོར་དང་པོའི་ནང་དེ་ལྟར་ཁྲེ་ཁི་ཁྲོ་ཁི་བཀག་སྡོམ་བྱ་ངེས་ལ། ཁྲེ་ཁི་ཁྲོ་ཁི་ནི་གསང་མྱུལ་བྱ་མཁན་གྱི་སྙི་ཆས་ཤིག་ཡིན་པ་མ་ཟད། དེས་ཨ་རིའི་རྒྱལ་ཁབ་ཡོངས་བཙོག་བཟོ་བྱེད་ཀྱི་ཡོད་ལ། ན་གཞོན་རྣམས་ཀྱི་བསམ་བློར་བསླད་སྐྱོན་གཏོང་བཞིན་པར་བཤད་འདུག
ཡང་དེའི་ཐད་འགྲན་ཞུགས་པ་སྦྲས་སཱན་ཁྲེ་སི་ཡིས་ཀྱང་། ཨ་རི་ལ་མཚོན་ན་རྒྱ་ནག་ནི་འཇིགས་པ་ཆེ་ཤོས་ཡིན་ལ། ཉེན་ཁ་དེ་ཨ་རིའི་སྤྱི་ཚོགས་ཡོངས་ལ་ཁྱབ་ཀྱི་འདུག ང་ལ་མཚོན་ན་རྒྱ་ནག་གི་ངོས་ནས་ཁྱོད་ཤི་ང་གསོན་གྱི་སྲིད་ཇུས་བརྟན་པོ་ཞིག་བཟུང་ཡོད་ལ། སྲིད་ཇུས་འདིའི་ཁོངས་སུ་དམག་དོན་འཇིགས་སྐུལ་བྱེད་བཞིན་པ་དང་། དཔལ་འབྱོར་གྱི་ངོས་ནས་རྒྱ་ནག་ལ་མི་བརྟེན་རྒྱུ། རིག་གནས་ཀྱི་ངོས་ནས་ཤུགས་རྐྱེན་ཐེབས་བཞིན་སོགས་ཀྱི་ནང་དོན་འདུས་ཡོད་ཅེས་བཤད།
གཞན་ཡང་འགྲན་ཞུགས་པ་རཱ་མ་སི་ཝ་མེ་ཡིས། ཁྲེི་ཁི་ཁྲོ་ཁི་ཡི་བཀོལ་སྤྱོད་བསྒྲིགས་རིམ་རྐྱང་བ་བཀག་སྡོམ་བྱ་རྒྱུ་ནི་ལས་སླ་བོ་ཞིག་རེད། དོན་དངོས་ཐོག་ང་ཚོས་དེ་ལས་ཀྱང་རྒྱ་ཆེ་ས་ཞིག་ལ་བསམ་བློ་གཏོང་དགོས། ང་ཚོས་ངེས་པར་ཨ་རིའི་སྤྱི་གཉེར་ཁང་དག་གིས་དན་གྲངས་དག་རྒྱ་ནག་ལ་བརྒྱུད་འདྲེན་བྱ་རྒྱུ་ཡོངས་སུ་གཏན་འགོག་བྱ་དགོས་ཅེས་བཤད་འདུག།
དེ་མིན་འགྲན་ཞུགས་པ་ཁྲེམ་སི་ཁོ་ཐྲི་ཡིས་ཁྲེ་ཁི་ཁྲོ་ཁི་Tiktok བཀག་སྡོམ་བྱ་འོས་ལ། ཨ་རིའི་མི་རྣམས་ལ་མཚོན་ན་བརྡ་འཕྲིན་གྱི་ངོས་ནས་སྣེ་ཁྲིད་ཀྱི་ནུས་པ་འདོན་རྒྱུ་གལ་ཆེ་ལ། མི་རབས་རྗེས་མ་རྣམས་ལ་མཚོན་ན་ལྷག་ཏུ་ནས་དེ་གལ་ཆེན་པོ་རེད་ཅེས་བཤད།
ཐེངས་འདིའི་རྩོད་འགྲན་གྱི་སྐབས་སུ། རྒྱབ་སྐྱོར་གྱི་ཚད་རིམ་ཨང་གཉིས་པར་སླེབས་པའི་འགྲན་ཞུགས་པ་སྦྲས་སཱན་ཁྲེ་སི་དང་། ནཱེ་ཁས་ཧེ་ལཱས་གཉིས་ཀྱིས་ཕན་ཚུན་བར་རྒྱ་ནག་ལ་སྐྱོན་བརྗོད་བྱ་ཕྱོགས་ཐད་ལངས་ཕྱོགས་བརྟན་པོ་མེད་ཚུལ་གྱི་སྐྱོན་བརྗོད་བྱས་ཤིང་། འདས་པའི་གཟའ་འཁོར་ཁ་ཤས་རིང་ཁོ་གཉིས་བར་གྱི་འགྲན་རྩོད་ཤུགས་ཆེ་རུ་ཕྱིན་འདུག། དེ་ཡང་སྦྲས་སཱན་ཁྲེ་སི་ཡིས། ནཱེ་ཁས་ཧེ་ལས་ཡིས་དེ་སྔོན་བྱང་ཁཱ་རོ་ལས་ནཱ་མངའི་སྡེ་སྤྱི་ཁྱབ་ཀྱི་འགན་འཁུར་སྐབས་རྒྱ་ནག་དང་མཐུན་པོ་བྱས་ཏེ། རྒྱ་ནག་གི་མི་སྣ་ཁཱ་རོ་ལས་ནཱ་མངའ་སྡེའི་ནང་ཡོང་རྒྱུར་དགའ་བསུ་བྱས་པ་མ་ཟད། རྒྱ་ནག་ལ་དམག་དོན་རྟེན་གཞིའི་ཉེ་ཁུལ་གྱི་ས་འདོན་སྤྲོད་བྱས་པ། རྒྱ་ནག་གི་གཞུང་ཚབ་ཆེན་མོར་འཕྲིན་ཡིག་བྲིས་ནས་ཁོ་ཚོ་ཆེས་ཉེ་བའི་གྲོགས་པོ་ཡིན་པར་བརྗོད་འདུག་པ་སོགས་ཀྱི་སྐྱོན་བརྗོད་བྱས་པ་དང་འབྲེལ་ནས། སྦྲས་སཱན་ཁྲེ་སི་ཁོ་རང་གི་ངོས་ནས་རྒྱ་ནག་གིས་ཧྥུ་ལོ་རོས་ཊ་མངའ་སྡེའི་ནང་ས་ཉོ་རྒྱུར་བཀག་སྡོམ་བྱས་ཤིང་། སློབ་ཆེན་དག་ནས་རྒྱ་ནག་གི་ཁུང་ཙི་སློབ་གླིང་དག་ཕྱིར་བསྐྲད་པ་སོགས་བྱས་པར་བཤད་འདུག།
དེ་ལ་ནཱེ་ཁས་ཧེ་ལས་ཡིས་ལན་འདེབས་བྱས་དོན་ལ། ཉེ་ཆར་ཧྥུ་ལོ་རོས་ཊ་མངའ་སྡེ་གཞུང་གི་དྲ་རྒྱའི་སྟེང་རྒྱ་ནག་གི་ཚོང་པ་འགུག་ཐབས་བྱས་པའི་གསར་འགྱུར་བཀོད་ཡོད་པ་ནག་བསུབ་བཏང་འདུག་ཅེས་གསར་འགྱུར་བརྒྱུད་ལམ་དུ་སླེབས་འདུག་པ་དང་། སྦྲས་སཱན་ཁྲེ་སི་ཧྥུ་ལོ་རོས་ཊ་མངའ་སྡེའི་དཔལ་འབྱོར་འཕེལ་རྒྱས་སྡེ་ཚན་གྱི་འགན་འཛིན་ཡིན་པ་ལྟར། གཟའ་འཁོར་སྔོན་མའི་ནང་སྡེ་ཚན་འདི་ཡིས། ཧྥུ་ལོ་རོས་ཊ་མངའ་སྡེ་ནི་རྒྱ་ནག་གི་ཁེ་ལས་ཀྱི་ཁེ་གཉེར་བྱ་ས་གཙོ་བོ་ཡིན་ཅེས་བཤད་འདུག་ལ། དེར་མ་ཟད་མངའ་སྡེ་འདིའི་ནང་རྒྱ་ནག་གི་དམག་སྤྱོད་གནམ་གྲུ་བཟོ་ས་ཞིག་གི་འཛུགས་སྐྲུན་རྒྱ་བསྐྱེད་བྱ་བཞིན་ཡོད་པ་སོགས་ཀྱི་སྐྱོན་བརྗོད་བྱས་ལ། སྦྲས་སཱན་ཁྲེ་སི་ཡིས་ལས་ཀ་དེ་མཚམས་འཇོག་བྱེད་དུ་བཅུག་ཡོད་པའི་ལན་འདེབས་བྱས་འདུག