ཐེ་ཝན་གྱི་བདེ་འཇགས་དང་བརྟན་བརླིང་ལ་སྲུང་སྐྱོབ་དང་རྒྱ་ནག་གི་བཙན་གནོན་ལ་ཁ་གཏད་བཅད་ཆེད་ཨ་མེ་རི་ཁའི་གྲོས་ཚོགས་གོང་མའི་ཕྱི་སྲིད་ལྷན་ཁང་གིས་ཟླ་བ་རྗེས་མའི་ནང་༡༩༧༩ལོར་གཏན་འབེབས་གནང་བའི་ཨ་རིས་ཐེ་ཝན་དང་འབྲེལ་ལམ་འཛིན་ཕྱོགས་ཀྱི་ཁྲིམས་ལུགས་ལ་བསྐྱར་ཞིབ་བྱ་རྒྱུ་ཡིན་ཞིང་། གྲོས་གཞི་དེས་ཨ་རིས་ཐེ་ཝན་ལ་ཨ་སྒོར་དུང་ཕྱུར་བཅུ་གྲངས་ཀྱི་རིན་གོང་གནས་པའི་གོ་ལག་འཚོང་རྒྱུ་དང་། དེ་བཞིན་ཐེ་ཝན་དེ་ནུབ་ཆིངས་དམག་དོན་སྒྲིག་འཛུགས་ཀྱི་མནའ་གྲོགས་ཀྱི་གོ་གནས་སྤྲོད་རྒྱུ་སོགས་དེ་སྔར་ཨ་མེ་རི་ཁས་ཐེ་ཝན་ཐོག་འཛིན་པའི་སྲིད་ཇུས་ལ་འགྱུར་ལྡོག་ཆེན་པོ་གཏང་རྒྱུ་ཡིན་པ་དང་གྲོས་གཞི་དེ་ལ་ཨ་རིའི་ཆབ་སྲིད་ཚོགས་པ་གཉིས་ཀའི་འཐུས་མི་ཚོས་རྒྱབ་སྐྱོར་འཐོབ་རྒྱུའི་རེ་བ་ཆེན་པོ་ཡོད་པར་མ་ཟད། དེ་ནི་འདས་པའི་ལོ་ངོ་༥༠ལྷག་གི་རིང་ཨ་རིས་ཐེ་ཝན་ཐོག་འཛིན་པའི་སྲིད་ཇུས་ལ་ཕྱོགས་ཡོངས་ནས་འགྱུར་ལྡོག་བཏང་བ་ཞིག་ལ་ངོས་འཛིན་བྱེད་ཀྱི་ཡོད་པ་རེད།
༢༠༢༢ལོའི་ཨ་རིས་ཐེ་ཝན་ལ་འབྲེལ་བ་འཛིན་ཕྱོགས་ཀྱི་ཁྲིམས་འཆར་The Taiwan Policy Act of 2022དེ་ནི་ད་ལོའི་སྤྱི་ཟླ་༦པའི་ཚེས་༡༧ཉིན་ཨ་རིའི་གྲོས་ཚོགས་གོང་མའི་ཕྱི་སྲིད་ལྷན་ཁང་གི་འགན་འཛིན་དང་། དམངས་གཙོ་ཚོགས་པའི་འཐུས་མི་Bob Menendezལགས་དང་གྲོས་ཚོགས་འོག་མའི་ཕྱི་སྲིད་ལྷན་ཁང་གི་འགན་འཛིན་དང་དམངས་གཙོ་ཚོགས་པའི་འཐུས་མི་Gregory Meeksལགས་རྣམ་པ་གཉིས་ནས་ཐུན་མོང་གིས་བཏོན་པ་ཞིག་རེད།
མ་གཞི་ཨ་མེ་རི་ཁའི་གྲོས་ཚོགས་གོང་མའི་ཕྱི་སྲིད་ལྷན་ཁང་གིས་སྤྱི་ཟླ་༧པའི་ཚེས་༡༩སྟེ་རེས་གཟའ་མིག་དམར་ཉིན་གོང་འཁོད་ཁྲིམས་འཆར་དེར་བསྐྱར་ཞིབ་བྱ་རྒྱུའི་འཆར་གཞི་ཡོད་ཀྱང་ཕར་འགྱངས་བྱས་འདུག ཁྲིམས་འཆར་ཐོག་མར་བཏོན་མཁན་གྲོས་ཚོགས་གོང་མའི་ཕྱི་འབྲེལ་ལྷན་ཚོགས་ཀྱི་འགན་འཛིན་དང་དམངས་གཙོ་ཚོགས་པའི་འཐུས་མི་Bob Menendezལགས་ནས་ཨ་རིའི་རླུང་འཕྲིན་ཁང་ལ་འགྲེལ་བརྗོད་གནང་གསལ། ཁྲིམས་འཆར་དེ་ལ་སྤྱི་ཟླ་༨པའི་ཚེས་༣ཉིན་གྲོས་ཚོགས་ནང་དངོས་སུ་བསྐྱར་ཞིབ་བྱ་རྒྱུ་ཡིན་པ་དང་། ད་ལན་གྲོས་གཞི་དེ་ལ་བསྐྱར་ཞིབ་བྱ་རྒྱུ་ཕར་འགྱངས་བྱེད་དགོས་དོན་ནི་གྲོས་ཚོགས་གོང་མའི་ནང་གི་འཐུས་མི་གཉིས་གསུམ་གྱིས་ཁོ་ཚོ་ལ་གྲོས་གཞིའི་ནང་དོན་སྐོར་བསྐྱར་ཞིབ་ཀྱི་དུས་ཚོད་རིང་ཙམ་དགོས་ཀྱི་ཡོད་པའི་རེ་བ་བཏོན་པའི་རྐྱེན་རེད། ཡིན་ན་ཡང་དམངས་གཙོ་ཚོགས་པའི་འཐུས་མི་ཚོས་གྲོས་གཞི་དེ་ལ་བསམ་འཆར་བཏོན་མེད། ཁོ་ཚོས་ཅིག་བྱས་ན་དག་བཅོས་ཁྲིམས་འཆར་འགའ་ཤས་འདོན་སྲིད་པ་རེད་ཅེས་བརྗོད་འདུག
Bob Menendezལགས་ནས་སྤེལ་བའི་གསལ་བསྒྲགས་ཡི་གེའི་ནང་འཁོད་དོན། ཝ་ཤིན་ཐོན་ལ་ད་ལྟ་ཕྱི་འབྲེལ་ཐབས་ཇུས་བསྐྱར་གསོ་བྱ་རྒྱུའི་གོ་སྐབས་ཤིག་རྙེད་པ་རེད། ༢༠༢༢ལོའི་ཨ་རིས་ཐེ་ཝན་ལ་འབྲེལ་བ་འཛིན་ཕྱོགས་ཀྱི་ཁྲིམས་འཆར་དེ་ནི་གསར་གཏོད་ཆེན་པོ་ཞིག་དང་། དེས་པེ་ཅིང་གི་དམག་དོན་དང་དཔལ་འབྱོར། ཕྱི་འབྲེལ་ཀྱི་བཙན་དབང་སྲིད་ཇུས་ལ་གདོང་ལེན་བྱེད་ཕྱོགས་ཐད་ཨ་མེ་རི་ཁ་ནི་ཐེ་ཝན་དང་དེ་བཞིན་ཞི་བདེ་རྒྱ་མཚོའི་ཁུལ་གྱི་ནང་དམངས་གཙོའི་རིན་ཐང་ལྟ་གྲུབ་འཛིན་མཁན་གྱི་མཐུན་གྲོགས་ཚོ་དང་མཉམ་དུ་ཡོད་པ་དང་། ཁྲིམས་འཆར་དེས་པེ་ཅིང་ལ་ཐེ་ཝན་གནད་དོན་ཐག་གཅོད་བྱེད་དགོས་ན་ཕུ་ཐིང་གི་ལམ་ཁ་དེར་འགྲོ་མི་ཉན་རྒྱུའི་བརྡ་ལན་གསལ་པོ་སྤྲད་ཡོད་ཅེས་འཁོད་འདུག
གཞན་ཡང་གྲོས་ཚོགས་འོག་མའི་ཕྱི་འབྲེལ་ལྷན་ཚོགས་ཀྱི་འགན་འཛིན་དང་དམངས་གཙོ་ཚོགས་པའི་འཐུས་མི་Gregory Meeksལགས་ནས་ཀྱང་ཐེ་ཝན་ནི་ཨ་མེ་རི་ཁའི་མནའ་གྲོགས་གལ་ཆེན་ཡིན་པ་དང་ལྷག་པར་དུ་ཐེ་ཝན་གྱི་གློག་འདྲེན་ཕྱེད་གཟུགས་བཟོ་ལས་ཀྱིས་རྒྱལ་སྤྱིའི་ཁྲོམ་རའི་ནང་གོ་གནས་གལ་ཆེན་ཟིན་ཡོད་པ་རེད། དེ་ལས་གལ་ཆེ་བ་ཞིག་ནི་ང་ཚོས་མུ་མཐུད་དུ་ཐེ་ཝན་ལ་རྒྱབ་སྐྱོར་བྱེད་དགོས་ཀྱི་ཡོད་པ་དང་། ཐེ་ཝན་དང་མཉམ་ལས་བྱ་རྒྱུ་རྒྱ་བསྐྱེད་གཏོང་དགོས་ཞེས་འདི་གར་ཨ་རིའི་རླུང་འཕྲིན་ཁང་ལ་འགྲེལ་བརྗོད་གནང་འདུག
ཁྲིམས་འཆར་དེ་ནི་དེ་སྔོན་ཨ་རིས་༡༩༧༩ལོར་ཐེ་ཝན་ལ་འབྲེལ་ལམ་འཛིན་ཕྱོགས་ཀྱི་ཁྲིམས་ཡིག་གཏན་འབེབས་གནང་བའི་རྗེས་ལ་ཨ་མེ་རི་ཁས་ཐེ་ཝན་ལ་འཛིན་པའི་སྲིད་ཇུས་ལ་ཕྱོགས་ཡོངས་ནས་བསྐྱར་ཞིབ་ཀྱིས་འགྱུར་ལྡོག་ཆེན་པོ་གཏང་རྒྱུ་ཡིན་པར་མཚོན་ཡོད་ལ། ལྷག་པར་དུ་ཁྲིམས་འཆར་དེ་ལས་ཐེ་ཝན་བདེ་འཇགས་སྐོར་གྱི་རོགས་སྐྱོར་ལས་གཞི་Taiwan Security Assistance Initiativeཞེས་པ་གསར་འཛུགས་ཀྱིས་འབྱུང་འགྱུར་ལོ་བཞིའི་རིང་ཨ་སྒོར་དུང་ཕྱུར་༤༥ཡི་རིན་གོང་གནས་པའི་གོ་ལག་རོགས་སྐྱོར་གནང་བའི་ལས་འཆར་ཁྲོད་དུ་ཐེ་ཝན་ལ་ཐོག་མར་བསམ་བློ་གཏོང་དགོས་པའི་རེ་འདུན་བཏོན་ཡོད་པར་མ་ཟད། ཐེ་ཝན་རྒྱལ་སྲུང་སྐོར་གྱི་རོགས་དངུལ་དེ་ཨ་སྒོར་དུང་ཕྱུར་༢ནས་དུང་ཕྱུར་༥་ལ་འཕར་རྒྱུ་དང་། ཐེ་ཝན་ལ་ནུབ་ཆིངས་དམག་དོན་སྒྲིག་འཛུགས་ཀྱི་མནའ་གྲོགས་ཀྱི་གོ་གནས་སྤྲད་ནས་ཨ་རིས་ཐེ་ཝན་ལ་བདེ་འཇགས་སྲུང་སྐྱོབ་སྐོར་གྱི་དམ་བཅའ་ལ་ཤུགས་སྣོན་བརྒྱབ་རྒྱུ་རེད་འདུག
ཐེ་ཝན་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཨོའོ་ཅང་ཨན་གྱིས་རེས་གཟའ་པ་སངས་ཉིན་ཁྲིམས་འཆར་དེ་ལ་དགའ་བསུ་དང་ཐུགས་རྗེ་ཆེ་ཞུས་ཡོད་ཅིང་། ཁོང་གིས་ཨ་རིས་ཐེ་ཝན་ལ་འབྲེལ་བ་འཛིན་ཕྱོགས་ཀྱི་ཁྲིམས་ཡིག་ལས་ཐེ་ཝན་དང་ཨ་མེ་རི་ཁའི་འབྲེལ་ལམ་དང་། ཐེ་ཝན་གྱི་བདེ་སྲུང་། ཚོང་དོན་གྱི་འབྲེལ་བ། རྒྱལ་སྤྱིའི་ཐོག་ཐེ་ཝན་གྱི་གོ་གནས་དང་རྒྱ་ནག་ལ་གདོང་ལེན་བྱེད་ཕྱོགས་སོགས་ནང་དོན་ཕུན་སུམ་ཚོགས་པ་ཡོད་པ་ཞིག་རེད་ལ་། དེ་ནི་ཨ་རིའི་གྲོས་ཚོགས་ཀྱིས་ཉེ་བའི་ལོ་འགའ་ཤས་རིང་ལ་ཐེ་ཝན་ལ་རྒྱབ་སྐྱོར་གྱི་ཁྲིམས་འཆར་དོན་སྙིང་ཆེ་ཤོས་དང་ཚབ་མཚོན་རང་བཞིན་ལྡན་པའི་ཁྲིམས་འཆར་གལ་ཆེ་ཞིག་རེད་ཅེས་བརྗོད་འདུག
དུས་མཚུངས་སུ་ཨ་རིའི་གྲོས་ཚོགས་འོག་མའི་དམག་དོན་ལྷན་ཁང་གི་ཚོགས་མི་དང་གྲོས་ཚོགས་འོག་མའི་འཐུས་མི་Jim Banksལགས་ནས་རེས་གཟའ་པ་སངས་ཉིན་ཐེ་ཝན་གྱི་བདེ་སྲུང་སྐོར་ལ་རོགས་སྐྱོར་ཆེད་དུ་ཐེ་ཝན་ལ་མཚོན་ཆ་ཕྱིར་འཚོང་གི་ཁྲིམས་འཆར་ཞིག་བཏོན་གནང་ཡོད་པ་དང་ད་ལོའི་སྤྱི་ཟླ་༤པའི་ནང་གྲོས་ཚོགས་གོང་མའི་དམག་དོན་ལྷན་ཁང་གི་ཚོགས་མི་དང་སྤྱི་མཐུན་ཚོགས་པའི་འཐུས་མི་Josh Hawley་ལགས་ནས་ཀྱང་གྲོས་ཚོགས་གོང་མའི་ནང་གོང་འཁོད་ཁྲིམས་འཆར་དེ་བཏོན་གནང་ཡོད་པ་རེད།
ད་ལོའི་སྤྱི་ཟླ་༤པའི་ནང་ཨ་རིའི་གྲོས་ཚོགས་འཐུས་མི་Bob Menendezལགས་དང་Lindsey Graham་གཉིས་ཀྱིས་མི་དྲུག་ལས་གྲུབ་པའི་སྐུ་ཚབ་ཚོགས་པ་ཞིག་སྣེ་ཁྲིད་དེ་ཐེ་ཝན་ལ་གཟིགས་སྐོར་དུ་ཕེབས་ཡོད་པ་དང་སྐབས་དེར་ཐེ་ཝན་གྱི་སྲིད་འཛིན་ལྕམ་ཚའེ་དབྱིན་ཝེན་དང་ཐེ་ཝན་ཕྱི་སྲིད་དཔོན་པོ་ཝུའུ་ཀྲའོ་ང་ཐེ་ཝན་རྒྱལ་སྲུང་དཔོན་པོ་ཆིའུ་གོ་ཀྲེང་དང་ཐུག་འཕྲད་གནང་ཡོད་པ་རེད། གཞན་ཡང་ཉེ་དུས་གསར་ལམ་ཁག་ནས་གནས་ཚུལ་ཐོན་གསལ་ལ། ཨ་མེ་རི་ཁའི་གྲོས་ཚོགས་འོག་མའི་ཚོགས་གཙོ་ལྕམ་ནན་སེ་ཕེ་ལོ་སི་ལགས་རིང་མིན་སྤྱི་ཟླ་བརྒྱད་པའི་ནང་ཐེ་ཝན་དུ་ཕེབས་འཆར་ཡོད་པར་མ་ཟད། ལྕམ་ནན་སེ་ཕེ་ལོ་སི་ལགས་ཀྱིས་སྣེ་ཁྲིད་པའི་སྐུ་ཚབ་ཚོགས་པ་དེ་ཧིན་རྡུ་ནི་ཤི་ཡ་དང་ཉི་ཧོང། མཱ་ལ་ཤི་ཡ་། སིང་ག་ཕོག་བཅས་རྒྱལ་ཁབ་ཁག་ནང་འཚམས་གཟིགས་སུ་ཕེབས་རྒྱུ་རེད་འདུག ལྕམ་ནན་སེ་ཕེ་ལོ་སི་ལགས་ལ་དེ་སྔོན་ཏོག་དབྱིབས་ནད་དུག་གི་ནད་རྟགས་ཐོན་ཡོད་པའི་རྐྱེན་ལས་མ་གཞི་ད་ལོའི་སྤྱི་ཟླ་༤པའི་ནང་ཐེ་ཝན་ལ་འཚམས་གཟིགས་ཕེབས་རྒྱུའི་འཆར་གཞི་དེ་ཕར་འགྱངས་བྱེད་དགོས་ཁེལ་ཡོད་པ་དང་སྐབས་དེར་འཆར་གཞི་དེ་ལ་རྒྱ་ནག་ཕྱོགས་ནས་སྐྱོན་བརྗོད་ཤུགས་ཆེ་བྱས་ཡོད་པ་རེད།