ཨ་རིའི་རླུང་འཕྲིན་ཁང་གི་ཀུན་གླེང་གསར་འགྱུར་ནང་༧གོང་ས་མཆོག་ཨ་རིར་ཆིབས་སྒྱུར་བསྐྱངས་འཆར་དང་། རྒྱ་གར་གྱི་སྲིད་བློན་མོ་དྷི་སོགས་ལ་འོས་བསྡུའི་རྒྱལ་ཁ་ཐོབ་པར་འཚམས་འདྲི་གནང་བ། ཨ་རིའི་གྲོས་ཚོགས་སུ་དྲུག་བཞི་ལས་འགུལ་དུས་དྲན་སྲུང་བརྩི། མེག་སི་ཀོའི་བུད་མེད་སྲིད་འཛིན། གྷ་ཛའི་ཞི་བདེའི་གྲོས་གཞི། ཨ་རིའི་རྒྱལ་མཚམས་སྟངས་འཛིན་སོགས་ཡོད། ཀུན་གླེང་ལས་རིམ་དུ་ཚེ་རིང་དབང་མོ་ལགས་ཀྱིས་བྱང་ཨ་རིའི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་དང་ལྷན་པེ་ཅིང་གནམ་བདེ་སྒོ་མོ་ཆེའི་ཐང་ཆེན་དུ་སློབ་ཕྲུག་ཚོར་དྲག་གནོན་བྱས་ཏེ་མི་ལོ་༣༥ འཁོར་བའི་དུས་དྲན་ཉིན་མོ་སྲུང་བརྩིའི་ཐད་བགྲོ་གླེང་ཞུ་རྒྱུ་དང་། དེ་བཞིན་དུ་ཚེ་རིང་དབང་མོ་ལགས་ཀྱིས་ནུབ་བྱང་མི་རིགས་སློབ་གྲྭ་ཆེན་མོའི་དགེ་རྒན་ཆེན་མོ་ཟུར་པ་རྒྱལ་ལོ་ལགས་སུ་ཁོང་རང་ཉིད་དགུང་ལོ་༢༣ ཡིན་དུས་རྒྱ་ནག་གི་ལན་ཀྲུའུ་གྲོང་ཁྱེར་ནས་དྲུག་བཞི་ལས་འགུལ་ནང་དངོས་སུ་མཉམ་ཞུགས་བྱས་པ་དང་། བོད་པ་དང་སོག་པོ། ཡུ་གུར་བའི་སློབ་ཕྲུག་མང་པོ་ཞིག་ཀྱང་ལས་འགུལ་དེའི་ནང་མཉམ་ཞུགས་བྱས་ཡོད་པའི་ཐད་བགྲོ་གླེང་ཞུ་རྒྱུ་ཡིན།