ཨ་རིའི་ཕྱི་སྲིད་དྲུང་ཆེ་བྷ་ལིན་ཁེན་མཆོག་རིང་མིན་ཚེས་༡༨ དང་༡༩ ཉིན་པེ་ཅིང་དུ་འཚམས་འདྲིར་ཕེབས་རྒྱུ་གཏན་ཁེལ་ཡོད་ཅིང་། ཨ་རིའི་མཐོ་རིགས་དཔོན་པོ་ཚོས་ཉམས་ཉེན་ཆེན་པོར་འཕྲད་དུས་ཨ་རྒྱ་གཉིས་བར་གྲོས་མོལ་གྱི་ལམ་ཁ་ཞིག་ཕྱེས་ནས་ཉེན་ཁ་ཆུང་དུ་གཏོང་ཐབས་གནང་རྒྱུ་ནི་ད་རེས་བྷ་ལིན་ཁེན་མཆོག་པེ་ཅིང་དུ་ཕེབས་བའི་དམིགས་ཡུལ་གཙོ་བོ་རེད་ཅེས་ནན་བརྗོད་གནང་བཞིན་ཡོད་ཀྱང་། ད་རེས་ཀྱི་འཚམས་འདྲི་ལ་གྲུབ་འབྲས་ཆེན་པོ་ཐོབ་རྒྱུར་རེ་བ་བཅངས་མེད་པ་རེད། དབྱེ་ཞིབ་པ་ཚོས་ད་ཐེངས་བྷ་ལིན་ཁེན་མཆོག་པེ་ཅིང་དུ་ཕེབས་པ་དེས་ཨ་རྒྱ་གཉིས་ཀྱི་དབུ་ཁྲིད་ད་ལོའི་སྤྱི་ཟླ་༡༡ པའི་ནང་ཨེ་ཤེ་ཡ་ཞི་བདེ་རྒྱ་མཚོའི་མངའ་ཁུལ་གྱི་དཔལ་འབྱོར་ལྷན་ཚོགས་ཐོག་མཇལ་མོལ་ཡོང་རྒྱུར་རྨང་གཞི་བཏིང་བ་ཞིག་དང་། ཕྱོགས་གཉིས་ཀྱི་དབུ་ཁྲིད་མཇལ་མོལ་བྱུང་ན་ད་གཟོད་ཨ་རྒྱ་གཉིས་ཀྱི་འབྲེལ་ལམ་བསྐྱར་གསོ་ཡོང་ཐུབ་རྒྱུའི་རེ་བ་ཡོད་པ་ཞིག་ལ་ངོས་འཛིན་བྱེད་བཞིན་འདུག།
བྷ་ལིན་ཁེན་པེ་ཅིང་དུ་ཕེབས་དགོས་དོན་ཅི།
ད་རེས་བྷ་ལིན་ཁེན་མཆོག་ཨ་རིའི་ཕྱི་སྲིད་དྲུང་ཆེའི་མཚན་ཐོག་ནས་པེ་ཅིང་དུ་འཚམས་འདྲིར་ཕེབས་པ་ཐོག་མ་ཆགས་ཡོད་པར་མ་ཟད། དེ་ནི་ཨ་རིའི་ཕྱི་སྲིད་དྲུང་ཆེ་༢༠༡༨ ལོ་ནས་ད་བར་པེ་ཅིང་དུ་ཕེབས་པ་ཐོག་མ་དེ་ཆགས་ཀྱི་ཡོད་པ་རེད། ཨ་རིའི་གཞུང་གི་གསལ་བསྒྲགས་སྤེལ་གསལ་ལ་ད་རེས་ཀྱི་འཚམས་གཟིགས་ལ་དམིགས་ཡུལ་ཆེན་པོ་གསུམ་ཡོད་དེ། ཨ་རྒྱ་གཉིས་བར་གྲོས་མོལ་གྱི་ལམ་ཁ་རྒྱུན་འཁྱོངས་ཡོང་ཐབས་ཀྱིས་ཕྱོགས་གཉིས་ཀྱི་འབྲེལ་ལམ་དེ་འགན་ཁུར་བའི་ཐོག་ནས་དོ་དམ་གནང་རྒྱུ་དང་། ཕྱོགས་གཉིས་ཀྱི་འབྲེལ་ལམ་དང་དེ་བཞིན་འཛམ་གླིང་སྤྱི་དང་ས་ཁུལ་གྱི་ལས་དོན་སྐོར་ལ་གླེང་སློང་གནང་རྒྱུ། རྒྱལ་སྤྱིའི་ཐོག་ཨ་རྒྱ་གཉིས་ཀར་འཕྲད་བཞིན་པའི་འགྲན་སློང་ལ་མཉམ་ལས་ཐོག་ནས་གདོང་ལེན་གནང་ཕྱོགས་བཅས་རེད།
ཨ་རིའི་རྒྱལ་ཁབ་བདེ་འཇགས་ལྷན་ཚོགས་ཀྱི་ཧིན་རྡུ་ཞི་བདེ་རྒྱ་མཚོའི་མངའ་ཁུལ་གྱི་སྲིད་ཇུས་མཐུན་སྦྱོར་བ་ཁེར་ཊི་ཁམ་བྷེལ་Kurt Campbell ལགས་ནས་གཟའ་ལྷག་པའི་ཉིན་ཨ་རྒྱ་གཉིས་བར་གྲོས་མོལ་གྱི་བརྒྱུད་ལམ་ནི་ཧ་ཅང་གལ་འགངས་ཆེན་པོ་ཆགས་ཡོད་པ་དང་། ཨ་རིས་རྒྱ་ནག་དང་གྲང་དམག་དུས་སྐབས་ལྟ་བུའི་ཉམས་ཉེན་དོ་དམ་བྱེད་སའི་ལམ་ཁ་ཞིག་བཟོ་ཐུབ་རྒྱུའི་རེ་བ་བྱེད་བཞིན་ཡོད་ཅེས་གསུངས་འདུག། དེ་བཞིན་དུ་ཨ་རིའི་ཧིན་རྡུ་ཞི་བདེ་རྒྱ་མཚོའི་མངའ་ཁུལ་གྱི་ལས་དོན་ཚོགས་ཆུང་གི་ཕྱག་རོགས་ཏ་ནིའོ་ཁི་རི་ཐེན་བྷ་རིན་ཁི་Daniel Kritenbrink ལགས་ནས་ཀྱང་། ད་རེས་ཕྱི་སྲིད་དྲུང་ཆེ་པེ་ཅིང་དུ་ཕེབས་པ་ནི་ནམ་རྒྱུན་ནང་བཞིན་ཐེ་ཝན་དང་ཡུག་ཀེ་རན་གྱི་གནད་དོན་སྐོར་དང་། ཨ་རྒྱ་གཉིས་ཀྱི་མི་དམངས་ཚོའི་བར་བརྗེ་རེས་ལ་ཤུགས་སྣོན་རྒྱག་རྒྱུ་སྐོར་ནས་གླེང་སློང་གནང་རྒྱུ་རེད་ཅེས་གསུངས་འདུག།
རྒྱ་ནག་གཞུང་འབྲེལ་གསར་ཁང་ཁག་གིས་རྒྱ་ནག་གིས་མ་གཞིར་ཨ་རི་དང་འབྲེལ་ལམ་བསྐྱར་གསོ་ཡོང་རྒྱུ་དེ་བློས་གཏོང་བྱས་ཚར་ཡོད་ཀྱང་། ཨ་རིས་རྒྱ་ནག་ལ་བྷ་ལིན་ཁེན་མཆོག་པེ་ཅིང་དུ་ཕེབས་རྒྱུའི་རེ་འདུན་ཚུར་བཏོན་པ་ཞིག་ཡིན་ཚུལ་སྒྲོག་བཞིན་ཡོད། འོན་ཏེ་ཨ་རིའི་ཕྱི་སྲིད་དྲུང་ཆེའི་ཕྱག་རོགས་ཀྱིས་བྷ་ལིན་ཁེན་མཆོག་པེ་ཅིང་དུ་ཕེབས་རྒྱུ་དེ་ནི་ཨ་རྒྱ་ཕྱོགས་གཉིས་ཀྱི་འབད་བརྩོན་ལ་བརྟེན་ནས་བྱུང་བ་ཞིག་རེད་ཅེས་ནན་བརྗོད་གནང་འདུག།
བྷ་ཌན་འཛིན་སྐྱོང་གིས་རྒྱ་ནག་ཐོག་འཛིན་པའི་སྲིད་ཇུས་ལ་འགྱུར་ལྡོག་འགྲོ་མི་སྲིད།
ཉེ་ལམ་བྷ་ཌན་འཛིན་སྐྱོང་གིས་རྒྱ་ནག་དང་གྲོལ་མོལ་གྱི་ལམ་ཁ་ཕྱེ་རྒྱུར་འབད་བརྩོན་གནང་བཞིན་པ་དང་། ལྷག་པར་དུ་ཨ་རིའི་རྒྱལ་ཁབ་བདེ་འཇགས་སྐོར་གྱི་སློབ་སྟོན་པ་ཇཱེ་ཁེ་སུའུ་ལི་ཝེན་Jake Sullivan ལགས་ནས་ཡུ་རོབ་ཀྱི་བརྗོད་ཚུལ་ཏེ་རྒྱ་ནག་དང་འབྲེལ་ལམ་གཙང་བཅད་མ་ཡིན་པར་ཉེན་ཁ་སེལ་ཐབས་བྱེད་པ་ཡིན་ཞེས་པ་ལུང་དྲངས་ཡོད་པའི་རྗེས་སུ། མི་འགའ་ཤས་ཤིག་གིས་བྷ་ཌན་འཛིན་སྐྱོང་གིས་རྒྱ་ནག་ཐོག་འཛིན་པའི་སྲིད་ཇུས་ལྷོད་ཡངས་གཏོང་བཞིན་ཡོད་པའི་བརྡ་ཞིག་ལ་མཐོང་གི་ཡོད་མོད། ཨ་རིའི་རྒྱལ་ཁབ་བདེ་འཇགས་ལྷན་ཚོགས་ཀྱི་ཧིན་རྡུ་ཞི་བདེ་རྒྱ་མཚོའི་མངའ་ཁུལ་གྱི་སྲིད་ཇུས་མཐུན་སྦྱོར་བ་ཁེར་ཊི་ཁམ་བྷེལ་Kurt Campbell ལགས་ནས་རྒྱ་ནག་དང་གྲོས་མོལ་བྱས་པ་ཙམ་གྱིས་རྒྱ་ནག་ཐོག་འཛིན་པའི་སྲིད་ཇུས་ལ་འགྱུར་བ་གཏོང་གི་ཡོད་པ་མཚོན་མི་ཐུབ། འདི་ནི་ཐབས་ཇུས་ཐོག་གི་འགྱུར་ལྡོག་ཅིག་མ་རེད་ལ་ཨ་རིའི་རྒྱལ་ཁབ་སྐྱོང་བའི་ཐབས་ཇུས་ལ་འགྱུར་ལྡོག་གསར་པ་ཕྱིན་པ་ཞིག་ཀྱང་མ་རེད། རྒྱ་ནག་དང་འགྲན་རྩོད་བྱ་རྒྱུ་དེ་ནི་༢༠༢༢ ལོའི་སྤྱི་ཟླ་༥ པ་ནས་ད་བར་འཛིན་པའི་སྲིད་ཇུས་ཤིག་རེད། རྒྱ་ནག་གིས་ཐེ་ཝན་མཚོ་ཁུག་དང་ཀུ་བྷའི་གནད་དོན་སོགས་བརྒྱུད་ནས་བཙན་ཤེད་བྱས་དང་བྱེད་མུས་རེད། ཨ་རིས་ཀྱང་དེ་ལ་དགོས་ངེས་ཀྱི་རྒོལ་ལན་སློག་རྒྱུ་རེད་ཅེས་གསུངས་འདུག།
སྤྱི་ཟླ་༦པའི་ཚེས་༡༢ ཉིན། རྒྱ་ནག་གི་དམག་མིའི་གནམ་གྲུ་ཁ་ལོ་བར་སྦྱོང་བརྡར་སྤྲད་པའི་ལས་འགུལ་ནང་མཉམ་བཞུགས་ཀྱིས་ཨ་རིའི་རྒྱལ་ཁབ་བདེ་འཇགས་ལ་ཉེན་ཁ་བཟོ་ཡོད་པའི་ཉེས་མིང་འོག་ཚོགས་པ་༤༣ ནི་བྷ་ཌན་འཛིན་སྐྱོང་གིས་ཕྱིར་གཏོང་བཀག་སྡོམ་གྱི་ཐོ་གཞུང་ནང་བཅུག་ཡོད་ཅིང་། གཞན་ཡང་སྤྱི་ཟླ་༦ པའི་ཚེས་༩ ཉིན་ལ་རྒྱ་ནག་གི་བཟོ་ཚོང་ཁང་ཞིག་དང་དེའི་ཡན་ལག་བཟོ་ཚོང་ཁང་༨ ཀྱིས་ཤིན་ཅང་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བའི་ལས་དོན་ནང་མཉམ་བཞུགས་བྱས་ཡོད་པའི་དོགས་གཞིའི་འོག་ཐོ་གཞུང་ནག་པོའི་ནང་དུ་བཅུག་ཡོད་པ་རེད།
ཨ་རྒྱ་གཉིས་ཀྱི་འབྲེལ་ལམ་སླར་གསོ་ཡོང་མ་ཐུབ་པའི་རྒྱུ་རྐྱེན་གཙོ་བོ་གང་ཡིན་ནམ།
ཨ་རིའི་ཡེལ་གཙུག་ལག་སློབ་ཆེན་གྱི་ཁྲིམས་ལུགས་རིག་པའི་སློབ་དཔོན་ཆེན་མོ་མོ་རེ་ཛི་རུ་ཏའོ་ཧྥུ་Moritz Rudolf ལགས་ནས་ཨ་རྒྱ་གཉིས་ཀྱི་འབྲེལ་ལམ་སླར་གསོ་ཡོང་མི་ཐུབ་པའི་རྒྱུ་རྐྱེན་གཙོ་བོ་ཞིག་སྟེ་ད་བར་འབྲེལ་ལམ་ཇེ་སྡུག་ཏུ་ཕྱིན་འཇུག་མཁན་དེ་ཕ་རོལ་པོ་རེད་ཅེས་ཕན་ཚུན་སྐྱོན་བརྗོད་བྱེད་རེས་བྱས་ནས་བསྡད་ཡོད་པར་ཐུག་ཡོད་ཅེས་གསུངས་འདུག། ད་ཕན་ཨ་རྒྱ་གཉིས་དབར་འཛམ་གླིང་ཐོག་གི་གོ་གནས་དང་། ཕྱི་འབྲེལ་ཐབས་ཇུས། ཚོང་དོན་དཔལ་འབྱོར། ཐེ་ཝན་གྱི་གནད་དོན་དང་ཕྱོགས་སོ་སོའི་ཆབ་སྲིད་ལམ་ལུགས་ལ་སོགས་པ་ཕྱོགས་མང་པོ་ཞིག་གི་ཐོག་ལ་ཕན་ཚུན་འཁང་ར་དང་སྐྱོན་བརྗོད་བྱེད་རེས་བྱས་དང་བྱེད་བཞིན་ཡོད་པར། དཔེར་ན་རྒྱལ་སྤྱིའི་སྒྲིལ་སྲོལ་ཐོག་ནས་བཤད་ན། ཨ་རིའི་ངོས་ནས་རྒྱ་ནག་གིས་རྒྱལ་སྤྱིའི་ཁྲིམས་དང་སྒྲིག་སྲོལ་ལ་དོ་ཕོག་གཏོང་བཞིན་པ་དང་། འཛམ་གླིང་སྤྱིའི་རིན་ཐང་ལྟ་གྲུབ་དང་རྩ་དོན་ལམ་ལུགས་སོགས་ལ་གཏོར་བཤིག་གཏོང་བཞིན་ཡོད་ཅེས་སྐྱོན་བརྗོད་བྱེད་བཞིན་པ་དང་། ཡང་རྒྱ་ནག་གིས་ཨ་རིས་གྲང་དམག་དང་བཙན་དབང་རིང་ལུགས་ཀྱི་བསམ་བློ་ཁྱེར་ནས་ཨ་རི་དང་མི་མཐུན་པ་ཡོད་ཚད་རྩ་མེད་གཏོང་བཞིན་འདུག། ཨ་རིས་མ་དངུལ་དང་འཕྲུལ་རིག་ལག་རྩལ་གྱི་སྟོབས་ཤུགས་ལ་བརྟེན་ནས་རྒྱལ་སྤྱིའི་སྒྲིག་སྲོལ་ལ་སྲུང་སྐྱོབ་བྱེད་བཞིན་ཡོད་པར་ཁ་གཡར་ནས་སོ་སོའི་ཆབ་སྲིད་ཀྱི་ཤུགས་རྐྱེན་རྒྱ་བསྐྱེད་གཏོང་བཞིན་ཡོད་པ་རེད་ཅེས་སྐྱོན་བརྗོད་བྱེད་བཞིན་པ་རེད། དེ་བས་སློབ་དཔོན་ཆེན་མོ་མོ་རེ་ཛི་རུ་ཏའོ་ཧྥུ་Moritz Rudolf ལགས་ནས་ཨ་རྒྱ་གཉིས་དབར་ཕན་ཚུན་སྐྱོན་བརྗོད་བྱེད་རེས་བྱེད་བཞིན་པ་དེས་ཕན་ཚུན་ཡིད་ཆེས་བརླག་ཡོད་པའི་གནས་སྟངས་མངོན་ཡོད། དེ་ནི་ཕྱོགས་གཉིས་ཀྱི་ཆབ་སྲིད་ལམ་ལུགས་དང་རིན་ཐང་ལྟ་གྲུབ་ཐ་དད་ཡིན་པ་དང། རྒྱལ་ཁབ་ནང་ཁུལ་གྱི་ཆབ་སྲིད་སྟོབས་ཤུགས་ཀྱི་ཤུགས་རྐྱེན་སོགས་ནས་བྱུང་བ་ཞིག་ཡིན་སྟབས། དེར་འགྱུར་ལྡོག་གཏང་དགོས་ན་ཧ་ཅང་དཀའ་ངལ་ཆེན་མོ་ཡོད་པ་རེད་ཅེས་གསུངས་འདུག།
རྒྱ་ནག་དམར་ཤོག་གི་འགོ་ཁྲིད་ཞི་ཅིན་ཕིང་གིས་ད་ལོའི་སྤྱི་ཟླ་༣ པའི་ནང་། ཨ་རི་གཙོས་པའི་ནུབ་ཕྱོགས་རྒྱལ་ཁབ་ཚོས་རྒྱ་ནག་ལ་ཕྱོགས་ཡོངས་ནས་བཀག་སྡོམ་དང་། མཐའ་བསྐོར་ནས་བཀག་སྐྱིལ་དང་འགོག་ཐབས་བྱེད་ཀྱི་ཡོད་པས། ང་ཚོར་སྔར་བྱུང་མྱོང་མེད་པའི་འགྲན་སློང་ཆེན་པོ་ཞིག་འཕྲད་བཅུག་ཡོད་ཅེས་བརྗོད་འདུག། ཨ་རིའི་ཕྱི་སྲིད་དྲུང་ཆེ་བྷ་ལིན་ཁེན་མཆོག་པེ་ཅིང་དུ་འཚམས་གཟིགས་ལ་ཕེབས་བཞིན་པའི་སྐབས་འདིར། ཞི་ཅིན་ཕིང་གིས་ཀྱང་འགལ་ཟླ་རིགས་གང་ཡང་འབྱུང་སྲིད་པའི་སྐོར་གྲ་སྒྲིག་ཨང་གསར་བྱེད་བཞིན་ཡོད་ཅིང་། ཟླ་བ་གོང་མའི་ཟླ་མཇུག་ཏུ་ཞི་ཅིན་ཕིང་གིས་ཐལ་ཆ་ཆེ་བའི་གནས་ཚུལ་ལ་གྲ་སྒྲིག་ཡག་པོ་བྱ་དགོས་ཞེས་ནན་བརྗོད་ཐེངས་གཉིས་བྱས་ཡོད་པ་རེད།
