ཉེ་དུས་ཐའི་ལེན་ཌིའི་ནང་ཕྱོགས་འགལ་ཆབ་སྲིད་ཚོགས་པ་ཕྱིར་བསྡུ་བྱས་པ་དང་ཆབས་ཅིག ཚོགས་པའི་སྲིད་བློན་ཕྱིར་འབུད་བཏང་བ་བཅས་གནད་དོན་གཉིས་ཀྱི་ཐོག་ཁྲིམས་ཁང་གིས་ཐག་གཅོད་བྱས་ཡོད་པ་དང་། ཆབ་སྲིད་ཀྱི་ལས་དོན་ནང་ཞུགས་མི་ཆོག་པ་བཟོས་པའི་ཕྱོགས་འགལ་ཚོགས་པའི་འགོ་ཁྲིད་ཀྱིས་ཐའི་ལེན་ཌིའི་རྒྱལ་ཁབ་ཀྱི་ཆབ་སྲིད་ལ་ཁྲིམས་ཁང་གིས་ཐེ་བྱུས་བྱ་རྒྱུ་སྔོན་འགོག་བྱ་ཐབས་སུ་ཡུལ་དེའི་ཆབ་སྲིད་མི་སྣ་ཚོས་ཁྲིམས་ཁང་གི་ལམ་ལུགས་ལ་བསྒྱུར་བཅོས་ངེས་པར་གཏོང་དགོས་པ་ཡིན་ཞེས་བཤད་འདུག གང་ལགས་ཞེ་ན། ད་ལྟའི་ཆར་ཐའི་ལེན་ཌིའི་གནས་བབ་དེ་མདུན་བསྐྱོད་བྱེད་མ་ཐུབ་པར་རང་འཇག་མུ་མཐུད་སྐོར་ར་འཁོར་ནས་བསྡད་འདུག་ཅེས་བརྗོད་འདུག ན་ནིང་ལོར་མདུན་བསྐྱོད་ཆབ་སྲིད་ཚོགས་པའི་འགོ་ཁྲིད་པི་ཊ་ལིམ་ཇཱ་རོན་རཐཱ་ལ་སྲིད་གཞུང་འཛུགས་རྒྱུར་དམ་བསྒྲགས་བཀག་བསྡོམས་བྱས་ནས་སྲིད་གཞུང་འཛུགས་འཇུག་མེད་པ་མ་ཟད། ཁོང་ལ་ལོ་བཅུའི་རིང་ཆབ་སྲིད་ཀྱི་ལས་དོན་ནང་ཞུགས་མི་ཆོག་པ་བཟོས་ཡོད་ནའང་། ཐའི་ལན་ཌིའི་ནང་བསྒྱུར་བཅོས་ཆེན་པོ་ཞིག་གཏོང་རྒྱུར་ལས་དོན་མུ་མཐུད་ནས་བྱེད་འཆར་ཡོད་པ་རེད། དེ་བཞིན་ཡུལ་དེའི་རང་དབང་ཅན་གྱི་ལྟེ་གནས་ཁག་ཆབ་སྲིད་ཀྱི་དགོས་མཁོ་སྒྲུབ་རྒྱུར་བེད་སྤྱོད་གཏོང་སྲོལ་ཡོད་པ་དེ་དག་ཀྱང་མཚམས་འཇོག་ཐུབ་རྒྱུའི་དམིགས་ཡུལ་འཛིན་གྱི་ཡོད་ནའང། སེམས་ཤུགས་ནམ་ཡང་མ་ཆག་པར་མུ་མཐུད་འཐབ་རྩོད་བྱེད་ཀྱི་ཡིན་ཞེས་བརྗོད་འདུག
ཐའི་ལེན་ཌིའི་ནང་ལོ་བཅུ་ཕྲག་གཉིས་ཙམ་རིང་མང་ཚོགས་ཀྱིས་དགའ་མོས་བྱེད་སའི་ཆབ་སྲིད་ཚོགས་པ་དང་ཡུལ་དེའི་དྲག་པོའི་དཔུང་དམག་དང་གནད་ཡོད་ལྟེ་གནས་བཅས་ཀྱི་དབར་དབང་ཆའི་འཐབ་རྩོད་བྱས་པའི་རྐྱེན་གྱིས་ཡུལ་དེའི་ནང་སྐབས་རེ་སྲིད་གཞུང་མགོ་རྟིང་སློག་པ་དང་། ཡང་སྐབས་རེ་ཆེས་མཐོའི་ཁྲིམས་ཁང་གིས་ཐེ་བྱུས་བྱས་པ་བཅས་ལ་བརྟེན་ནས་སྲིད་གཞུང་ཐེངས་མང་པོ་འཕོ་བསྒྱུར་ཕྱིན་ཏེ་ཆབ་སྲིད་གནས་སྟངས་སྲ་བརྟན་མེད་པར་གྱུར་ཡོད་ཅིང་། དེ་ཡང་ཐའི་ལེན་ཌིའི་ཕྱོགས་འགལ་བའི་འགོ་ཁྲིད་པི་ཊཱ་ཡིས་རོ་ཀྲར་གསར་སྤེལ་ལས་ཁང་ལ་ ཐའི་ལེན་གྱི་མདུན་བསྐྱོད་ཆབ་སྲིད་ཚོགས་པ་ཕྱིར་བསྡུ་བྱས་པ་དང་སི་རི་ཐཱ་ ཐཱ་ཝི་སིན་སྲིད་བློན་ནས་གནས་དབྱུངས་བཏང་བ་སོགས་ཀྱི་ཐག་གཅོད་དེ་དག་ཁྲིམས་ཁང་གིས་བྱས་པ་ཞིག་ཡིན། དེས་མང་ཚོགས་ལ་རྒྱལ་ཁ་གང་ཡང་སོན་མེད་པའི་འགྲེལ་བརྗོད་དང་འབྲེལ་མང་ཚོགས་ཀྱི་བསམ་པའི་ནང་ང་ཚོ་མདུན་བསྐྱོད་བྱེད་ཀྱི་ཡོད་རེད་བསམ་གྱི་ཡོད། འོན་ཀྱང་དོན་དངོས་ཐོག་ང་ཚོ་གང་དུའང་མི་བསྐྱོད་པར་རང་འཇག་མུ་མཐུད་སྐོར་ར་འཁོར་ནས་བསྡད་ཡོད་ཅེས་འགྲེལ་བརྗོད་བྱས་འདུག
ཐའི་ལེན་གྱི་ཤེས་ཡོན་ཅན་དང་ཁྲིམས་ཀྱི་ཐོག་ཆེད་ལས་མཁས་པ་བཅས་གནད་ཡོད་མི་སྣ་༡༣༤ཡིས་ཡུལ་དེའི་ཁྲིམས་ཁང་ལ་སྐྱོན་བརྗོད་ཀྱི་བསྒྲགས་གཏམ་ཞིག་སྤེལ་བའི་ནང་ཁྲིམས་ཁང་གིས་ཁྲིམས་གཞི་ལས་འགལ་བའི་གོམ་སྟབས་སྤོས་ཡོད་པ་དེས་མང་ཚོགས་ཀྱིས་ཡུལ་དེའི་ཁྲིམས་ལུགས་དང་དམངས་གཙོའི་ལམ་ལུགས་ལ་ཡིད་ཆེས་བྱ་རྒྱུ་མེད་པ་བཟོས་ཡོད་པའི་འགྲེལ་བརྗོད་བྱས་པའི་གནས་ཚུལ་ཐོན་སྐབས་གོང་ཞུས་ཕྱོགས་འགལ་ཚོགས་པའི་འགོ་ཁྲིད་རང་ལོ་༤༣ལ་སོན་པ་པི་ཏཱ་ཡིས་གཏམ་བཤད་དེ་བྱས་པ་ཞིག་ཡིན་འདུག་ ད་ཆ་ཕྱོགས་འགལ་བའི་འགོ་ཁྲིད་པི་ཊཱ་ཐའི་ལེན་ཌིའི་ནང་ཆབ་སྲིད་ཀྱི་ལས་དོན་ནང་ལོ་བཅུའི་རིང་ཞུགས་མི་ཆོག་པ་བཟོས་པའི་རྗེས་ཁོང་ཨ་རིའི་ཧར་ཝ་ཌི་གཙུག་ལག་སློབ་གཉེར་ཁང་ལ་ཉམས་ཞིབ་ཀྱི་ལས་དོན་ཆེད་བསྐྱོད་ཀྱི་ཡོད་ཅིང་། ཁོང་གིས་ཐའི་ལེན་ཌིའི་རྩ་ཁྲིམས་ནང་འཁོད་པའི་རྒྱལ་བརྒྱུད་རིང་ལུགས་ལ་དམའ་འབེབས་བྱས་པ་ཡིན་ན། དམའ་འབེབས་བྱེད་མཁན་དེར་ལོ་ངོ་༡༥འི་རིང་བཙོན་འཇུག་ཉེས་ཆད་གཏོང་རྒྱུའི་ཁྲིམས་ལུགས་ལ་བསྒྱུར་བཅོས་གཏོང་རྒྱུའི་ལས་འགུལ་སྤེལ་བ་ནི་ཡུལ་དེའི་རྒྱལ་བརྒྱུད་རིང་ལུགས་ཀྱི་རྩ་ཁྲིམས་ལ་རྩིས་མེད་བཏང་བ་ཞིག་ཡིན་ལུགས་ཁྲིམས་ཁང་གིས་སྐྱོན་བརྗོད་བྱེད་ཀྱི་ཡོད་པ་རེད། ཉེ་ཆར་པིའོ་ཐའི་ཆབ་སྲིད་མནའ་འབྲེལ་ཚོགས་པ་ལ་རྒྱལ་ཁ་ཐོབ་པའི་རྗེས་གཟའ་འཁོར་སྔོན་མའི་རེས་གཟའ་པ་སངས་ཉིན་ཡུལ་དེའི་གྲོས་ཚོགས་ཀྱི་ནང་མང་མོས་ཐོག་ནས་ཤིན་ན་ཝ་ཏཱ་རའི་མི་རྒྱུད་ནས་ཡིན་པ་སྲིད་བློན་མི་ཐོག་གསུམ་པ་རང་ལོ་༣༧སོན་པ་ལྕམ་ཕཱི་ཐོ་ཐཱན་ཤེ་ན་ཝ་ཀྲེར་སྲིད་བློན་ལ་འོས་འདེམས་བྱུང་ཡོད་པ་དང་། དེར་ཡུལ་དེའི་རྒྱལ་པོས་རེས་གཟའ་ཉི་མའི་ཉིན་རྒྱབ་སྐྱོར་གནང་ཡོད་པ་རེད།
རུའི་ཀྲར་གསར་སྤེལ་ལས་ཁང་ནས་བཏུས།
གསར་འགོད་པ། ཀུན་བཟང་སྒྲོལ་མ།
ཞུ་དག་རྩོམ་སྒྲིག་པ། རྣམ་རྒྱལ་ཤཱསྟྲཱི།
གླེང་སྟེགས།