ཨ་རིའི་འོས་འཕེན་བས་འོས་བསྡུའི་རྗེས་དྲག་སྤྱོད་ལག་ལྟར་བྱེད་སྲིད་པའི་བློ་འཚབ།

༄༅། གཟའ་འཁོར་གཅིག་ཙམ་གྱི་ནང་ལ་ཨ་རིའི་འོས་འཕེན་བ་ཚོས་སྲིད་འཛིན་རྗེས་མ་དེ་འོས་འདེམས་བྱ་རྒྱུ་ཡིན་པ་དང་ དུས་མཚུངས་འོས་འཕེན་བའི་ཁྲོད་དུ་ད་ལོའི་འོས་བསྡུའི་རྗེས་སུ་འོས་བསྡུའི་གྲུབ་འབྲས་ལ་འཕྲུ་སློག་གཏོང་ཐབས་སོགས་བྱས་ཏེ་རྒྱ་ཆེ་ས་ནས་ཨ་རིའི་མང་གཙོའི་ལམ་ལུགས་ལ་གནོད་སྐྱོན་གཏོང་བའི་བྱ་ཐབས་སྤེལ་བ་སོགས་བྱས་ཏེ་ཆབ་སྲིད་དང་འབྲེལ་བའི་དྲག་སྤྱོད་ལག་ལྟར་བྱ་སྲིད་པའི་བློ་འཚབ་ཆེན་པོ་བྱེད་ཀྱི་ཡོད་པ་རེད་ཅེས་ཨེ་པི་གསར་འགྱུར་ལས་ཁང་དང་སྤྱི་དམངས་ལས་དོན་ཉམས་ཞིབ་ཁང་ཟུང་འབྲེལ་གྱིས་བྱས་པའི་ཞིབ་འཇུག་སྙན་ཐོ་ཞིག་གི་ནང་གསལ་སྟོན་བྱས་འདུག

དེ་ཡང་ཨ་རིའི་མང་ཚོགས་ཁྲོད་དུ་ད་ནས་ལོ་བཞི་མིན་ཙམ་གྱི་སྔོན་ལ་ དེ་སྔའི་སྲིད་འཛིན་ཌོ་ནལ་ཁྲམ་གྱིས་ཕྱི་ལོ་༢༠༢༠ལོའི་སྲིད་འཛིན་འོས་བསྡུའི་ནང་ཁོང་ལ་ཕམ་ཉེས་བྱུང་བར་ངོས་ལེན་མ་གནང་བའི་རྗེས་འབྲས་སུ་ ཕྱི་ལོ་༢༠༢༡ལོའི་ཕྱི་ཟླ་དང་པོའི་ནང་ཟིང་ཆ་སློང་མཁན་མི་མང་ཁག་ཅིག་གིས་གྲོས་ཚོགས་ཀྱི་ཁང་ཆེན་ཐོག་བཙན་རྒོལ་བྱས་ཏེ་ཞི་བའི་སྒོ་ནས་སྲིད་དབང་རྩིས་སྤྲོད་ལ་བཀག་འགོག་བྱེད་ཐབས་བྱས་པ་དེ་ནས་བཟུང་སྟེ་ འཛམ་གླིང་གི་མང་གཙོ་རྙིང་ཤོས་ཡིན་པ་ཨ་རིའི་མང་གཙོ་འདི་བཞིན་སྲ་བརྟན་གནས་མིན་ཐད་བློ་འཚབ་ཆེན་པོ་བྱེད་གཞི་ཞིག་ཏུ་གྱུར་ཡོད་པ་རེད། ད་རེས་མི་མང་གི་བསམ་ཚུལ་བསྡུ་རུབ་བྱས་པའི་གྲུབ་འབྲས་ཀྱི་ནང་ལའང་ དེབ་འགོད་བྱས་པའི་འོས་འཕེན་བ་བཅུའི་ནང་ནས་བཞིས་འོས་བསྡུ་གྲུབ་པའི་རྗེས་སུ་འོས་ཤོག་གི་གྲུབ་འབྲས་ལ་འགྱུར་ལྡོག་གཏོང་ཐབས་ཀྱི་དྲག་སྤྱོད་སྤེལ་སྲིད་པའི་ཐོག་ཧ་ཅང་བློ་འཚབ་བམ་ ཡང་ན་བློ་འཚབ་གང་ཙམ་ཆེན་པོ་བྱེད་ཀྱི་ཡོད་པ་གསལ་སྟོན་བྱུང་འདུག། དེ་དང་ཕྱོགས་མཚུངས་འོས་འཕེན་བ་དེ་རིགས་གྲས་ནས་འོས་བསྡུའི་རྗེས་སུ་ས་གནས་སམ་མངའ་སྡེ་ཁག་ཅིག་གིས་འོས་བསྡུའི་གྲུབ་འབྲས་ཕྱི་བསྒྲགས་བྱ་རྒྱུར་བཀག་འགོག་བྱ་ཐབས་བྱེད་བ་དང་ འོས་བསྡུའི་གྲུབ་འབྲས་ལ་ཁས་ལེན་མ་བྱས་པར་ཁྲིམས་གཏུགས་བྱ་ཐབས་སྤེལ་རྒྱུ་ཡིན་པའི་ཐོག་ལའང་སེམས་འཁྲལ་ཧ་ཅང་ཆེན་པོ་ཡོད་མཁན་དང་སེམས་འཁྲལ་གང་ཙམ་ཡོད་མཁན་བཅས་ནི་འོས་འཕེན་བ་གསུམ་གྱི་ནང་ནས་གཅིག་ཡིན་པ་ཐེར་འདོན་བྱུང་འདུག

དེའི་བར་ན་ སྲིད་འཛིན་ཟུར་པ་ཌོ་ནལ་ཁྲམ་གྱིས་ད་དུང་ཡང་འོས་བསྡུའི་དྲིལ་བསྒྲགས་སྐབས་སུ་སྲིད་འཛིན་གྱི་འོས་བསྡུ་སྔོན་མ་དེ་དྲང་བདེན་བྱུང་མེད་ལུགས་ཀྱི་མརྗུན་གཏམ་སྤེལ་མུས་ཡིན་པ་མ་ཟད་ ཁོང་ལ་ད་ལོའི་འོས་བསྡུའི་གྲུབ་འབྲས་ཇི་བྱུང་ལ་ངོས་ལེན་གནང་མིན་བཀའ་དྲི་ཞུས་པ་ཁག་གི་ལན་དུ་ གལ་ཏེ་འོས་བསྡུ་དེ་དྲང་བདེན་ཞིག་བྱུང་བ་ཡིན་ཚེ་ཁས་ལེན་བྱ་རྒྱུ་ཡིན་ཞེས་གསུངས་ཏེ་ ད་ལོ་ཡང་འོས་བསྡུའི་གྲུབ་འབྲས་ལ་རྩོད་པ་སྐྱོན་སྲིད་པའི་རྣམ་པ་ཡོངས་སུ་སྟོན་གནང་ཡོད་པ་རེད། དེ་དང་ཕྱོགས་མཚུངས་འོས་མི་གཉིས་ཀྱི་ནང་ནས་འོས་བསྡུའི་གྲུབ་འབྲས་ཇི་ཐོན་ལ་ངོས་ལེན་དེ་སྐུ་ཞབས་ཁྲམ་ལས་ལྕམ་ཀ་མ་ལ།་ཧེ་རེསེ་ཡིས་གནང་རྒྱུའི་བཟོ་ལྟ་གསལ་བ་ཡོད་ལུགས་བརྗོད་ཀྱི་ཡོད་ཅིང། ཡང་ད་རེས་སྲིད་འཛིན་འོས་བསྡུ་དང་འབྲེལ་བའི་ཐོག་མང་ཚོགས་ཀྱི་བསམ་ཚུལ་བསྡུ་རུབ་བྱས་པའི་ནང་ སྲིད་དོན་ཚོགས་པ་གཉིས་ཀྱི་འོས་འཕེན་མི་མང་ཁྲོད་ ད་ལོའི་སྲིད་འཛིན་འོས་བསྡུའི་ནང་འོས་མི་སུ་ལ་རྒྱལ་ཁ་ཐོབ་པ་ཡིན་ན་ ཨ་རིའི་མང་གཙོའི་ལམ་ལུགས་ལ་ཉམས་ཉེས་གཏོང་སྲིད་པའི་ཐོག་བློ་འཚབ་བྱེད་ཀྱི་ཡོད་པ་གསལ་འདུག། ཡང་དེའི་ཐད་འོས་མི་གཉིས་ཀྱི་ནང་ནས་སྐུ་ཞབས་ཁྲམ་ལ་འོས་བསྡུའི་རྒྱལ་ཁ་ཐོབ་པ་ཡིན་ཚེ་ མང་གཙོར་ཉམས་ཉེས་གཏོང་གི་རེད་ཟེར་མཁན་འོས་འཕེན་བའི་གྲངས་འབོར་ཕྱེད་ཀ་ཡིན་པ་དང་ དེ་བཞིན་འོས་འཕེན་བ་བཅུའི་ནང་ནས་བཞིས་བྱས་ན་ ལྕམ་ཧེ་རེསེ་ལ་རྒྱལ་ཁ་ཐོབ་པ་ཡིན་ཚེ་ མང་གཙོར་གནོད་སྐྱོན་གཏོང་གི་རེད་ཅེས་གསལ་སྟོན་བྱས་འདུག

བྱས་ཙང་གནད་དོན་དེའི་ཐད་མང་ཚོགས་ཁྲོད་སྲིད་དོན་ཚོགས་པ་སོ་སོའི་ལངས་ཕྱོགས་གཞིར་བཟུང་གིས་བསམ་ཚུལ་བརྗོད་ནས་སོ་སོའི་འོས་མི་དེས་མང་གཙོ་གོང་འཕེལ་དང་སྲ་བརྟན་བཟོ་རྒྱུ་ཡིན་པ་དང་ ཁ་གཏད་འོས་མི་དེ་ཡིས་མང་གཙོར་གཏོར་གཤིག་གཏོང་གི་རེད་ཅེས་བརྗོད་ཀྱི་ཡོད་པ་རེད། དེ་དང་ཕྱོགས་མཚུངས་ཕྱི་ལོ་༢༠༢༡ལོའི་ཕྱི་ཟླ་དང་པོའི་ཚེས་དྲུག་ཉིན་གྲོས་ཚོགས་ཐོག་དྲག་ཟིང་གི་དོན་རྐྱེན་བྱུང་བ་དེའི་ཐོག་ལའང་སྲིད་དོན་ཚོགས་པ་སོ་སོའི་མང་ཚོགས་ཁྲོད་ལྟ་སྟངས་མི་འདྲ་བ་ཡོད་པར་ མང་གཙོ་ཚོགས་པ་དང་བློ་ཟུར་བོར་གནས་མཁན་མི་མང་དང་ དེ་བཞིན་སྤྱི་མཐུན་ཚོགས་པའི་མི་མང་ཁག་ཅིག་གིས་དེའི་ཐོག་སྐུ་ཞབས་ཁྲམ་ལ་ཉེས་འཛུགས་དང་སྐྱོན་བརྗོད་བྱེད་ཀྱི་ཡོད་ནའང་ སྤྱི་མཐུན་ཚོགས་པའི་ཁྲོད་དུ་ཁོང་ལ་དེའི་ཐད་སྐྱོན་བརྗོད་དེ་ཙམ་བྱེད་མཁན་མེད་པ་རེད། དེ་དང་ཕྱོགས་མཚུངས་སྤྱི་མཐུན་ཚོགས་པའི་ཚོགས་ཁོངས་མི་མང་མང་པོ་ཞིག་གིས་ལྕམ་ཀ་མ་ལ།་ཧེ་རེསེ་ལ་ཕྱི་མི་གཞིས་བསྡོད་པ་ཇེ་མང་དུ་སོང་བའི་གནད་དོན་དང་ དཔལ་འབྱོར་སླར་གསོ་དེ་ཙམ་བྱུང་མི་ལུགས་ཀྱི་བསམ་ཚུལ་བཅང་སྟེ་ཁོང་ལ་སྐྱོན་བརྗོད་བྱེད་བཞིན་ཡོད་པ་རེད།

དེའི་ཐོག་ལ་ཨ་རིའི་སྲིད་འཛིན་འོས་བསྡུའི་ལམ་ལུགས་འདི་བཞིན་ མི་མང་རེ་རེའི་འོས་ཤོག་གྲངས་བཤེར་གྱི་ཐོག་ནས་མིན་པར་ མངའ་སྡེ་ཁག་ལ་མི་འབོར་ལ་གཞིགས་པའི་འོས་བསྡུའི་འཐུས་མིའི་གྲངས་ཀ་ལ་གཞིགས་ཏེ་ངོས་བཞེས་བྱེད་ཀྱི་ཡོད་པ་འདི་ཡིས་ དེང་སྐབས་འོས་བསྡུ་བྱ་ལ་ཉེ་བའི་དུས་འདིར་ གཞུང་འཛིན་མང་གཙོ་ཚོགས་པའི་སྲིད་འཛིན་འོས་མི་ཀ་མ་ལ། ཧེ་རེསེ་དང་ཕྱོགས་འགལ་སྤྱི་མཐུན་ཚོགས་པའི་སྲིད་འཛིན་འོས་མི་ཌོ་ནལ་ཁྲམ་རྣམ་གཉིས་ནས་འོས་བསྡུའི་གྲུབ་འབྲས་ལ་ཁྱད་པར་ཆེན་པོ་བཟོ་གཞིའི་མངའ་སྡེ་བདུན་པོ་དེའི་ནང་དྲིལ་བསྒྲགས་ཚ་ཚ་འུར་འུར་ངང་སྤེལ་ཏེ་མི་མང་གི་བློ་འགུག་ཐབས་གནང་བཞིན་ཡོད་པ་རེད། མངའ་སྡེ་དེ་དག་གི་མི་འབོར་ནི་ཨ་རིའི་མི་འབོར་གྱི་བརྒྱ་ཆ་༡༨ལས་མིན་ནའང་ འོས་བསྡུའི་ནང་ཐོབ་ཤོར་ལ་གནད་འགག་ཆེན་པོ་ཆགས་ཡོད་པ་རེད། གནས་ཚུལ་འདི་ཕྱོགས་བསྒྲིགས་དང་སྙན་སྒྲོན་ཞུ་མཁན་པདྨ་བདེ་ཆེན་ཡིན།