༄༅། །རེས་གཟའ་ཟླ་བའི་ཉིན། ཨ་རི་དང་དབྱིན་ཇིའི་གཞུང་གཉིས་ཀས། དབྱིན་ཇིའི་འོས་བསྡུའི་ལྷན་ཁང་དང་། དེ་བཞིན་ཨ་རི་དང་དབྱིན་ཇིའི་གྲོས་ཚོགས་འཐུས་མི་ཚོར་ཆེད་དམིགས་ཀྱིས་སིམ་འཛུལ་བྱས་ཡོད་པར་རྒྱུ་མཚན་དུ་བྱས་ནས། རྒྱ་ནག་གཞུང་དང་ངན་འབྲེལ་ཡོད་པའི་དྲ་རྒྱའི་སིམ་འཛུལ་བྱེད་མཁན་མི་སྒེར་པ་གཉིས་དང་བཟོ་ཚོང་ཁང་གཅིག་བཅས་ལ་ཉེས་ཆད་གཅད་རྒྱུའི་གསལ་བསྒྲགས་བྱས་འདུག་ཅིང་། ད་ལན་ཨ་རིའི་གཞུང་གིས་ཉེས་ཆད་གཅད་ཡུལ་ནི། རྒྱ་ནག་གཞུང་གི་རྒྱབ་སྐྱོར་ཡོད་པའི་དྲ་རྒྱའི་སིམ་འཛུལ་བྱེད་མཁན་གྱི་བཟོ་ཚོང་ཁང་དང་མི་སྒེར་པ་གཉིས་ཡིན་པ་དང་། དེ་ཚོས་ཨ་རིའི་གཞི་རྩའི་རྨང་གཞིའི་འཛུགས་སྐྲུན་ལ་དྲ་རྒྱའི་སིམ་འཛུལ་དང་གཏོར་རྒོལ་གྱི་བྱ་འགུལ་མང་པོ་སྤེལ་ཡོད་པ་བརྗོད་འདུག།
ཨ་རིའི་ནོར་སྲིད་སྡེ་ཚན་གྱིས་སྤེལ་བའི་གསལ་བསྒྲགས་ཤིག་ལས། མིང་ལ་ཝུའུ་ཧན་ཤའོ་རའེ་ཀྲིས་ཚན་རྩལ་བཟོ་ཚོང་ཁང་ཞེས་པ་དེ་ནི། དོན་དམ་ལ་རྒྱ་ནག་གི་བདེ་འཇགས་ལས་ཁུངས་ཀྱི་ཁོངས་གཏོགས་ཤིག་ཡིན་པ་དང་། དེ་བཞིན་ད་ལན་ཉེས་ཆད་གཅད་ཡུལ་མི་སྒེར་པ་གཉིས་ནི། ནཱིས་ཀའོ་པིང་དང་ཀྲའོ་ཀོང་ཙུང་ཞེས་པ་གཉིས་རེད་འདུག། ད་ཐེངས་ཉེས་ཆད་བཅད་པ་དེ་ནི་ཨ་རིའི་ཁྲིམས་འཛིན་སྡེ་ཚན་དང་དབུས་ཞིབ་དཔྱོད་ལྷན་ཁང་། ཨ་རིའི་ཕྱི་སྲིད་ལྷན་ཁང་། དབྱིན་ཇིའི་གཞུང་བཅས་ནས་ཐུན་མོང་གིས་ཐག་གཅོད་བྱས་པ་ཞིག་རེད་འདུག།
ཨ་རིའི་ཁྲིམས་འཛིན་སྡེ་ཚན་གྱིས་སྤེལ་བའི་གསལ་བསྒྲགས་ལས་གསལ་དོན་ལྟར་ན། གོང་ཞུས་ནཱིས་ཀའོ་པིང་དང་ཀྲའོ་ཀོང་ཙུང་གཉིས་ཚུད་པའི་རྒྱ་ནག་གཞུང་དང་ངན་འབྲེལ་ཡོད་པའི་དྲ་རྒྱའི་སིམ་འཛུལ་བྱེད་པོ་མི་བདུན་གསལ་སྟོན་བྱས་ཡོད་པ་དང་། མི་དེ་དག་གིས་ཨ་རིའི་ཁེ་ལས་དང་གཞུང་གི་དཔོན་རིགས། རྒྱ་ནག་གཞུང་དང་ལྟ་སྤྱོད་མི་མཐུན་པའི་མི་སྣ་ཚོའི་གློག་ཀླད་ནང་སིམ་འཛུལ་བྱས་ནས་མགོ་སྐོར་བསླུ་བྲིད་བཏང་བའི་བྱ་འགུལ་སྤེལ་ཡོད་པའི་ཉེས་འཛུགས་བྱས་འདུག་པར་མ་ཟད། དྲ་རྒྱ་བརྒྱུད་ནས་གསང་མྱུལ་བྱ་འགུལ་སྤེལ་བ་དེ་ནི་བཟོད་བསྲན་བྱེད་ཐབས་བྲལ་བའི་བྱ་སྤྱོད་ཅིག་ཡིན་སྟབས། ཨ་རིའི་རྒྱལ་ཁབ་བདེ་འཇགས་དང་ཡར་རྒྱས་གོང་འཕེལ་ལ་ཉེན་ཁ་བཟོ་མཁན་རྣམས་དང་། ཨ་རིའི་མི་སེར་དང་ཁེ་ལས། གཞི་རྩའི་རྨང་གཞི་འཛུགས་སྐྲུན་སོགས་ལ་དོ་ཕོག་གཏོང་མཁན་ཚོར་འགན་ལེན་ཁུར་འཇུག་གི་ཡིན་ཞེས་བརྗོད་འདུག།
ཡང་ཉིན་དེར། དབྱིན་ཇིའི་གཞུང་གིས་ཀྱང་རྒྱ་ནག་གི་དྲ་རྒྱའི་སིམ་འཛུལ་བྱེད་མཁན་ཐེར་འདོན་བྱས་ཏེ། ནཱིས་ཀའོ་པིང་དང་ཀྲའོ་ཀོང་ཙུང་གཉིས་དང་། མིང་ལ་ཝུའུ་ཧན་ཤའོ་རའེ་ཀྲིས་ཚན་རྩལ་བཟོ་ཚོང་ཁང་ལ་མ་དངུལ་བཀག་སྡོམ་དང་། དབྱིན་ཇིའི་ཁེ་ལས་ཁག་དང་མི་སྒེར་པ་ཚོས་གང་ཟག་དེ་གསུམ་པོ་དང་། དཔལ་འབྱོར་གྱི་འབྲེལ་ལམ་འཛུགས་མི་ཆོག་པའི་ཉེས་ཆད་བཅད་ཡོད་པར་མ་ཟད། དེ་དོན་ཡུལ་དེར་བཅའ་སྡོད་རྒྱ་ནག་གི་གཞུང་ཚབ་པ་བཀའ་འགུག་ཀྱང་གནང་འདུག།
འབྲེལ་ཡོད་དཔོན་རིགས་ཀྱིས་བརྗོད་དོན་ལྟར་ན། ད་ལན་རྒྱ་ནག་གི་དྲ་རྒྱའི་སིམ་འཛུལ་བྱེད་མཁན་ཚོས་དབྱིན་ཇིའི་འོས་བསྡུ་ལྷན་ཁང་གི་ལག་ལ་ཡོད་པའི་འོས་འཕེན་མཁན་མི་འབོར་བྱེ་བ་མང་པོའི་ཆ་འཕྲིན་བརྐུས་འཁྱེར་བྱས་ཡོད་པ་དང་། དེ་དག་གིས་དྲ་རྒྱའི་གསང་མྱུལ་གྱི་ལས་ཀ་གཉེར་ནས་དམིགས་འབེན་བྱེད་ས་གཙོ་བོ་ནི། ནམ་རྒྱུན་རྒྱ་ནག་གི་ཉེན་ཁ་ཐེར་འདོན་གནང་མཁན་གྱི་གྲོས་ཚོགས་འཐུས་མི་ཚོ་ཡིན་པ་ར་འཕྲོད་བྱུང་འདུག། དབྱིན་ཇིའི་ཕྱི་སྲིད་ལས་ཁུངས་ཀྱིས། དྲ་རྒྱའི་སིམ་འཛུལ་བྱེད་མཁན་དེ་དག་གིས་ཆ་འཕྲིན་བརྐུས་འཁྱེར་བྱས་ཡོད་པ་དེས་ད་ཕན་འོས་བསྡུའི་འཕེལ་རིམ་དང་། གང་ཟག་སྒེར་པའི་དམངས་གཙོའི་ཐོབ་ཐང་། འོས་བསྡུའི་ཐོ་འགོད་སོགས་འོས་བསྡུའི་ལས་དོན་ལ་ཤུགས་རྐྱེན་ངན་པ་ཐེབས་མེད་པ་བརྗོད་འདུག།
གླེང་སྟེགས།