རེས་གཟའ་ལྷག་པའི་ཉིན་ཡུ་ཀེ་རན་གྱི་རྒྱལ་ས་ཀིཝ་ནང་ཡོད་ཨ་རིའི་གཞུང་ཚབ་ལས་ཁང་སྒོ་བརྒྱབ་རྒྱུའི་གསལ་བསྒྲགས་བྱས་འདུག་པ་དང་། དེ་ནི་ཨུ་རུ་སུས་ཡུ་ཀེ་རན་གྱི་རྒྱལ་སར་མཁའ་ཐོག་ནས་གཞི་རྒྱ་ཆེ་བའི་གཏོར་རྒོལ་བྱ་རྒྱུའི་སྡིག་ར་བཏང་རྗེས་ཐག་གཅོད་བྱས་པ་ཞིག་རེད་འདུག
འགྱུར་བའི་འཕེལ་རིམ་དེ་ནི་ཨ་རིའི་སྲིད་འཛིན་ཇོ་ བྷའི་ཌན་གྱིས་ཡུ་ཀེ་རན་ལ་སྤྲད་པའི་ཨ་རིའི་མེ་ཤུགས་འཕུར་མདའ་ཨུ་རུ་སུའི་ས་ཐོག་བེད་སྤྱོད་བྱེད་ཆོག་པའི་ཐག་གཅོད་གནང་བ་དེར་ཨུ་རུ་སུས་ཁོང་ཁྲོ་ཆེན་པོ་བྱས་ནས་ཡ་ལན་སློག་རྒྱུའི་ཁས་ལེན་བྱས་རྗེས་ཉེན་ཁ་ནས་གཡོལ་ཐབས་སུ་ཐག་གཅོད་བྱས་པ་ཞིག་ཡིན་པ་རེད།
རེས་གཟའ་མིག་དམར་ཉིན་ཨུ་རུ་སུས་ཡུ་ཀེ་རན་ལ་བཙན་འཛུལ་དཔུང་འཇུག་བྱས་ནས་ཉིན་གྲངས་ཆིག་སྟོང་ཟིན་པ་དང་། ཨུ་རུ་སུའི་དམག་མིའི་མཉམ་དུ་བྱང་ཀོ་རི་ཡའི་དམག་མི་དམག་སར་འབྱོར་ཡོད་པ་དེས་དམག་འཐབ་དེར་རྒྱལ་སྤྱིའི་དོ་སྣང་གསར་པ་ཞིག་བྱས་ཡོད་པ་དང་། གནས་སྟངས་དེ་ལ་བརྟེན་ནས་ཨ་རིའི་སྲིད་འཛིན་བྷའི་ཌན་གྱི་སྲིད་ཇུས་ལ་འགྱུར་བ་བྱུང་བ་རེད་ཅེས་ཨ་རིའི་གཞུང་འབྲེལ་མི་སྣ་ཚོས་འགྲེལ་བརྗོད་བྱེད་ཀྱི་ཡོད་པ་རེད།
སྲིད་འཛིན་བྷའི་ཌན་གྱིས་ཡུ་ཀེ་རན་གྱི་དམག་འཐབ་དང་འབྲེལ་བའི་སྲིད་ཇུས་ལ་འགྱུར་བ་བཏང་མ་ཐག་ ཨུ་རུ་སུའི་སྲིད་འཛིན་པུ་ཌིན་གྱིས་རྡུལ་ཕྲན་གོ་མཚོན་བེད་སྤྱོད་མགོ་འཛུགས་ཀྱི་མཚམས་ནས་ཐོན་ཏེ་རེས་གཟའ་མིག་དམར་ཉིན་གལ་སྲིད་རྡུལ་ཕྲན་ནུས་པ་ལྡན་པའི་རྒྱལ་ཁབ་གཙོས་རྒྱལ་ཁབ་གཞན་གང་རུང་གིས་རྒྱབ་སྐྱོར་འོག་ཨུ་རུ་སུར་གཏོར་རྒོལ་བྱུང་ན་རྡུལ་ཕྲན་གོ་མཚོན་བེད་སྤྱོད་བྱེད་དགོས་པའི་ལྟ་གྲུབ་གསར་པ་ཞིག་གསལ་བསྒྲགས་བྱས་འདུག་ཅིང་། དེ་ཡང་སྤྱིར་བཏང་གོ་མཚོན་གྱི་གཏོར་རྒོལ་བྱས་པ་ཡང་ཚུད་ཡོད་པ་མ་ཟདད།
ཨ་རིའི་རྒྱབ་གཉེར་བྱས་ནས་ཡུ་ཀེ་རན་གྱི་གཏོར་རྒོལ་ཡང་ཚུད་ཡོད་སྲིད་པ་རེད།
ནུབ་ཕྱོགས་རྒྱལ་ཁབ་ཀྱི་དབུ་ཁྲིད་ཚོས་ ཨུ་རུ་སུས་དེ་ལྟར་ཐག་གཅོད་བྱས་པ་དེ་ནུབ་ཕྱོགས་མཐུན་ཕྱོགས་རྒྱལ་ཁབ་ཚོས་ཡུ་ཀེ་རན་ལ་རོགས་རམ་འཕར་མ་བྱ་རྒྱུའི་བསམ་བློར་འགྱུར་གཏོང་ཐབས་བྱས་པ་རེད་ཅེས་གསུངས་ནས་ཨུ་རུ་སུའི་སྡིག་ར་ལ་བདག་སྤྱོད་བྱེད་ཀྱི་ནའང་། ཡུ་ཀེ་རན་གྱིས་ཨ་རིའི་མེ་ཤུགས་འཕུར་མདེལ་ཨུ་རུ་སུའི་ས་ཐོག་བེད་སྤྱོད་དང་པོ་བྱས་རྗེས་འཁོན་འཛིན་གྱི་གནས་སྟངས་རྒྱ་བསྐྱེད་སོང་ནས་འཛམ་གླིང་གི་མ་རྐང་ཁྲོམ་རར་ཤུགས་རྐྱེན་བྱས་ཡོད་པ་རེད།
ཡུ་ཀེ་རན་ནང་ཡོད་ཨ་རིའི་གཞུང་ཚབ་ཁང་གིས་བརྗོད་དོན་ལ་ གཞུང་ཚབ་ལས་ཁུངས་སྒོ་བརྒྱབ་རྒྱུ་དང་ཉེན་བརྡ་གཏོང་དགོས་རྐྱེན་ནི་ཨུ་རུ་སུས་ཀིཝ་ནང་མུ་མཐུད་མེ་ཤུགས་འཕུར་མདེལ་དང་མི་མེད་འཕྲུལ་འཁོར་བརྒྱུད་གཏོར་རྒོལ་བྱེད་ཀྱི་ཡོད་པ་དེ་ཡིན་ཅིང་། གཞུང་ཚབ་ཀྱི་ལས་དོན་གང་མགྱོགས་རྒྱུན་ལྡན་བཞིན་བྱེད་ཀྱི་རེད་ཅེས་འགྲེལ་བརྗོད་བྱས་འདུག
ནུབ་ཕྱོགས་རྒྱལ་ཁབ་དང་ཡུ་ཀེ་རན་གྱི་གཞུང་འབྲེལ་མི་སྣ་ཚོས་བརྗོད་ན། ཡུ་ཀེ་རན་གྱི་གློག་ཁང་སོགས་ནུས་ཤུགས་ཀྱི་མཛོད་ཁང་རྣམས་ལ་གཏོར་སྐྱོན་གཏོང་རྒྱུར་ཨུ་རུ་སུས་ཤིན་ཏུ་ནུས་ཤུགས་ཆེ་བའི་འཕེན་རྒྱང་རིང་བའི་གོ་ལག་ཕུང་གསོག་བྱེད་ཀྱི་འདུག་ཅེས་བརྗོད་ཀྱི་ཡོད་པ་རེད།
ཝ་ཤིན་ཌོན་དུ་ཡོད་པའི་དམག་དོན་ཉམས་ཞིབ་ཁང་གི་དམག་དོན་དབྱེ་ཞིབ་པ་ཚོས་བརྗོད་ན་ ཨ་རི་གཞུང་གིས་ཡུ་ཀེ་རན་ལ་སྤྲད་པའི་ཨ་རིས་བཟོས་པའི་མེ་ཤུགས་འཕུར་མདེལ་ཨ་རུ་སུའི་ས་ཐོག་འཕེན་ཆོག་པའི་ཐག་གཅོད་གནང་བ་དེས་ཡུ་ཀེ་རན་གྱི་དམག་འཐབ་ལ་འགྱུར་བ་འགྲོ་རྒྱུ་མིན་ནའང་། ཨུ་རུ་སུའི་དམག་དོན་ནུས་པ་སྐྱོ་རུ་འགྲོ་ཉེན་ཡོད་རེད་ཅེས་འགྲེལ་བརྗོད་བྱས་འདུག
དམག་དོན་དབྱེ་ཞིབ་པ་དེ་ཚོས་བརྗོད་དོན་ལ ཨུ་རུ་སུའི་དམག་མིའི་བརྟེན་གཞི་ཁག་ལ་ཡུ་ཀེན་རན་གྱིས་འཕེན་རྒྱང་རིང་བའི་མེ་ཤུགས་འཕུར་མདེལ་གྱི་གཏོར་རྒོལ་བྱ་རྒྱུ་ནི་ཨུ་རུ་སུའི་དམག་མིའི་ནུས་པ་ཉམས་དམས་གཏོང་རྒྱུར་མེད་དུ་མི་རུང་བ་གཅིག་རེད་ཅེས་འགྲེལ་བརྗོད་བྱས་འདུག
དེའི་བར་ན་ལྷོ་ཀོ་རི་ཡས་བརྗོད་དོན་ལ་གཞིགས་ན། ཉེ་འཆར་བྱང་ཀོ་རི་ཡས་ཨུ་རུ་སུ་ལ་ལྕགས་འཁྲབ་འཁོར་ལོ་འཕར་མ་སྤྲད་འདུག་པ་དང་། བྱང་ཀོ་རི་ཡའི་དམག་མི་རྣམས་ཨུ་སུ་རུའི་ས་དམག་དང་མཁའ་དམག་དཔུང་སྡེའི་མཉམ་དུ་འགྲེམས་འཇོག་བྱས་པ་མ་ཟད། མང་པོ་གཅིག་དམག་སར་ཨུ་རུ་སུའི་དམག་མིའི་མཉམ་དུ་དམག་འཐབ་ནང་ཞུགས་ཡོད་པ་རེད།།
གླེང་སྟེགས།