ཨ་རིའི་ཕྱི་སྲིད་ལས་ཁུངས་ཀྱི་དྲུང་གཞོན་དང་བོད་དོན་དམིགས་བསལ་འབྲེལ་མཐུད་པ་ཨ་ཛི་རཱ ཛེ་ཡ་ནི་གཟའ་ལྷག་པའི་ཉིན་ཏེ། ཕྱི་ཟླ་བརྒྱད་པའི་ཚེས་༢༡ ཉིན་ནེའི་ཡོག་གྲོང་ཁྱེར་དུ་ཕེབས་ནས་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཏཱ་ལའི་བླ་མ་མཆོག་ལ་མཇལ་བཅར་ཞུས་འདུག
ཨ་རིའི་ཕྱི་སྲིད་ལས་ཁུངས་ཀྱིས་སྤེལ་བའི་གསལ་བསྒྲགས་ལྟར་ན་ལྕམ་ཛེ་ཡ་དང་ལྷན་དུ་སྲིད་འཛིན་གྱི་དམིགས་བསལ་ཕྱག་རོགས་དང་། དམངས་གཙོ་དང་འགྲོ་བ་མིའི་ཐོབ་ཐང་ཚན་པའི་རྒྱལ་ཁབ་བདེ་འཇགས་ལྷན་ཚོགས་ཀྱི་འགན་འཛིན་གཅིག་ལྕོགས་ཀེ་ལི ར་ཛུ་ཁི་ཡང་༧གོང་ས་མཆོག་ལ་མཇལ་བཅར་དུ་ཕེབས་འདུག
མཇལ་མོལ་གྱི་རིང་ལ་དམིགས་བསལ་བོད་དོན་འབྲེལ་མཐུད་པས་སྲིད་འཛིན་བྷ་ཌན་གྱི་ཚབ་ཞུས་ནས་༧གོང་ས་མཆོག་གི་སྐུའི་འཕྲོད་བཞེས་དྲག་སྐྱེད་ཡོང་རྒྱུའི་སྨོན་འདུན་དང་། ཨ་རིའི་གཞུང་གིས་མུ་མཐུད་དུ་བོད་ཀྱི་འགྲོ་བ་མིའི་ཐོབ་ཐང་གི་གནས་སྟངས་གོང་སྤེལ་དང་། བོད་ཀྱི་ཐུན་མོང་མ་ཡིན་པའི་ལོ་རྒྱུས་དང་། སྐད་ཡིག རིག་གཞུང་། ཆོས་ལུགས་སྲུང་སྐྱོབ་བྱེད་པར་རྒྱབ་སྐྱོར་བྱ་རྒྱུའི་དམ་བཅའ་བཅངས་ཡོད་པ་ནན་བརྗོད་ཞུས་ཤིང་། དེ་བཞིན་ལྕམ་ཛེ་ཡ་ལགས་ཀྱིས་༧གོང་ས་མཆོག་ལ་སྐུ་ཚེ་ཧྲིལ་བོའི་རིང་འཚེ་མེད་ཞི་བ་དང་བྱམས་སྙིང་རྗེ་ཁྱབ་སྤེལ་བཏང་བར་རྗེས་སུ་ཡི་རངས་ཞུས། དྲུང་གཞོན་ཁོང་གིས་ད་རུང་༧གོང་ས་མཆོག་དང་ལྷན་དུ་བོད་ཀྱི་རིག་གཞུང་སྲུང་སྐྱོབ་བྱེད་སྟངས་དང་། ཨ་རིའི་གཞུང་གིས་བོད་ནང་གི་འགྲོ་བ་མིའི་ཐོབ་ཐང་ཡར་རྒྱས་གཏོང་བར་འབད་བརྩོན་བྱེད་བཞིན་པའི་ལས་དོན་ཁག རྒྱ་ནག་མི་དམངས་སྤྱི་མཐུན་རྒྱལ་ཁབ་དང་༧གོང་ས་མཆོག་གམ། ༧གོང་ས་མཆོག་གི་སྐུ་ཚབ་དང་ལྷན་དུ་དོན་འབྲས་ལྡན་པའི་གྲོས་མོལ་བསྐྱར་མཐུད་ཡོང་བར་རྒྱབ་སྐྱོར་བྱེད་ཕྱོགས་བཅས་ཀྱི་ཐད་བཀའ་མོལ་གནང་བ་རེད།།
གླེང་སྟེགས།