རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གིས་ཕྱི་ཟླ་༨པའི་ཚེས་༢༨ཉིན་ཤིང་ཅང་ནང་གི་འགྲོ་བ་མིའི་ཐོབ་ཐང་སྐོར་གྱི་སྙན་ཐོ་བཏོན་ནས་ལོ་གཉིས་ཙམ་སོང་བའི་དྲན་གསོའི་སྔ་ནུབ་ཏུ་རྒྱ་ནག་གཞུང་ནས་ཤིང་ཅང་ནང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གྱི་སྲིད་ཇུས་ཁག་མུ་མཐུད་ལག་ལེན་བསྟར་བྱེད་ཀྱི་འདུག་ཅེས་སྐྱོན་བརྗོད་འཁོད་པའི་གསལ་བསྒྲགས་ཤིག་སྤེལ་འདུག
ལོ་གཉིས་གོང་གི་སྙན་ཐོ་དེའི་ནང་རྒྱ་ནག་གཞུང་གིས་ཤིང་ཅང་ནང་ཡུ་གུར་བ་གཙོས་པའི་ཁ་ཆེའི་མི་རིགས་ས་ཡ་གཅིག་ཙམ་བཀག་ཉར་གྱིས་འགྲོ་བ་མིའི་ཀུན་སྤྱོད་ལས་འགལ་བའི་སྡུག་སྦྱོང་གཏོང་བཞིན་པའི་གནས་ཚུལ་ཐེར་འདོན་བྱས་འདུག་ཀྱང་། དྲག་གནོན་ཅན་གྱི་སྲིད་ཇུས་ཁག་མུ་མཐུད་ལག་བསྟར་བྱེད་བཞིན་པ་རེད་ཅེས་གསུངས་འདུག
༢༠༢༢ལོའི་ཕྱི་ཟླ་༨པའི་ཚེས་༣༡ཉིན་མོ་ནི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ནས་ཤིང་ཅང་ནང་གི་འགྲོ་བ་མིའི་ཐོབ་ཐང་གནས་སྟངས་ཧ་ཅང་ཞན་པོ་ཡིན་པ་དང་། ཡུ་གུར་བ་དང་ཁ་ཆེའི་གྲངས་ཉུང་མི་རིགས་གཞན་ས་ཡ་གཅིག་ཙམ་ཞིག་ངལ་རྩོལ་འགྱུར་བཀོད་ཁང་ཁག་ནང་བཀག་ཉར་བྱས་ཡོད་པའི་སྐོར་བཀོད་པའི་སྙན་ཐོ་བཏོན་ནས་ལོ་གཉིས་སོང་བའི་སྐབས་དང་བསྟུན་ནས་གཟའ་མིག་དམར་ཉིན་མོ་བསྐྱར་ཞིབ་ཆེད་དུ་གྲོས་གླེང་ཞིག་གནང་འདུག་པ་དང་། བགྲོ་གླེང་ཐོག་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གིས་༢༠༢༣ལོའི་ཕྱི་ཟླ་༢པ་ནས་བཟུང་གྲོང་ཁྱེར་ཇི་ནེ་ཝའི་ནང་རྒྱ་ནག་གི་གཞུང་འཛིན་མི་སྣ་དང་བགྲོ་མོལ་རིམ་པ་ཞིག་གནང་བའི་བརྒྱུད་ད་ལོའི་ཕྱི་ཟླ་༥པའི་ཚེས་༢༦ནས་ཕྱི་ཟླ་༦པའི་ཚེས་༡བར་དུ་རྒྱལ་ཚོགས་ཀྱི་རྟོག་ཞིབ་ཚོགས་ཆུང་ཞིག་ཤིང་ཅང་དུ་ཕེབས་ཐུབ་ཡོད་པ་དང་། དེའི་སྐབས་རྒྱ་ནག་གི་གཞུང་འཛིན་མི་སྣ་ཚོ་དང་འགྲོ་བ་མིའི་ཐོབ་ཐང་གནས་སྟངས་སྐོར་ལ་གྲོས་མོལ་བྱས་སྐབས་ཤིང་ཅང་ནང་ཡུ་གུར་བ་ཚོར་འཇིགས་སྐུལ་རིང་ལུགས་པར་ཁ་གཏད་དང་རྒྱལ་ཁབ་ཀྱི་བདེ་འཇགས་ཆེད་དུ་ཟེར་བ་སོགས་དྲང་བདེན་མིན་པའི་ཁྲིམས་དང་སྲིད་ཇུས་ཁག་མུ་མཐུད་ལག་བསྟར་བྱེད་བཞིན་པ་ཤེས་རྟོགས་བྱུང་ཡོད་ཅེས་རྒྱལ་ཚོགས་ཀྱི་རྟོག་ཞིབ་ཚོགས་ཆུང་དེའི་མགྲིན་ཚབ་པ་རཱ་ཝེ་ན་ ཤཱམ་དཱ་སཱ་ནིས་འགྲེལ་བརྗོད་གནང་འདུག་པ་དང་། སྐབས་དེར་ཁོང་གིས་རྒྱ་ནག་གི་གཞུང་འཛིན་པ་ཚོར་རྒྱལ་ཁབ་ཀྱི་བདེ་འཇགས་ཆེད་དུ་དང་འཇིགས་སྐུལ་བ་དང་ཁ་འབྲལ་བར་ཁ་གཏད་ཟེར་བའི་སྲིད་ཇུས་དེ་ཚོས་ཤིང་ཅང་དང་བོད་ནང་གི་གྲངས་ཉུང་མི་རིགས་ཚོ་དང་དེ་བཞིན་ཧོང་ཀོང་གི་མི་མང་ཚོར་དྲག་གནོན་ཤུགས་ཆེ་བྱེད་ཀྱི་ཡོད་པ་གསལ་བཏོན་གནང་བ་ཡིན་ཞེས་གསུངས་འདུག
རེས་གཟའ་མིག་དམར་ཉིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཐད་ཀྱི་ཆེས་མཐོའི་ལྷན་ཚོགས་ནས་ཤིང་ཅང་ནང་གི་འགྲོ་བ་མིའི་ཐོབ་ཐང་གནས་སྟངས་སྐོར་གྱི་སྙན་ཐོ་འདོན་ནས་ལོ་གཉིས་འཁོར་བར་བསྐྱར་ཞིབ་ཀྱི་གྲོས་མོལ་དེའི་སྐབས་སུ་འདས་པའི་ལོ་གཉིས་ནང་ཤིང་ཅང་ནང་གི་འགྲོ་བ་མིའི་ཐོབ་ཐང་གནས་སྟངས་ལ་བཟང་ཕྱོགས་ཀྱི་འགྱུར་བ་གང་ཡང་ཕྱིན་མེད་པར་བརྟེན་ལྷན་ཁང་འདི་ནས་མུ་མཐུད་དེ་རྒྱ་ནག་གཞུང་ལ་རྒྱལ་ཁབ་བདེ་འཇགས་དང་འཇིགས་སྐུལ་རིང་ལུགས་པ་ཁ་གཏད་ཟེར་བའི་ཁྲིམས་དང་སྲིད་ཇུས་དེ་དག་གིས་གྲངས་ཉུང་མི་རིགས་ལ་མཐོང་ཆུང་དང་དབྱེ་འབྱེད། མནར་གཅོད་ཚུད་པའི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་པས་སྲིད་ཇུས་དེ་དག་འཕྲལ་དུ་འཚམས་འཇོག་དགོས་པ་བསྐྱར་བརྗོད་གནང་ཡོད་པ་རེད། རྒྱ་ནག་གཞུང་ནས་རྒྱལ་ཚོགས་ཀྱི་འགྲོ་བ་མིའ་ཐོབ་ཐང་ལྷན་ཚོགས་ནས་ལོ་གཉིས་གོང་དུ་བཏོན་པའི་ཤིང་ཅང་ནང་བཀག་ཉར་ཁང་ཁག་བཙུགས་ནས་ཡུ་ཁུར་བ་གཙོས་པའི་ཁ་ཆེའི་མི་རིགས་ཚོ་ས་ཡ་གཅིག་ཙམ་བཀག་ཉར་བྱེད་པ་དང་བཀག་ཉར་ཁང་ནང་བཙན་དབང་གིས་ངལ་རྩོལ་བཀོལ་བ་དང་། བེུད་ལ་བཙན་གཡེམ་དང་སྐྱེས་སྒོ་བཀག་པ་སོགས་གནས་ཚུལ་འཚབ་ཆེ་ཡོད་སྐོར་སྙན་ཐོར་བཀོད་པ་དེར་ངོས་ལེན་བྱེད་ཀྱི་མེད་པ་དང་ བཀག་ཉར་ཁང་དེ་དག་ནི་ཁ་འབྲལ་དང་འཇིགས་སྐུལ་རིང་ལུགས་པ་མེད་པ་བཟོ་རྒྱུའི་ཆེད་དུ་བསམ་བློའི་སློབ་གསོ་ཁང་ཞིག་ཡིན་ལུགས་སོགས་འགྲེལ་བརྗོད་བྱེད་ཀྱི་ཡོད་པ་རེད།
ཨེ་ཕེཕ པི་དང་ཨ་རི་རླུང་འཕྲིན་ཁང་གི་གསར་ཁང་ནས་བཏུས།
གསར་འགོད་པ། པ་སངས་དབྱངས་སྐྱིད།
ཞུ་དག་རྩོམ་སྒྲིག་པ། རྣམ་རྒྱལ་ཤཱསྟྱཱི།
གླེང་སྟེགས།