ཨ་རིའི་གཞུང་འཛིན་གསར་བ་དང་ཆབ་སྲིད་ཀྱི་འགྱུར་བ་འདིའི་ནང་ཨ་རིའི་གཞུང་གསར་བའི་ལས་འཆར་གྲོས་གཞིའི་ཁྲོད་དུ་བོད་དོན་གནས་བབ་ཛ་དྲག་ཡིན་པ་བརྡ་ལན་འཕྲོད་དགོས་པ་དང་། ཨ་རིའི་མི་རབས་གསར་བའི་ཆབ་སྲིད་པ་ཚོ་དང་བོད་དོན་འབྲེལ་མཐུད་བྱེད་དགོས་པ་དེ་དུས་ལ་བབ་པའི་ཕྱག་ལས་གལ་ཆེན་ཞིག་ཡིན་པ་རེད།
ཨ་རིའི་གཞུང་གསར་བ་ཞིག་ཡོང་སྐབས་བོད་དང་འབྲེལ་བའི་ཕྱག་ལས་གལ་ཆེ་ཤོས་དེ་གཞུང་དེའི་འོག་གི་(ཨ་རིའི་བོད་དོན་དམིགས་བསལ་འབྲེལ་མཐུད་པ་དུས་ཐོག་ལ་བསྐོ་འཇོག་བྱེད་དགོས་པ་དེ་ཆགས་ཡོད་ཅིང་། གཞུང་འཛིན་སྔ་མ་ཚོས་བཞག་པའི་བོད་དོན་ཁྲིམས་འཆར་རྣམས་དོན་འཁྱོངས་ལྡན་པ་ཡོང་རྒྱུ། གཞུང་གསར་བ་དེའི་ལས་ཀྱི་སྣེ་མོ་བ་ཚོར་བོད་དོན་ཛ་དྲག་ངང་ཡོད་པ་བཅས་ཀྱི་དགོས་མདུན་དང་བརྡ་ལན་དུས་ཐོག་ལ་འཕྲོད་ཐུབ་པ་བྱ་དགོས་པ་མ་ཟད། གཞུང་འཛིན་གསར་བའི་ལས་ཀ་དངོས་སུ་མགོ་འཛུགས་མ་བྱེད་པའི་སྔོན་ལ་བརྡ་ལན་འཕྲོད་ཐུབ་པ་བྱེད་དགོས་པ་དེ་གནད་འགག་ཆེ་ཤོས་ཡིན་པ་རེད།
ཨ་རིའི་ནང་དུ་རྒྱལ་ཡོངས་འོས་བསྡུ་མཇུག་སྒྲིལ་མཚམས་འདིར་ཨ་རིའི་སྲིད་འཛིན་དང་ཨ་རིའི་གྲོས་ཚོགས་གོང་མའི་འོས་བསྡུའི་མཇུག་འབྲས་བཅས་ལས་ཨ་རིའི་སྤྱི་མཐུན་སྲིད་དོན་ཚོགས་པར་རྒྱལ་ཁ་ཐོབ་ཅིང་། ད་ལྟ་གྲོས་ཚོགས་འོག་མའི་འཐུས་མི་གྲངས་མང་ཡང་སྤྱི་མཐུན་སྲིད་དོན་ཚོགས་པ་འགྱུར་སྲིད་པའི་གནས་བབ་འདི་ནི་མཐོང་དཀོན་པའི་གཞུང་འཛིན་གྱི་གནས་བབ་ཅིག་ཡིན། ཨ་རིའི་སྲིད་འཛིན་དང་ཁྲིམས་བཟོ་ལྷན་ཁང་གི་གྲོས་ཚོགས་གོང་འོག་གཉིས་བཅས་གཞུང་ཧྲིལ་བོར་སྤྱི་མཐུན་སྲིད་དོན་ཚོགས་པས་བཟུང་བ་ཡིན་ན། ད་ལོའི་འོས་བསྡུའི་ཁྲོད་དུ་ཕམ་ཁ་ཆེ་ཤོས་བྱུང་ས་དེ་དམངས་གཙོ་སྲིད་དོན་ཚོགས་པ་ཆགས་ཡོད་འདུག་ལ། དམངས་གཙོ་སྲིད་དོན་ཚོགས་པར་འདི་ལྟ་བུའི་ཕམ་ཁ་བྱུང་དོན་ཅི་ཡིན་ཐད་ལ་ད་ལྟ་ཨ་རིའི་ནང་བགྲོ་གླེང་ཤུགས་ཆེན་འགྲོ་བཞིན་པ་རེད། ཨ་རིའི་གཞུང་སྲིད་གསར་བ་དང་ཆབ་སྲིད་ཀྱི་འགྱུར་བ་འདིའི་ནང་དུ་བོད་དོན་འབྲེལ་མཐུད་བྱེད་ཐབས་གསར་བ་དང་གོ་སྐབས་ཅི་ཡོད་སོགས་ནི་ཨ་རིའི་བོད་པ་ཚོས་དོ་སྣང་བྱེད་ས་གཙོ་བོ་ཞིག་ཡིན།
ཨ་རིའི་རྒྱལ་ཡོངས་ངལ་རྩོལ་ཚོགས་པ་Label Union ཆེ་ཤོས་གྲས་SEIUཡི་མཱི་ནི་སོ་ཌ་དང་ཨ་ཡོ་ཝ་མངའ་སྡེའི་ཚོགས་པའི་ཚོགས་གཞོན་འཇིགས་མེད་ཨུ་རྒྱན་ལགས་ཀྱིས་བརྗོད་དོན་བྱེད་ན། ཨ་རིའི་གཞུང་འཛིན་གསར་བའི་ལས་ཡུན་མགོ་འཛུགས་མ་བྱེད་པའི་སྔོན་ལ་གཞུང་འཛིན་གྱི་ལས་འཆར་གྲོས་གཞི་འདོན་སྲོལ་ཡོད་པས། དུས་ཚོད་ཐུང་ཐུང་འདིའི་ནང་བོད་མི་ཚོས་གོ་སྐབས་དམ་འཛིན་གྱིས་ཨ་རིའི་སྲིད་འཛིན་གྱི་བློ་ཉེ་ཆབ་སྲིད་པ་དང་གྲོས་ཚོགས་འཐུས་མི་ཚོ་ལ་བོད་དོན་ཛ་དྲག་ཡིན་པ་བརྡ་ལན་འཕྲོད་ཐུབ་པ་བྱ་དགོས་པ་དང་། གཞུང་འཛིན་གསར་བར་རྟེན་འབྲེལ་ཞུ་རྒྱུའི་གོ་སྐབས་གལ་ཆེན་དེ་བཟུང་ནས་རྟེན་འབྲེལ་ཞུ་རྒྱུ་དང་ཆབས་ཅིག་ཏུ་བོད་དོན་གནས་ཚུལ་ཛ་དྲག་ངང་ཡོད་པ་ནན་ཞུ་བྱེད་དགོས་པ་ནི་ཁ་ཚ་དགོས་གཏུགས་ཡིན་པ་རེད།
འཇིགས་མེད་ཨུ་རྒྱན་ལགས་ཀྱིས་གཞུང་འཛིན་གསར་བར་འབྲེལ་བ་ཞུ་ཐབས་ངོ་སྤྲོད་གནས་སྐབས། འོས་བསྡུ་འདིའི་ཁྲོད་ནས་གྲོས་ཚོགས་གོང་མ་དང་འོག་མ་གཉིས་ཀར་འོས་མིའི་གདན་གྲངས་ཐོབ་མཁན་སྤྱི་མཐུན་སྲིད་དོན་ཚོགས་པ་དང་རྒྱུན་དུ་བོད་དོན་ལ་ཐུགས་སྣང་ཡོད་མཁན། ཧྥེ་ལོ་རི་ཌིའི་འཐུས་མི་མཱར་ཁོ་རའུ་བྷའོ་(Marco Rubio) དང་། ཨེན་ཌི་ཡཱ་ནཱའི་འཐུས་མི་ཌོ་ཊི་ཡོན་(Todd Young) ནེའུ་ཇར་སི་འཐུས་མི་ཁེ་རེ་སི་སཱི་མི་ཐི་(Chris Smith) ཌེག་སི་སུ་འཐུས་མི་མཱེ་ཁཱལ་མེག་ཁོལ་(Michael McCaul) ཡང་འཇིགས་མེད་ཨུ་རྒྱན་ལགས་བཞུགས་སའི་མཱི་ནི་སོ་ཌའི་གྲོས་ཚོགས་འཐུས་མི་ཐཱོམ་ཨེམ་མེར་(Tom Emmer) བཅས་ནི་འདེམས་ཐོན་སྲིད་འཛིན་ཌོ་ནལ་ཌམ་ལ་འབྲེལ་བ་ཡག་པོ་ཡོད་པས། ས་གནས་སོ་སོ་ནས་བོད་མི་ཚོ་གྲོས་ཚོགས་འཐུས་མི་འདི་ཚོའི་འཁྲིས་སུ་བཅར་ཏེ་བོད་ཀྱི་གནས་སྟངས་ཛ་དྲག་ངང་ཡོད་པ་བརྡ་ལན་འཕྲོད་ཐབས་བྱེད་དགོས་པ་དང་། འདི་དག་ལ་འབྲེལ་བ་ཞུ་ཐུབ་པ་ཡིན་ན་སྲིད་འཛིན་ཌམ་གྱི་གཞུང་འཛིན་ལས་འཆར་གྲོས་གཞིའི་ནང་བོད་དོན་སླེབས་པར་རེ་བ་ཞིག་ཀྱང་མཐོང་གི་ཡོད་འདུག
འཇིགས་མེད་ཨུ་རྒྱན་ལགས་ཀྱི་དགོངས་ཚུལ་ལྟར་ན། ཨ་རིའི་ས་གནས་སོ་སོའི་བོད་རིགས་ཚོགས་པ་དང་དེ་མིན་བོད་མི་སྒེར་རེ་རེ་ནས་ད་ལྟའི་གཞུང་འཛིན་གསར་བའི་ལས་ཡུན་དངོས་སུ་མགོ་འཛུགས་མ་བྱེད་པའི་གོང་ནས་ས་གནས་སོ་སོར་གྲོས་ཚོགས་འཐུས་མི་དང་ཆབ་སྲིད་མི་སྣར་འབྲེལ་བ་འཛུགས་དགོས་པ་དེ་གལ་ཆེན་པོ་ཆགས་ཡོད་པ་སྟེ། གཞུང་འཛིན་གསར་བའི་ལས་ཡུན་དངོས་སུ་མགོ་འཛུགས་དུས་འབྲེལ་བ་འཛིན་རྒྱུ་ཡིན་ཟེར་ན་འཕྱི་དྲག་པ་རེད་འདུག
ཡང་འཇིགས་མེད་ཨུ་རྒྱན་ལགས་ཀྱིས་ཨ་རིའི་ཆབ་སྲིད་ཁོར་ཡུག་ཏུ་ཕྱག་ལས་གནང་བའི་ཉམས་མྱོང་དང་མཐོང་ཐོས་ལས་ད་ལྟ་ཨ་རིའི་བོད་མི་ཚོས་སྒྲུབ་དགོས་པའི་གནད་དོན་གལ་ཆེ་ཤོས་ནི་ཨ་རིའི་ས་གནས་སོ་སོའི་བོད་རིགས་ཚོགས་པ་ཁག་གི་ཁྱབ་ཁོངས་སུ་རིག་གཞུང་སྡེ་ཚན་ལྟ་བུ་ཡོད་པ་ལྟར། ངེས་པར་དུ་གནས་ཡུལ་རྒྱལ་ཁབ་ཀྱི་ས་གནས་ཆབ་སྲིད་མི་སྣ་དང་གྲོས་ཚོགས་འཐུས་མི་ལ་འབྲེལ་མཐུད་བྱེད་མཁན་གྱི་བོད་དོན་འབྲེལ་མཐུད་དང་ཞུ་གཏུག་ཚོགས་ཆུང་རེ་འཛུགས་དགོས་པ་དེ་དུས་ལ་བབ་ཡོད་པ་རེད། འདིའི་ཐད་ལ་ཁོང་གིས། ཨ་རིའི་ཆབ་སྲིད་དུ་ཕྱག་ལས་གནང་སྐབས། ཉིན་རྟག་པར་མིན་རུང་། གཟའ་འཁོར་རེར་ཆབ་སྲིད་པ་ཚོར་འབྲེལ་བ་བྱེད་རྒྱུ་དང་ཡང་ན་ཁོ་ཚོའི་ཕྱག་ལས་གནང་བར་འབྲེལ་བ་ཞིག་འཇོག་དགོས། ཨ་རིའི་བོད་པ་ཚོས་རྟག་པར་གནང་མི་ཐུབ་རུང་། ཟླ་གཅིག་གི་ནང་ལ་ཆུ་ཚོད་ཁ་ཤས་རེ་གཏོང་ཐུབ་པ་བྱེད་དགོས། ཡིན་ན་ཡང་ཤེས་ཡོན་དང་དུས་ཚོད་ཡོད་མེད་སོགས་དཀའ་ངལ་མང་པོ་ཡོད་པས། བོད་རིགས་ཚོགས་པ་ཁག་གི་ཁྱབ་ཁོངས་སུ་བོད་དོན་འབྲེལ་མཐུད་དང་ཞུ་གཏུག་ཚོགས་ཆུང་ཞིག་ཡོད་པ་ཡིན་ན་ང་ཚོས་ཨ་རིའི་གཞི་རིམ་གྱི་ཆབ་སྲིད་ཀྱི་ཁོར་ཡུག་ནས་བོད་དོན་རྒྱབ་སྐྱོར་གྱི་རྩ་བ་ཡག་པོ་ཞིག་འཛུགས་ཐུབ རྩ་བའི་རྒྱལ་སྤྱིའི་བོད་དོན་ལས་འགུལ་ཁང་དང་བོད་ཀྱི་སྐུ་ཚབ་དོན་གཅོད་ཁང་སོགས་ཀྱིས་ལོ་གཅིག་རེར་ཐེངས་རེ་བོད་དོན་ཞུ་གཏུག་གོ་སྒྲིག་ཞུ་བཞིན་པ་དེ་ཧ་ཅང་གལ་ཆེན་པོ་ཡིན། ཡིན་ན་ཡང་འཛམ་གླིང་གི་འགྱུར་བ་དང་ཨ་རིའི་ཆབ་སྲིད་ཀྱི་ཁོར་ཡུག་གི་བོད་དོན་འདི་ལ་འདི་ཙམ་གྱིས་འགྲིག་གི་མེད་པ་གསལ་བོ་རེད། དེའི་རྐྱེན་གྱིས་ས་གནས་སུ་དེ་ལྟ་བུའི་ཚོགས་ཆུང་རེ་ཡོད་པ་ཡིན་ན་ཁོ་ཚོས་བོད་ནང་གི་གནས་སྟངས་གསར་བ་ཁག་ཨ་རིའི་ཆབ་སྲིད་མི་སྣ་ལ་དུས་ཐོག་ཏུ་ངོ་སྤྲོདདང་། ཡང་ཆབ་སྲིད་མི་སྣ་དེ་ཚོའི་ཚོགས་འདུར་བཅར་བ་དང་ཁོ་ཚོར་བགྲོ་གླེང་ཞུ་རྒྱུ། ས་གནས་བོད་རིགས་ཚོགས་པའི་མཛད་སྒོ་སོགས་སུ་གདན་འདྲེན་ཞུ་རྒྱུ་སོགས་ཀྱི་འབྲེལ་བ་འཇོག་ཐུབ། བོད་དོན་རྒྱབ་སྐྱོར་བའི་ཨ་རིའི་ཆབ་སྲིད་པ་རྙིང་བ་ཁ་ཤས་དགུང་ལོ་བགྲེས་པོ་དང་ཁ་ཤས་དགོངས་པ་ཞུས་ཚར་བ་དེ་འདྲ་ཡོད། ཆབ་སྲིད་པ་གསར་བ་ཚོ་དང་འབྲེལ་བ་འཇོག་དགོས་པ་གལ་ཆེན་པོ་ཆགས་ཡོད། གཞུང་གསར་བའི་ནང་གི་མི་སྣ་ལ་འབྲེལ་བ་འཇོག་དགོས་པ་གལ་ཆེན་ཆགས་ཡོད་ཅེས་གསུང་བྱུང་།
ཨ་རིའི་བོད་པ་ཚོའི་ཁྲོད་དུ་སྲིད་དོན་ཚོགས་པ་གང་རུང་ཞིག་གི་ལྟ་བར་རྒྱབ་རྟེན་གྱིས་སྲིད་དོན་ཚོགས་པ་དེའི་ ཚོགས་མི་ཡིན་པ་ལྟ་བུའི་གཏམ་སྤྱོད་སྤེལ་མཁན་སོགས་ཡོད་མོད། ཡིན་ན་ཡང་འཇིགས་མེད་ཨུ་རྒྱན་ལགས་ཀྱིས་ཁོང་རང་ཉིད་ཀྱི་ཕྱག་ལས་ཀྱི་དགོས་མཁོ་དང་བོད་མིའི་དགོས་མདུན་གཉིས་ཞིབ་བསྡུར་གྱིས་བཀའ་མོལ་གནང་སྐབས། ང་རང་ཉིད་དཔེ་བཞག་ན། ངའི་ལས་ཀའི་ཐོག་ནས་འབྲེལ་བ་ཡོང་ས་ཤུགས་ཆེ་བ་དེ་དམངས་གཙོ་ཚོགས་པ་རེད། ཡིན་ན་ཡང་བོད་དོན་ཐོག་ལ་སླེབས་སྐབས་སྤྱི་མཐུན་ཚོགས་པ་དང་དམངས་གཙོ་ཚོགས་པ་གཉིས་ཀར་ཁྱད་པར་ཁྱོན་ནས་མེད། བོད་དོན་ལ་རྒྱབ་སྐྱོར་གནང་མཁན་ཚོར་ང་ཚོས་རྒྱབ་སྐྱོར་བྱེད་པ་ཡིན་ན་དེ་ནི་མི་སྒེར་བ་ཞིག་ལ་རྒྱབ་སྐྱོར་ཞུ་བཞིན་པ་ལས། ཆབ་སྲིད་ཚོགས་པ་གང་རུང་ལ་རྒྱབ་སྐྱོར་བྱེད་ཀྱིན་མེད། ས་གནས་སོ་སོར་བོད་དོན་རྒྱབ་སྐྱོར་བའི་གྲོས་ཚོགས་འཐུས་མི་ཚོར་ཕར་བཅར་ཏེ་རོགས་པ་གནང་རོགས་ཞེས་ཞུ་བ་འཐེན་དགོས་པ་ལྟར། མཚམས་རེར་ཁོ་ཚོར་ང་ཚོའི་རོགས་པ་དགོས་པའི་དུས་སྐབས་ཀྱང་ཡོང་གི་རེད། ཕར་རེ་བ་ཞུ་རྒྱུ་ཙམ་མིན་པར་རྒྱབ་སྐྱོར་ཡང་ཞུ་དགོས། དཔལ་འབྱོར་བསྡུ་རུབ་སོགས་ཀྱི་ཆ་ཤས་ལེན་དགོས་པ་རེད། ཡང་དཔེར་ན་ཉེ་ཆར་གྲོས་ཚོགས་སུ་བོད་དོན་ཁྲིམས་འཆར་ལ་རྒྱབ་སྐྱོར་ཐོབ་པ་དེ་ལྟར། རྒྱབ་སྐྱོར་བྱེད་མཁན་གྲོས་ཚོགས་འཐུས་མི་ཚོར་ས་གནས་སོ་སོ་ནས་བོད་མི་ཚོ་ཕར་བཅར་ཏེ་རྒྱབ་སྐྱོར་གནང་བར་བཀའ་དྲིན་ཆེ་ཞེས་ཁ་བཏགས་ལྟ་བུ་གཡོགས། ཡང་ན་མཛད་སྒོ་ལྟ་བུར་སྐད་བཏང་བ་ཡིན་ན་ཁོ་ཚོས་ཀྱང་དགའ་བོ་བྱེད་ཀྱི་རེད། ངས་གང་བྱེད་པ་དེར་ཁོ་ཚོས་དོ་སྣང་བྱས་འདུག ཕན་ཐོགས་འདུག་བསམ་པ་བྱུང་གི་རེད། ཡང་གལ་ཏེ་ས་གནས་ཤིག་ཏུ་བོད་མི་མེད་པ་ཡིན་ན། ས་གནས་དེ་ཚོར་ནང་ཆོས་ལ་དོ་སྣང་བྱེད་མཁན་དང་ནང་བ་དེ་འདྲ་ཡོད་པ་རེད། ནང་བའི་ཆོས་ཚོགས་སོགས་ལ་འབྲེལ་བ་ཞུས་ཏེ་ས་གནས་ཀྱི་གྲོས་ཚོགས་འཐུས་མི་དེས་བོད་དང་བོད་མིར་རྒྱབ་སྐྱོར་འདི་འདྲ་གནང་འདུག འཐུས་མི་དེར་འབྲེལ་བ་ཞུས་ནས་ཐུགས་རྗེ་ལེགས་གསོལ་ཞུ་རོགས་ཞེས་མངགས་བཅོལ་ཞུས་ན་འགྲིག་གི་རེད། འདིའི་རིགས་དེ་ས་གནས་ཀྱི་མི་སྟེ་ཁོ་ཚོར་འོས་ཤོག་འཕེན་མཁན་གྱི་མི་ཡིན་དུས་དེ་ལ་ནམ་རྒྱུན་དོ་སྣང་ཆེན་པོ་བྱེད་སྲོལ་ཡོད་ཅེས་གསུང་བྱུང་ལ། ཡང་དཔེར་ན་སྔར་ལོ་ཨ་རིའི་གྲོས་ཚོགས་སུ་བྱུང་བའི་བོད་དོན་ཁྲིམས་འཆར་དེར་རྒྱབ་སྐྱོར་བྱེད་མེད་མཁན་གྲོས་ཚོགས་འཐུས་མི་ཁ་ཤས་ཡོད་པ་དེ་ཚོ་ཀྱང་བོད་དོན་ལ་རྒྱབ་སྐྱོར་མེད་པ་མ་ཡིན་པར། ཁོ་ཚོའི་ས་གནས་སུ་འོས་ཤོག་བླུགས་མཁན་བོད་མི་མེད་པ་སོགས་ཀྱིས་བོད་ཀྱི་གནས་ཚུལ་དེ་ཁོ་ཚོ་དང་ཁ་ཐུག་འབྲེལ་བ་མེད་པ་ལྟ་བུ་གྱུར་བ་ཡིན་པས། བོད་མི་ཚོས་གྲོས་ཚོགས་འཐུས་མི་དེ་ཚོར་ཐེངས་འདིར་རྒྱབ་སྐྱོར་གནང་རྒྱུ་བྱུང་མེད་ཀྱང་། རྗེས་ཕྱོགས་བོད་དོན་ལ་རྒྱབ་སྐྱོར་གནང་རོགས་ཞེས་འབྲེལ་བ་འཛུགས་དགོས་པ་དང་བརྡ་ལན་འཕྲོད་ཐུབ་པ་བྱེད་དགོས། འདི་ལྟ་བུའི་འབྲེལ་མཐུད་དང་ཞུ་གཏུག་གི་ལས་ཀ་བྱེད་མཁན་བོད་རིགས་ཚོགས་པའི་ཁྱབ་ཁོངས་སུ་བོད་དོན་འབྲེལ་མཐུད་དང་ཞུ་གཏུག་གི་ཚོགས་ཆུང་རེ་ཡོད་ཚེ་ཕན་ཐོགས་ཡོད་སྐོར་ཡང་གསུང་བྱུང་།
ཡང་འཇིགས་མེད་ཨུ་རྒྱན་ལགས་ཀྱིས་བརྗོད་ན་ཕྱག་ལས་ཀྱི་དགོས་མཁོ་ལྟར་ཨ་རིའི་ཆབ་སྲིད་མི་སྣ་དང་འབྲེལ་འདྲིས་ཀྱི་གོ་སྐབས་མང་པོ་ཡོད་ཅིང་། ཉམས་མྱོང་དེ་ལས་ད་ལྟ་ཨ་རིའི་ཆབ་སྲིད་ཀྱི་མཁའ་དབུགས་སུ་བོད་དོན་ལ་ཐུགས་སྣང་གང་འདྲ་འདུག་ཅེས་བཀའ་འདྲི་ཞུས་སྐབས། ཁོང་གིས། ཆབ་སྲིད་པ་ཚོས་ཐོག་མ་༧རྒྱལ་བ་རིན་པོ་ཆེ་གང་འདྲ་འདུག་ཅེས་བཀའ་འདྲི་གནང་གི་འདུག དེའི་རྗེས་སུ་གནས་ཚུལ་ཚར་བ་འདྲ་བོ་འདུག ང་ཡིན་ན་ངས་བོད་དུ་གནས་ཚུལ་འདི་འདྲ་འདུག ཛ་དྲག་འདི་འདྲ་འདུག་ཅེས་ཞུ་བཞིན་ཡོད། དེང་སེང་ཨ་རིའི་ནང་བོད་མི་ཚོས་ལོ་གཅིག་ལ་བོད་དོན་ཞུ་གཏུག་ཐེངས་གཅིག་སྤེལ་བཞིན་པ་རེད། གཞན་གསུམ་བཅུའི་དུས་དྲན་གྱི་སྐད་འབོད་གཅིག་གནང་བཞིན་པ་རེད། དེ་ལས་གཞན་མང་པོ་མེད་པའི་སྐབས་སུ་ཨ་རིའི་གསར་ལམ་ཁག་དང་ཨ་རིའི་ཆབ་སྲིད་པ་ཚོས་བོད་དུ་གནས་ཚུལ་ཛ་དྲག་ཡིན་པར་ངོས་འཛིན་མེད་ལ་དོ་སྣང་ཡང་མེད་པ་འདྲ་བོ་འདུག ང་ཚོས་ཡང་ནས་བསྐྱར་དུ་གོ་རྟོགས་སྤེལ་བ་ཡིན་ན་ཁོ་ཚོར་སློབ་སྦྱོང་ཞིག་རག་གི་རེད་མ་གཏོགས། ད་ལྟའི་དུས་སུ་འབྲེལ་བ་ཡག་པོ་ཡོད་ཙམ་མ་གཏོགས་བོད་དུ་གནས་ཚུལ་ཡོད་པ་སོགས་ལ་དེ་ཙམ་དོ་སྣང་་མི་འདུག་ཅེས་བཀའ་ལན་གནང་བྱུང་།
ཨ་རིའི་ཆབ་སྲིད་ཀྱི་ལོ་རྒྱུས་ཁྲོད་དུ་སྤྱི་མཐུན་སྲིད་དོན་ཚོགས་པ་དང་དམངས་གཙོ་སྲིད་དོན་ཚོགས་པ་གཉིས་ལ་ཆབ་སྲིད་ཀྱི་ལྟ་བ་མ་འདྲ་བ་ཡོད་ཅིང་། མཚམས་རེར་ཨ་རིའི་སྲིད་དོན་ཚོགས་པ་གཉིས་ཀའི་ལྟ་བ་མ་འདྲ་བའི་ཐོག་ནས་འགལ་ཟླ་སོགས་རྣོ་ངར་ལྡན་པ་བྱུང་བཞིན་ཡོད་མོད། ཡིན་ན་ཡང་བོད་དོན་རྒྱབ་སྐྱོར་དང་བོད་དོན་ཁྲིམས་ཡིག་འདོན་པ་ལ་སོགས་པའི་བོད་ཀྱི་གནད་དོན་ཐོག་ནས་ཨ་རིའི་སྲིད་དོན་ཚོགས་པ་གཉིས་ཀ་དབྱེར་མེད་ཀྱིས་ཐུན་མོང་གི་སྡིངས་ཆ་དང་ཐག་གཅོད་ཀྱིས་སྲིད་དོན་ཚོགས་པ་གཉིས་ཀ་རྡོག་རྩ་གཅིག་སྒྲིལ་ཡིན། མིག་དཔེ་འདི་ལ་བརྟེན་ནས་བོད་མི་ཚོ་ཡིན་ན་ཡང་ལྟ་བ་ལངས་ཕྱོགས་དང་ཚོལ་ཁ་ཆོས་ལུགས་སོགས་དབྱེ་བ་མེད་པར་མཉམ་རུབ་ཐོག་བོད་དོན་གནད་དོན་སེལ་ཐབས་དང་བོད་དོན་ཞུ་གཏུག་བྱེད་རྒྱུ་དེ་གལ་ཆེ་བ་སྟེ། རྒྱལ་ཁབ་གཞན་པ་དང་གྲོས་ཚོགས་འཐུས་མི་སོགས་ཀྱིས་བོད་དང་བོད་མི་ཞེས་དོ་སྣང་ཆེ་བ་ལས། ཁྱེད་བོད་མིའི་ནང་གི་ལྟ་བ་ལངས་ཕྱོགས་འདི་རེད་ཅེས་ཁ་ཁར་འབྱེད་པ་དང་། ཡང་ཆོལ་ཁ་ཆོས་ལུགས་འདི་རེད་ཅེས་དབྱེ་བ་ཕྱེས་ཀི་མེད་ཅེས་ཀྱང་འཇིགས་མེད་ཨུ་རྒྱན་ལགས་ཀྱིས་གསུང་བྱུང་ལ། ཡང་སྤྱིར་རྒྱལ་ཁབ་གཞན་པའི་སྲིད་གཞུང་དང་གྲོས་ཚོགས་འཐུས་མི་སོགས་ཀྱི་བོད་དོན་རྒྱབ་སྐྱོར་དེ་གལ་ཆེན་པོ་ཡིན་རུང་། བོད་ཀྱི་གནད་དོན་སེལ་མཁན་ལྡེའུ་མིག་ངོ་མ་དེ་བོད་པ་རང་ཉིད་ཡིན་པ་དང་བོད་ཀྱི་གནད་དོན་སེལ་བར་ལས་འགན་ཡང་བོད་མི་རང་ཉིད་ལ་ཡོད་པ་ནན་བརྗོད་གནང་སོང་།
གླེང་སྟེགས།