རེས་གཟའ་ཟླ་བའི་ཉིན་ཨ་རིའི་ཆི་གྷ་གོ་གྲོང་ཁྱེར་ནང་མང་གཙོ་ཚོགས་པའི་རྒྱལ་ཡོངས་ཚོགས་ཆེན་འཚོག་གི་ཡོད་པ་དང་། སྐབས་དེར་གྷ་ཛའི་ནང་དམག་འཁྲུག་འཕྲལ་དུ་མེ་འཕེན་མཚམས་འཇོག་དགོས་པའི་དགོས་འདུན་གཙོ་བོར་བསྒྲགས་ཏེ་ངོ་རྒོལ་ལས་འགུལ་བ་སྟོང་ཚོ་མང་པོ་ཞིག་གིས་གྲོང་ཁྱེར་དེའི་ནང་འཛོམས་རྒྱུ་ཡིན་པ་དང་། དེ་ཡང་མང་གཙོ་ཚོགས་པས་ཨིས་རལ་ལ་རྒྱབ་སྐྱོར་བྱེད་བའི་སྲིད་ཇུས་ལ་ངོ་རྒོལ་སྤེལ་རྒྱུ་ཡིན་པ་རེད། སྲིད་འཛིན་ཇཱོ་བྷའི་ཌན་གྱིས་སྲིད་འཛིན་འོས་མི་ནས་ཕྱིར་འཐེན་གནང་ནས་སྲིད་འཛིན་གཞོན་པ་ལྕམ་ཀ་མ་ལཱ་ ཧེ་རེ་སེ་ལ་མང་གཙོ་ཚོགས་པའི་སྲིད་འཛིན་འོས་མིར་རྒྱབ་གཉེར་གནང་ཡོད་ཅིང་། མང་གཙོ་ཚོགས་པའི་འོས་འཕེན་བའི་འཐུས་མི་ཚོས་ལྕམ་ཧེ་རེ་སེ་ལ་ཧ་ཅང་ཚད་མཐོའི་རྒྱབ་སྐྱོར་ཐོབ་ནས་ད་ལམ་ཚོགས་པའི་རྒྱལ་ཡོངས་འཐུས་མི་ཚོགས་ཆེན་ཐོག་ཁོང་གིས་ལྕམ་ཧེ་རེ་སིས་ཚོགས་པ་དེའི་སྲིད་འཛིན་འོས་མིར་དངོས་སུ་ངོས་བཞེས་གནང་རྒྱུ་ཡིན་པ་རེད།
འོན་ཀྱང་དེ་སྔ་སྲིད་འཛིན་བྷ་ཌན་ལ་སྔོན་འགྲོའི་འོས་བསྡུའི་སྐབས་སུ་ཁོང་གིས་གྷ་ཛའི་དམག་འཁྲུག་མཚམས་འཇོག་གནང་རྒྱུར་ཤུགས་གནོན་གནང་མ་ཐུབ་པ་མ་ཟད། ཨིས་རལ་ལ་གོ་མཚོན་གྱི་མཐུན་འགྱུར་སྦྱར་བ་སོགས་རྒྱབ་སྐྱོར་ཇེ་ཆེ་བྱས་དང་བྱེད་བཞིན་འདུག་ཅེས་ངོ་རྒོལ་མཚོན་བྱེད་སྐད་འབོད་བྱེད་དུ་འཛོམས་ཀྱི་ཡོད། དེ་དག་ནི་ད་ལོའི་སྲིད་འཛིན་གྱི་སྔོན་འགྲོའི་འོས་བསྡུའི་སྐབས་སུ་རང་གི་ཚོགས་པའི་འོས་མིར་འོས་ཤོག་འཕེན་རྒྱུར་ཐག་ཆོད་མ་བྱས་པར་བསྡོད་མཁན་ཡིན་ཞེས་གསལ་སྟོན་བྱེད་མཁན་མི་མང་དེ་དག་ཡིན་པ་དང་། ད་ཁོང་ཚོས་ཆི་ཁ་གྷོར་དེ་ལྟར་སྐད་འབོད་བྱས་ནས་ངོ་རྒོལ་བྱ་རྒྱུ་ཡིན་པ་རེད། ཁོང་ཚོས་བརྗོད་དོན་ལ། རྩ་བའི་ད་ཆ་སྐུ་ཞབས་བྷ་ཌན་མིན་པར་ལྕམ་ཀ་མ་ལཱ་ ཧེ་རེ་སེ་སྲིད་འཛིན་འོས་མི་ཡིན་ནའང་། ཁོང་ནི་བྷ་ཌན་ཆབ་སྲིད་འཛིན་སྐྱོང་ཁང་གི་མཛད་གཙོ་ཞིག་ཡིན་པར་བརྟེན་ཁོང་ལའང་ངོ་རྒོལ་དང་སྐྱོན་བརྗོད་གཅིག་མཚུངས་བྱེད་ཀྱི་ཡོད་ཅེས་གསལ་འདོན་བྱེད་ཀྱི་ཡོད་པ་རེད།
གཟའ་འཁོར་འདིའི་ནང་མང་གཙོ་ཚོགས་པའི་རྒྱལ་ཡོངས་འཐུས་མི་ཚོགས་ཆེན་གྱི་དུས་ཡུན་ཆ་ཚང་རིང་ཚོགས་ཁང་ཆེན་མོ་ཡུ་ནཡེ་ཊིཌ་ སེན་ཀྲར་ཅེས་པ་དེའི་ཉེ་འཁྲིས་སུ་སློབ་ཕྲུག་ཐེ་བའི་ངོ་རྒོལ་བ་ཁྱོན་བསྡོམ་ཁྲི་གཉིས་ཙམ་ཞིག་འཛོམས་རྒྱུ་ཡིན་སྐོར་ངོ་རྒོལ་སྐད་འབོད་ལས་འགུལ་གྱི་གོ་སྒྲིག་བ་ཚོས་ཚོད་དཔག་བྱེད་ཀྱི་ཡོད་པ་རེད། ཡང་ངོ་རྒོལ་ལས་འགུལ་བའི་ཁྲོད་དུ་གྷ་ཛ་ཡི་གནད་དོན་ཙམ་མིན་པར་དགོས་འདུན་འདྲ་མིན་ཞིག་བཏོན་སྟེ་ངོ་རྒོལ་སྤེལ་གྱི་ཡོད་པའི་ནང་ འགའ་ཞིག་གིས་བེུད་ལ་་མངའ་གནས་ཕྲུག་འདོན་གྱི་ཐོབ་ཐང་སོར་གནས་ཐུབ་པ་དགོས་ཅེས་པ་དང་། གཞན་ཁག་ཅིག་གིས་ཡུལ་གྱི་འཚོ་རྟེན་ཡར་རྒྱས་གཏོང་དགོས་པ། ཨིསི་རལ་གྱི་དམག་ལ་དཔལ་འབྱོར་རོགས་རམ་མཚམས་འཇོག་བྱེད་དགོས་པ་སོགས་ཡིན་པ་རེད། འོན་ཀྱང་མང་གཙོ་ཚོགས་པའི་རྒྱལ་ཡོངས་འཐུས་མི་ཚོགས་ཆེན་འདིའི་སྐབས་སུ་སྲིད་འཛིན་ཟུར་པ་ཌོ་ནལ་ཊམ་ལ་རྒྱབ་སྐྱོར་མཐའ་གཅིག་ཏུ་བྱེད་མཁན་གཡས་ཕྱོགས་མཐའ་འཛིན་ལྟ་སྤྱོད་པའི་རིགས་ཀྱིས་མཉམ་ཞུགས་བྱེད་ཀྱི་ཡོད་མེད་ད་ལྟ་གསལ་པོ་མེད། དེའི་བར་ན་ཆི་ཁ་གོ་གྲོང་ཁྱེར་གྱི་སྲིད་སྐྱོང་ཇི་བྷི། པེ་རེཛ་ཀར་གྱིས་ད་རེས་ཚོགས་ཆེན་སྐབས་སུ་ངོ་རྒོལ་བར་གཏམ་བརྗོད་རང་དབང་གནང་བ་དང་ཆབ་ཅིག ཚོགས་ཆེན་དེའི་ནང་མཉམ་ཞུགས་བ་དང་གསར་འགོད་པ་སོགས་མི་གྲངས་ཁྲི་ལྔ་སྐོར་ཞིག་འཛོམས་པའི་སྐབས་སུ་བདེ་འཇགས་སྲུང་སྐྱོབ་ཐོག་དམ་བསྒྲགས་ནན་པོ་གནང་གི་ཡིན་ཞེས་ཨི་པི་གསར་འགྱུང་ལས་ཁང་ལ་གསུངས་འདུག
ཨེ་པི་གསར་སྤེལ་ཁང་ནས་བཏུས།
གསར་འགོད་པ། པདྨ་བདེ་ཆེན།
ཞུ་དག་རྩོམ་སྒྲིག་པ། རྣམ་རྒྱལ་ཤཱསྟྲཱི།
གླེང་སྟེགས།