ཨ་རིའི་ཁྲིམས་འཛིན་ལྷན་ཁང་གིས་དྲ་རྒྱར་སིལ་འཛུལ་བྱེད་མཁན་རྒྱ་ནག་གི་མི་སེར་༡༢ ཁྲིམས་སར་གཏུགས་འདུག

རེས་གཟའ་ལྷག་པའི་ཉིན་ཨ་རིའི་ཁྲིམས་འཛིན་ལྷན་ཁང་གིས་རྒྱ་ནག་གི་མི་སེར་༡༢ ཀྱིས་གྲུབ་པའི་དྲ་རྒྱར་སིལ་འཛུལ་བྱེད་མཁན་རྩ་འཛུགས་ཤིག་གིས་འཛམ་གླིང་ཁྱོན་ཡོངས་སུ་གཏམ་བརྗོད་རང་དབང་ལ་དྲག་གནོན་དང་གོ་ལའི་ནང་ཚོགས་པ་སྒྲིག་འཛུགས་ཁག་གི་གཞི་གྲངས་རྐུ་ཁྱེར་བྱེད་བཞིན་ཡོད་པའི་རྐྱེན་གྱིས། གོང་ཞུས་རྒྱ་ནག་གི་མི་སེར་༡༢ པོ་ཁྲིམས་ལ་གཏུགས་ཡོད་ཅེས་ཕྱིར་བསྒྲགས་བྱས་འདུག

རྒྱ་ནག་གི་མི་སེར་༡༢ ཁྲིམས་གཏུགས་བྱས་ཡོད་པའི་ཁོངས་ནས་རྒྱ་ནག་བདེ་སྲུང་ལས་ཁུངས་ཀྱི་ཉེན་རྟོག་པའི་དཔོན་རིགས་གཉིས་ཚུད་ཡོད་པ་རེད། ཨ་རིའི་ཁྲིམས་འཛིན་ལྷན་ཁང་གིས་གསལ་བསྒྲགས་ནང་། དྲ་རྒྱ་སིལ་འཛུལ་བྱེད་མཁན་ཚོགས་པ་དེ་ལ་རྒྱ་ནག་གི་བདེ་སྲུང་ལས་ཁུངས་དང་རྒྱལ་ཁབ་བདེ་འཇགས་ལས་ཁུངས་ཀྱིས་མ་དངུལ་འགྲོ་སོང་ཕོན་ཆེན་གཏོང་གི་ཡོད་པ་དང་། དྲ་རྒྱ་སིལ་འཛུལ་བྱེད་ཡུལ་ནི་མང་ཆེ་བ་ཨ་རིའི་ནང་ཡོད་པའི་རྒྱ་ནག་གཞུང་ལ་སྐྱོན་བརྗོད་བྱེད་མཁན་གྱི་མི་སྒེར་པ་དང་། གཞན་ཨ་རིའི་ནང་ཆོས་ལུགས་རྩ་འཛུགས་ཆེན་པོ་ཞིག དེ་བཞིན་ཨེ་ཤེ་ཡའི་རྒྱལ་ཁབ་འགའ་ཤས་ཀྱི་ཕྱི་སྲིད་ལས་ཁུངས་དང་ཨ་རིའི་དབུས་གཞུང་དང་མངའ་སྡེ་གཞུང་གི་ལས་ཁུངས་ཁག་སོགས་ཡིན་པ་གསལ་སྟོན་བྱས་འདུག

ན་ནིང་ལོར་ཨ་རིའི་ནོར་སྲིད་ལྷན་ཁང་གི་གློག་ཀླད་འགའ་ཤས་ལ་རྒྱ་ནག་གི་དྲ་རྒྱ་སིལ་འཛུལ་བྱེད་མཁན་གྱིས་གཏོར་བརླག་ཐེབས་ཡོད་པའི་གནས་ཚུལ་ཐོན་མྱོང་ཡོད་པ་དང་། དེ་བཞིན་ན་ནིང་ལོའི་ལོ་མཇུག་ཏུ་རྒྱ་ནག་གི་གློག་འཕྲིན་བཟོ་ཚོང་ཁང་གིས་Salt Typhoon ཞེས་པའི་དྲ་རྒྱ་སིལ་འཛུལ་གྱི་ལས་འགུལ་སྤེལ་ཏེ། ཨ་རིའི་ནང་གི་དཔོན་རིགས་དང་མི་སྣ་གྲགས་ཅན་ཚོའི་སྒེར་གྱི་ཆ་འཕྲིན་རྐུ་ཁྱེར་དང་གཞན་ཨ་རིའི་བརྡ་འཕྲིན་བཟོ་ཚོང་ཁང་AT&T དང་Verizon གཉིས་ལ་ཡང་སིལ་འཛུལ་བྱས་ཡོད་པའི་གནས་ཚུལ་ཐོན་ཡོད་པ་རེད།