རྒྱལ་སྤྱིའི་ནང་པའི་ལྷན་ཚོགས་ཀྱིས་གོ་སྒྲིག་ཞུས་པ་ལྟར་དེ་རིང་ཕྱི་ཟླ་༥ ཚེས་༧་དང་། བོད་ཟླ་༣་པའི་ཚེས་༡༥་ནི་འཕགས་པ་གནས་བརྟན་སྡེ་པའི་བསྟན་རྩིས་ལྟར་སྟོན་པ་བཅོམ་ལྡན་འདས་སྐུ་བལྟམས་པ་དང་སངས་རྒྱས་པ། མྱ་ངན་ལས་འདས་པ་བཅས་དུས་ཆེན་གསུམ་འཛོམས་ཁེལ་ཡོད་པ་རེད། འཛམ་གླིང་གི་ནང་པའི་ཡུལ་གྲུ་ཀུན་ཏུ་སྟོན་པ་བཅོམ་ལྡན་འདས་ཀྱི་སྐུ་བརྙན་ལ་མེ་ཏོག་དང་བདུག་སྤོས། མར་མེ་སོགས་ཀྱི་མཆོད་པ་ཕུལ་ཏེ་ཝྭེ་སཀ་ཞེས་པའི་རྒྱལ་སྤྱིའི་འགྲོ་ལུགས་ལྟར་ས་ག་ཟླ་བའི་དུས་ཆེན་སྲུང་བརྩིས་ཞུས་འདུག