སི་རི་ཡའི་གྱེན་ལོག་པ་ཚོས་སྲིད་འཛིན་ཨ་སད་ཀྱི་སྲིད་གཞུང་མགོ་ལྡིང་སློག་ཡོད་པ།

༄༅།། སི་རི་ཡའི་གྱེན་ལོག་པ་ཚོས་ད་ནས་ཉིན་བཅུའི་གོང་ཡུལ་དེའི་བྱང་ཕྱོགས་ཀྱི་གྲོང་ཁྱེར་ཨ་ལེབ་པོ་དབང་འཛིན་བྱས་པའི་རྗེས་གྱེན་ལོག་པ་དེ་དག་གིས་ཁ་ས་གཟའ་ཉི་མའི་ཐོ་རེངས་ཙམ་ལ་ཡུལ་དེའི་རྒྱལ་སའི་ནང་བཙན་འཛུལ་བྱས་ཏེ་སྲིད་འཛིན་ཨ་སད་ཀྱི་སྲིད་གཞུང་གནས་གཡུང་བཏང་སྟེ། ལོ་ལྔ་བཅུ་ཕྱིན་པའི་ཨ་སད་ཁྱིམ་ཚང་གི་དབང་བསྒྱུར་དེ་འཇུག་བསྒྲིལ་བྱས་ཡོད་པའི་གནས་ཚུལ་ཐོན་འདུག

གྱེན་ལོག་པ་ཚོས་/ཡུལ་དེའི་གཞུང་གཉེར་བརྙན་འཕྲིན་གྱི་ཐོག་བརྙན་ཐུང་ཞིག་རྒྱང་སྲིངས་བྱས་ཡོད་པ་དེའི་ནང་ ང་ཚོས་སྲིད་འཛིན་བྷ་ཤཱར་ཨ་སད་ཀྱི་སྲིད་གཞུང་མགོ་ལྡིང་སློག་ཡོད་པ་དང་། བཙོན་འཇུག་དོ་དམ་གྱི་འོག་ཡོད་པའི་ཆབ་སྲིད་ཀྱི་བཙོན་པ་ཚང་མ་གློད་བཀྲོལ་བཏང་ཡོད་ཅེས་བཀོད་ཡོད་འདུག

གྱེན་ལོག་པའི་གསལ་བསྒྲཌ་དེ་ནི། ཡུལ་དེའི་ཕྱོགས་འགལ་ཚོགས་པའི་འགོ་འཁྲིད་ཀྱིས་སྲིད་འཛིན་ཨ་སད་གནམ་གྲུ་ཞིག་གི་ནང་འཛུལ་ཏེ་སྔོན་ཚུད་ནས་གསལ་བསྒྲགས་མ་བྱས་པའི་ས་གནས་ངེས་མེད་ཅིག་ལ་ཕྱོགས་ཐོན་བྱས་ཡོད་པ་བཤད་པའི་ཆུ་ཚོད་ཁ་ཤས་ཀྱི་རྗེས་བྱས་ཡོད་འདུག

ཡུལ་དེའི་སྲིད་བློན་ཇ་ལ་་ལི་ཡིས་བརྙན་ཐུང་ཞིག་འགྲེམས་སྤེལ་གནང་ཡོད་པ་དེའི་ནང་ ང་ཚོས་རྒྱལ་ཁབ་ཀྱི་སྲིད་དབང་རྩིས་སྤྲོད་བྱ་རྒྱུར་ཕྱོགས་འགལ་ཚོགས་པ་དང་མཉམ་དུ་མཉམ་སྦྲེལ་ཕྱ་ར་གྲུ་འདེགས་བྱ་རྒྱུར་གྲ་སྒྲིགས་ཡོད། ངོས་རང་རང་ཉིད་ཀྱི་ཁྱིམ་ཚང་ནང་ཡོད་མུས་ཡིན་པ་དང་། ངོས་རང་ལས་ཁུང་ལ་ཕྱིན་ཏེ་གཞུང་འབྲེལ་གྱི་ལས་ཀ་མུ་མཐུད་བྱེད་ཀྱི་ཡིན་ཅེས་གསུངས་འདུག

སྲིད་བློན་གྱིས་ཡུལ་དེའི་སྲིད་འཛིན་ཨ་སད་བྲོས་བྱོལ་དུ་ཕྱིན་ཡོད་པ་་གསུངས་མེད་རུང་། ཡིན་ན་ཡང་། ཁོང་གིས་ཡུལ་གྱི་ནང་རང་དབང་གི་འོས་བསྡུའི་ལམ་ནས་འདེམས་བསྐོ་བྱས་པའི་སྲིད་གཞུང་ཞིག་འཛུགས་དགོས་པའི་འབོད་བསྐུལ་གནང་ཡོད་འདུག

ཡུལ་དེའི་འགྲོ་བ་མིའི་ཐོབ་ཐང་གི་ཚོགས་པའི་མགྲིན་ཚབ་པས་གསར་འགོད་པ་ཚོར་སྐད་ཆ་ཤོད་པའི་སྐབས་སྲིད་འཛིན་ཨ་སད་གཟའ་ཉི་མའི་ཞོ་གས་གནམ་གྲུ་ཞིག་གི་ནང་འཛུལ་ཏེ་བྲོས་བྱོལ་དུ་ཕྱིན་ཡོད་པ་གཏན་འབེབས་བྱས་ཡོད་པ་དང་། ཨ་སད་ལ་རྒྱབ་སྐྱོར་བྱེད་མཁན་ལྟེ་བ་ཨི་རཱན་གྱི་བརྙན་འཕྲིན་གྱིས་ཀྱང་སྲིད་འཛིན་ཨ་སད་བྲོས་བྱོལ་དུ་ཕྱིན་ཡོད་པ་གཏན་འབེབས་བྱས་འདུག

རང་ལོ་༢༩ཡིན་པའི་རྒྱལ་སའི་ཁྲིམས་རྩོད་པ་ཨོ་མཱར་གྱིས་ང་ལ་བྱུང་བའི་དགའ་ཚོར་དེ་ཚོ་ངས་འགྲེལ་བཤད་བརྒྱབས་ཤེས་ཀྱི་མི་འདུག སྲིད་འཛིན་ཨ་སད་དང་ཁོ་པའི་པཱ་ལགས་ཀྱི་དུས་སྐབས་ལ་ང་ཚོ་ག་དུས་ཡིན་ན་ཡང་འཇིགས་སྣང་དང་དངང་སྐྲག་གི་འོག་སྡོད་དགོས་བྱུང་སོང་། ད་ཕྱིན་ང་ཚོ་རང་འཇིགས་སྣང་མེད་པར་དབང་གི་ཐོག་ནས་སྡོད་ཆོག་གི་རེད། ངའི་པཱ་ལཌ་དེ་སྔོན་ཨ་སད་ཀྱི་དམག་མིས་བསད་སོང་། ངའི་སྤུན་མཆེད་ཞིག་བཙོན་འཇུག་དོ་དམ་གྱི་འོག་བསྡད་ཡོད་རེད། ཨ་སད་ཁོ་རང་ཁྲིམས་འགལ་ནག་ཅན་པ་མི་ཁྱི་ནང་བཞིན་ཞིག་རེད་ཅེས་བཤད་འདུག

རྒྱལ་སའི་མི་མང་མང་པོ་ཞིག་གྲོང་ཁྱེར་གྱི་ཁ་ཆེའི་་ཕྱག་འཚལ་ཁང་ལ་ཕྱིན་སྟེ། ཡུལ་ལུང་དེ་སྲིད་དབང་སྒེར་གཅོད་པ་ཨ་སད་ཀྱི་དབང་བསྒྱུར་ནས་རང་དབང་ཐོབ་ཡོད་པར་དཀོན་མཆོག་ལ་ཐུགས་རྗེ་ཆེ་བཤད་ཡོད་འདུག

གྱེན་ལོག་པ་ཚོས་རྒྱལ་ས་དབང་འཛིན་བྱས་པའི་གནས་ཚུལ་ཐོན་པའི་རྗེས་རྒྱལ་སའི་ཉེན་རྟོག་པའི་ལས་ཁུང་ཨ་མའི་ནང་ཡོད་པའི་ཉེན་རྟོག་པ་རྣམས་བྲོས་བྱོལ་དུ་ཕྱིན་སྟེ་ལས་ཁུང་སྟོང་པ་ཆགས་ཡོད་འདུག

གྱེན་ལོག་པ་ཚོ་དེ་སྔོན་ཕྱི་ལོ་༢༠༡༨ཀྱི་ལོར་རྒྱལ་སའི་ཕྱི་རོལ་བར་ཐེངས་གཅིག་སླེབས་ཡོད་རུང་། ཡིན་ན་ཡང་། གྱེན་ལོག་པ་ཚོ་རྒྱལ་ས་རང་གི་ནང་འཛུལ་ཞུགས་བྱས་པ་ད་རེས་ཐོག་མ་ཡིན་པ་དང་། ཡུལ་དེའི་རླུང་འཕྲིན་གིས་རྒྱང་སྲིང་བྱས་པའི་གནས་ཚུལ་ཞིག་གི་ནང་རྒྱལ་སའི་གནམ་ཐང་སྟོང་པ་བཟོས་ཏེ། གནམ་ཐང་དེར་གནམ་གྲུ་བབས་མི་ཆོག་པ་དང་འཕུར་བསྐྱོད་བྱེད་མི་ཆོག་པ་བཟོས་ཡོད་འདུག

གྱེན་ལོག་པ་ཚོས་རྒྱལ་ས་བཙན་བཟུང་མ་བྱས་པའི་ཉིན་སྔོན་མ་སྟེ་ཁེ་ཉིན་གཟའ་སྤེན་པའི་ཉིན་ཁོང་ཚོས་ཡུལ་དེའི་གྲོང་ཁྱེར་ཆེ་ཤོས་ཨང་གསུམ་པ་ཧོམ་དབང་འཛིན་བྱས་ཡོད་པ་དང་། ཁོང་ཚོས་དེའི་གོང་དུ་ཡུལ་དེའི་བྱང་ཕྱོཌ་ཀྱི་གྲོང་ཁྱེར་ཨ་ལེབ་པོ་དང་ཧ་མ་ཉིས་ཀ་དབང་འཛིན་བྱས་ཡོད་པ་རེད།།

སི་རི་ཡའི་གྱེན་ལོག་པ་ཚོས་ད་རེས་སླར་ཡང་གྱེན་ལངས་ལས་འགུལ་བྱེད་པའི་སྐབས་རྣམ་ཀུན་སྲིད་འཛིན་ཨ་སད་ལ་རྒྱབ་སྐྱོར་བྱེད་མཁན་ཡུལ་ཁག་ལྟེ་བ་ཨུ་རུ་སུ་དང་ཨི་རཱན་གཉིས་ཀྱིས་རོཌ་རམ་བྱས་ཐུབ་མེད་པ་རེད། ཨུ་རུ་སུས་དེང་སང་ཡུག་རེན་གྱི་ནང་བརྒྱབས་བཞིན་པའི་དམག་འཁྲུག་དང་། ཨི་རཱན་གྱི་མཐུན་གྲོཌ་ཧེཇ་བྷོལ་ལ་ཨིཛ་རཱ་ཡེལ་གྱིས་གཏོར་རྒོལ་བཏང་སྟེ་ཉམས་དམས་སུ་བཏང་བ་དེས་ཨི་རཱན་གཉའ་ཆགས་ཏེ། སྲིད་འཛིན་ཨ་སད་གྲོགས་མེད་གཅིག་པུར་ལས་ཏེ་ཕམ་ཉེས་བྱུང་་ཡོད་པ་རེད།

ཨ་མི་རི་ཀའི་འདེམས་ཐོན་སྲིད་འཛིན་ཊྲམ་གྱིས་རང་ཉིད་ཀྱི་སྤྱི་ཚོགས་དྲ་ལམ་གྱི་ཐོག་ཨ་མི་རི་ཀས་སི་རི་ཡའི་རྙོགས་ཁྲའི་ནང་མཉམ་ཞུགས་བྱ་རྒྱུ་མེད་ལུགས་གསུངས་ཡོད་པའི་ཁར་ བྷ་ཡེ་ཌེན་སྲིད་གཞུང་གིས་སི་རི་ཡའི་ནང་འཁྲུག་ནང་ཐེ་བྱུས་བྱེད་རྩིས་མེད་ཅེས་གསུངས་ཡོད་པའི་གནས་ཚུལ་ཐོན་འདུག