ཕོ་བྲང་དཀར་པོའི་རྒྱལ་ཁབ་བདེ་འཇགས་སྐོར་གྱི་སློབ་སྟོན་པ་ཇེ་ཁེ་སུའུ་ལི་ཝན་Jake Sullivan དང་རྒྱ་ནག་དམར་ཤོག་གཞུང་གི་ཆབ་སྲིད་རྒྱུན་ལས་དང་། རྒྱ་ནག་དབུས་ཕྱི་སྲིད་གཞུང་ལས་ཁང་གི་འགན་འཛིན་ཝང་དབྱི་གཉིས་སྤྱི་ཟླ་༥ པའི་ཚེས་༡༠ ནས་༡༡ ཉིན་ཝེ་ཡེ་ནཱར་ཐུག་འཕྲད་གྲོས་མོལ་བྱས་ཡོད་ཅིང་། དེ་ནི་ད་ལོའི་སྤྱི་ཟླ་༢ པར་རྒྱ་ནག་གི་གསང་མྱུལ་ལྒང་བུ་ཨ་རིའི་མངའ་ཁོངས་སུ་འཛུལ་ཡོང་བའི་དོན་རྐྱེན་བྱུང་ནས་ད་བར། ཨ་རྒྱ་གཉིས་ཀྱི་མཐོ་རིགས་དཔོན་པོའི་དབར་ཐུག་འཕྲད་བྱས་པ་ཐོག་མ་དེ་ཆགས་ཡོད་པ་རེད། སྲིད་དོན་དབྱེ་ཞིབ་པ་འགའ་ཤས་ཀྱིས་ཐུག་འཕྲད་དེ་ནི་ཨ་རྒྱ་གཉིས་ཀྱི་འབྲེལ་ལམ་ཛ་དྲག་ཅན་དེ་བཞིན་ཞི་ལྷོད་འགྲོ་འགོ་ཚུགས་པའི་རྟགས་མཚན་ཡིན་པ་འགྲེལ་བརྗོད་བྱས་ཡོད་པ་རེད།
ནིའུ་ཡོག་དུས་བབ་ཀྱིས་ཕྱི་འབྲེལ་ལས་དོན་སྐོར་གྱི་གསར་འགོད་པ་ཨེ་ཏོར་ཝང་Edward Wong གིས་ཊུས་ཊར་དྲ་ལམ་ཐོག་སྤེལ་བའི་རྩོམ་ཐུང་ཞིག་ལས། ཐུག་འཕྲད་བྱུང་རྗེས་ཕོ་བྲང་དཀར་པོས་སྤེལ་བའི་གསལ་བསྒྲགས་དེ་ནི་ནམ་རྒྱུན་ནང་བཞིན་ཁ་གསལ་པོ་ཞིག་མེད་ཀྱང་། ཕྱོགས་གཉིས་ཀྱི་དཔོན་རིགས་ཐུག་འཕྲད་བྱས་པ་ཙམ་གྱིས་ཨ་རྒྱ་གཉིས་དབར་མཐོ་རིགས་དབར་གྱི་གྲོས་མོལ་བསྐྱར་གསོ་བྱས་ཡོད་པ་མཚོན་ཡོད་ཅེས་འཁོད་འདུག།
དེ་བཞིན་དུ་བྷུ་རུ་ཁིན་སི་ཉམས་ཞིབ་ཁང་Brookings Institution གི་ཕྱི་སྲིད་སྐོར་གྱི་ཉམས་ཞིབ་པ་གྲགས་ཅན་རན་ཧཱ་སི་Ryan Hass ཡིས། ཕོ་བྲང་དཀར་པོ་དང་རྒྱ་ནག་གཞུང་འབྲེལ་གྱིས་སྤེལ་བའི་གསལ་བསྒྲགས་ཡི་གེའི་ནང་། ཕན་ཚུན་དངོས་ཡོད་གཞིར་བཞག་ཐོག་ནས་ཁ་གསང་པོ་ངང་དོན་ཕན་ལྡན་པའི་གྲོས་མོལ་བྱས་ཡོད་ཚུལ་བསྟན་འདུག་ལ། བྷ་ཌན་དང་ཞི་ཅིན་ཕིང་གཉིས་པཱ་ལིན་གླིང་ཕྲན་ཐོག་གི་ཐུག་འཕྲད་སྐོར་དང་འབྲེལ་ནས་མཇུག་བསྡུས་ཡོད་སྟབས། ཨ་རྒྱ་གཉིས་ཀྱི་དབུ་ཁྲིད་བར་གྲོས་མོལ་ཡོང་རྒྱུར་རྨང་གཞི་བཏིང་ཡོད་སྲིད་པ་རེད་ཅེས་འཁོད་ཡོད་པ་རེད།
ཆབ་སྲིད་ཀྱི་གསར་འགྱུར་དྲ་ཚིགས་Politico ཞེས་པའི་རྒྱ་ནག་སྐོར་གྱི་གསར་འགོད་པ་ལིང་ཧེ་Phelim Kine ཡིས་ཀྱང་། ད་ལན་ཕོ་བྲང་དཀར་པོའི་རྒྱལ་ཁབ་བདེ་འཇགས་སྐོར་གྱི་སློབ་སྟོན་པ་ཇེར་ཁེ་སུའུ་ལི་ཝན་དང་རྒྱ་ནག་དམར་ཤོག་གཞུང་གི་ཕྱི་སྲིད་གཞུང་ལས་ཁང་གི་འགན་འཛིན་ཝང་དབྱི་གཉིས་ཐུག་འཕྲད་གྲོས་མོལ་བྱས་པ་དེས། བྷ་ཌན་དང་ཞི་ཅིན་ཕིང་གཉིས་བར་གྱི་གྲོས་མོལ་དང་ཡང་ན་ཨ་རྒྱ་གཉིས་ཀྱི་དཔོན་རིགས་བར་གྱི་གྲོས་མོལ་ཡོང་རྒྱུར་རྨང་གཞི་བཏིང་ཡོད་པར་འདོད་དེ། ཁོང་གིས་ཊུས་ཊར་དྲ་ལམ་ཐོག་ལ་ད་ལན་ཐུག་འཕྲད་གྲོས་མོལ་སྐབས་སུ་བསྐྱར་དུ་ཨ་རིའི་ཕྱི་སྲིད་དྲུང་ཆེ་པུ་ལིང་ཁེང་པེ་ཅིང་དུ་ཕེབས་རྒྱུའི་འཆར་གཞི་བཀོད་ཡོད་སྲིད་ཅེས་འཁོད་འདུག།
ད་ལོའི་སྤྱི་ཟླ༢ པའི་ཟླ་མགོ་ཙམ་ལ། རྒྱ་ནག་གི་གསང་མྱུལ་ལྒང་བུ་ཞིག་ཨ་རིའི་བར་སྣང་མཁའ་དབྱིངས་སུ་འཛུལ་ཡོང་བར་ཤེས་རྟོགས་བྱུང་རྗེས། ཨ་རིས་དམག་གི་གནམ་གྲུ་བཏང་ནས་ལྒང་བུ་དེ་གཏོར་ཡོད་པ་དང་། རྒྱ་ནག་གིས་ཨ་རིའི་བྱེད་སྟངས་ལ་སྐྱོན་བརྗོད་ཤུགས་ཆེ་བྱས་ཐོག་ལྒང་བུ་དེ་གསང་མྱུལ་ལྒང་བུ་ཡིན་པའི་ངོས་ལེན་བྱས་མེད་པ་རེད། དོན་རྐྱེན་དེ་བྱུང་རྗེས་ཨ་རྒྱ་གཉིས་ཀྱི་འབྲེལ་ལམ་མྱུར་དུ་ཇེ་སྡུག་ཕྱིན་ཡོད།
ཕོ་བྲང་དཀར་པོའི་རྒྱལ་ཁབ་བདེ་འཇགས་སྐོར་གྱི་སློབ་སྟོན་པ་ཇེར་ཁེ་སུའུ་ལི་ཝན་དང་རྒྱ་ནག་དམར་ཤོག་གཞུང་གི་ཕྱི་སྲིད་གཞུང་ལས་ཁང་གི་འགན་འཛིན་ཝང་དབྱི་གཉིས་ཐུག་འཕྲད་མ་བྱས་གོང་གི་ཉིན་འགའ་ཤས་སྔོན་ལ། རྒྱ་ནག་ཕྱི་སྲིད་དཔོན་པོ་ཆིང་ཀང་གིས་རྒྱ་ནག་ནང་གནས་སྡོད་ཨ་རིའི་གཞུང་ཚབ་ནཱི་ཁོ་ལ་སི་བྷེར་སི་Nicholas Burns ལ་ཐུག་འཕྲད་བྱས་འདུག། ནཱི་ཁོ་ལ་སི་བྷེར་སིས་ཚེས་༡༡ ཉིན་ཊུས་ཊར་དྲ་ལམ་ཐོག་ཏུ། ཁོང་རང་ཉིད་རྒྱ་ནག་གི་ཕྱི་སྲིད་དཔོན་པོ་ཆིང་ཀང་དང་ཐུག་འཕྲད་བྱས་ཏེ། ཨ་རྒྱ་གཉིས་ཀྱི་ཚོང་དོན་འབྲེལ་ལམ་སྐོར་ལ་གྲོས་གླེང་ཞིབ་ཕྲ་བྱས་ཡོད་པར་མ་ཟད། རྒྱ་ནག་ནང་ཡོད་པའི་ཨ་རིའི་ཁེ་ལས་ཚོ་ལ་འདྲ་མཉམ་དྲང་བདེན་གྱི་མཐོང་ཚུལ་སྤྲད་རྒྱུ་གལ་ཆེ་ཡིན་སྐོར་ནན་བརྗོད་བྱས་འདུག།
སྲིད་འཛིན་བྷ་ཌན་མཆོག་གི་གནམ་གཤིས་འགྱུར་ལྡོག་གི་གནད་དོན་སྐོར་གྱི་དམིགས་གསལ་སྐུ་ཚབ་ཇོན་ཁེར་རི་John Kerry ཡིས་རྒྱ་ནག་གིས་གནམ་གཤིས་གནད་དོན་སྐོར་ལ་གྲོས་མོལ་བྱ་ཆེད་རིང་མིན་ཁོ་རྒྱ་ནག་དུ་གདན་འདྲེན་བྱས་ཡོད་ཚུལ་བརྗོད་འདུག། ཡིན་ན་ཡང་འགྲོ་བ་མིའི་ཐོབ་ཐང་བརྩོན་ལེན་བྱེད་མཁན་མང་པོ་ཞིག་གིས། གལ་སྲིད་ཨ་རྒྱ་གཉིས་ཀྱི་འབྲེལ་ལམ་ལ་བཟང་ཕྱོགས་ཀྱི་འགྱུར་ལྡོག་ཅིག་ཕྱིན་པ་ཡིན་ན་རྒྱ་ནག་ནང་དུ་འགྲོ་བ་མིའི་ཐོབ་ཐང་གི་གནད་དོན་དེ་བཞིན་ཟུར་འབུད་བྱ་རྒྱུའི་བློ་འཚབ་ཡོང་བཞིན་ཡོད་པ་རེད།
ཨ་རིར་གནས་འཁོད་ཁ་ཆེ་ཡུ་གུར་བ་ལས་འགུལ་བ་རུའུ་ཤན་ཨ་བྷ་སིRushan Abbas ཡིས་ཊུས་ཊར་དྲ་ལམ་ཐོག། ད་ལན་ཨ་རྒྱ་གཉིས་ཀྱི་དཔོན་རིགས་མཇལ་མོལ་བྱུང་བ་དེས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པ་དང་། ཁ་ཆེ་ཡུ་གུར་བ་ཚོ་ལ་རིགས་རྒྱུད་རྩ་མེད་གཏོང་བཞིན་པ། བོད་ནང་བོད་པ་ཚོ་ལ་གདུག་རྩུབ་ཆེ་བའི་དྲག་གནོན་བྱེད་བཞིན་པ་དང་། ཧོང་ཀོང་ནང་གི་རང་དབང་དམངས་གཙོ་རྡོག་བརྫིས་གཏོང་བཞིན་པ། ཐེ་ཝན་ལ་འཇིགས་སྐུལ་བྱེད་བཞིན་པའི་གནད་དོན་སོགས་ལ་མཚོན་ན་དེའི་མཚོན་དོན་ག་རེ་ཡིན་མིན་ཤེས་འདོད་ཡོད་ཅེས་འཁོད་འདུག།
རེས་གཟའ་ཕུར་བུ་ཉིན་རེ་ཊྲེ་སིའི་གསར་ཁང་གིས་ཨ་རིའི་གཞུང་གི་དཔོན་རིགས་ནང་ཁུལ་གྱི་གློག་འཕྲིན་ཞིག་ལུང་དྲངས་ཏེ་གནས་ཚུལ་སྤེལ་གསལ་ལ། གསང་བའི་ལྒང་བུའི་དོན་རྐྱེན་བྱུང་རྗེས། དོན་དམ་ལ་ཨ་རིའི་གཞུང་གིས་དོན་རྐྱེན་དེའི་རྐྱེན་ལས་ཨ་རྒྱ་ཕྱོགས་གཉིས་དབར་གྱི་འབྲེལ་ལམ་ལ་ཐེབས་པའི་ཤུགས་རྐྱེན་ངན་པ་དེ་སྟངས་འཛིན་ཡོང་ཐབས་སུ། ད་བར་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པར་དམིགས་ནས་ཉེས་ཆད་གཅད་རྒྱུ་དང་། ཕྱིར་གཏོང་ལ་དོ་དམ་བྱ་རྒྱུ་སོགས་ཕྱིར་འགྱངས་བྱས་ཡོད་པ་རེད།
ཐབས་ཇུས་དང་རྒྱལ་སྤྱིའི་ཉམས་ཞིབ་ཁང་CSIS ཞེས་པའི་དཔལ་འབྱོར་ལས་གཞིའི་སྐོར་གྱི་ཉམས་ཞིབ་པ་གྷེ་རེ་ཊི་ཏི་ཕི་ཕོག་Gerard DiPippo གིས་ཊུས་ཊར་དྲ་ལམ་ཐོག་ཏུ། རེ་ཊྲེ་སིས་སྤེལ་བའི་གསར་འགྱུར་དེས་མི་མང་པོ་ཞིག་གི་དོགས་སློང་དེ་བདེན་པ་ཡིན་པ་ར་འཕྲོད་བྱས་སོང་། ཨ་རིས་རྒྱ་ནག་ལ་ཉེས་ཆད་གཅད་རྒྱུ་ཕྱིར་འགྱངས་བྱས་དགོས་དོན་དེ་ཡང་ཕྱོགས་གཉིས་ཀྱི་འབྲེལ་ལམ་བསྐྱར་གསོ་ཡོང་རྒྱུར་བསམ་བློ་བཏང་བ་རེད། འོན་ཏེ་ད་ཡོད་ཀྱི་འབྲེལ་ལམ་དེ་དུས་ཡུན་ག་ཚོད་ཙམ་རྒྱུན་འཁྱོངས་བྱ་ཐུབ་རྒྱུ་བཤད་ཁག་པོ་རེད། ཨ་རིས་རྦད་དེ་ཕྱིར་འགྱངས་བྱེད་སྲིད་ཀྱི་རེད་དམ། ང་ལ་དོགས་པ་ཡོད། པེ་ཅིང་གིས་ཀྱང་དེ་ཤེས་ཀྱི་ཡོད་རེད་ཅེས་འཁོད་འདུག།
རྒྱ་ནག་གི་དཔོན་རིགས་ཤིག་གིས་རེ་ཊྲེ་སི་གསར་ཁང་ལ། གལ་སྲིད་པེ་ཅིང་གིས་ལྒང་བུ་དང་འབྲེལ་ནས་བཏོན་པའི་རེ་འདུན་དེ་བཞིན་ཨ་རིས་བསྐོང་ཐུབ་པ་ཡིན་ན་པུ་ལིང་ཁེང་པེ་ཅིང་དུ་ཕེབས་རྒྱུ་དེ་ཡང་ལམ་ལྷོང་ཡོང་སྲིད་པ་རེད་ཅེས་དང་། རྒྱ་ནག་གི་རེ་བ་ནི། ཨ་རིའི་ཞིབ་དཔྱོད་ལས་ཁུངས་ཀྱིས་རྒྱ་ནག་གི་ལྒང་བུ་སྐོར་གྱི་ཞིབ་འཇུག་གྲུབ་དོན་ཁག་ཕྱིར་བསྒྲགས་མི་བྱ་རྒྱུ་དེ་རེད་ཅེས་བརྗོད།
རྒྱ་ནག་གནད་དོན་སྐོར་གྱི་ཉམས་ཞིབ་པ་བྷིལ་པི་ཤོག་ཕུ་Bill Bishop གིས་ཊུས་ཊར་དྲ་ལམ་ཐོག་ཏུ་དེ་ལ་ཟུར་ཟ་དང་བཅས། པེ་ཅིང་གིས་གསང་མྱུལ་ལྒང་བུ་ཆུང་ཆུང་ཞིག་བེད་སྤྱོད་བཏང་ནས་འདི་ལྟ་བུའི་རྩེ་མོ་ཡག་ཐག་ཆོད་ཅིག་རྩེད་ཐུབ་པ་ནི་ཧ་ལས་པ་རེད་ཅེས་སྤེལ་འདུག།
ཨ་རིའི་དཔལ་འབྱོར་རིག་པ་བ་ཁི་རི་སི་བྷོ་ཏིང་Chris Balding གིས་ཀྱང་། དོན་དག་དེ་བརྒྱུད་ནས་ནམ་རྒྱུན་པེ་ཅིང་གཞུང་གི་རིགས་ལམ་སྟེ། གལ་སྲིད་ཁྱོད་ཚོས་ང་ཚོའི་དགོས་མཁོ་ཚང་མ་བསྒྲུབ་པ་ཡིན་ན། ང་ཚོས་ཀྱང་ཁྱོད་ཀྱི་དགོས་མཁོ་ལ་བསམ་བློ་གཏང་ཆོག་ཅེས་པའི་གོང་གཏམ་པའི་བྱ་སྤྱོད་དེ་ཕྱིར་མངོན་སོང་། དེ་ནི་པེ་ཅིང་གིས་འབྲེལ་ལམ་ཡོད་ཚད་ལ་འཛིན་པའི་གཞི་རྩའི་ལངས་ཕྱོགས་ངོ་མ་དེ་རེད་ཅེས་བཀོད་འདུག།
