ར་ཤི་ཡར་དཔལ་འབྱོར་དཀའ་ངལ་ཡོད་པའི་སྟེང་དུ་ཟས་སོང་འཕར།

༄༅།། ཕུར་ཊིན་གྱིས་ཁྱིམ་མཚེས་རྒྱལ་ཁབ་ཡུཀ་རེན་ལ་བཙན་འཛུལ་དམག་འཁྲུག་བསླངས་པའི་རྗེས་སུ་ནུབ་ཕྱོགས་རྒྱལ་ཁབ་ཁག་གིས་ར་ཤི་ཡར་ཚོང་འབྲེལ་བཅད། ར་ཤི་ཡར་དཔལ་འབྱོར་དཀའ་ངལ་ཚབས་ཆེན་འཕྲད་བཞིན་པའི་སྟེང་དུ་ཟས་སོང་འཕར། ཕྱི་ཟླ་༡༡་པའི་ཚེས་༡༤་ཉིན་བྷུ་ལུམ་བྷག་གསར་ཁང་གིས་གནས་ཚུལ་སྤེལ་བ་ལྟར་ན། ད་ལོའི་འགོ་སྟོད་ནས་ཕྱི་ཟླ་༡༡་པའི་བར་དུ་ར་ཤི་ཡའི་ཁྲོམ་ར་ཁག་ཏུ་ཞོ་ཁོག་གི་རིན་གོང་བརྒྱ་ཆ་༧༣་འཕར་བ་དང་མར་གྱི་རིན་གོང་བརྒྱ་ཆ་༣༠་འཕར། ཙོང་དང་ཉུང་དམར་གྱི་རིན་གོང་བརྒྱ་ཆ་༢༠་ལྷག་འཕར། སྐྱུར་སྤྲི་དང་འོ་མ། བག་ལེབ་སོགས་ཀྱི་རིན་གོང་བརྒྱ་ཆ་ནས་༡༢་ནས་༡༥་འཕར་ཏེ་མང་ཚོགས་ཀྱིས་བཟའ་བཏུང་ཉོ་མི་ཐུབ་པའི་མཚམས་སུ་བསླེབས། ཕུ་ཊིན་གྱིས་དམག་འཁྲུག་རྒྱུན་འཁྱོངས་དང་རྒྱལ་ནང་དུ་བརྟན་ལྷིང་བསྐྲུན་རྒྱུ་གཉིས་བསྒྲུབ་མ་ཐུབ་པར་དཀའ་ངལ་ནང་དུ་ཚུད།།

ར་ཤི་ཡའི་ཀི་རོབ་གྲོང་ཁྱེར་གྱི་རྒན་མོ་ལོ་ན་༧༢་ལ་སོན་པའི་ཊ་ཊི་ཡ་ན་ཞེས་པ་ཞིག་གིས་བཤད་པ་ལྟར་ན། ཁོ་མོའི་རྒས་ཕོགས་ཀྱི་གསུམ་ཆའི་གཉིས་ཟས་སོང་ལ་འགྲོ་གྲོན་གཏང་དགོས་པ་དང་སྔོན་ཆད་རྒས་ཕོགས་ཀྱི་ཕྱེད་ཀ་མ་གཏོགས་ཟས་སོང་ལ་འགྲོ་གྲོན་གཏོང་དགོས་ཀྱི་མེད། དེང་སྐབས་ངས་ཤིང་ཏོག་སོགས་ཉོ་མཚམས་བཞག་སྟེ་ཟ་ཐུབ་ཀྱི་མེད། ༢༠༢༢་ལོར་ར་ཤི་ཡས་ཁྱིམ་མཚེས་རྒྱལ་ཁབ་ཡུཀ་རེན་ལ་བཙན་འཛུལ་མ་བྱས་བར་དུ་ངས་གྲོན་ཆུང་འདི་འདྲ་ཞིག་བྱས་མྱོང་མེད། ལོ་སར་དུས་སུ་ཉ་སྒོང་དམར་པོའི་ཟས་རིགས་གཡོ་སྐོལ་བྱ་རྒྱུ་ནི་རེ་བ་མེད་པ་ཞིག་ཏུ་གྱུར་སོང་ཞེས་ཁ་པར་ནང་དུ་གསར་འགོད་པའི་དྲི་བ་ཁག་ལ་ལན་བཏབ། ཡུཀ་རེན་གྱི་དམག་འཁྲུག་མ་ལངས་གོང་ནས་ར་ཤི་ཡའི་ས་གནས་ཁག་ཏུ་ཟས་སོང་འཕར་ཏེ་མི་དམངས་ཀྱིས་འཁང་ར་བཤད། ར་ཤི་ཡའི་གཞུང་གིས་མང་ཚོགས་ལ་ཟས་སོང་འཕར་གྱི་ཡོད་པ་སྟངས་འཛིན་མ་ཐུབ་ན་རྒྱལ་ནང་དུ་ཟིང་འཁྲུག་ལང་སྲིད་པའི་ཉེན་ཁ་ཤིན་ཏུ་ཆེ།།

ར་ཤི་ཡའི་དབུས་དངུལ་ཁང་གིས་ཡུལ་ཐང་འཕར་གྱི་ཡོད་པ་གཅོག་ཐབས་སུ་སྐྱེད་ཀ་བརྒྱ་ཆ་༢༡་སྤར། ད་ལྟ་དངུལ་ཁང་ལའང་བྱ་ཐབས་གསར་པ་ཞིག་མེད་པར་སྣང་། རྒྱལ་ས་མོ་སི་ཀོ་ནས་རྒྱང་ཐག་སྤྱི་ལེ་༡༠༠༠་ཡས་མས་ཤིག་གི་མཚམས་སུ་ཆགས་པའི་ཀི་རོབ་གྲོང་ཁྱེར་གྱི་ཚོང་ཁང་ཁག་ཏུ་ལོ་སྔོན་མ་དང་བསྡུར་ན་འོ་མ་དང་མར། སྒོ་ང་དང་བག་ལེབ་ཀྱི་རིན་ལྡབ་གཉིས་འཕར་ཡོད་ཅིང་། ར་ཤི་ཡའི་སྤྱི་ཁྱབ་ཁྲིམས་སྦྱོར་བ་ཨི་གྷོར་ཀ་ར་སི་ནོབ་(Igor Krasnov)་ཀྱིས་འབྲོག་པ་ཚོས་དཀར་ཆུའི་རིན་གོང་ལྡབ་ལོག་སྤར་གྱི་ཡོད་མེད་ཞིབ་འཇུག་བྱ་རྒྱུ་ཞེས་བསྒྲགས། སྲིད་བློན་མི་ཁེལ་མི་ཤུ་སི་ཊིན་(Mikhail Mishustin)་གྱིས་སོ་ནམ་ལྷན་ཁང་གིས་མང་ཚོགས་ལ་ཤིང་ཏོག་དང་སྔོ་ཚོད་མ་ཆད་པ་བྱ་དགོས་ཞེས་བཀའ་ཕབ། སྲིད་བློན་གཞོན་པས་ཁྲོམ་རེའི་ཟས་སོང་གི་རིན་གོང་དེ་ཉིན་ལྟར་སྲིད་གཞུང་གིས་སྟངས་འཛིན་བྱ་དགོས་ཞེས་ཐབས་ཇུས་བཏོན།།

དཀྱིལ་ཤར་ས་ཁུལ་གྱི་གསར་འགྱུར་ཉམས་ཞིབ་ཁང་གི་དམིགས་བསལ་སློབ་སྟོན་པ་ཨི་ནོ་ཟེམ་ཚེབ་(Valdislav Inozemtsev)་ཀྱིས་དཀའ་ངལ་འདི་ཞིང་པ་དང་འབྲོག་པ་ཚོས་ཚོང་ལོག་བརྒྱབ་ནས་བྱུང་བ་རེད་ཅེས་ལན་ཁག་དཀྲི་ཡི་འདུག ར་ཤི་ཡས་ཁྱིམ་མཚེས་རྒྱལ་ཁབ་ཡུཀ་རེན་ལ་བཙན་འཛུལ་བྱས་པའི་མཇུག་འབྲས་ཡིན་པ་ཁས་ལེན་གྱི་མི་འདུག ༢༠༠༧་ནས་ར་ཤི་ཡ་རྒྱལ་ཡོངས་སུ་མར་གྱི་རིན་གོང་འཕར་འགོ་ཚུགས་ཀྱང་སྲིད་གཞུང་གིས་སྣང་མེད་དུ་བཞག་པ་རེད་ཅེས་བཀྲལ། ར་ཤི་ཡའི་གཞུང་གིས་དངུལ་སྒོར་ཡོད་ཚད་དམག་འཁྲུག་ལ་འགྲོ་གྲོན་བཏང་བ་དང་སྐྱེས་པ་ཕལ་མོ་ཆེ་དམག་སར་བཏང་སྟེ་དངོས་ཟོག་གི་ཆ་རྒྱུ་མཁོ་འདོན་མ་ཐུབ་པ་དང་ཕྱུགས་ཟོག་ལ་རྩྭ་ཆག་ཆད། ཨ་རི་སོགས་ཀྱིས་ཚོང་ལས་བཀག་ནས་ཕྱི་རྒྱལ་གྱི་དངོས་ཟོག་ནང་འདྲེན་བྱེད་དུ་མ་བཅུག ར་ཤི་ཡའི་བཟོ་ལས་དང་ཞིང་ལས་སོགས་ལ་ངལ་རྩོལ་བ་མེད་པར་འཐུས་ཤོར་སོང་། ད་དུང་གནམ་གཤིས་ཡག་པོ་མ་བྱུང་བར་སྟོན་འབྲས་བསྡུ་མ་ཐུབ་པར་རྐྱེན་ངན་བྱུང་།།

ཕྱི་ཟླ་༡༡་པའི་ཚེས་༡༤་ཉིན་ཕྱི་སྲིད་དུས་དེབ་ལ་གནས་ཚུལ་ཐོན་པ་ལྟར་ན། ཕྱི་ཚུལ་དུ་ར་ཤི་ཡའི་དཔལ་འབྱོར་འཕེལ་རྒྱས་སོང་སྟེ་ན་ནིང་རྒྱལ་ནང་ཐོན་སྐྱེད་རྩ་འབོར་བརྒྱ་ཆ་༣.༦་འཕར། ད་ལོ་རྒྱལ་ནང་ཐོན་སྐྱེད་རྩ་འབོར་བརྒྱ་ཆ་༣.༩་འཕར་རྒྱུའི་དམིགས་ཚད་བཟུང་། དེ་བཞིན་ར་ཤི་ཡའི་མི་མང་ལས་ཤོར་པའི་གྲངས་འབོར་ཡང་བརྒྱ་ནས་༤.༤་ནས་བརྒྱ་ཆ་༢.༤་ལ་མར་ཆག ར་ཤི་ཡའི་གཞུང་གིས་རྒྱལ་སྲུང་བཟོ་ལས་ཁག་ལ་ལས་མི་འབུམ་༥་ཁ་སྣོན་བྱས་པ་དང་དམག་མི་གསར་པ་༡༨༠༠༠༠་བསྡུས། སྐྱེས་པ་སྟོང་ཕྲག་མང་པོ་དྲག་ཆས་ཡུལ་དམག་དང་སྒེར་དམག་གི་སྒྲིག་འཛུགས་ཁག་ཏུ་ཞུགས། ར་ཤི་ཡས་ལོ་རེར་སྒྱོགས་མདེལ་ས་ཡ་༣་རེ་བཟོ་ཐུབ། འཕུར་མདེལ་དང་ཁ་ལོ་བ་མེད་པའི་འཕུར་གྲུ་བཟོ་རྒྱུའང་མང་དུ་བཏང་སྟེ་མི་མང་ལ་ལས་ཀ་མེད་པའི་དཀའ་ངལ་མེད། ཉམས་ཞིབ་པ་ཚོས་ར་ཤི་ཡའི་དཔལ་འབྱོར་ནི་དམག་འཁྲུག་གི་འགྲོ་གྲོན་དང་ཚོང་ལས་བཀག་སྡོམ་གྱི་ཉེས་ཆད་འོག་ནས་ལོ་མང་རིང་སླར་གསོ་བྱེད་མི་ཐུབ་པ་ཞིག་ཏུ་འགྱུར་གྱི་ཡོད་པའི་རྟགས་མཚན་མངོན་ཞེས་བསྟན།།

དམག་དོན་ཉམས་ཞིབ་པ་ཚོས་ར་ཤི་ཡའི་ལྕགས་ཁྲབ་འཁོར་ལོ་དང་འཐབ་འཁོར། འཕུར་མདེལ་དང་འཕུར་གྲུ་སོགས་བཟོ་སྐྲུན་བྱས་པ་དང་ཡུཀ་རེན་གྱི་དམག་ས་ཁག་ཏུ་གཏོར་སྐྱོན་ཕོག་པའི་གྲངས་འབོར་ལ་ཁྱད་པར་ཆེན་པོ་འདུག ར་ཤི་ཡས་མཚོན་ཆ་དང་དམག་དོན་ཡོ་བྱད་བཟོ་སྐྲུན་བྱས་ནས་དམག་འཁྲུག་གི་དགོས་མཁོ་བསྒྲུབ་ཐུབ་རྒྱུ་ཁག་པོ་རེད། ཟླ་ཤས་གོང་ནས་ར་ཤི་ཡའི་དམག་གིས་འཕེན་གྱི་ཡོད་པའི་སྒྱོགས་མདེལ་ཕྱེད་ཀ་ཙམ་བྱང་ཀོ་རི་ཡ་ནས་ནང་འདྲེན་བྱས་པ་དེ་ཚོ་རེད། ༢༠༢༥་ལོའི་ཟླ་དྲུག་ཕྱི་མ་དེར་ར་ཤི་ཡར་མཚོན་ཆ་རིགས་འགའ་ཞིག་ཆད་རྒྱུའི་མཚམས་སུ་བསླེབས་འདུག ཐོག་མར་དམག་ས་ཁག་ཏུ་གཏོར་བའི་ར་ཤི་ཡའི་མེ་སྒྱོགས་ཆེ་དེ་ཚོར་ཚབ་ཤུལ་བཟོ་མི་ཐུབ། ཟླ་བ་རེར་ར་ཤི་ཡའི་ལྕགས་ཁྲབ་འཁོར་ལོ་༡༠༠་ལྷག་དང་མེ་སྒྱོགས་༢༢༠་ཡས་མས་རེ་ཡུཀ་རེན་གྱི་དམག་ས་ཁག་ཏུ་གཏོར་གྱི་འདུག མེ་སྒྱོགས་དང་ལྕགས་ཁྲབ་འཁོར་རེར་ལྕི་ཚད་ཊོན་༢༠་ནས་༣༠་ཙམ་ཡོད་པས་ཟླ་བ་རེར་མེ་སྒྱོགས་དང་ལྕགས་ཁྲབ་འཁོར་ལོ་༡༠་ཙམ་ལས་བཟོ་མི་ཐུབ་པའི་སྙན་ཐོ་བཏོན།།

ཟླ་བ་རེར་ཆ་མཉམ་ར་ཤི་ཡའི་མེ་སྒྱོགས་དང་ལྕགས་ཁྲབ་འཁོར་ལོ་༡༥༥་རེ་རྩ་གཏོར་འགྲོ་བཞིན་པར་མ་ཟད། ད་ལྟའི་བར་དུ་ར་ཤི་ཡའི་སྐམ་དམག་གི་འཐབ་འཁོར་༤༩༩༥་རྩ་གཏོར་ཚར་འདུག་ཅེས་གཞི་གྲངས་སུ་འཁོད། ར་ཤི་ཡའི་རྒྱལ་སྲུང་ལྷན་ཁང་གིས་གན་རྒྱ་བཞག་པའི་བཟོ་གྲྭ་ཁག་ནས་ལོ་རེར་འཐབ་འཁོར་༢༠༠་དང་ཟླ་བ་རེར་འཐབ་འཁོར་༡༧་ལས་བཟོ་ཐུབ་ཀྱི་མེད་པས་དམག་འཁྲུག་གི་དགོས་མཁོ་སྐོང་མི་ཐུབ། ར་ཤི་ཡའི་བཟོ་གྲྭ་ཁག་ཏུ་ལོ་རེར་སྒྱོགས་མདེལ་ས་ཡ་༣་བཟོས་ཀྱང་༢༠༢༢་གཅིག་པུར་སྒྱོགས་མདེལ་ས་ཡ་༡༢་འཕངས། ཕུ་ཊིན་ལ་མཚོན་ཆ་མེད་པར་དམག་འཁྲུག་རྒྱག་མི་ཐུབ་པའི་དུས་ཚོད་དེ་ནམ་སླེབས་རྒྱུ་ཡིན་པ་ཏག་ཏག་ཅིག་བཤད་མི་ཐུབ་ཀྱང་ཉི་མ་དེ་འཆར་རྒྱུ་ཡིན་པ་ལྡོག་ཏུ་མེད། ར་ཤི་ཡའི་དམག་དོན་འགྲོ་གྲོན་འདི་རྒྱུན་འཁྱོངས་བྱེད་ཐུབ་པ་ཞིག་མ་རེད་ཅེས་དཔྱད་བརྗོད་སྤེལ་འདུག

ཉེ་ཆར་ཕྱི་ཟླ་༩་པའི་ཚེས་༣༠་ཉིན་རོ་ཡེ་ཊར་སི་གསར་ཁང་གིས་གནས་ཚུལ་སྤེལ་བ་ལྟར་ན། ༢༠༢༥་ལོར་ར་ཤི་ཡས་རྒྱལ་སྲུང་ཐད་ཨ་སྒོར་ཐེར་འབུམ་༡༤༥་འགྲོ་གྲོན་གཏང་རྒྱུའི་ཐག་བཅད། དེ་ནི་༢༠༢༥་ལོའི་ར་ཤི་ཡའི་དངུལ་རྩིས་ཀྱི་བརྒྱ་ནས་༣༢་ཟིན་པ་དང་༢༠༢༤་ལོའི་རྒྱལ་སྲུང་འགྲོ་གྲོན་དང་བསྡུར་ན་བརྒྱ་ཆ་༢༥་འཕར། ནོར་སྲིད་བློན་ཆེན་ཨན་ཊོན་སི་ལུ་ཝ་ནོབ་(Anton Siluanov)་ཀྱིས་རྡོ་སྣུམ་དང་སོལ་རླངས་ཕྱིར་ཚོང་གི་ཡོང་འབབ་དེས་གཞུང་གི་དངུལ་རྩིས་བརྒྱ་ཆ་༢༧་ཟིན་ཡོད། འདི་ནི་ལོ་སྔོན་མ་ཁག་དང་བསྡུར་ན་ཉུང་དུ་ཕྱིན་ཡོད་པས་ཡག་པོ་རེད། ར་ཤི་ཡའི་དངུལ་རྩིས་དེ་རྡོ་སྣུམ་དང་སོལ་རླངས་ཕྱིར་ཚོང་གི་ཡོང་འབབ་ཁོ་ནར་བརྟེན་མེད་པའི་རྟགས་མཚན་རེད་ཅེས་གྲོས་ཚོགས་སུ་སྙན་སེང་ཞུས། ཡུཀ་རེན་གྱི་དམག་འཁྲུག་རྗེས་སུ་ར་ཤི་ཡར་རྒྱ་དཀར་ནག་གཉིས་དང་རྒྱལ་ཁབ་ཉུང་ཤས་ཤིག་ལས་རྡོ་སྣུམ་དང་སོལ་རླངས་ཕྱིར་ཚོང་བྱ་ཡུལ་མེད་པའི་གནས་ཚུལ་ཐོན་འདུག