ར་ཤི་ཡ་སྟོབས་ཤུགས་ཉམས་ནས་རྒྱ་ནག་ལ་གུ་བཤངས་བྱ་དགོས་པར་གྱུར།

༄༅།། རྒྱ་ནག་གིས་དབུས་ཨེ་ཤི་ཡར་མེ་འཁོར་ལྕགས་ལམ་འཛུགས་སྐྲུན་བྱ་རྒྱུ་ཡིན། ར་ཤི་ཡའི་སེ་བི་རི་ཡ་ནས་རྒྱ་ནག་ལ་སོལ་རླངས་ལྕགས་སྦུག་འཐེན་གྱི་ཡོད་པ་དེའི་བརྒྱུད་ལམ་བསྒྱུར་དགོས་ཞེས་དགོས་འདུན་བཏོན་པར་ཕུ་ཊིན་གྱིས་མོས་མཐུན་བྱས་འདུག ཕྱི་ཟླ་༡༢་པའི་ཚེས་༣༡་ཉིན་ཨེ་ཤི་ཡའི་དུས་བབ་ཚགས་པར་ལ་གསར་འགྱུར་ཐོན་པ་ལྟར་ན། རྒྱ་ནག་གིས་ཞིན་ཅང་ནས་ཀིར་ཀི་སི་ཐན་དང་ཨུ་ཛི་བྷེ་ཀི་སི་ཐན་ལ་མེ་འཁོར་ལྕགས་འཛུགས་སྐྲུན་བྱ་རྒྱུ་དེར་ར་ཤི་ཡས་ངོ་རྒོལ་བྱས་ནས་ལོ་༢༧་ལ་བཀག དེང་སྐབས་ར་ཤི་ཡ་སྟོབས་ཤུགས་ཉམས་ནས་རྒྱ་ནག་ལ་བསྟུན་དགོས་པས་༢༠༢༥་ལོའི་ཕྱི་ཟླ་༧་ནས་རྒྱ་ནག་གིས་ཞིན་ཅང་ནས་དབུས་ཨེ་ཤི་ཡར་མེ་འཁོར་ལྕགས་ལམ་འཛུགས་བྱ་རྒྱུའི་ཐག་བཅད། དེ་བཞིན་ར་ཤི་ཡའི་སེ་བི་རི་ཡའི་སོལ་རླངས་ལྕགས་སྦུག་གཉིས་པའང་རྒྱ་ནག་གི་འདོད་པ་ལྟར་སོག་ཡུལ་མ་བརྒྱུད་པར་ཁ་ཛག་སི་ཐན་བརྒྱུད་ནས་རྒྱ་ནག་ལ་འཐེན་རྒྱུ་ཁས་བླངས། ཕུ་ཊིན་གྱིས་ར་ཤི་ཡའི་དཔལ་འབྱོར་དང་ཚོང་ལས། བདེ་འཇགས་དང་ས་ཁམས་ཆབ་སྲིད་ཀྱི་རྩ་དོན་འགའ་ཞིག་གི་ཐོག་ཏུ་རྒྱ་ནག་ལ་མ་བསྟུན་ཐབས་མེད་དུ་གྱུར།།

ཡུཀ་རེན་གྱི་དམག་འཁྲུག་དང་རྒྱལ་སྤྱིའི་ཐོག་ཏུ་རྡོ་སྣུམ་གྱི་རིན་གོང་ཟགས་པ་བཅས་ཀྱིས་ར་ཤི་ཡ་བྱ་ཐབས་ཟད་ནས་རྒྱ་ནག་ལ་གུ་བཤངས་བྱས། ན་ནིང་ཕྱི་ཟླ་༤་ནང་རྡོ་སྣུམ་ལྕགས་ཟོམ་གང་ལ་ཨ་སྒོར་༨༧་ཡིན་རུང་ཕྱི་ཟླ་༡༢་པའི་ནང་དུ་རྡོ་སྣུམ་གྱི་རིན་གོང་ཨ་སྒོར་༧༠་ལ་མར་ཆག ཉེ་བའི་ཟླ་ཤས་རིང་རྒྱལ་སྤྱིའི་ཁྲོམ་རའི་ནང་དུ་རྡོ་སྣུམ་གྱི་རིན་གོང་བརྒྱ་ཆ་༡༨་ཆག་སྟེ་ར་ཤི་ཡའི་དཔལ་འབྱོར་ལ་གྱོང་གུད་ཚབས་ཆེན་ཕོག རྒྱལ་སྤྱིའི་ཁྲོམ་རའི་ནང་དུ་རྡོ་སྣུམ་གྱི་རིན་གོང་ཆག་པའི་སྟེང་དུ་འཛམ་གླིང་གི་བཟོ་ལས་ཡར་ཐོན་རྒྱལ་ཁབ་བདུན་དང་ཡུ་རོབ་མཉམ་འབྲེལ། ཨོ་གླིང་སོགས་ཀྱིས་ར་ཤི་ཡའི་རྡོ་སྣུམ་ལྕགས་ཟོམ་གང་ལ་ཨ་སྒོར་༦༠་ལས་སྤྲོད་མི་ཆོག་ཅེས་རིན་གོང་གཏན་ལ་ཕབ། ར་ཤི་ཡར་ཨ་སྒོར་གྱི་ཡོང་འབབ་ཆད་པའི་སྟབས་ཀྱིས་དངུལ་ལོར་རུ་བྷུལ་གྱི་འཛའ་ཐག་ཉམས། ཡུཀ་རེན་གྱི་དམག་འཁྲུག་ལངས་ནས་བཟུང་སྟེ་ར་ཤི་ཡའི་རུ་བྷུལ་འཛའ་ཐང་བརྒྱ་ཆ་༣༤་ཆག་འདུག

ཐོག་མར་རྒྱ་ནག་གིས་ལོ་རབས་༩༠་པའི་ནང་དུ་ཞིན་ཅང་ནས་ཀིར་ཀི་སི་ཐན་དང་ཨུ་ཛི་བྷེ་ཀི་སི་ཐན་ལ་མེ་འཁོར་ལྕགས་ལམ་འཛུགས་སྐྲུན་བྱ་རྒྱུའི་གྲབས་བཤམས། ༡༩༩༧་ལོར་འབྲེལ་ཡོད་རྒྱལ་ཁབ་གསུམ་གྱིས་མེ་འཁོར་ལྕགས་ལམ་དེ་དགོས་ངེས་ཤིག་རེད་ཅེས་གྲོས་མཐུན་བཞག་ཀྱང་འཛུགས་སྐྲུན་འགོ་འཛུགས་མ་ཐུབ། ཧོ་ནན་གྱི་རྩོམ་པ་པོ་ལི་ཧྲུ་ཡུང་(Li Shuyong)་ཞེས་པ་ཞིག་གིས་རྒྱ་ནག་དང་ཀིར་ཀི་སི་ཐན། ཨུ་ཛི་བྷེ་ཀི་སི་ཐན་གསུམ་གྱི་མེ་འཁོར་ལྕགས་ལམ་དེ་ལོ་༢༧་འགོར་དགོས་དོན་ཅི་རེད། གྲང་དམག་གི་དུས་སུ་དབུས་ཨེ་ཤི་ཡ་ཧྲིལ་པོ་ཨུ་རུ་སུ་དམར་ཤོག་གི་མངའ་ཁོངས་སུ་གཏོགས། ཨུ་རུ་སུ་དམར་ཤོག་འཐོར་ཞིག་ཕྱིན་པའི་རྗེས་སུའང་དབུས་ཨེ་ཤི་ཡའི་རྒྱལ་ཁབ་ཁག་ར་ཤི་ཡའི་སྟངས་འཛིན་འོག་ནས་མ་ཐར། ར་ཤི་ཡ་གཅིག་པུས་ཁ་ཛཀ་སི་ཐན་གྱི་རྡོ་སྣུམ་དང་ཨུ་ཛི་བྷེ་ཀི་སི་ཐན་གྱི་སྲིན་བལ་སོགས་དབུས་ཨེ་ཤི་ཡའི་ཐོན་སྐྱེད་རྣམས་ཡུ་རོབ་ལ་སྐྱེལ་འདྲེན་བྱས་ནས་རྒྱ་ནག་ལ་མེ་འཁོར་ལྕགས་ལམ་འཛུགས་སྐྲུན་བྱེད་དུ་མ་བཅུག་པ་རེད་ཅེས་བསྟན།།

རྩོམ་པ་པོ་ལི་ཧྲུ་ཡུང་གིས་རྒྱ་ནག་དང་ཀིར་ཀི་སི་ཐན། ཨུ་ཛི་བྷེ་ཀི་སི་ཐན་གསུམ་གྱི་མེ་འཁོར་ལྕགས་ལམ་ལེགས་འགྲུབ་ན་དབུས་ཨེ་ཤི་ཡའི་ཐོན་སྐྱེད་རྣམས་ར་ཤི་ཡ་འབའ་ཞིག་ལ་བརྟེན་ནས་ཕྱིར་ཚོང་བྱེད་མི་དགོས། དབུས་ཨེ་ཤི་ཡའི་ཐོན་སྐྱེད་དེ་རྣམས་རྒྱ་ནག་ནས་ཨི་རན་དང་ཏུར་ཀི། གྷེ་རི་སི་བརྒྱུད་ནས་ཡུ་རོབ་ལ་སྐྱེལ་འདྲེན་བྱེད་ཆོག ད་ལྟ་ར་ཤི་ཡས་རྒྱ་ནག་དང་ཀིར་ཀི་སི་ཐན། ཨུ་ཛི་བྷེ་ཀི་སི་ཐན་གསུམ་གྱི་མེ་འཁོར་ལྕགས་ལམ་འཛུགས་སྐྲུན་བྱེད་ཆོག་ཅེས་མོས་མཐུན་བྱས་དོན་ནི་ཡུཀ་རེན་གྱི་དམག་འཁྲུག་གིས་ར་ཤི་ཡའི་བང་མཛོད་ཀྱི་དངུལ་སྒོར་རྣམས་ཟད། རྒྱལ་ཁབ་ལ་འགྲོ་གྲོན་མེད་པར་ཡུལ་ཐང་འཕར། ར་ཤི་ཡར་ནུབ་ཕྱོགས་རྒྱལ་ཁབ་ཁག་གིས་ཚོང་ལས་བཀག་པའི་གྱོང་གུད་དེ་རྒྱ་ནག་ལ་རྡོ་སྣུམ་དང་སོལ་རླངས་བཙོངས་ནས་གསབ་ཐབས་བྱེད་ཀྱི་འདུག རྒྱ་ནག་གིས་ར་ཤི་ཡའི་རྡོ་སྣུམ་དང་སོལ་རླངས་མང་ཙམ་ཉོ་དགོས་པས་མེ་འཁོར་ལྕགས་ལམ་འཛུགས་སྐྲུན་ལ་དགག་པ་བརྒྱབ་པ་ཕྱིར་འཐེན་བྱས་ནས་རྒྱ་ནག་ལ་དབུས་ཨེ་ཤི་ཡའི་ཚོང་ལས་ཀྱི་ཁེ་སང་བགོ་བཤའ་རྒྱག་གི་ཡོད་པ་རེད་ཅེས་བཀྲལ།།

ཕུ་ཊིན་གྱིས་རྒྱ་ནག་གི་འདོད་པ་ལྟར་གནད་དོན་གཞན་ཞིག་གི་ཐོག་ཏུ་གུ་བཤངས་བྱས་པ་ནི་སེ་བི་རི་ཡའི་སོལ་རླངས་ལྕགས་སྦུག་གཉིས་པ་ཡིན་ཞིང་། ཟླ་བ་སྔོན་མའི་ཚེས་༢༥་ཉིན་ར་ཤི་ཡའི་སྲིད་བློན་གཞོན་པ་ཨ་ལིཀ་ཛན་ཌར་ནོ་ཝག་(Alexander Novak)་གིས་སེ་བི་རི་ཡའི་སོལ་རླངས་ལྕགས་སྦུག་གཉིས་པ་དེ་སོག་ཡུལ་བརྒྱུད་ནས་རྒྱ་ནག་ལ་འཐེན་རྒྱུའི་ཚབ་ཏུ་ཁ་ཛཀ་སི་ཐན་བརྒྱུད་ནས་འཐེན་རྒྱུའི་གྲོས་མཐུན་བྱུང་སོང་། ལྕགས་སྦུག་དེ་འགྲུབ་ན་ལོ་རེར་སོལ་རླངས་མཱི་ཊར་ཤོ་གཟུགས་མ་ཐེར་འབུམ་༤༥༠་འདྲེན་གཏོང་ཐུབ། སོལ་རླངས་མཱི་ཊར་ཤོ་གཟུགས་མ་ཐེར་འབུམ་༡༠་ཁ་ཛཀ་སི་ཐན་ལ་བཙོང་རྒྱུ་དང་སོལ་རླངས་མཱི་ཊར་ཤོ་གཟུགས་མ་ཐེར་འབུམ་༣༥་ལ་རྒྱ་ནག་ལ་བཙོང་འཆར་ཡོད། ད་ལྟ་གྲོས་མཐུན་དེའི་ཞིབ་ཕྲ་ཁག་ལ་གྲོས་མོལ་བྱེད་ཀྱི་ཡོད་ཅེས་བསྒྲགས། སྲིད་བློན་གཞོན་པ་ནོ་ཝག་གི་སྐད་ཆ་དེས་ར་ཤི་ཡས་སོག་ཡུལ་བརྒྱུད་ནས་སོལ་རླངས་ལྕགས་སྦུག་འཐེན་རྒྱུ་མིན་པ་གསལ་སྟོན་བྱུང་།།

དངུལ་རྩའི་ཚགས་པར་ལ་གནས་ཚུལ་ཐོན་པ་ལྟར་ན། རྒྱ་ནག་གིས་ར་ཤི་ཡར་ཆུ་གྲང་རྒྱ་མ་གང་དྲོས་ཐུབ་པའི་སོལ་རླངས་བོངས་ཚད་ས་ཡ་༡་ལ་ཨ་སྒོར་༤.༤་ལས་སྤྲོད་ཀྱི་མེད་ཅིང་། ཡུ་རོབ་རྒྱལ་ཁབ་ཁག་གིས་ར་ཤི་ཡར་ཆུ་གྲང་རྒྱ་མ་གང་དྲོས་ཐུབ་པའི་སོལ་རླངས་བོངས་ཚད་ས་ཡ་༡་ལ་ཨ་སྒོར་༡༠་རིན་པ་སྤྲོད་ཀྱི་ཡོད་པས་རྒྱ་ནག་ལ་སོལ་རླངས་བཙོངས་ན་ཁེ་སང་ཕྱེད་ཀའང་མེད། ཀོ་ལུམ་བྷི་ཡ་སློབ་གྲྭ་ཆེན་མོའི་རྒྱལ་སྤྱིའི་ནུས་ཤུགས་ཞིབ་འཇུང་ཁག་གིས་༢༠༢༣་ལོར་རྒྱ་ནག་གི་སོལ་རླངས་མཱི་ཊར་ཤོ་གཟུགས་མ་ཐེར་འབུམ་༡༧༠་ནང་འདྲེན་བྱས་འདུག ཕྱི་ལོ་༢༠༣༠་ལོར་སོལ་རླངས་མཱི་ཊར་ཤོ་གཟུགས་མ་ཐེར་འབུམ་༢༥༠་ནང་འདྲེན་བྱ་དགོས་པར་འགྱུར་ཤས་ཆེ། ར་ཤི་ཡས་རྒྱ་ནག་གི་འདོད་པ་ལྟར་སེ་བི་རི་ཡའི་ལྕགས་སྦུག་གཉིས་པ་འཐེན་རྒྱུའི་མོས་མཐུན་བྱས་མོད། འོན་ཀྱང་ལྕགས་སྦུག་དེའི་ནང་དུ་ལོ་ལྟར་སོལ་རླངས་མཱི་ཊར་ཤོ་གཟུགས་མ་དུང་ཕྱུར་༥༠༠་གཏོང་ཐུབ་པ་དེའི་ཆ་ཤས་ཤིག་ལས་རྒྱ་ནག་གིས་ཉོ་འཆར་མི་འདུག ར་ཤི་ཡའི་གཞུང་གིས་རྒྱལ་ནང་དུ་སོལ་རླངས་རིན་གོང་བཅག་ནས་འཚོང་གི་ཡོད་པ་ལྟར་རྒྱ་ནག་ལ་བཙོང་དགོས་ཟེར་གྱི་འདུག་ཅེས་སྙན་ཐོ་བཏོན།།

རྒྱ་ནག་གི་ཧྲན་ཤིའི་རྩོམ་པ་པོ་དང་ཨེ་ཤི་ཡ་ཞི་བདེ་རྒྱལ་མཚོའི་ཉིན་རེའི་ཚགས་པར་གྱི་དམག་དོན་དཔྱད་ཞིབ་པ་ཧྲི་ཅང་ཡུའི་(Shi Jiangyue)་ཞེས་པ་ཞིག་གིས་སོག་ཡུལ་ལ་སོལ་རླངས་བརྒྱུད་གཏོང་གི་ཡོང་འབབ་ཨ་སྒོར་ས་ཡ་མང་པོ་མེད་པར་འགྱུར་རྒྱུ་ཡིན་པར་མ་ཟད། སོག་ཡུལ་གྱི་རྨང་གཞིའི་མཐུན་རྐྱེན་འཛུགས་སྐྲུན་དང་མ་རྩ་འཛུགས་འཇོག ར་ཤི་ཡར་ཕྱི་འབྲེལ་སྲ་བརྟན་གཏོང་བའི་གོ་སྐབས་སོགས་མེད་པར་གྱུར་པ་རེད། དེ་ནི་སོག་ཡུལ་གྱིས་འཛམ་གླིང་ཡོངས་ལ་འབྲེལ་བ་འཛིན་རྒྱུའི་ཕྱི་སྲིད་ཅིག་ལག་ལེན་བསྟར་བའི་ཉེར་ལེན་རེད་ཅེས་བཀྲལ། སོག་ཡུལ་གྱིས་ཨ་རི་དང་ཡུ་རོབ་ལ་འབྲེལ་བ་ཡག་ཏུ་གཏོང་གི་ཡོད་པར་རྒྱ་ནག་མ་དགའ་བའམ། ཡང་ན་རྒྱ་ནག་གིས་དོགས་ཟོན་བྱས་ནས་ར་ཤི་ཡར་སོག་ཡུལ་བརྒྱུད་ནས་རྒྱ་ནག་ལ་སོལ་རླངས་ལྕགས་སྦུག་འཐེན་རྒྱུ་བསྒྱུར་དགོས་ཞེས་དགོས་འདུན་བཏོན་པའི་གནས་ཚུལ་ཐོན་འདུག

རྒྱ་ནག་གིས་ར་ཤི་ཡའི་རྡོ་སྣུམ་དང་སོལ་རླངས་ཉོས་ཀྱང་ཁྲོམ་རའི་རིན་གོང་དེ་སྤྲོད་ཀྱི་མེད་པ་སྟེ། ན་ནིང་ཕྱི་ཟླ་༦་པའི་ཚེས་༣་ཉིན་གཟའ་འཁོར་གསར་འགྱུར་དུས་དེབ་ཀྱིས་ར་ཤི་ཡའི་ནུས་ཤུགས་བློན་ཆེན་ཟུར་པ་མཱི་ལོབ་(Vladimir Milov)་ལ་བཅར་འདྲི་ཞུས་ནས་གསར་འགྱུར་སྤེལ་བ་ལྟར་ན། ར་ཤི་ཡའི་སོལ་རླངས་རྒྱ་ནག་ལ་བཙོངས་ན་ཡུ་རོབ་ལ་བཙོངས་པ་ལྟར་གྱི་ཁེ་སང་ཞིག་ནམ་ཡང་ཐོབ་མི་སྲིད། ཕུ་ཊིན་གྱིས་ཁྱིམ་མཚེས་རྒྱལ་ཁབ་ཡུཀ་རེན་ལ་བཙན་འཛུལ་བྱས་ནས་ཡུ་རོབ་རྒྱལ་ཁབ་ཁག་ལ་སོལ་རླངས་བཙོང་སའི་ཁྲོམ་ར་མེད་པར་གྱུར་པ་རེད། ར་ཤི་ཡས་རྡོ་སྣུམ་དང་སོལ་རླངས་བཙོངས་ནས་མུ་མཐུད་དུ་དམག་འཁྲུག་གི་འགྲོ་གྲོན་གཏང་ཐུབ་རྒྱུ་ཁག་པོ་རེད། ༢༠༢༣་ལོར་ར་ཤི་ཡར་སོལ་རླངས་དང་རྡོ་སྣུམ། གློག་ཕྱིར་ཚོང་གི་ཡོང་འབབ་ཨ་སྒོར་དུང་ཕྱུར་༦༩་གྱོང་གུད་ཕོག་འདུག ར་ཤི་ཡའི་སོལ་རླངས་ཀྱི་ཁེ་སང་ཤུགས་ཆེ་ཤོས་དེ་ཡུ་རོབ་ནས་ཡོང་གི་ཡོད་ཀྱང་ཕྱིས་སུ་ཡུ་རོབ་ལ་བསྐྱར་དུ་ར་ཤི་ཡའི་སོལ་རླངས་བཙོང་ཐུབ་རྒྱུ་དཀའ་བར་སྣང་ཞེས་བཤད་འདུག