ཟླ་བ་གོང་མའི་ནང་ལྷོ་ཨ་ཧྥེ་རི་ཀས་རྒྱལ་སྤྱིའི་ཁྲིམས་ཁང་ལ་ཨི་སི་རལ་གྱིས་གྷ་ཛ་ལུང་གཤོངས་སུ་རིགས་རྒྱུད་རྩ་མེད་གཏོང་བཞིན་ཡོད་པའི་ནག་ཉེས་བཙུགས་ཡོད་པ་དང་། རྒྱལ་སྤྱིའི་ཁྲིམས་ཁང་གིས་སྤྱི་ཟླ་དང་པོའི་ཚེས་༡༡ རེས་གཟའ་ཕུར་བུ་དང་ཚེས་༡༢ རེས་གཟའ་པ་སངས་བཅས་ཉིན་གྲངས་གཉིས་རིང་གྱོད་དོན་དེའི་ཐད་ཉན་ཞིབ་ཚོགས་འདུ་བསྐངས་ཏེ། ལྷོ་ཨ་ཧྥེ་རི་ཀའི་བཏོན་པའི་མེ་འཕེན་མཚམས་འཇོག་གི་དགོས་འདུན་ཐད་བསམ་འཆར་བསྡུ་ལེན་བྱ་འགོ་ཚུགས་པ་དང་། ཨི་སི་རལ་གྱིས་དེའི་ཐད་རང་སྲུང་གིས་དག་སེལ་བྱས་ནས་ཁྲིམས་ཐོག་རྩོད་གླེང་བྱེད་པའི་ཞི་བའི་དམག་འཁྲུག་ཅིག་ལངས་ཡོད་པ་རེད།
བདུན་ཕྲག་གོང་མའི་རེས་གཟའ་ཕུར་བུའི་ཉིན་ལ། ཨི་སི་རལ་གྱི་བཙན་བཟུང་འོག་ཡོད་པའི་ནུབ་ཆུ་ཁ་དང་ལྗི་རུ་ས་ལུམ་ཤར་མར་གནས་སྡོད་པ་ལི་སི་ཐན་གྱི་མི་ཚོས་ས་ཐག་རིང་བའི་རྒྱལ་སྤྱིའི་ཁྲིམས་ཁང་ནང་གི་གཏུགས་བཤེར་ཉེས་འཛུགས་ཀྱི་བརྒྱུད་རིམ་ལ་དོ་སྣང་དང་ཡིད་དབང་འཕྲོག་པ་བྱུང་ཡོད་ཅིང་། ལྷོ་ཨ་ཧྥེ་རི་ཀའི་རྒྱལ་ཁབ་ཀྱིས་ཨི་སི་རལ་ལ་གྷ་ཛ་ལུང་གཤོངས་སུ་རིགས་རྒྱུད་རྩ་གཏོང་བའི་ཉེས་འཛུགས་བྱས་ཏེ། རྒྱལ་ཚོགས་ཀྱི་ཆེས་མཐོའི་ཁྲིམས་ཁང་དུ་སྔར་ལོ་རྒྱུས་ནང་བྱུང་མྱོང་མེད་པའི་གྱོད་དོན་གལ་ཆེན་ཞིག་གི་ཐད་ཉན་ཞིབ་ཚོགས་འདུ་འཚོག་འགོ་ཚུགས་ཡོད་པ་རེད།
གོང་ཞུ་ཡུལ་གྲུ་དེའི་པ་ལི་སི་ཐན་གྱི་དགའ་ཉེ་གྲོགས་པོ་དང་ཁྱིམ་མི་རྣམས་ནང་གི་ཚོམས་ཆེན་དང་། ཁ་ཧྥེ་ཁང་སོགས་སུ་ལྷན་འཛོམས་ཀྱིས། ནེ་ཌར་ལན་ཌིའི་ནང་རྟེན་གཞི་བྱས་ཡོད་པའི་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་ཁྲིམས་ཁང་དུ་ཁྲིམས་ར་འཚོགས་ནས་ཞིབ་དཔྱོད་ཚུགས་པའི་ཐད་དོ་སྣང་བྱེད་བཞིན་པ་དང་། གླ་འཁོར་ཁ་ལོ་བ་ཚོས་ལས་ཀའི་བར་གསེང་ནས་ཁ་པར་བརྒྱུད་ནས་རྒྱལ་སྤྱིའི་ཁྲིམས་ཁང་གི་ཐད་གཏོང་ལ་ལྟ་བཞིན་ཡོད་པ་རེད།
བརྙན་འཕྲིན་གྱི་ཤེལ་ཡོལ་ངོས་སུ་གྷ་ཛ་ལུང་གཤོངས་སུ་མི་གསོད་ཁག་སྦྱོར་དང་གཏོར་རྒོལ་གྱི་བརྙན་རིས་སྣ་ཚོགས་འཆར་བཞིན་ཡོད་པ་དང་། དེ་དང་ཆབས་གཅིག་བརྙན་འཕྲིན་བརྒྱུད་གཏོང་བྱེད་པའི་བརྙན་མིག་གི་ངོས་སུ་ཁྲིམས་རྩོད་པ་དང་ཁྲིམས་དཔོན་བར་རྩོད་པ་གཏོང་བའི་ངང་ཚུལ་མཐོང་རྒྱུ་ཡོད་པ་རེད། ནུབ་ཆུ་ཁའི་ནུབ་རྒྱུད་ཀྱི་རཱ་མ་ལའི་གྲོང་ཁྱེར་གྱི་ཁ་ཧྥེ་ཁང་ཞིག་ཏུ་མི་ཚོས་ལྷོ་ཨ་ཧྥེ་རི་ཀའི་ཁྲིམས་འཛིན་བློན་ཆེན་གྱིས་“ལོ་ངོ་བཅུ་གྲངས་རིང་འཆར་གཞི་དང་གོ་རིམ་ལྡན་པའི་སྒོ་ནས་པ་ལི་སི་ཐན་མི་ཚོར་གཉའ་གནོན་དང་དྲག་སྤྱོད་སྤེལ་”ཐད་འགྲེལ་བརྗོད་བྱེད་སྐབས། དེར་འདུས་ཀྱི་མི་ཚང་མ་དགའ་སྐྱོ་ཟུང་འབྲེལ་གྱི་ཚོར་བ་དྲག་པོ་བརྒུལ་ཏེ། རྐུབ་བཀྱག་ལས་ཡར་ལངས་ཏེ་སྐད་འབོད་བྱས་པ་དང་ངུ་ཤར་རྒྱག་པ་སོགས་བྱས་ཡོད་པ་རེད།
ལོ་ན་༢༥ ཡིན་པའི་ཁྲིམས་རྩོད་པ་མིང་ལ་ཨ་ས་ལཱ་མན་སོར་ཏུ་འབོད་པ་ཞིག་གིས། ངས་རྒྱལ་སྤྱིའི་སྤྱི་ཚོགས་ཀྱིས་ཨི་སི་རལ་ལ་འགན་འཁྲི་བདའ་དེད་གཏོང་བའི་དོན་དངོས་དེ་ལ་ཧ་ལས་ཧང་སངས་སོང་། ཞེས་དང་། ངའི་ངོས་ནས་གྱོད་དོན་དེས་པ་ལི་སི་ཐན་མི་དམངས་ཀྱིས་རྒྱལ་སྤྱིའི་སྤྱི་ཚོགས་ལ་ཡིད་ཆེས་དང་རེ་བ་བསྐྱར་གསོ་བྱུང་བ་ཐེངས་མ་དང་པོ་ཡིན་པའི་ཉམས་སྣང་བྱུང་ཞེས་བརྗོད་ཡོད་པ་དང་། ཨི་སི་རལ་གྱིས་རིགས་རྒྱུད་རྩ་མེད་གཏོང་བའི་ཉེས་འཛུགས་དེར་ངོ་ལེན་མེད་པའི་དགག་པ་ཤུགས་ཆེ་རྒྱག་དགོས་བྱུང་ཡོད་པར་མ་ཟད། ཐེངས་མ་དང་པོ་དངོས་སུ་ཁུངས་སྐྱེལ་དག་འབུད་བྱས་དགོས་བྱུང་ཡོད་པ་དེས། གྱོད་དོན་དེའི་མཚོན་དོན་ཅི་ཞིག་ཡིན་པ་ར་སྤྲོད་གསལ་པོ་བྱས་ཡོད་པ་རེད། ལྷོ་ཨ་ཧྥེ་རི་ཀའི་རྒྱལ་ཁབ་ཀྱི་ངོས་ནས་རྒྱལ་སྤྱིའི་ཁྲིམས་ཁང་གིས་མགྱོགས་མྱུར་དུ་ཨི་སི་རལ་གྱིས་རིགས་རྒྱུད་རྩ་མེད་གཏོང་བའི་ནག་ཉེས་ལ་ཁྲིམས་ཐག་བཅད་དེ། གོམ་པ་དང་པོ་ལ་གྷ་ཛའི་དམག་འཁྲུག་མཚམས་འཇོག་གི་བཀོད་ཁྱབ་གཏོང་དགོས་པའི་རེ་བ་བྱེད་ཀྱི་ཡོད་པ་རེད།
ཨ་རིའི་མཉམ་འབྲེལ་གསར་ཁང་གིས་གནས་ཚུལ་སྤེལ་དོན་ལྟར་ན། ད་ཕན་རྒྱལ་ཁབ་༥༠ ལྷག་གིས་རྒྱལ་ཚོགས་ཀྱི་ཆེས་མཐོའི་ཁྲིམས་ཁང་ནང་། གྷ་ཛ་ལུང་གཤོངས་སུ་ཨི་སི་རལ་གྱིས་པ་ལི་སི་ཐན་གྱི་མིར་རིགས་རྒྱུད་རྩ་མེད་གཏོང་བའི་ཉེས་འཛུགས་ཀྱི་གྱོད་དོན་ཐད་རྒྱལ་སྐྱོར་བྱས་ཡོད་པ་དང་། ལྷོ་ཨ་ཧྥེ་རི་ཀས་ཧ་མ་སིས་སྤྱི་ཟླ་བཅུ་པའི་ཚེས་བདུན་ཉིན་གྱི་འཇབ་རྒོལ་ལའང་དེ་མཚུངས་ཀྱི་སྐྱོན་བརྗོད་བྱེད་ཀྱི་ཡོད་ཀྱང་། དོན་རྐྱེན་དེས་ཨི་སི་རལ་གྱི་ད་ལྟའི་བྱེད་སྟངས་དེ་བཞིན་ལུགས་མཐུན་ཡིན་པའི་སྒྲུབ་བྱེད་དུ་ངོས་འཛིན་བྱེད་ཀྱི་མེད་པ་རེད།
ཨི་སི་རལ་གྱི་ཕྱོགས་ནས་རིགས་རྒྱུད་རྩ་མེད་གཏོང་བའི་ཉེས་འཛུགས་ཐད་ངོ་རྒོལ་དྲག་པོ་བྱས་ཡོད་པར་མ་ཟད། ཁྲིམས་ལུགས་མཁས་པའི་ཚོགས་པ་ཞིག་ཆེད་གཉེར་མངགས་གཏོང་བྱས་ཏེ། ཟླ་བ་བཅུ་པའི་ཚེས་བདུན་ཉིན་གྱི་ཧ་མ་སིས་འཇབ་རྒོལ་གྱི་དམག་དོན་བྱ་སྤྱོད་ཐད་ཁུངས་སྐྱེལ་དག་འབུད་བྱས་ཡོད་ཅིང་། གཏུགས་བཤེས་ཉེས་འཛུགས་ཀྱི་གྱོད་དོན་དེ་ཡོངས་སུ་མཇུག་མ་རྫོགས་བར་གྱི་བརྒྱུད་རིམ་ཆ་ཚང་ལ་ཕལ་ཆེར་ལོ་ངོ་འགའ་ཤས་འགོར་སྲིད་པ་རེད།
གླེང་སྟེགས།