པ་ཀིས་ཐན་གྱི་དྲིལ་བསྒྲགས་བློན་ཆེན་གྱིས་པ་ཀིས་ཐན་གཞུང་གིས་སྲིད་བློན་ཟུར་པ་ཨིམ་རན་ཁན་གྱི་ཆབ་སྲིད་ཚོགས་པ་ཏེ་རིག་ཨེ་ཨིན་སབ་ཅེས་པ་དེ་ཁྲིམས་ཐོག་བཀག་འགོག་བྱ་རྒྱུའི་ཐག་གཅོད་བྱས་ཡོད་པ་དང་། དེ་ནི་ཚོགས་པ་དེས་རྒྱལ་ནང་གི་ཁྲིམས་ལུགས་དང་འགལ་ནས་ཕྱི་རྒྱལ་ནས་དངུལ་ལེན་ཡོད་པ་ཁྲིམས་ཐོག་ཁུངས་སྐྱེལ་ར་འཕྲོད་བྱུང་ཡོད་པ་མ་ཟད། ཚོགས་པ་དེས་ན་ནིང་རྒྱལ་ནང་གི་དྲག་པོའི་བརྟེན་གཞིར་རྒོལ་རྡུང་དང་འབྲེལ་་ཟིང་ཆ་སློང་རྒྱུའི་དམིགས་ཡུལ་བཅངས་ཡོད་པ་བཅས་ལ་གཞི་བཞག་ནས་ཐག་གཅོད་བྱས་པ་ཡིན་ཞེས་འགྲེལ་བརྗོད་བྱས་འདུག
པ་ཀིས་ཐན་སྲིད་གཞུང་གིས་ཆབ་སྲིད་ཚོགས་པ་ཁྲིམས་ཐོག་བཀག་འགོག་བྱ་རྒྱུ་དེ་བློན་ཆེན་ལྷན་ཚོགས་ལ་སྙན་སེང་ཞུ་རྒྱུ་ཡིན་ཅིང་། བློན་ཆེན་ལྷན་ཚོགས་ལ་ཐག་གཅོད་གནང་རྒྱུའི་དབང་ཚད་ཡོད་རེད་ཅེས་འགྲེལ་བརྗོད་བྱས་འདུག
པ་ཀིས་ཐན་གཞུང་གིས་སྲིད་བློན་ཟུར་པ་ཨིམ་རན་ཁན་དང་སྲིད་འཛིན་ཟུར་པ་ཨ་རིཕ་ ཨལ་ཝི་གཉིས་ཀྱིས་རྩ་ཁྲིམས་ཀྱི་འོག་རྒྱལ་ཁབ་ལ་རྒྱབ་གཏོད་བྱས་པའི་ནག་ཉེས་དེ་ཆེས་མཐོའི་ཁྲིམས་ཁང་ལ་ཞུ་གཏུག་བྱ་རྒྱུ་ཡིན་ཞེས་བཤད་འདུག
སྲིད་བློན་ཟུར་པའི་ཕྱག་རོགས་ཛུལ་ཕི་ཀར་ བྷུ་ཁ་རིས་བརྗོད་དོན་ལ་ གཞུང་གི་ཐག་གཅོད་དེ་ནི་འཇམ་པོའི་ཐབས་ཀྱི་དྲག་པོའི་ཁྲིམས་གཞིའི་ཕྱོགས་སུ་བསྐྱོད་པ་གཅིག་ཡིན་ཅིང་། ཡུལ་གྱི་ཁྲིམས་ཁང་ལ་རྡིག་སྐུལ་དང་གནོན་ཤུགས་འགྲོ་ཉེན་གྱི་བློ་འཚབ་བྱེད་འོས་པའི་རྟགས་རེད་ཅེས་འགྲེལ་བརྗོད་བྱས་འདུག་
པ་ཀིས་ཐན་ནང་ཟིང་ཆའི་གནས་ཚུལ་གསར་ཤོས་དེ་པ་ཀིས་ཐན་གཞུང་གིས་རྒྱལ་སྤྱིའི་མ་དངུལ་ཐེབས་རྩ་ཁང་ནས་ཨ་སྒོར་ཐེར་འབུམ་བདུན་ཙམ་ཐོབ་ཐབས་ལ་ཞིང་པ་ཚོ་ནས་དཔྱ་ཕྲལ་སྤར་རྒྱུའི་འཆར་གཞི་སོགས་བཅོས་འགྱུར་ལ་མི་མང་གི་འདོད་པ་མེད་པའི་རྣམ་འགྱུར་ཤུགས་ཆེར་ཡོད་པའི་སྐབས་འདིར་བྱུང་བ་ཞིག་ཡིན་པ་རེད།
གཟའ་འཁོར་སྔོན་མར་ཆེས་མཐོའི་ཁྲིམས་ཁང་གིས་སྲིད་བློན་ཟུར་པའི་ཚོགས་པར་གྲོས་ཚོགས་ནང་གདན་གྲངས་འཕར་མ་༢༠ཟུར་འཇོག་བྱ་རྒྱུའི་འོས་ཆོས་འདུག་ཅེས་གསུངས་ཡོད་པ་དེས་ མནའ་འབྲེལ་གཞུང་འཛིན་ཚོགས་པར་གནས་སྟངས་སྲ་བརྟན་མེད་པའི་གནོན་ཤུགས་བྱུང་ཡོད།
ད་ལྟའི་འཆར་པ་ཀིས་ཐན་སྲིད་གཞུང་གིས་སྲིད་བློན་ཟུར་པའི་ཆབ་སྲིད་ཚོགས་པ་བཀག་འགོག་བྱ་རྒྱུ་དེ་དང་། ཆེས་མཐོའི་ཁྲིམས་ཁང་གིས་ཁོང་ཚོར་གྲོས་ཚོགས་ནང་གདན་གྲངས་འཕར་མ་སྤྲོད་རྩིས་ཡོད་པའི་གནད་དོན་དེ་གཉིས་ལ་འབྲེལ་བ་ཇི་ཡོད་ད་ལྟའི་འཆར་ཤེས་རྟོགས་དཀའ་བར་གྱུར་ཡོད།
པ་ཀིས་ཐན་སྲིད་གཞུང་གིས་སྲིད་བློན་ཟུར་པའི་ཆབ་སྲིད་ཚོགས་པ་ཁྲིམས་ཐོག་བཀག་འགོག་བྱ་རྒྱུའི་རྒྱུ་རྐྱེན་གཅིག་ནི། སྲིད་དོན་ཚོགས་པ་དེས་ཨ་རིའི་གྲོས་ཚོགས་ནང་པ་ཀིས་ཐན་གྱི་འོས་བསྡུར་ངོས་འཛིན་མེད་པའི་གྲོས་ཆོད་འཇོག་ཐབས་བྱེད་ཀྱི་ཡོད་པ་དང་། རྒྱལ་སྤྱིའི་མ་དངུས་ཐེབས་རྩ་ཁང་ལ་འོས་བསྡུའི་གྲུབ་འབྲས་ལ་གྲངས་བཤེར་བྱེད་དགོས་པའི་སྙན་ཞུ་ཕུལ་པ་དེ་གཉིས་རེད་ཅེས་བརྗོད་ཀྱི་ཡོད་པ་རེད། དེར་ཕྱི་རྒྱལ་ཡུལ་ཁག་ནས་རྒྱབ་སྐྱོར་ཡོང་ཐབས་བྱས་པ་གཉིས་ཡིན་པར་ངོས་འཛིན་བྱེད་ཀྱི་ཡོད།
དེ་བཞིན་རང་དབང་ལྡན་པ་་པ་ཀིས་ཐན་གྱི་འགྲོ་བ་མིའི་ཐོབ་ཐང་ལས་ཁང་གིས་སྤྱི་ཚོགས་དྲ་ལམ་ཨེཀྶ་ཞེས་པར་གཞུང་གི་ཐག་གཅོད་དེ་དག་ནི་ཧང་སང་དགོས་པ་ཞིག་ཡིན་སྐོར་བཤད་ནས་ཐག་གཅོད་དེ་དག་ཕྱིར་འཐེན་དགོས་པར་ནན་སྐུལ་བྱས་འདུག
སྲིད་བློན་ཟུར་པ་ཨིམ་རན་ཁན་ཁ་སྔོན་ཕྱི་ཟླ་༨ པ་ནས་དོ་དམ་བཙོན་འཇུག་འོག་གནས་མུས་ཡིན་པ་དང་། གཟའ་སྤེན་པའི་ཉིན་ཁོང་གི་ཆུང་མ་གསུམ་པ་དེ་དང་་ཁྲིམས་འགལ་ཐོག་གཉེན་སྒྲིག་བྱས་པའི་ནག་ཉེས་དེ་ཉེས་མེད་ཀྱི་ཁྲིམས་ཐག་བཅད་ཡོད་ནའང་། གཞུང་ཕྱོགས་ནས་གོང་གི་་གནད་དོན་ཁག་གི་ཐོག་ཉེས་འཛུགས་བྱེད་ཀྱི་ཡོད་པ་དེས་ཁོང་བཙོན་ཁང་ནས་གློད་དཀྲོལ་ཐོབ་རྒྱུ་ཁག་པོ་ཡིན་པའི་ཚོད་དཔག་བྱེད་ཀྱི་་ཡོད་པ་རེད།
རུའི་ཌར་དང་ཨེ་ཨཧྥ་པི་གསར་སྤེལ་ལས་ཁང་ནས་བཏུས།
གསར་འགོད་པ། ཚེ་བརྟན་ཆོས་སྒྲོན།
ཞུ་དག་རྩོམ་སྒྲིག་པ། རྣམ་རྒྱལ་ཤཱསྟྲཱི།
གླེང་སྟེགས།