༄༅།། པ་ཀི་སི་ཐན་གྱིས་ཨི་རན་ལ་རྒོལ་ལན་བསློགས་ནས་མི་༩་བསད། ཁ་སྔོན་གཟའ་མིག་དམར་ཉིན་ཨི་རན་གྱིས་པ་ཀི་སི་ཐན་ལ་གཏོར་རྒོལ་བྱས་ནས་བྱིས་པ་གཉིས་བསད་པའི་གནས་ཚུལ་ཐོན། ཕྱི་ཟླ་དང་པོའི་ཚེས་༡༨་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཨི་རན་གྱི་ས་ཐོག་ཏུ་སྐུང་ཡོད་པའི་དྲག་སྤྱོད་པའི་བཙན་ས་ཞིག་ལ་པ་ཀི་སི་ཐན་གྱིས་མཁའ་དབྱིངས་ནས་གཏོར་རྒོལ་བྱས་པ་ནི་སྔ་ཉིན་དེར་ཨི་རན་གྱིས་པ་ཀི་སི་ལ་གཏོར་རྒོལ་བྱས་པར་ལན་པ་བསློགས་པ་ཞིག་ཡིན་པའི་རྣམ་པ་མངོན། དེ་རིང་གཟའ་ཕུར་བའི་ཉིན་པ་ཀི་སི་ཐན་གྱི་ཕྱི་སྲིད་ལྷན་ཁང་གིས་ང་ཚོའི་གཏོར་རྒོལ་དེ་དཔུང་སྡེ་ཁག་གི་མཉམ་འབྲེལ་དམ་ཟབ་དང་དམིགས་འབེན་གཙིགས་འཛིན་གྱི་གཏོར་རྒོལ་ཞིག་ཡིན། ད་ནངས་ཞོགས་པའི་གཏོར་རྒོལ་དེ་འཇིགས་སྐུལ་རིང་ལུགས་པ་ཚོས་རྒོལ་རྡུང་ཆེན་པོ་ཞིག་བྱ་འཆར་ཡོད་པ་ཤེས་རྟོགས་བྱུང་ནས་ཕར་རྒོལ་བྱས་པ་ཡིན། ཐེངས་འདིའི་གཏོར་རྒོལ་དེས་པ་ཀི་སི་ཐན་གྱི་དམག་ལ་རྒྱལ་ཁབ་དང་བདེ་འཇགས་སྲུང་སྐྱོབ་ཀྱི་གྲ་སྒྲིག་ཡོད་པ་མཚོན་ཐུབ་ཅེས་བསྒྲགས།།
པ་ཀི་སི་ཐན་གྱི་དམག་གི་མགྲིན་ཚབ་པས་ང་ཚོས་ཁ་ལོ་བ་མེད་པའི་འཕུར་གྲུ་དང་མེ་ཤུགས་འཕུར་མདའ། འཕུར་མདེལ་འཕངས་ནས་གཏོར་རྒོལ་བྱས་ཀྱང་ཨི་རན་གྱི་མཁའ་དབྱིངས་མངའ་ཁོངས་སུ་དཔུང་འཛུལ་བྱས་མེད། ང་ཚོས་གཏོར་རྒོལ་བྱ་ཡུལ་ཁག་ཅིག་བྷ་ལུ་ཆི་སི་ཐན་བཅིངས་འགྲོལ་མདུན་སྐྱོད་ཚོགས་པའི་བཙན་ས་ཁག་ཡིན་ཟེར། བྷ་ལུ་ཆི་སི་ཐན་བཅིངས་འགྲོལ་མདུན་སྐྱོད་ཚོགས་པས་ཕྱི་ལོ་༢༠༠༠་ནས་གྱེན་ལོག་བྱ་རྒྱུ་མགོ་བརྩམས། ཁོ་ཚོ་ཚོ་ཤོག་གི་ཁ་བྲལ་རིང་ལུགས་པའི་སྒྲིག་འཛུགས་ཤིག་ཡིན་པ་དང་ཚོགས་པ་དེའི་ལས་སྣེ་ཚོས་པ་ཀི་སི་ཐན་གྱི་དམག་གིས་གཏོར་རྒོལ་བྱས་ནས་མི་མང་དཀྱུས་མ་དམར་གསོད་བྱས་སོང་ཞེས་གསལ་བསྒྲགས་སྤེལ། བྷ་ལུ་ཆི་སི་ཐན་གྱི་ཧལ་ཝ་ཤ་ཚོགས་པས་པ་ཀི་སི་ཐན་གྱི་དམག་གིས་གཏོར་རྒོལ་བྱས་ནས་ས་ར་ཝན་ས་གནས་ཀྱི་ཁང་པ་མང་པོ་གཏོར་བཤིགས་བཏང་བ་དང་གཏོར་རྒོལ་ཕོག་ཡུལ་ཁག་ཏུ་དུ་བ་འཕྱུར། འཕུར་མདེལ་གྱི་ཆག་རོ་སོགས་འདྲ་པར་བླངས་ནས་དྲྭ་ལམ་དུ་བཀྲམ།།
ཨི་རན་གྱི་སི་ས་ཏན་དང་བྷ་ལུ་ཆི་སི་ཐན་ཞིང་ཆེན་གྱི་སྤྱི་ཁྱབ་གཞོན་པ་ཨ་ལི་རེ་ཛས་པ་ཀི་སི་ཐན་གྱིས་གཏོར་རྒོལ་བྱས་ནས་ཨི་རན་གྱི་སི་ས་ཏན་དང་བྷ་ལུ་ཆི་སི་ཐན་ཞིང་ཆེན་གཉིས་ཀྱི་ས་མཚམས་སུ་བུད་མེད་གསུམ་དང་ཕྲུ་གུ་བཞི། སྐྱེས་པ་གཉིས་བཅས་མི་༩་ལ་སྲོག་སྐྱོན་ཕོག་ཀྱང་མི་དེ་ཚོ་ཨི་རན་གྱི་སྤྱི་དམངས་མ་རེད་ཅེས་བཀྲལ། པ་ཀི་སི་ཐན་གྱི་བྷ་ལུ་ཆི་སི་ཐན་ཞིང་ཆེན་དང་ཨི་རན་གྱི་སི་ས་ཏན། བྷ་ལུ་ཆི་སི་ཐན་ཞིང་ཆེན་གསུམ་སྟེ། པ་ཀི་སི་ཐན་གྱི་ནུབ་ཕྱོགས་དང་ཨི་རན་གྱི་ལྷོ་ཤར་ཕྱོགས་ས་འདྲེས་ཡིན་ཞིང་། བྷ་ལུ་ཆི་སི་ཐན་གྱི་ས་ཆ་མང་ཆེ་བ་པ་ཀི་སི་ཐན་དང་ས་ཆ་ཁག་ཅིག་ཨི་རན་གྱི་དབང་བསྒྱུར་འོག་ཏུ་ཚུད། པ་ཀི་སི་ཐན་གྱི་དབང་བསྒྱུར་འོག་ཏུ་ཡོད་པའི་བྷ་ལུ་ཆི་སི་ཐན་བ་ཚོས་གྱེན་ལོག་བྱས་ནས་རང་བཙན་འཐབ་རྩོད་ཀྱི་དམག་འཁྲུག་ལ་ཞུགས། ཨི་རན་གྱི་མངའ་འོག་ཏུ་ཚུད་པའི་བྷ་ལུ་ཆི་སི་ཐན་བ་ཚོས་རང་ལ་གཞི་རྩའི་ཐོབ་ཐང་ཁག་མི་འདུག་ཅེས་འཐབ་འཁྲུག་བསླངས།།
པ་ཀི་སི་ཐན་གྱི་མང་ཚོགས་དང་བྷ་ལུ་ཆི་སི་ཐན་བ་རྣམས་ཁ་ཆེའི་སུ་ཎི་ཆོས་རྒྱུད་ཀྱི་རྗེས་འཇུག་པ་ཡིན་པ་དང་ཨི་རན་ནི་འཛམ་གླིང་གི་ཁ་ཆེའི་ཤི་ཡ་ཆོས་རྒྱུད་ཀྱི་གྲུབ་མཐའ་འཛིན་པའི་རྒྱལ་ཁབ་གཙོ་དེ་ཡིན་པར་བརྟེན། འདས་པའི་ལོ་བཅུ་ཕྲག་གཉིས་ལྷག་གི་གོང་ནས་ཨི་རན་དང་པ་ཀི་སི་ཐན་གྱི་དབང་བསྒྱུར་འོག་ཏུ་པའི་བྷ་ལུ་ཆི་སི་ཐན་བ་ཚོས་རང་ལ་ཟས་གོས་གནས་མལ་སོགས་གཞི་རྩའི་འཚོ་བའི་མཐུན་རྐྱེན་ཁག་མེད་པ་ནི་གཅིག་མཚུངས་རེད། པ་ཀི་སི་ཐན་གཞུང་གིས་བྷ་ལུ་ཆི་སི་ཐན་གྱི་གཏེར་ཁ་སྔོག་འདོན་བྱས་ཀྱང་ས་གནས་མི་དམངས་ལ་ཡོང་འབབ་བགོ་བཤའ་རྒྱག་གི་མི་འདུག ཨི་རན་ནི་ཤི་ཡ་ཆོས་རྒྱུད་ཀྱི་རྗེས་འཇུག་རྒྱལ་ཁབ་གཙོ་བོ་དེ་ཡིན་པས་སུ་ཎི་ཆོས་རྒྱུད་འཛིན་པའི་བྷ་ལུ་ཆི་སི་ཐན་བ་ཚོར་གཉའ་གནོན་དང་དབྱེ་འབྱེད། མཐོང་ཆུང་བྱེད་ཀྱི་འདུག་ཅེས་སྡུག་སྐད་བརྒྱབ། པ་ཀི་སི་ཐན་དང་ཨི་རན་གཉིས་ཀྱི་འོག་ཏུ་ཚུད་པའི་བྷ་ལུ་ཆི་སི་ཐན་བ་ཚོས་རང་བཙན་དང་མི་རིགས་ཀྱི་ཐོབ་ཐང་བརྩད། ཇཱེ་ཡེ་ཤ་ཨལ་ཨ་ཌིལ་ཚོགས་པ་ནི་བྷ་ལུ་ཆི་སི་ཐན་གྱི་རང་བཙན་འཐབ་རྩོད་སྒྲིག་འཛུགས་ཆེ་ཤོས་དེ་ཡིན་པའི་གནས་ཚུལ་ཐོན་འདུག
ཨི་རན་དང་པ་ཀི་སི་ཐན་གཉིས་ཀས་དྲག་སྤྱོད་པ་ཚོར་གཏོར་རྒོལ་བྱས་པ་ཡིན་ཞེས་འགྲེལ་བཤད་རྒྱག་གི་ཡོད་ཀྱང་གཟའ་འཁོར་འདིའི་གཏོར་རྒོལ་ཁག་གིས་ཕྱོགས་གཉིས་ཀྱི་འབྲེལ་བ་སྡུག་ཏུ་གཏོང་རྒྱུའི་ཉེན་ཁ་ཤིན་ཏུ་ཆེ། རྡུལ་ཕྲན་མཚོན་ཆ་ཡོད་པའི་པ་ཀི་སི་ཐན་དང་ཨི་རན་གཉིས་ཀར་ནང་ཁུལ་གྱི་དྲག་སྤྱོད་པ་ཚོས་ས་མཚམས་ཁག་ཏུ་ཞི་བདེ་བརྟན་ལྷིང་མེད་པར་བསྒྱུར། ཨི་རན་དང་པ་ཀི་སི་ཐན་གཉིས་ཀྱིས་སྔ་མོ་ནས་གཅིག་གི་དྲག་སྤྱོད་པ་ཚོར་ཅིག་ཤོས་ཀྱིས་སྐུང་ཡུལ་སྐྲུན་གྱི་འདུག་ཅེས་ཕན་ཚུན་སྐྱོན་འཛུགས་བྱས་ནས་ཡིད་ཆེས་བརླགས། ཉེ་དུས་ཤིག་ནས་ཨི་སི་རལ་དང་པ་ལི་སི་ཐན་གྱི་ཧ་མ་སི་ཤོག་གི་དམག་འཁྲུག་ལངས། ཟླ་བ་འདིའི་མགོ་སྟོད་དེར་ཁ་ཆེ་རྒྱལ་ཁམས་ཀྱི་འཇིགས་སྐུལ་རིང་ལུགས་པ་ཚོས་རང་སྲོག་བློས་བཏང་ནས་གཏོར་རྒོལ་བྱས་ཏེ་ཨི་རན་བ་༩༠་ལྷག་བསད། ཨི་རན་གྱིས་སི་རི་ཡ་དང་ཨི་རག་གི་ས་ཐོག་ཏུ་སྐུང་ཡོད་པའི་ཁ་ཆེ་རྒྱལ་ཁམས་ཀྱི་འཇིགས་སྐུལ་རིང་ལུགས་པའི་བཙན་ས་ཁག་ལ་གཏོར་རྒོལ་བྱས་ནས་དམག་འཁྲུག་ཆེ་རུ་སོང་།།
བདུན་ཕྲག་འདིའི་གཟའ་མིག་དམར་ཉིན་ཨི་རན་གྱིས་གཏོར་རྒོལ་བྱས་པའི་ཇཱེ་ཡེ་ཤ་ཨལ་ཨ་ཌིལ་ཚོགས་པ་ནི་ཨལ་ཁེ་དྷ་སྒྲིག་འཛུགས་ལ་འབྲེལ་བ་ཡོད་པའི་ཇུན་དལ་ལཱ་ཚོགས་པ་ཞེས་ཁ་ཆེའི་མཐའ་ལྷུང་ཚོགས་པ་ཞིག་ནས་མཆེད། ཇཱེ་ཡེ་ཤ་ཨལ་ཨ་ཌིལ་ཚོགས་པའི་དྲག་སྤྱོད་པ་ཚོ་པ་ཀི་སི་ཐན་གྱི་ས་ཐོག་ཏུ་སྐུང་ནས་ཨི་རན་གྱི་བདེ་འཇགས་མི་སྣ་ཚོར་གཏོར་རྒོལ་བྱེད་ཀྱི་ཡོད་པའི་དོགས་པ་སྔ་མོ་ནས་འདུག ཆོས་ལུགས་ཀྱི་ལྟ་གྲུབ་རྩ་འཛིན་བྱེད་ཀྱི་མེད་པའི་བྷ་ལུ་ཆི་སི་ཐན་བཅིངས་འགྲོལ་མདུན་སྐྱོད་ཚོགས་པས་པ་ཀི་སི་ཐན་གྱི་བདེ་འཇགས་སྲུང་དམག་ལ་གཏོར་རྒོལ་བྱེད་ཀྱི་ཡོད་པར་མ་ཟད། ཁོ་ཚོས་བྷ་ལུ་ཆི་སི་ཐན་གྱི་ས་ཐོག་ཏུ་ཚོང་ལས་གཉེར་བཞིན་པའི་རྒྱ་ནག་གི་ཁེ་ལས་ཁག་ལ་གཏོར་རྒོལ་བྱས། བྷ་ལུ་ཆི་སི་ཐན་བཅིངས་འགྲོལ་མདུན་སྐྱོད་ཚོགས་པ་ཨི་རན་གྱི་ས་ཐོག་ཏུ་སྐུང་ཡོད་པའི་ཚོད་དཔག་བྱེད་ཀྱི་ཡོད་མོད། ཇཱེ་ཡེ་ཤ་ཨལ་ཨ་ཌིལ་ཚོགས་པ་དང་བྷ་ལུ་ཆི་སི་ཐན་བཅིངས་འགྲོལ་མདུན་སྐྱོད་ཚོགས་པ་གཉིས་ཀ་མི་རིགས་རིང་ལུགས་ཀྱི་སྒྲིག་འཛུགས་ཡིན་པར་ཁྱད་པར་མེད་པའི་གནས་ཚུལ་ཐོན་འདུག
ཕྱི་ཟླ་དང་པོའི་ཚེས་༡༨་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཨི་རན་གྱི་ཕྱི་སྲིད་ལྷན་ཁང་གི་མགྲིན་ཚབ་པ་ན་སར་ཁ་ནཱ་ནིས་པ་ཀི་སི་ཐན་གྱི་གཏོར་རྒོལ་ལ་ཁ་རྡུང་དྲག་པོ་བཏང་སྟེ་རྒྱལ་ས་ཐེ་རན་དུ་བཅའ་སྡོད་པ་ཀི་སི་ཐན་གྱི་གཞུང་ཚབ་པ་འབོད་འགུགས་བྱས་ནས་གཏོར་རྒོལ་བྱ་དགོས་པའི་རྒྱུ་མཚན་ཅི་ཡིན་སྐད་ཆ་དྲིས། གཟའ་མིག་དམར་ཉིན་གཏོར་རྒོལ་བྱུང་བའི་རྗེས་སུ་པ་ཀི་སི་ཐན་གྱིས་ཨི་རན་དུ་བཅའ་སྡོད་གཞུང་ཚབ་པ་ཕྱིར་འཐེན་བྱས་ནས་ངོ་རྒོལ་གྱི་རྣམ་འགྱུར་བསྟན། ཨ་རིའི་ཞི་བདེ་བསྟི་གནས་ཁང་གི་ལྷོ་ཨེ་ཤི་ཡའི་ཉམས་ཞིབ་པ་ཨ་ས་ཧྥན་ཌི་རི་མིར་ནས་པ་ཀི་སི་ཐན་གྱིས་རྒོལ་ལན་བསློགས་པ་ཡིན་ཟེར་གྱི་ཡོད་པ་ནི་ཛ་དྲག་ཆེ་རུ་གཏོང་འདོད་མེད་པའི་རྟགས་མཚན་རེད། ཨི་རན་གྱིས་པ་ཀི་སི་ཐན་ལ་གཏོར་རྒོལ་བྱས་པའི་ཀུན་སློང་ཅི་ཡིན་གསལ་པོ་མི་འདུག པ་ཀི་སི་ཐན་དང་ཨི་རན་གྱི་གཏོར་རྒོལ་འདི་འཐབ་འཁྲུག་ཆེན་པོ་ཞིག་ཏུ་འགྱུར་སྲིད་ཅེས་བློ་འཚབ་བྱེད་ཀྱི་ཡོད་པའི་གནས་ཚུལ་ཐོན་འདུག
ཉམས་ཞིབ་པ་ཁག་ཅིག་གིས་ཨི་རན་གྱི་འགོ་ཁྲིད་ཚོས་ཨ་མི་རི་ཀ་དང་ཨི་སི་རལ་གྱིས་ཀྱང་ས་མཚམས་བརྒལ་ནས་ཨི་རན་གྱི་ས་ཐོག་ཏུ་གཏོར་རྒོལ་བྱེད་ཕོད་ཀྱི་མེད། པ་ཀི་སི་ཐན་ཚད་ཐིག་བརྒལ་ནས་ཨི་རན་གྱི་ས་ཐོག་ཏུ་གཏོར་རྒོལ་བྱས་ཏེ་མིག་དཔེ་ངན་པ་ཞིག་གཏོད་སྲིད་ཅེས་སྐྲག དེང་སྐབས་ཡུ་རོབ་རྒྱལ་ཁབ་སུད་ཛིར་ལན་ཌི་འཚོགས་བཞིན་པའི་རྒྱལ་སྤྱིའི་དཔལ་འབྱོར་གླེང་སྟེགས་སུ་ཞུགས་ཡོད་པའི་པ་ཀི་སི་ཐན་གྱི་ལྟ་སྐྱོང་སྲིད་བློན་ཨན་ཝར་ཨུལ་ཧག་ཀ་ཀར་དང་ཨ་ཧྥི་རི་ཀའི་རྒྱལ་ཁབ་ཡུ་གྷན་ཌར་འཚམས་འདྲིར་ཕེབས་ཡོད་པའི་པ་ཀི་སི་ཐན་གྱི་ལྟ་སྐྱོང་ཕྱི་སྲིད་བློན་ཆེན་ཇཱ་ལིལ་ཨ་བྷས་སི་ཇཱི་ལཱ་ཎི་གཉིས་མགྱོགས་མྱུར་གྱིས་རང་ཡུལ་དུ་ལོག ད་ལྟ་ཨི་རན་དང་པ་ཀི་སི་ཐན་གཉིས་ཀར་རང་རང་གི་ས་ཐོག་ཏུ་སྐུང་ཡོད་པའི་དྲག་སྤྱོད་པ་ཚོར་གནོན་སྡོམ་བྱ་དགོས་པའི་འགན་འཁྲི་ཡོད་པའི་གནས་ཚུལ་ཐོན་འདུག ཨིན་རན་གྱི་ཕྱི་སྲིད་བློན་ཆེན་གྱིས་ང་ཚོའི་གཏོར་རྒོལ་བྱ་ཡུལ་དམིགས་འབེན་ནི་པ་ཀི་སི་ཐན་གྱི་ས་ཐོག་ཏུ་སྐུང་ཡོད་པའི་ཨི་རན་གྱི་འཇིགས་སྐུལ་རིང་ལུགས་པ་རྣམས་ཡིན་ཞེས་འགྲེལ་བཤད་བརྒྱབ་འདུག
གླེང་སྟེགས།