འཛམ་གླིང་གི་གྲོང་ཁྱེར་མང་པོ་ཞིག་ནང་ཕྱི་ཟླ་༡༡པའི་ཚེས་༢༤ཉིན་མོ་ལོ་གཉིས་གོང་རྒྱ་ནག་ནང་བྱུང་བའི་ཤོག་བུ་དཀར་པོའི་ངོ་རྒོལ་ལས་འགུལ་ལ་དྲན་གསོ་བྱས་ཡོད་པ་རེད།
དེ་ཡང་ལོ་གཉིས་གོང་རྒྱ་ནག་ནང་ཏོག་དབྱིབས་རིམས་ནད་གཅིག་ཀྱང་མེད་པ་བཟོ་རྒྱུའི་སྲིད་ཇུས་ཤིག་ལག་ལེན་གྱིས་བཙན་དབང་ཐོག་ནས་མི་མང་ཚང་མ་ཕྱིར་ཐོན་མི་ཆོག་པའི་དམ་དྲག་བྱས་པའི་སྐབས་སུ་ཤིང་ཅང་གི་ཨུར་མུ་ཆཱི་གྲོང་ཁྱེར་ནང་སྡོད་ཁང་ཐོག་རྩེགས་ཅན་ཞིག་ལ་མེ་སྐྱོན་བྱུང་ནས་ཕྱིར་ཐོན་མི་ཆོག་པའི་དམ་དྲག་རྐྱེན་པས་མི་༡༠འཆི་སྐྱོན་དང་༩ལ་རྨས་སྐྱོན་བྱུང་བའི་གནས་ཚུལ་ཞིག་རྒྱ་ནག་གི་སྤྱི་ཚོགས་དྲྭ་རྒྱའི་ཐོག་ལ་ཁྱབ་སྟེ་རྒྱ་ནག་གི་གྲོང་ཁྱེར་ཁག་ནང་ནད་ཡམས་སྔོན་འགོག་གི་བཙན་བརྒྱའི་འོག་དཀའ་སྡུག་མྱོང་བཞིན་པའི་མི་མང་ཚོར་ཤིང་ཅང་ནང་བྱུང་བའི་གནས་ཚུལ་ལྟར་སོ་སོ་ལའང་ཡོང་སྲིད་པའི་བློ་འཚབ་ཆེན་པོའི་ཐོག་ནས་སློབ་གྲྭ་ཆེན་མོའི་སློབ་ཕྲུག་གིས་འགོ་ཁྲིད་དེ་ཤོག་བུ་དཀར་པོ་ལག་ཏུ་འཁྱེར་ནས་སྲིད་གཞུང་ལ་ངོ་རྒོལ་གྱི་ལས་འགུལ་ཞིག་སྤེལ་ཡོད།
༢༠༢༢ལོའི་ཕྱི་ཟླ་༡༡པའི་ཟླ་མཇུག་ལ་ཤོག་བུ་དཀར་པོའི་ལས་འགུལ་དེ་རྒྱ་ནག་གི་སློབ་གྲྭ་ཆེན་མོ་༢༠༠ཙམ་དང་།ཞིང་ཆེན་༢༡ནང་སྤེལ་ཡོད་པ་དང་མཐར་སྲིད་གཞུང་ནས་ལོ་གསུམ་རིང་བཙན་དབང་གིས་སྒོ་རྒྱ་བསྡམས་པའི་སྲིད་ཇུས་དེ་མཚམས་འཇོག་བྱེད་དགོས་བྱུང་ཡོད་པ་རེད།
ཟླ་འདིའི་ཚེས་༢༤ ཉིན་མོ་ཕྱི་ཕྱོགས་སུ་ཤོག་བུ་དཀར་པོའི་ངོ་རྒོལ་བྱུང་ནས་ལོ་གཉིས་ཕྱིན་པར་དྲན་གསོའི་ལས་འགུལ་ཁག་སྤེལ་བའི་སྐབས་སུ་རྒྱ་རིགས་ཚོས་རྒྱ་ནག་ནང་དུ་བྱུང་བའི་ཤོག་བུ་དཀར་པོའི་གསར་བརྗེ་དེས་རྒྱ་མིའི་མི་རབས་གསར་པ་ཚོའི་དམངས་གཙོའི་སྟོབས་ཤུགས་ལ་སྐུལ་མ་ཐེབས་ཡོད་ཅེས་བརྗོད་ཡོད་པ་དང་།
དེ་ཡང་ཧཱོ་ལན་ཡུལ་གྲུའི་རྒྱལ་ས་ཨཱམ་སེ་ཌམ་ནང་དུ་རྒྱ་རིགས་ལོ་ན་རྒན་གཞོན་༥༠ལྷག་ཙམ་གྱིས་ལག་ཏུ་ཤོག་བུ་དཀར་པོ་དང་ཕྲེད་དར་སོགས་ཕྱར་ནས་རྒྱ་ནག་ནང་གི་ལས་འགུལ་དེར་དྲན་གསོ་བྱས་པ་དང་།ལས་འགུལ་གོ་སྒྲིག་པ་རཱན་ཤན་གྱིས་༢༠༢༢ལོའི་ཕྱི་ཟླ་༡༡པའི་ཟླ་མཇུག་གི་ཉིན་དེར་ཤིང་ཅང་ནང་དུ་མེ་སྐྱོན་བྱུང་སྐབས་ནད་ཡམས་སྔོན་འགོག་གི་ཆེད་དུ་སྒོ་རྒྱ་བདམས་པའི་གནས་སྟངས་འོག་ཕྱིར་ཐོན་མི་ཆོག་པར་མི་༡༠འཆི་སྐྱོན་བྱུང་བའི་གནས་ཚུལ་དེ་ཚོ་གསར་འགྱུར་ཐོག་མཐོང་སྐབས་སུ་ང་ཚོ་ནི་དམྱལ་བའི་ནང་གནས་བཞིན་པའི་ཚོར་སྣང་ཞིག་བྱུང་ཅེས་འགྲེལ་བརྗོད་བྱས་ཡོད།
དྲན་གསོའི་ལས་འགུལ་ཁག་འཇར་མ་ནིའི་གྲོང་ཁྱེར་བྷེ་ལིན་དང་དབྱིན་ཇིའི་རྒྱལ་ས་ལོན་ཌོན།ཉི་ཧོང་གི་རྒྱལ་ས་ཌོག་ཁྱོ་དང་ཨ་རིའི་གྲོང་ཁྱེར་ཁག་བཅས་ནང་དུའང་སྤེལ་ཡོད་ཅིང་།ཨ་རིའི་ལཱོ་སན་ཅི་ལཱསེ་གྲོང་ཁྱེར་ནང་རྒྱ་ནག་གི་དམངས་གཙོ་ཟེར་བའི་ཚོགས་པའི་འགོ་ཁྲིད་ཀྱིས་ཤོག་བུ་དཀར་པོའི་ལས་འགུལ་དེ་ང་ཚོའི་ཁྲོད་དུ་མུ་མཐུད་ཁྱབ་བཞིན་པ་དང་།རྒྱ་ནག་ནང་གི་སློབ་ཕྲུག་ཚོའི་སེམས་ཤུགས་ཀྱིས་ང་ཚོར་མཉམ་འབྲེལ་གྱི་སྟོབས་ཤུགས་ལ་རེ་བ་གསར་པ་ཞིག་བསླེབ་བཞིན་ཡོད་ཅེས་ཨ་རིའི་རླུང་འཕྲིན་ཁང་ལ་འགྲེལ་བརྗོད་བྱས་པ་
དང་།ཡང་ཨ་རིའི་འགྲོ་བ་མིའི་ཐོབ་ཐང་ཐད་ཀྱི་ཚོགས་པ་ཆེ་གྲས་རང་དབང་ཁང་པའི་རྒྱ་ནག་ཐད་ཀྱི་འགན་འཛིནཁཱེ་ཝེན་སཱེ་ལེཌན་གྱིས་རྒྱ་ནག་ནང་དུ་གཞུང་ནས་དམ་དྲག་ཤུགས་ཆེ་བྱེད་བཞིན་པར་མ་ལྟོས་པར་མི་མང་ཚོས་ཐབས་ལམ་འདྲ་མིན་གྱིས་ངོ་རྒོལ་ལས་འགུལ་སྤེལ་གྱི་ཡོད་པ་དང་།ཤོག་བུ་དཀར་པོའི་ལས་འགུལ་གོང་ཙམ་གྱི་༢༠༢༢ལོའི་ཕྱི་ཟླ་༦པ་ནས་བཟུང་ད་བར་གཞི་རྒྱ་ཆེ་ཆུང་མི་འདྲ་བའི་ངོ་རྒོལ་༧༥༠༠ཙམ་བྱུང་ཡོད་པ་མ་ཟད་མུ་མཐུད་དེ་མང་དུ་འགྲོ་བཞིན་པ་ནི་དཔེ་ན་༢༠༢༤ལོའི་ཕྱི་ཟླ་༧ནས་༩བར་རྒྱ་ནག་ཁྱོན་ཡོངས་སུ་གཞུང་ལ་ངོ་རྒོལ་གྱི་གནས་ཚུལ་༩༣༧ཙམ་བྱུང་ཡོད་པས་དེ་ནི་༢༠༢༣ལས་བརྒྱ་ཆ་༢༧ཙམ་མང་དུ་ཕྱིན་ཡོད་པ་རྟོག་ཞིབ་གསར་པ་ཁག་ལས་གསལ་གྱི་ཡོད་ཅེས་འགྲེལ་བརྗོད་གནང་འདུག
༢༠༢༢ལོའི་ཕྱི་ཟླ་༡༡པའི་ཟླ་མཇུག་ཏུ་ཤོག་བུ་དཀར་པོའི་ངོ་རྒོལ་ལས་འགུལ་སྤེལ་སྐབས་ཕྱི་ཕྱོགས་སུའང་རྒྱ་རིགས་སློབ་ཕྲུག་ཚོས་གདུང་སེམས་མཉམ་སྐྱེས་ཀྱི་ལས་འགུལ་སྤེལ་ཡོད་པ་དང་དཔེ་ན་ཨ་རིའི་སྙན་གྲགས་ཆེ་བའི་ཀཱོ་ལོམ་པི་ཡ་སློབ་གྲྭ་ཆེན་མོའི་ནང་དུ་རྒྱ་རིགས་སློབ་ཕྲུག་སྟོང་ཕྲག་ཁ་ཤས་འདུ་འཛོམས་ཀྱིས་ཨུར་མུ་ཆཱིར་མེ་སྐྱོན་འོག་འཆི་སྐྱོན་བྱུང་བ་ཚོར་མྱ་ངན་དང་ཤོག་བུ་དཀར་པོ་ལག་ཏུ་འཁྱེར་ནས་རྒྱ་ནག་ནང་གི་སློབ་ཕྲུག་ཚོའི་ངོ་རྒོལ་ལ་རྒྱབ་སྐྱོར་མཚོན་པ་བྱས་པ་མ་ཟད་ཞི་ཅིན་ཕིང་གོ་གནས་ནས་བབས་དགོས་ཟེར་བའི་སྐད་འབོད་བྱས་ཡོད་པ་རེད།
སྲིད་དོན་དབྱེ་ཞིབ་པ་ཚོས་རྒྱ་ནག་ནང་དུ་༢༠༢༢ལོར་བྱུང་བའི་ཤོག་བུ་དཀར་པོའི་ངོ་རྒོལ་གྱི་ལས་འགུལ་དེ་ནི་༡༩༨༩ལོར་པེ་ཅིང་གནམ་བདེ་སྒོ་མོའི་ཐང་ཆེན་དུ་བྱུང་བའི་སློབ་ཕྲུག་གི་དམངས་གཙོའི་ལས་འགུལ་རྗེས་སུ་གཞི་རྒྱ་ཆེ་ཤོས་ཤིག་ཡིན་པ་དང་ལས་འགུལ་དེ་ཐོག་མར་ཏོག་དབྱིབས་རིམས་ནད་ཀྱི་དམ་དྲག་ལ་ངོ་རྒོལ་ཆེད་དུ་དམིགས་ཡོད་ནའང་རྗེས་སུ་རྒྱ་ནག་གི་འགོ་ཁྲིད་ཞི་ཅིན་ཕིང་དང་དམར་ཤོག་ཚོགས་པར་ངོ་རྒོལ་ཞིག་ཆགས་ཡོད་ཅེས་གསུང་གི་ཡོད་པ་རེད།
གླེང་སྟེགས།