༄༅། ཉེ་ཆར་ཕྱི་ཟླ་བཅུ་པའི་ཚེས་༢༣ཉིན་ཨ་རིའི་རྒྱལ་དོན་སྲུང་བསྐྱོབ་ལྷན་ཁང་གི་མགྲིན་ཚབ་འཇོན། ཁར་བྷི་ཡིས་ ཨུ་རུ་སུ་ནང་བྱང་ཀོ་རི་ཡའི་དམག་མི་སུམ་སྟོང་ཆེད་རྗོངས་བྱས་ནས་ཡོད་པར་ གལ་ཏེ་དེ་ཚོས་ཨུ་རུ་སུའི་དམག་མི་དང་མཉམ་དུ་ཡུཀ་རེན་ཐོག་དམག་འཐབ་བྱས་པ་ཡིན་ན་ནི་ ཁོང་ཚོའི་ཐོག་དྲག་རྒོལ་བྱ་འོས་པ་ཆགས་ཀྱི་རེད་ཅེས་ཉེན་བརྡ་བཏང་གནང་ཡོད་པ་རེད། འོན་ཀྱང་ད་ཆ་ནི་གནས་ཚུལ་དེ་ལས་འཚབ་ཆེ་རུ་སོང་སྟེ་ ཁ་ས་གཟའ་ཟླ་བའི་ཉིན་ཨ་རིའི་རྒྱལ་སྲུང་ལས་ཁུངས་པེན་ཌ་གྷོན་གྱིས་ བྱང་ཀོ་རི་ཡ་ཡིས་རང་གི་དམག་མི་ཁྲི་གཅིག་ཙམ་ཞིག་ཨུ་རུ་སུ་ལ་ཆེད་རྗོངས་བྱུང་འདུག་ཅེས་གསལ་སྟོན་བྱས་འདུག་པ་དེ་ནི་ ད་བར་གསལ་སྟོན་བྱུང་བའི་ཨུ་རུ་སུ་ནང་གི་བྱང་ཀོ་རི་ཡའི་དམག་མིའི་གྲངས་འབོར་ལས་ལྡབ་གསུམ་ལྷག་གིས་མང་བ་ཡིན་པ་རེད།
གནད་དོན་དེའི་ཐད་ཨ་རིའི་རྒྱལ་སྲུང་ལས་ཁུངས་ཀྱི་གསར་འགོད་དྲུང་ཆེ་གཞོན་པ་སཱ་བྷི་རི་ན།སིང་གིས་གསར་འགོད་པར་བརྗོད་དོན་ལ་ བྱང་ཀོ་རི་ཡའི་དམག་མི་དེ་དག་ནི་ཤར་ཕྱོགས་ཨུ་རུ་སུའི་ས་གནས་སུ་དམག་སྦྱོང་བྱེད་ཀྱི་ཡོད་པ་མ་ཟད་ འབྱུང་འགྱུར་གཟའ་འཁོར་འགའ་ཞིག་གི་ནང་ དམག་མི་དེ་ཚོ་ཡུ་རེན་གྱི་ས་མཚམས་ཉེ་ཁྲིད་དུ་ཨུ་རུ་སུའི་དམག་མིར་ཞོགས་འདེགས་བྱ་རྒྱུར་གཏོང་སྲིད་པ་རེད་ཅེས་དང་ ཡང་ཁོང་གིས་དམག་མི་དེ་ཚོ་ནི་ཨུ་རུ་སུའི་ཁུར་སེཀ་ས་ཁུལ་ནང་ཡུཀ་རེན་ཐོག་དམག་འཐབ་བྱ་རྒྱུར་བེད་སྤྱོད་བྱེད་སྲིད་པའི་ཐོག་ང་ཚོར་བློ་འཚབ་ཡོད་ཅེས་ཀྱང་གསལ་སྟོན་བྱས་ཡོད་པ་རེད། ཡང་པེན་ཌ་གྷན་གྱི་དཔོན་རིགས་ཁོང་གིས་ ཨུ་རུ་སུའི་སྲིད་འཛིན་པུ་ཀྲིན་ནས་མུ་མཐུད་དེ་ཡུཀ་རེན་ཐོག་དམག་འཁྲུག་རྒྱག་བའི་ནང་ དམག་མི་ཕར་མ་དགོས་ངེས་ཆགས་ཡོད་སྟབས་ ད་ཆ་རང་གི་མཐུན་གྲོགས་བྱང་ཀོ་རི་ཡའི་དམག་མི་དེ་ཚོ་ཨུ་རུ་སུའི་དམག་མི་དང་མཉམ་དུ་ཡུཀ་རེན་ལ་དྲག་འཐབ་སྤེལ་རྒྱུར་དངོས་ཤུགས་བརྒྱུད་གསུམ་གང་ཅིའི་ཐོག་ནས་བེད་སྤྱེད་བྱ་རྒྱུའི་ཉེན་ཁ་ཡོད་མུས་རེད་ཅེས་འཐེར་འདོན་བྱས་གཞག།དེ་དང་ཕྱོགས་མཚུངས་ཁ་ས་གཟའ་ཟླ་བའི་ཉིན་བྱང་མཚོ་ཨཌ་ལན་ཀྲིག་སྤྱི་ཆིངས་དམག་དོན་སྒྲིག་འཛུགས་ནེ་ཀྲོ་ཡི་སྤྱི་ཁྱབ་མཀ། རཌ་ཡིས་བྱང་ཀོ་རི་ཡའི་དམག་མི་ཨུ་རུ་སུ་ནང་འགྲེམ་འཇོགས་བྱས་ཏེ་ཨུ་རུ་སུའི་ཡུཀ་རེན་ཐོག་གི་དམག་འཁྲུག་ལ་རོགས་ཕན་སྦྱོར་ཐབས་བྱེད་བ་འདི་ནི་ཧ་ཅང་ཉེན་འཚབ་ཆེ་བའི་དྲག་རྒོལ་རྒྱ་བསྐྱེད་ཀྱི་གནས་ཚུལ་ཞིག་ཡིན་པ་དང་ དེ་ཡིས་ཨུ་རུ་སུའི་སྲིད་འཛིན་པུ་ཀྲིན་གྱི་གནས་སྟངས་འ་ཆད་འུ་ཐུག་པ་ཞིག་ཆགས་པ་ཚོན་གྱི་ཡོད་རེད་ཅེས་གསུངས་ཏེ་སྐྱོན་བརྗོད་གནང་གཞག
དེ་ཡང་གནད་དོན་དབྱེ་ཞིབ་པས་བྱས་ན་ བྱང་ཀོ་རི་ཡ་ཡིས་རང་གི་དམག་མི་ཨུ་རུ་སུ་ལ་ཆེད་རྗོངས་བྱེད་བ་འདིའི་བཟང་ལན་དུ་ ཨུ་རུ་སུ་ནས་ལྟ་སྲུང་གི་སྲུང་སྐར་དང་མཚོ་འོག་གྲུ་གཟིངས་སོགས་དམག་དོན་འཕྲུལ་རིག་སྣ་མང་ཞིག་མཁོ་བསྒྲུབ་ཐོབ་ཐབས་སུ་དམིགས་ཀྱི་ཡོད་སྲིད་པའི་འགྲེལ་བརྗོད་བྱེད་ཀྱི་ཡོད་པ་རེད། གང་ལྟར་ད་ཆ་དམར་ཤོག་རྒྱལ་ཁབ་བྱང་ཀོ་རི་ཡ་ཡིས་ཨུ་རུ་སུ་ལ་དམག་མི་ཁྲི་གཅིག་ཙམ་ཞིག་ཆེད་རྗོངས་བྱས་པ་འདི་ཡིས་ཡུཀ་རེན་དང་ཡུལ་དེའི་ནུབ་ཕྱོགས་ཀྱི་མཐུན་གྲོགས་རྒྱལ་ཁབ་རྣམས་བློ་འཚབ་དང་བཅས་དོ་འཁུར་ཆེན་པོའི་སྒོ་ནས་ལྟ་ཞིབ་བྱེད་ཡས་ཤིག་ཆགས་ཡོད་པ་རེད།
གནས་ཚུལ་འདི་ཕྱོགས་བསྒྲིགས་དང་སྙན་སྒྲོན་ཞུ་མཁན་པདྨ་བདེ་ཆེན་ཡིན།
གླེང་སྟེགས།