༄༅།། སྲིད་བློན་ནེ་ཐན་ཡ་ཧུས་དམག་འཁྲུག་གི་སྔོན་དེར་ཨི་སི་རལ་གྱི་ཟུར་འཇོག་དམག་དཔུང་གིས་སྲི་ཞུ་བསྒྲུབ་རྒྱུ་མིན་ཞེས་ངོ་རྒོལ་བྱས་པ་རེད། ཧ་མ་སི་ཤོག་ཁག་གི་གོ་སྐབས་དེ་བཟུང་ནས་ཨི་སི་རལ་གཏོར་རྒོལ་བྱས་པ་ཡིན་སྲིད་ཅེས་བཤད་པ་རེད་ཟེར་བའི་གནས་ཚུལ་ཞིག་ཐོན། ཕྱི་ཟླ་༡༡་པའི་ཚེས་༥་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་ན་ལྟར་ན། སྲིད་བློན་ནེ་ཐན་ཡ་ཧུས་ངས་ཧ་མ་སི་ཤོག་ཁག་གི་གཏོར་རྒོལ་བྱུང་བའི་ལན་ཁག་དེ་ཟུར་འཇོག་དམག་དཔུང་ལ་གཡོགས་ནས་ཉེས་འཛུགས་བྱས་མེད་ཅེས་རང་ཉིད་དཀར་འདོན་བྱས་འདུག ཨི་སི་རལ་གྱི་འཕྲིན་ལམ་༡༢་པ་དང་གསར་འགྱུར་ལས་ཁུངས་ཁག་གིས་སྲིད་བློན་ནེ་ཐན་ཡ་ཧུས་ཟུར་འཇོག་མི་ཚུད་པའི་མང་ཚོགས་ཀྱིས་སྲིད་གཞུང་ལ་ངོ་རྒོལ་བྱས་ནས་ཧ་མ་སི་ཤོག་ཁག་གིས་ཨི་སི་རལ་ལ་གཏོར་རྒོལ་བྱས་པ་ཡིན་མིན་ཐད་ཞིབ་འཇུག་བྱ་དགོས་ཞེས་བཤད་པའི་གནས་ཚུལ་ཞིག་སྤེལ། ད་ལོ་སྲིད་བློན་ནེ་ཐན་ཡ་ཧུས་ཆེས་མཐོ་ཁྲིམས་ཁང་གི་དབང་ཚད་ཆུང་དུ་བཏང་སྟེ་སྲིད་གཞུང་གི་དབང་ཚད་ཆེ་རུ་བཏང་བར་ཨི་སི་རལ་རྒྱལ་ཡོངས་སུ་ཟླ་བ་མང་པོར་ངོ་རྒོལ་ཁྲོམ་སྐོར་གྱི་ལས་འགུལ་ལངས།།
ཨི་སི་རལ་གྱི་མང་ཚོགས་ནས་སྲིད་བློན་ནེ་ཐན་ཡ་ཧུའི་སྐྱོན་འཛུགས་ལ་ཁ་རྡུང་དྲག་པོ་བཏང་བའི་རྗེས་སུ་དོགས་སློང་གི་སྐད་ཆ་དེ་ཕྱིར་བསྡུ་དང་ཧ་མ་སི་ཤོག་ཁག་ལ་ང་ཚོ་གསོད་འདོད་བྱུང་ནས་དམག་འཁྲུག་བསླངས། ཨི་སི་རལ་གཞུང་དམངས་གཉིས་ལ་ནང་ཁུལ་དུ་ལྟ་བ་མཐུན་མིན་གྱི་འགལ་ཟླ་བྱུང་ནས་གཏོར་རྒོལ་ཕོག་པ་ཞིག་ག་ལ་ཡིན། ཧ་མ་སི་ཤོག་ཁག་རྩིས་ལོག་ཐེབས་པ་རེད། ཁོ་ཚོ་རྩ་མེད་གཏོང་རྒྱུ་དང་ང་ཚོར་རྒྱལ་ཁ་འཐོབ་ངེས་རེད་ཅེས་ནེ་ཐན་ཡ་ཧུས་ཨེག་སི་དྲྭ་ཚིགས་སུ་འཕྲིན་ཐུང་ཞིག་སྤེལ། ད་སྔ་ཨི་སི་རལ་གཞུང་དམངས་གཉིས་ཀྱིས་དམག་འཁྲུག་ལ་རིག་པ་བསྒྲིམས་ནས་སྲིད་བློན་ནེ་ཐན་ཡ་ཧུའི་ལས་འགན་འཐུས་ཤོར་བྱུང་ཡོད་མེད་ཞིབ་འཇུག་བྱེད་ཀྱི་མེད་ཀྱང་སྤྱི་ཚོགས་སུ་ནེ་ཐན་ཡ་ཧུ་སྲིད་བློན་གྱི་ལས་གནས་ནས་གནང་བ་ཞུ་དགོས་ཞེས་གླེང་སློང་བྱ་རྒྱུ་འགོ་ཚུགས། ཨི་སི་རལ་གྱི་ཛ་དྲག་སྲིད་གཞུང་ཁོངས་ཀྱི་ཕྱོགས་འགལ་ཚོགས་པའི་བློན་ཆེན་བྷེ་ནི་གྷན་ཛིས་སོ་སོའི་འགན་འཁྲི་མི་ལེན་པར་དམག་འཁྲུག་གི་དུས་སུ་དཀྲོག་གཏམ་བསྒྲགས་ན་དགོས་པ་མེད་ཅེས་སྲིད་བློན་ནེ་ཐན་ཡ་ཧུར་སྐྱོན་བརྗོད་བྱས་འདུག
ཉེ་ཆར་ཕྱི་ཟླ་༡༠་པའི་ཚེས་༧་ཉིན་ཧ་མ་སི་ཤོག་ཁག་གིས་ཨི་སི་རལ་ལ་གློ་བུར་དུ་སྐམ་མཚོ་གནམ་གསུམ་ནས་གཏོར་རྒོལ་བྱས་ནས་བཟུང་། ཨི་སི་རལ་གྱི་སྲིད་བློན་ནེ་ཐན་ཡ་ཧུས་རང་ཉིད་དཀར་འདོན་བྱེད་གང་ཐུབ་དང་གཏོར་རྒོལ་དེའི་ལན་ཁག་གཞན་ལ་དཀྲི་ཐབས་སུ་འབུངས། དཔེར་ན་ཕྱི་ཟླ་༡༠་པའི་ཚེས་༢༩་ཉིན་སྲིད་བློན་ནེ་ཐན་ཡ་ཧུས་ཨི་སི་རལ་གྱི་གསང་བའི་ལས་ཁུངས་ཁག་གི་འགོ་ཁྲིད་ཚོས་ལས་འགན་འཐུས་ཤོར་བཏང་སྟེ་ཧ་མ་སི་ཤོག་ཁག་གིས་གཏོར་རྒོལ་བྱུང་བ་རེད་ཅེས་སྐྱོན་བཙུགས། དེ་ནས་ཆུ་ཚོད་ཁ་ཤས་ཀྱི་རྗེས་སུ་སྲིད་བློན་ནེ་ཐན་ཡ་ཧུས་གསང་བའི་ལས་ཁུངས་ཁག་ལ་སྐྱོན་འཛུགས་བྱས་པ་འགྲིག་མི་འདུག ངས་གསར་འགོད་ལྷན་ཚོགས་ཐོག་ཏུ་སྐད་ཆ་བཤད་མི་དགོས་པ་ཁག་ཅིག་བཤད་འདུག ང་འཆུགས་ཡོད་པ་དང་ངས་བཟོད་གསོལ་ཞུ་རྒྱུ་ཡིན། ངས་གསང་བའི་ལས་ཁུངས་ཁག་གི་འགོ་ཁྲིད་ཚོར་རྒྱབ་སྐྱོར་ཆ་ཚང་བྱེད་ཀྱི་ཡོད། ཨི་སི་རལ་གྱི་དམག་དཔུང་སྤྱི་ཁྱབ་བཀོད་འདོམས་པ་དང་རྒྱལ་སྲུང་དཔུང་སྡེ་ཁག་གི་འགོ་ཁྲིད་ཚོའི་དབང་ཚད་ཆེ་རུ་གཏོང་གི་ཡོད་ཅེས་ཨེག་སི་དྲྭ་ཚིགས་སུ་འཕྲིན་ཐུང་ཞིག་སྤེལ།།
ཕྱི་ཟླ་༡༡་པའི་ཚེས་༦་ཉིན་ཧྥ་རན་སི་གསར་འགྱུར་ལས་ཁུངས་ནས་གནས་ཚུལ་སྤེལ་བ་ལྟར་ན། ཨི་སི་རལ་དང་ཧ་མ་སི་ཤོག་ཁག་གི་དམག་འཁྲུག་བརྒྱབ་པའི་རྗེས་སུ་པ་ལི་སི་ཐན་བ་ས་ཡ་༡་དང་ཕྱེད་ཀ་ལྷག་གྷ་ཟ་ནས་བྲོས་བྱོལ་དུ་འགྲོ་དགོས་བྱུང་ཞིང་། ཨི་སི་རལ་གྱི་དམག་གིས་གྷ་ཟའི་ས་རོ་རྡོ་རོའི་ནང་དུ་དཔུང་འཇུག་བྱས་ཏེ་ཧ་མ་སི་ཤོག་ཁག་གི་འཐབ་མོ་བ་ཚོར་འཐབ་རྒོལ་བྱེད་ཀྱི་ཡོད་ཅིང་། ཨི་སི་རལ་གྱི་དམག་གི་མགྲིན་ཚབ་པ་ཇཱོ་ནེ་ཐན་ཀོར་རི་ཀ་སིས་ཧ་མ་སི་ཤོག་ཁག་གི་འཐབ་མོ་བ་ཚོ་ས་འོག་ས་སྟེང་གང་དུ་ཡོད་ཀྱང་རྩ་མེད་གཏོང་རྒྱུ་ཡིན། གྷ་ཟའི་མི་མང་དཀྱུས་མ་ཚོ་ཉེན་གཡོལ་དུ་ཕྲོས། གྷ་ཟ་ཐང་གཤོང་ནར་མོར་ཧ་མ་སི་ཤོག་ཁག་གི་འཇིགས་སྐུལ་རིང་ལུགས་པ་རྣམས་མེད་པར་མ་བཏང་བར་དུ་ང་ཚོས་དམག་འཁྲུག་མཚམས་འཇོག་བྱ་རྒྱུ་མིན་ཞེས་བསྒྲགས། གྷ་ཟའི་སྨན་ཁང་དང་སློབ་གྲྭ། ལྷ་ཁང་སོགས་ཀྱི་འོག་ཏུ་ས་དོང་བྲུས་ཏེ་ཧ་མ་སི་ཤོག་ཁག་གི་འཐབ་མོ་བ་ཚོ་སྐུང་ཡུལ་དང་མཚོན་ཆ་འཇོག་ཡུལ། བཀོད་འདོམས་ཁང་སོགས་འཛུགས་སྐྲུན་བྱས་ཡོད་པས་ཧ་མ་སི་ཤོག་ཁག་རྩ་མེད་གཏོང་ཐུབ་རྒྱུ་ཁག་པོ་ཡིན་པའི་གནས་ཚུལ་ཐོན་འདུག
གྷ་ཟའི་གྲོང་མི་ཨ་ལཱ་ཨ་བྷུ་ཧ་སེ་ར་ཞེས་པ་ཞིག་གིས་ཨི་སི་རལ་གྱི་གཏོར་རྒོལ་ནི་ས་འགུལ་ཆེན་པོ་ཞིག་དང་མཚུངས། གྲོང་གླིང་ཧྲིལ་པོ་བསྣུབས་ཏེ་གྱང་ཆག་ལ་གཏུགས་འདུག་ཅེས་ཧྥ་རན་སི་གསར་འགྱུར་ལས་ཁང་གི་གསར་འགོད་པར་གླེང་མོལ་བྱས་འདུག གྷ་ཟའི་པ་ལི་སི་ཐན་གྱི་འཕྲོད་བསྟེན་ལྷན་ཁང་ནས་ཨི་སི་རལ་གྱིས་གཏོར་རྒོལ་བྱ་རྒྱུ་འགོ་བཙུགས་ནས་བཟུང་སྟེ་མི་༩༧༧༠་ལྷག་སྲོག་སྐྱོན་ཕོག་སོང་། སྲོག་སྐྱོན་ཕོག་མཁན་མང་ཆེ་བ་ནི་བུད་མེད་དང་ཕྲུ་གུ་རེད་ཅེས་གཞི་གྲངས་བཏོན། ཁ་སྔོན་ཕྱི་ཟླ་༡༠་པའི་ཚེས་༧་ཉིན་ཧ་མ་སི་ཤོག་ཁག་གི་འཐབ་མོ་བ་༢༥༠༠་ལྷག་གིས་ཨི་སི་རལ་གཏོར་རྒོལ་བྱས་ནས་མི་༡༤༠༠་ལྷག་བསད་པ་དང་མི་༢༤༠་ལྷག་བཙན་གྱིས་ཁྲིད། གྷ་ཟ་ཐང་གཤོངས་ནར་མོར་ཡོད་པའི་ཕྱི་རྒྱལ་བ་རྣམས་ཨི་ཇེབ་བརྒྱུད་ནས་སོ་སོའི་རྒྱལ་ཁབ་ཁག་ཏུ་བྲོས་ཀྱང་ཉེན་གཡོལ་དུ་འགྲོ་ས་མེད་པའི་པ་ལི་སི་ཐན་བ་ཚོས་དམག་འཁྲུག་གི་དཀའ་སྡུག་ཚད་མེད་མྱོང་དགོས་པར་གྱུར། གཟའ་མཇུག་དེ་ནས་ཧ་མ་སི་ཤོག་ཁག་གིས་གྷ་ཟ་ཐང་གཤོངས་སུ་ལུས་ཡོད་པའི་ཕྱི་རྒྱལ་བ་རྣམས་ཨེ་ཇེབ་བརྒྱུད་དེ་ཕྱི་རུ་གཏོང་རྒྱུ་བཀག་ཡོད་པའི་གནས་ཚུལ་ཐོན་འདུག
ད་ལྟ་ཨི་སི་རལ་གྱི་དམག་གིས་གྷ་ཟ་གྲོང་ཁྱེར་མཐའ་བསྐོར་ནས་ས་གནས་དེ་དུམ་བུ་གཉིས་སུ་བཅད། ད་དུང་ཡང་ཨི་སི་རལ་གྱིས་གཏོར་རྒོལ་ཚབས་ཆེན་བྱ་ཡུལ་གྷ་ཟའི་ས་གནས་ཁག་ཏུ་པ་ལི་སི་ཐན་བ་འབུམ་༣་དང་ཁྲི་ཚོ་༥་ལྷག་ཕྱི་རུ་མ་ཐར་པར་ལུས། ཁ་སང་གཟའ་ཉི་མར་ཨི་སི་རལ་གྱིས་སྐྱབས་བཅོལ་བའི་སྡོད་སྒར་ཁག་ལ་གཏོར་རྒོལ་བྱས་ནས་མི་༤༥་བསད། པ་ལི་སི་ཐན་བ་ས་དབྱི་དཱ་ཨལ་ན་ཇ་མ་ཞེས་པ་ཞིག་གིས་ས་རྡོའི་ཁྲོད་དུ་མི་གསོན་པ་ལུས་ཡོད་དམ་ཞེས་སྐད་བརྒྱབ་ནས་དྲིས། ཁོ་པས་བུད་མེད་ཅིག་གི་མགོ་ལ་ལྕགས་ཀྱི་གདུང་མ་ཞིག་ལྷུང་སྟེ་བསད་འདུག བྱིས་པ་དང་རྒན་རྒོན་ཚོར་སྔོན་བརྡ་མ་བཏང་བར་གཏོར་རྒོལ་བྱས་བྱུང་ཞེས་གསར་འགོད་པར་སྡུག་སྐད་བརྒྱབ། རྒྱལ་སྤྱིའི་ཐོག་ཏུ་ཨི་སི་རལ་ལ་མེ་འཕེན་མཚམས་འཇོག་བྱ་དགོས། པ་ལི་སི་ཐན་བ་ཚོར་སྐྱོབ་གསོ་སྐྱེལ་འདྲེན་བྱེད་དུ་འཇུག་དགོས་ཞེས་གནོན་ཤུགས་སྤྲོད་ཀྱི་ཡོད་ཀྱང་ཨི་སི་རལ་མེ་འཕེན་མ་མཚམས་འཇོག་བྱ་རྒྱུར་མ་འཐད། དེ་རིང་གཟའ་ཟླ་བའི་ཉིན་འཇོར་ཌན་གྱི་གནམ་དམག་གིས་གྷ་ཟའི་པ་ལི་སི་ཐན་བ་ཚོར་སྨན་དང་ཉེར་མཁོའི་དངོས་ཟོག་རྣམས་གཡུགས་ཡོད་པའི་གནས་ཚུལ་ཐོན་འདུག
ཕྱི་ཟླ་༡༡་པའི་ཚེས་༥་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། གཟའ་ཉི་མའི་ཉིན་ཨ་རིའི་ཕྱི་སྲིད་དྲུང་ཆེ་བྷ་ལིན་ཁེན་ནུབ་འགྲམ་དུ་ཕེབས་ནས་པ་ལི་སི་ཐན་དབང་འཛིན་ལྷན་ཁང་གི་སྲིད་འཛིན་ཨ་བྷ་སི་ལ་ཐུག་ནས་པ་ལི་སི་ཐན་མི་དམངས་ཀྱི་དཀའ་སྡུག་སེལ་ཐབས་དང་དམག་འཁྲུག་རྗེས་སུ་ཅི་ཞིག་བྱ་དགོས་མིན་སོགས་ལ་གྲོས་སྡུར་བྱས་འདུག དབྱིན་ཡུལ་དུ་བཅའ་སྡོད་པ་ལི་སི་ཐན་གྱི་གཞུང་ཚབ་པ་ཧུ་སམ་ཟོམ་ལོ་ཏས་ཨ་རིའི་རྒྱལ་ཡོངས་ངོ་མཇལ་བརྙན་འཕྲིན་ལས་རིམ་ནང་དུ་ལྟ་ཚུལ་མི་མཐུན་པའི་ཁྱད་པར་ཆེན་པོ་ཡོད་པས་ཨ་རིའི་ཕྱི་སྲིད་དྲུང་ཆེ་དང་པ་ལི་སི་ཐན་གྱི་སྲིད་འཛིན་ཨ་བྷ་སིའི་ཐུག་འཕྲད་དེ་ལྷུག་པོ་ཞིག་བྱུང་མི་འདུག ང་ཚོའི་སྲིད་འཛིན་ནས་ཨི་སི་རལ་གྱི་དམག་གིས་པ་ལི་སི་ཐན་གྱི་མི་མང་དཀྱུས་མ་དམར་གསོད་བྱེད་ཀྱི་ཡོད་པ་འཕྲལ་དུ་མཚམས་འཇོག་བྱ་དགོས་པའི་དགོས་འདུན་པ་རེད། ཨ་མི་རི་ཀར་བར་འདུམ་གྱི་གོ་སྐབས་ཤིག་ཐོབ་ཡོད་པར་མ་ཟད། ཨི་སི་རལ་དང་པ་ལི་སི་ཐན་གཉིས་ལ་བར་འདུམ་བྱེད་མཁན་ཞིག་དགོས་ཀྱི་འདུག་ཅེས་གསར་འགོད་པའི་དྲི་བ་ཁག་ལ་ལན་བཏབ།།
ཨི་སི་རལ་དང་ནུབ་འགྲམ་དུ་ཕེབས་པའི་རྗེས་སུ་ཨ་རིའི་ཕྱི་སྲིད་དྲུང་ཆེ་བྷག་དྷ་ད་ལ་ཕེབས་ཏེ་ཨི་རག་གི་སྲིད་བློན་ལ་ཐུག་ནས་ཨ་རིའི་དམག་སྒར་ཁག་ལ་གཏོར་རྒོལ་བྱེད་མཁན་ཚོར་གནོན་སྡོམ་བྱ་དགོས། ཨི་སི་རལ་དང་ཧ་མ་སི་ཤོག་ཁག་གི་འཐབ་འཁྲུག་དེ་རྒྱལ་ཁབ་གཞན་ལ་ཁྱབ་ཏུ་འཇུག་མི་ཉན། གྷ་ཟའི་པ་ལི་སི་ཐན་བ་ཚོར་མི་ཆོས་རིང་ལུགས་ཀྱི་སྐྱོབ་གསོ་སྐྱེལ་འདྲེན་བྱ་རྒྱུའི་གྲོས་སྡུར་བྱས་འདུག ཨི་རན་གྱིས་རྒྱབ་སྐྱོར་བྱེད་ཀྱི་ཡོད་པའི་ཨི་རག་གི་ཡུལ་དམག་ཁག་ཅིག་གིས་ཨ་རིའི་དམག་སྒར་ཁག་ལ་གཏོར་རྒོལ་བྱས་ནས་ཨི་སི་རལ་དང་ཧ་མ་ཤོག་ཁག་གི་དམག་འཁྲུག་དེ་རྒྱ་ཆེ་རུ་གཏོང་ཐབས་སུ་འབད། དེ་རིང་གཟའ་ཟླ་བའི་ཉིན་ཕྱི་སྲིད་དྲུང་ཆེ་ཏུར་ཀི་ལ་ཕེབས་ནས་ཨི་སི་རལ་དང་ཧ་མ་སི་ཤོག་ཁག་གི་འཐབ་འཁྲུག་མཚམས་འཇོག་ཇི་ལྟར་བྱ་དགོས་མིན། ཏུར་ཀིའི་གཞུང་གིས་ཨི་སི་རལ་དུ་བཅའ་སྡོད་གཞུང་ཚབ་པ་ཕྱིར་འཐེན་བྱས་ནས་ཕྱོགས་གཉིས་ཀྱི་འབྲེལ་བ་སྡུག་ཏུ་ཕྱིན་པ་སླར་གསོ་བྱ་ཐབས། ཨི་སི་རལ་གྱིས་གཏོར་རྒོལ་བྱས་ནས་པ་ལི་སི་ཐན་གྱི་མི་དམངས་དཀྱུས་མ་ཚོ་བསད་རྨས་འབྱུང་གི་ཡོད་པར་ཏུར་ཀིའི་གཞུང་གིས་ངོ་རྒོལ་བྱས་འདུག
