ཕྱི་ཚེས་༩ནས་༡༡་བར་ཨ་རིའི་རྒྱལ་སའི་ནང་བྱང་ཨཌ་ལན་ཌིག་དམག་དོན་སྤྱི་ཆིངས་སྒྲིག་འཛུགས་དབུ་བརྙེས་ནས་མི་ལོ་༧༥་འཁོར་བར་དྲན་གསོ་དང་སྦྲགས་སྒྲིག་འཛུགས་དེའི་རྒྱལ་ཁབ་༣༢་ཀྱི་དབུ་ཁྲིད་ཚོས་ཡུ་ཀེ་རན་གྱི་གནད་དོན་གཙོས་གལ་ཆེའི་གནད་དོན་ཐད་ཆེས་མཐོའི་ལྷན་ཚོགས་གནང་རྒྱུ་ཡིན་པ་དང་། སྐབས་དེར་ཡུ་ཀེ་རན་གྱི་སྲིད་འཛིན་ཡང་མཉམ་ཞུགས་གནང་རྒྱུ་ཡིན་པ་རེད།
ཆེས་མཐོའི་དབུ་ཁྲིད་ཀྱི་ཚོགས་འཛོམས་དེར་སྲིད་འཛིན་བྷའི་ཌན་གྱིས་ཉེ་འོང་དང་ལྷོ་ཀོ་རེ་ཡ། ནིའུ་ཛར་ལནྜ། ཨོས་ཀྲེ་ལི་ཡ་བཅས་ཀྱི་སྐུ་ཚབ་མགྲོན་འབོད་གནང་འདུག་པ་དང་། དེ་ནི་ཨེ་ཤ་ཡའི་མངའ་ཁུལ་ནང་རྒྱ་ནག་གི་ནུས་ཤུགས་གོང་འཕེལ་འགྲོ་བཞིན་པའི་སྐབས་འདིར་སྒྲིག་འཛུགས་དེའི་ཤུགས་རྐྱེན་ཆེ་རུ་གཏོང་གི་ཡོད་པའི་མངོན་རྟགས་ཡིན་པ་རེད། འོན་ཀྱང་ད་ལམ་སྒྲིག་འཛུགས་དེའི་ཆེས་མཐོའི་དབུ་ཁྲིད་ཚོའི་གྲོས་མོལ་ལྷན་འཛོམས་དེ་དེའི་གོང་དང་མི་འདྲ་བར་གདོང་ལེན་བྱེད་དགོས་པའི་གནད་དོན་མང་པོ་ཞིག་གི་ཐོག་གྲོས་མོལ་གནང་དགོས་ཀྱི་ཡོད། དེ་ཡང་ཨུ་་རུ་སུས་ཡུ་ཀེ་རན་ལ་བཙན་འཛུལ་བྱས་ནས་ལོ་གཉིས་ལྷག་འགྲོ་བཞིན་ཡོད་པ་མ་ཟད། ཉེ་བའི་དུས་སུ་ཨུ་རུ་སུས་ཡུ་ཀེ་རན་གྱི་ཤར་ཕྱོགས་མངའ་ཁུལ་ཁག་གཅིག་གི་ནང་དཔུང་འཇུག་བྱེད་ཤུགས་ཆེ་རུ་སོང་ཡོད་པ་དེས་སྒྲིག་འཛུགས་དེའི་འཐུས་མི་རྒྱལ་ཁབ་ཚོས་ཡུ་ཀེ་རན་ལ་ད་བར་གང་ཅིའི་རོགས་སྐྱོར་བྱས་དང་བྱེད་བཞིན་པའི་ནུས་པར་དྲི་བ་གཏོང་དགོས་པ་ཆགས་ཡོད་སྟབས་ད་རེས་ཀྱི་ཚོགས་འདུར་ཡུ་ཀེ་རན་གྱི་སྲིད་འཛིན་གྱིས་དེའི་ཐོག་འགྲེལ་བཤད་སྐྱོན་དགོས་པ་གྱུར་ཡོད་པ་དང་། དེ་མིན་སྒྲིག་འཛུགས་དེ་སྣེ་ཁྲིད་དང་་སྟོབས་ཤུགས་རྒྱ་བསྐྱེད་གཏང་རྒྱུར་རྒྱབ་སྐྱོར་མཐའ་གཅིག་ཏུ་གནང་མཁན་ཨ་རིའི་སྲིད་འཛིན་ལས་ཐོག་ཇོའི་བྷ་ཌན་སྤྱི་ཟླ་བཅུ་གཅིག་པའི་ནང་བསྐྱར་དུ་སྲིད་འཛིན་ལ་འདེམས་ཐོན་ཡོང་གི་ཡོད་མེད་བརྗོད་དཀའ་བར་གྱུར་ཡོད་པ་དང་། དེ་ལས་ལྡོག་ནས་སྒྲིག་འཛུགས་དེར་རྒྱབ་སྐྱོར་བྱེད་རྒྱུ་མེད་ལུགས་བརྗོད་མཁན་ཀྲམ་ལ་རྒྱལ་ཁ་ཐོབ་སྲིད་པའི་གནད་དོན་དེར་བསམ་ཞིབ་བྱེད་དགོས་དགོས་གྱུར་ཡོད་པའི་གནས་ཚུལ་ཐོན་འདུག
གསར་འགོད་པ། བསྟན་འཛིན་ལྷུན་གྲུབ།
རྣམ་རྒྱལ་ཤཱསྟྲཱིས་ཞུ་དག་བྱས།
གླེང་སྟེགས།