ཨ་རིའི་སྲིད་འཛིན་གྱི་འོས་བསྡུ་བྱེད་བར་གཟའ་འཁོར་ཁ་ཤས་ལས་མེད་པའི་སྐབས་འདིར་སྲིད་དོན་ཚོགས་པ་གཉིས་ཀའི་འོས་མི་གཉིས་དང་ཕྱག་སྦྲེལ་བཅས་ཀྱིས་འོས་བསྡུའི་དྲིལ་བསྒྲགས་རྣོ་ངར་ལྡན་པར་གནང་བཞིན་པ་དང་ཆབས་ཅིག འོས་འཕེན་མི་མང་ཁྲོད་དུ་འོས་བསྡུ་དང་འབྲེལ་བའི་ལས་དོན་མང་པོ་ཞིག་སྤེལ་བཞིན་པ་རེད། འོས་མི་སྡེ་ཁག་ཇི་འདྲ་ཞིག་གིས་འོས་བསྡུའི་གྲུབ་འབྲས་ལ་ཁྱད་པར་བཟོ་མིན་ཐད་དཔྱད་བསྡོམས་རྒྱབ་པ་བཏོན་པའི་ནང་ཨ་རིའི་ནང་ས་སྐྱེས་རྡོ་སྐྱེས་ཀྱི་མི་སྡེའམ་གདོད་མའི་མི་རིགས་ཚོས་ཁྱད་པར་བཟོ་སྲིད་པའི་གནས་སྟངས་ཆགས་ཡོད་སྐོར་གནས་ཚུལ་ཐོན་འདུག
གདོད་མའི་མི་རིགས་ཚོས་ སྲིད་དོན་ཚོགས་པ་གང་གི་འོས་མིར་འོས་མང་བ་འཕེན་བ་ཡིན་ཚེ་ དེ་དག་གིས་མཐའ་མའི་འོས་ཐོབ་ཤོར་ལ་ཁྱད་པར་བཟོ་སྲིད་པ་དང་། ལྷག་པར་དུ་འོས་བསྡུར་ཧ་ཅང་ཁྱད་པར་བཟོ་སྲིད་པའི་མངའ་སྡེ་དཔེར་ན་ ཝིསི་ཀན་སེན་དང་ཨེ་རི་ཛོ་ན་ལྟ་བུའི་ནང་གདོད་མའི་མི་རིགས་ཀྱི་འོས་ཤོག་ཧ་ཅང་གནད་འགག་ཆེན་པོ་ཆགས་འདུག དེ་དང་དུས་མཚུངས་ད་ལྟའི་སྐབས་འདིར་གདོད་མའི་མི་རིགས་ཀྱི་ལས་འགུལ་བའི་ཚོགས་སྡེ་དཔེར་ན་ནེ་ཀྲེབ་ཨ་མེ་རི་ཀན་ཐོབ་ཐང་ཐེབས་རྩ་ལྟ་བུས་སོ་སོའི་མི་མང་གནས་ཡུལ་ས་ཁུག་དང་དྲྭ་རྒྱ་དང་མཐུན་རྐྱེན་ཞན་པ་བཅས་དབེན་པའི་ས་ཁུལ་གྱི་དཀའ་ངལ་རྣམས་སེལ་ཐབས་བྱས་ནས་དེ་ཁུལ་གྱི་མི་མང་ཚོས་འོས་འཕེན་རྒྱུར་དེབ་འགོད་བྱེད་ཕྱོགས་དང་དེ་བཞིན་འོས་བསྡུ་དངོས་གཞིའི་ཉིན་གྱི་སྔོན་ནས་འོས་འཕེན་ཐུབ་པ་བཟོ་རྒྱུ་སོགས་གང་ཅིའི་རོགས་འདེགས་དང་ལམ་སྟོན་བྱེད་བཞིན་ཡོད་པ་རེད། རྩ་བའི་གདོད་མའི་མི་རིགས་རྣམས་ཀྱིས་སྲིད་དོན་ཚོགས་པ་གཉིས་ནས་གང་ལ་འོས་ཤོག་མང་བ་འཕེན་མིན་ནི་ལམ་གསེང་བརྗོད་དཀའ་ནའང་། དེ་སྔ་ཕྱི་ལོ་༢༠༢༠ལོའི་འོས་བསྡུའི་སྐབས་སུ་གདོད་མའི་མི་སྡེ་ཁག་༢༢གནས་ཡུལ་ཨེ་རི་ཛོ་ན་མངའ་སྡེའི་མི་མང་ཚོས་མང་གཙོ་ཚོགས་པའི་འོས་མིར་འོས་ཤོག་ཕངས་པ་དེ་ཡིས་དེ་ལོའི་འོས་བསྡུར་ཁྱད་པར་བཟོས་ཡོད་པ་རེད། འོན་ཀྱང་ཁུལ་དེའི་གདོད་མའི་མི་རིགས་མང་པོ་ཞིག་ནི་རང་ཁྱིམ་གྱི་ཁ་བྱང་མེད་པར་སྦྲགས་ཁང་གི་ཨང་གྲངས་ཐོག་ནས་དེབ་འགོད་བྱས་པའི་རིགས་ཡིན་སྟབས་ས་གནས་ཀྱི་འོས་བསྡུའི་སྒྲིག་གཞིའི་འོག་མི་མང་དེ་རིགས་ནས་འོས་ཤོག་འཕེན་རྒྱུར་དཀའ་ངལ་འཕྲད་སྲིད་སྐོར་ཨེ་རི་ཛོ་ནའི་གདོད་མའི་མི་རིགས་ཀྱི་འོས་བསྡུ་ཅེས་ཚོགས་པའི་ལས་ཐོག་འགན་འཛིན་འཇེ་ནི། པེ་རིཤེ་ཡིས་བརྗོད་འདུག
ཡང་ཨ་རིིིའི་གདོད་མའི་མི་རིགས་ཚོས་སྲིད་དོན་ཚོགས་པ་བྱེ་བྲག་གང་ལ་འོས་ཤོག་མང་བ་འཕེན་མིན་ཐད་ད་བར་གསལ་པོ་ངོ་འཕྲོད་པ་བྱུང་མེད་ཅེས་ནིའུ་མེཀ་ཛི་ཀོ་གཙུག་ལག་སློབ་གཉེར་ཁང་གི་སློབ་དཔོན་གྷེབ་བིརིལ། སེན་ཆས་ཡིས་གསུངས་འདུག མི་སྡེ་དེ་ཁོངས་ནས་ཤུགས་ཆེ་བས་མང་གཙོ་ཚོགས་པར་འོས་འཕེན་གྱི་ཡོད་ལུགས་བརྗོད་པ་དེ་ཡང་དངོས་འབྲེལ་ཞིབ་འཇུག་གི་སྒྲུབ་ཐོའི་ཐོག་ནས་བརྗོད་ཀྱི་མེད་པ་དང་། དེ་བཞིན་མང་ཚོགས་ཀྱི་བསམ་ཚུལ་བསྡུ་ལེན་བྱས་པའི་ནང་གདོད་མའི་མི་རིགས་བ་མང་ཆེ་བས་མང་གཙོ་ཚོགས་པར་བློ་ཁ་ཉེ་བ་བྱེད་ཀྱི་ཡོད་ནའང་། མི་རིགས་ནག་པོ་དང་ལེ་ཀྲི་ནོ་མི་རིགས་ནང་བཞིན་གྱིས་བརྟན་པོ་བྱས་ནས་མང་གཙོ་ཚོགས་པར་འོས་འཕེན་མཁན་མིན་པ་གསལ་པོ་རེད་ཅེས་གསལ་སྟོན་གནང་འདུག དེ་བཞིན་གདོད་མའི་མི་རིགས་རང་ཉིད་ཀྱང་ཁོང་ཚོ་ནི་སྲིད་དོན་ཚོགས་པ་བྱེ་བྲག་གཅིག་གི་ཕྱོགས་གཏོགས་མིན་ཞེས་བརྗོད་ཀྱི་ཡོད་པ་མ་ཟད། ཁོང་ཚོས་གནད་དོན་ལ་གཞིགས་ཏེ་འོས་འཕེན་གྱི་ཡོད་སྐོར་བརྗོད་ཀྱི་ཡོད་པ་རེད། ད་ལོའི་འོས་བསྡུའི་སྐབས་སུ་གདོད་མའི་མི་རིགས་གྲས་ནས་ན་ཝ་ཧོ་མི་སྡེ་ལྟ་བུའི་ཁྲོད་དུ་སྤྱི་མཐུན་ཚོགས་པའི་འོས་མི་ཌོ་ནལ་ཁྲམ་གྱིས་བེུད་ཀྱི་མངལ་གནས་ཕྲུག་དོར་ལ་བཀག་བསྡོམ་བྱེད་བའི་སྲིད་ཇུས་དེ་རྩ་ཆེར་ངོས་འཛིན་གྱིས་ཁོང་ལ་འོས་ཤོག་འཕེན་རྒྱུ་ཡིན་ཞེས་བརྗོད་མཁན་ཀྱང་ཡོད་པ་རེད།
ཨ་རིའི་རླུང་འཕྲིན་ཁང་གི་གསར་ཁང་བས་བཏུས།
གསར་འགོད་པ། པདྨ་བདེ་ཆེན།
ཞུ་དག་རྩོམ་སྒྲིག་པ། རྣམ་རྒྱལ་ཤཱསྟྲཱི།
གླེང་སྟེགས།