༄༅།། རྒྱ་གར་གྱི་ནང་སྲིད་བློན་ཆེན་ཨ་མི་ཏ་ཤཱ་(Amit Shah)་ནས་ལ་དྭགས་དབུས་ཐད་སྐྱོང་མངའ་ཁུལ་དུ་རྫོག་ཁག་གསར་པ་ལྔ་འཛུགས་རྒྱུ་ཡིན་ཞེས་གསལ་བསྒྲགས་སྤེལ་འདུག ཕྱི་ཟླ་༨་པའི་ཚེས་༢༦་ཉིན་དཔལ་འབྱོར་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། རྫོང་ཁག་ལྔ་པོ་དེ་ནི་ཟངས་དཀར་དང་དཱ་རས། གཤམ་དང་ནུབ་ར། བྱང་ཐང་རྣམས་ཡིན་ཞིང་། དཱ་རས་ནི་མཁར་དཀྱིལ་གྱི་ཁོངས་སུ་ཡོད་པ་དང་རྒྱ་གར་གྱི་ནང་སྲིད་ལྷན་ཁང་གིས་ལ་དྭགས་ཀྱི་ས་གནས་དེ་དག་འཛུགས་སྐྲུན་ཡར་རྒྱས་དང་སྤྱི་དམངས་ལ་སྲི་ཞུ་བསྒྲུབ་རྒྱུ་ཡག་ཏུ་གཏོང་བར་རྫོང་ཁག་གསར་པ་ལྔ་འཛུགས་རྒྱུ་བྱས་པ་ཡིན། དེང་སྐབས་ལ་དྭགས་ལ་གླེ་དང་མཁར་དཀྱིལ་ཞེས་རྫོང་ཁག་གཉིས་ལས་མེད་ཅེས་གསལ་བསྒྲགས་སྤེལ་འདུག
ནང་སྲིད་བློན་ཆེན་ཨ་མི་ཏ་ཤཱས་སྲིད་བློན་མོ་དྷིའི་ལ་དྭགས་ཡར་རྒྱས་ཕུན་སུམ་ཚོགས་པའི་ས་གནས་ཤིག་ཏུ་བསྒྱུར་རྒྱུའི་ཕུགས་བསམ་མངོན་དུ་འགྱུར་བར་ནང་སྲིད་ལྷན་ཁང་གིས་དབུས་ཐད་སྐྱོང་མངའ་ཁུལ་དེར་རྫོང་ཁག་གསར་པ་ལྔ་འཛུགས་རྒྱུའི་གྲོས་གཞི་བཏོན་པ་ཡིན། རྫོང་ཁག་གསར་པ་ལྔ་བཙུགས་ན་ཕྱོགས་གང་ཐད་ནས་ས་གནས་མང་ཚོགས་ལ་སྲི་ཞུ་ཐད་ཀར་བསྒྲུབ་ཐུབ། སྲིད་བློན་མོ་དྷིའི་གཞུང་གིས་ལ་དྭགས་འབྱོར་ཕྱུག་ལྡན་པ་དང་གོ་སྐབས་མང་བའི་ས་གནས་ཤིག་ཏུ་བསྒྱུར་རྒྱུའི་དམ་བཅའ་བཞག་ཡོད་པ་ལག་ལེན་བསྟར་རྒྱུ་སྟོབས་བདེ་རུ་འགྲོ་ཐུབ་ཅེས་ཨེག་སི་དྲྭ་ཚིགས་སུ་འཕྲིན་ཐུང་ཞིག་སྤེལ། ༢༠༡༩་ལོར་རྒྱ་གར་གཞུང་གིས་ཇམ་མུ་ཀསྨིར་མངའ་སྡེའི་ཐོབ་ཐང་ཕྱིར་བསྡུ་བྱས་ནས་ཇམ་མུ་ཀསྨི་དང་ལ་དྭགས་ཟུང་དབུས་ཐད་སྐྱོང་མངའ་ཁུལ་གཉིས་སུ་བསྒྱུར།།
གཟའ་ཟླ་བའི་ཉིན་སྲིད་བློན་མོ་དྷིས་ཨེག་སི་དྲྭ་ཚིགས་སུ་ལ་དྭགས་ལ་རྫོང་ཁག་གསར་པ་ལྔ་འཛུགས་རྒྱུའི་གྲོས་གཞི་བཏོན་པར་ངས་རྟེན་འབྲེལ་ཞུ་རྒྱུ་ཡིན། ལ་དྭགས་ཀྱི་འཛིན་སྐྱོང་དང་འཕེལ་རྒྱས་རྣམས་འཐུས་སྒོ་ཇེ་ཚང་དུ་འགྲོ་ཐུབ་པའི་རེ་བ་ཡོད། ལ་དྭགས་ལ་རྫོང་ཁག་གསར་པ་ལྔ་འཛུགས་རྒྱུ་ནི་མངའ་ཁུལ་དེ་གནད་འགག་ཆེན་པོར་རྩི་བཞིན་པའི་རྟགས་མཚན་ཡིན། ད་ནས་བཟུང་སྟེ་ཟངས་དཀར་དང་དཱ་རས། གཤམ་དང་ནུབ་ར། བྱང་ཐང་བཅས་ལ་དོ་སྣང་ཇེ་ཆེ་དང་སྲི་ཞུ་གང་ལེགས། མི་དམངས་ལ་ལས་ཀ་སོགས་ཀྱི་གོ་སྐབས་མང་དུ་གཏོང་ཐུབ་པས་ངས་ལ་དྭགས་མི་དམངས་ལ་བཀྲ་ཤིས་བདེ་ལེགས་ཀྱི་འཚམས་འདྲི་ཞུ་རྒྱུ་ཡིན་ཞེས་འཕྲིན་ཐུང་ཞིག་སྤེལ། ད་ལྟའི་ཆར་ལ་དྭགས་ཀྱི་ཆོས་ལུགས་དང་ཆབ་སྲིད་ཀྱི་ལས་སྣེ་མང་ཆེ་བས་ནང་སྲིད་ལྷན་ཁང་གིས་ལ་དྭགས་ལ་རྫོང་ཁག་གསར་པ་ལྔ་འཛུགས་རྒྱུའི་གྲོས་གཞི་བཏོན་པར་དགའ་བསུ་བཞིན་པའི་གནས་ཚུལ་ཐོན་འདུག
རྒྱ་གར་གྱི་ནང་སྲིད་ལྷན་ཁང་གིས་བཏོན་པའི་གྲོས་གཞི་དེར་ལ་དྭགས་དབུས་ཐད་སྐྱོང་མངའ་ཁུལ་གྱིས་ཞིབ་འཇུག་བྱས་ནས་ཐ་མའི་ཐག་གཅོད་བྱ་དགོས་ཤིང་། ཨ་རིའི་རླུང་འཕྲིན་ཁང་གིས་ལ་དྭགས་པ་ཞིག་ལ་རྫོང་ཁག་གསར་པ་ལྔ་འཛུགས་རྒྱུའི་འཆར་གཞི་ཡོད་པ་དེར་དགེ་སྐྱོན་ཅི་ཞིག་མཐོང་གི་འདུག་ཅེས་དྲིས། ལ་དྭགས་པ་དེས་རྫོང་ཁག་གསར་པ་འཛུགས་རྒྱུའི་གྲོས་གཞི་དེའི་ཞིབ་ཕྲ་ཁག་ཤེས་རྟོགས་མ་བྱུང་བར་དགེ་སྐྱོན་ཅི་ཡོད་གླེང་སློང་བྱ་རྒྱུ་ཁག་པོ་འདུག རྫོང་ཁག་རེར་མིང་དོན་མཚུངས་པའི་རང་དབང་ཡོད་མེད་དང་འཛིན་སྐྱོང་གི་དབང་ཚད་ཡོད་མེད་ལ་ཐུག་ཡོད་པ་རེད། དཔེར་ན་༢༠༡༩་ལོར་རྒྱ་གར་གཞུང་གིས་ལ་དྭགས་ལ་དབུས་ཐད་སྐྱོང་མངའ་ཁུལ་གྱི་ཐོབ་ཐང་སྤྲད་ཀྱང་མངའ་སྡེའི་གྲོས་ཚོགས་འཛུགས་མི་ཆོག་པ་དང་རང་གི་ས་གནས་སུ་བཅའ་ཁྲིམས་བཟོ་ཆོག་པའི་དབང་ཚད་མ་སྤྲད་པ་རེད་ཅེས་ལན་འདེབས་བྱས་བྱུང་།།
ཕྱི་ཟླ་༨་པའི་ཚེས་༢༤་ཉིན་རྒྱ་གར་གྱི་བང་ཆེན་ཚགས་པར་ལ་གནས་ཚུལ་ཐོན་པ་ལྟར་ན། རྒྱ་གར་ནང་སྲིད་ལྷན་ཁང་གི་མགྲིན་ཚབ་པ་ཞིག་གིས་ལ་དྭགས་ཀྱི་མི་འབོར་མང་ཆེ་བ་གླེ་དང་མཁར་དཀྱིལ་གཉིས་སུ་འདུས། ནུབ་ར་དང་ཟངས་དཀར། བྱང་ཐང་བཅས་སུ་མི་འབོར་ཉུང་བ་དང་ས་གནས་དེ་དག་མཐའ་མཚམས་སུ་ཆགས། འགྲིམ་འགྲུལ་དང་སྐྱེལ་འདྲེན་སྟབས་བདེ་མེད་པར་གླེ་དང་མཁར་དཀྱིལ་གཉིས་གཅིག་པུས་འཛིན་སྐྱོང་ཡག་པོ་ཞིག་བྱེད་དཀའ། གཞི་རིམ་མང་ཚོགས་ཀྱི་ཕན་བདེ་བསྒྲུབ་པར་ས་གནས་སོ་སོར་རྫོང་རེ་བཙུགས་ན་འཛིན་སྐྱོང་ཡར་རྒྱས་གཏོང་ཐུབ་པའི་ཕན་ཐོགས་འབྱུང་། རྫོང་ཁག་གསར་པ་ལྔ་བཙུགས་པའི་རྗེས་སུ་རྒྱ་གར་དབུས་གཞུང་དང་ལ་དྭགས་དབུས་ཐད་སྐྱོང་མངའ་ཁུལ་གཉིས་ཟུང་འབྲེལ་གྱིས་མཐའ་མཚམས་ས་ཁུལ་དེ་ཚོར་འཛུགས་སྐྲུན་ཡར་རྒྱས་དང་དཔལ་འབྱོར་འཕེལ་རྒྱས་གཏོང་ཐུབ་ཅེས་བཀྲལ།།
རྒྱ་གར་ནང་སྲིད་ལྷན་ཁང་གི་མགྲིན་ཚབ་པས་མུ་མཐུད་དུ་བཤད་པ་ལྟར་ན། ལ་དྭགས་ལ་རྫོང་ཁག་གསར་པ་ལྔ་འཛུགས་རྒྱུའི་རྩ་དོན་ལ་ནང་སྲིད་ལྷན་ཁང་འཐད་པ་ཡོད། ནང་སྲིད་ལྷན་ཁང་གིས་ལ་དྭགས་དབུས་ཐད་སྐྱོང་མངའ་ཁུལ་གཞུང་ལ་ཚོགས་ཆུང་ཞིག་ཚུགས། ཚོགས་ཆུང་དེར་རྫོང་ཁག་གསར་འཛུགས་ཀྱི་གོ་རིམ་དང་རྫོང་གི་སྤྱི་ཁྱབ་ཁང་གང་དུ་ཚུགས་དགོས་མིན། རྫོང་ཁག་ཕན་ཚུན་གྱི་ས་མཚམས་དང་རྫོང་གི་སྒྲོམ་གཞི། རྫོང་གི་ལས་བྱེད་པའི་ས་མིག་སོགས་འབྲེལ་ཡོད་ཀྱི་གནད་དོན་ཁག་ལ་གྲོས་སྡུར་བྱས་ནས་ཐག་གཅོད་བྱ་དགོས་པའི་བཀོད་ཁྱབ་བཏང་ཡོད། ཉེ་བའི་ལོ་ཤས་ཤིག་ནས་རྒྱ་གར་ཡར་རྒྱས་ཆེན་པོ་འགྲོ་བཞིན་ཡོད་ཀྱང་སྤྱི་ཚོགས་ཀྱི་ལམ་སྲོལ་མ་འདྲ་བ་དང་མངའ་སྡེ་གཞུང་ལ་དབྱེ་འབྱེད་བྱེད་ཀྱི་ཡོད་ལུགས་ཀྱི་སྐྱོན་འཛུགས་བྱུང་ནས་དབུས་ཐད་སྐྱོང་མངའ་ཁུལ་དེ་མངའ་སྡེ་གཞན་ལྟར་འཕེལ་རྒྱས་འགྲོ་མ་ཐུབ་པ་རེད་ཅེས་བསྟན།།
ཐོག་མར་ལ་དྭགས་པ་ཚོས་རང་གི་ས་གནས་དེར་དབུས་ཐད་སྐྱོང་མངའ་ཁུལ་གྱི་གནས་བབ་ཐོབ་པར་དགའ་བསུ་ཞུས། ཕྱིས་སུ་དབུས་ཐད་སྐྱོང་མངའ་ཁུལ་གྱི་འཛིན་སྐྱོང་འོག་ཏུ་ལ་དྭགས་ལ་མངའ་སྡེའི་གྲོས་ཚོགས་འཛུགས་ཆོག་པའི་ཐོབ་ཐང་མེད་པ་དང་བཅའ་ཁྲིམས་བཟོ་མི་ཆོག་པ། ལ་དྭགས་ཀྱི་ལས་བྱེད་པ་དང་ཤེས་ཡོན་སློབ་སྦྱོང་ས་མིག་རྣམས་ས་གནས་མི་མང་ལ་ཟུར་འཇོག་བྱེད་ཀྱི་མེད་པར་མ་ཟད། དབུས་ཐད་སྐྱོང་མངའ་ཁུལ་གྱི་གནས་བབ་འོག་ཏུ་ལ་དྭགས་ཀྱི་ས་ཆ་དང་རང་བྱུང་འཁོར་ཡུག་ལའང་སྲུང་སྐྱོབ་མ་ཐུབ། རྒྱ་གར་གྱི་མངའ་སྡེ་ཁག་ནས་མི་གྲངས་ཁྲི་ཚོ་མང་པོ་གནས་སྤོར་བྱས་ནས་ལ་དྭགས་པ་ཚོར་རང་གི་ཐུན་མོང་མ་ཡིན་པའི་སྐད་ཡིག་དང་རིག་གཞུང་ཞིག་ཡོད་པ་ཉམས་བརླག་འགྲོ་རྒྱུའི་ཉེན་ཁ་ཆེ་རུ་སོང་། རྒྱ་གར་གྱི་བཟོ་ཚོང་ལས་ཁུངས་ཁག་གིས་འཛུགས་སྐྲུན་གྱི་ལས་གཞི་གཉེར་བ་དང་གཏེར་ཁ་བརྐོས། ལ་དྭགས་ཀྱི་ཁོར་ཡུག་སྲུང་སྐྱོབ་པ་བསོད་ནམས་དབྱང་ཕྱུག་སོགས་ཀྱིས་མངའ་སྡེའི་ཐོབ་ཐང་དགོས་ཞེས་ངོ་རྒོལ་ལས་འགུལ་སྤེལ་དགོས་པར་གྱུར་ཏོ།།
གླེང་སྟེགས།