༄༅།། ཨ་རིར་ཁྲིམས་འགལ་དུ་བསྡད་ཡོད་པའི་རྒྱ་གར་བ་༡༨༠༠༠་རྒྱ་གར་གཞུང་གིས་རང་ཡུལ་དུ་ལེན་རྒྱུའི་གྲོས་མཐུན་བྱུང་བ་དང་རྒྱ་གར་དུ་ལུས་པའི་ཕ་མ་ཚོས་རང་གི་བུ་ཕྲུག་རྣམས་ཨ་རི་ནས་ཕྱིར་སློག་མི་འབྱུང་བའི་རིམ་གྲོ་སྒྲུབ་ཀྱི་ཡོད་པའི་གསར་འགྱུར་ཐོན་འདུག ཕྱི་ཟླ་དང་པོའི་ཚེས་༢༦་ཉིན་ནེའུ་ཡོཀ་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། སྲིད་བློན་མོ་དྷིའི་སྐྱེས་ཡུལ་གུ་ཇ་ར་ཏ་མངའ་སྡེ་ནི་རྒྱ་གར་ནས་ཕྱི་རྒྱལ་དུ་སྐྱོད་མཁན་ཆེས་མང་བའི་ས་གནས་ཤིག་ཡིན་པ་སྟེ། ཁང་པ་ཁག་གི་གྱང་ངོས་སུ་ཨ་རིར་གནས་འཁོད་རྒྱ་གར་བ་ཚོས་རོགས་སྐྱོར་བྱས་ནས་འཛུགས་སྐྲུན་བྱས་པ་རེད་ཅེས་ཡིག་བྱང་བཀོད། ཁང་བདག་རྣམས་ཨ་རིར་སྤོས་ནས་ཁང་ཁྱིམ་སྟོང་པར་ལུས། རྒྱ་གར་ནས་ཨ་རིར་ཁྲིམས་མཐུན་དུ་ཕྱིན་པ་ཉུང་བ་དང་ཁྲིམས་འགལ་དུ་ཕྱིན་པ་ཤིན་ཏུ་མང་། སྲིད་འཛིན་ཊམ་ནས་ཁྲིམས་འགལ་གྱི་ཕྱི་མི་གཞིས་ཆགས་པ་རྣམས་ཕྱིར་ཕུད་བྱེད་ཀྱི་ཡིན་ཞེས་ཁྱབ་བསྒྲགས་བྱས་པའི་རྗེས་སུ་ཁྱིམ་མཚེས་རྒྱལ་ཁབ་མེག་སི་ཀོ་དང་དབུས་ཨ་མི་རི་ཀའི་རྒྱལ་ཁབ་ཁག་སྐྲག་དགོས་པར་གྱུར།།
ཕིའུ་ཞིབ་འཇུག་ཁང་གིས་ཨ་མི་རི་ཀར་ཁྲིམས་འགལ་གྱི་ཕྱི་མི་གཞིས་ཆགས་པ་ཡོང་མཁན་གཙོ་བོ་ཞིག་རྒྱ་གར་བ་རེད། ༢༠༢༢་ལོར་ཨ་རིར་ཁྲིམས་འགལ་དུ་བསྡད་ཡོད་པའི་རྒྱ་གར་བ་འབུམ་༧་ལྷག་འདུག དེ་ནི་མེག་སི་ཀོ་དང་ཨལ་སལ་ཝ་ཌོ་གཉིས་ཀྱི་འཕྲོ་ནས་རྒྱ་གར་བ་མང་ཤོས་རེད་ཅེས་སྙན་ཐོ་བཏོན། ཌོ་ནལ་ཊམ་ནས་ཁྲིམས་འགལ་གྱི་ཕྱི་མི་གཞིས་ཆགས་པ་རྣམས་ཕྱིར་ཕུད་བྱ་རྒྱུ་འགོ་བཙུགས་པའི་རྗེས་སུ་རྒྱ་གར་བ་ཚོར་དངངས་སྐྲག་ཆེན་པོ་ལངས། རྒྱ་གར་བ་ཁག་ཅིག་ཁྲིམས་མཐུན་དུ་ཡོང་སྟེ་ཐོངས་མཆན་གྱི་དུས་ཡུན་རྫོགས་ཀྱང་རང་ཡུལ་དུ་མ་ལོག རྒྱ་གར་བ་མང་ཆེ་བ་ཁྲིམས་འགལ་དུ་ལྷགས། ༢༠༢༣་གཅིག་པུར་རྒྱ་གར་བ་ཁྲི་ཚོ་༩་ལྷག་ཨ་རིར་ཁྲིམས་འགལ་དུ་བསླེབས་ནས་ས་མཚམས་སུ་འཛིན་བཟུང་བྱས་པ་རེད་ཅེས་ཨ་རིའི་གཞུང་གི་གཞི་གྲངས་སུ་འཁོད། སྔ་ལོ་ཨ་རིའི་གཞུང་གིས་རྒྱ་གར་བ་༡༠༠༠་ལྷག་ཕྱིར་སློག་བྱས་འདུག
རྒྱ་གར་གཞུང་གིས་ཨ་རིར་རྒྱལ་སྲུང་དང་འཕྲུལ་རིག ཚོང་ལས་བཅས་ཀྱི་འབྲེལ་བ་རྒྱ་སྐྱེད་ཐུབ་ཡོད་པར་མ་ཟད། སྔ་ལོ་ཌོ་ནལ་ཊམ་ལ་འོས་བསྡུའི་རྒྱལ་ཁབ་ཐོབ་པར་སྲིད་བློན་མོ་དྷིས་ངའི་བརྩེ་བའི་གྲོགས་པོ་ཞེས་རྟེན་འབྲེལ་ཞུས། ཊམ་གྱི་ལས་དུས་གཉིས་པར་ཨ་མི་རི་ཀ་ཨང་དང་པོར་འཛིན་པའི་སྲིད་ཇུས་ལག་ལེན་བསྟར་ཀྱང་རྒྱལ་ཁབ་གཞན་དང་མ་འདྲ་བར་རྒྱ་གར་ལ་བརྡབ་གསིག་དེ་ཙམ་འཕོག་རྒྱུ་མིན་པའི་གདེང་ཚོད་རྙེད། ད་དུང་རྒྱ་གར་གཞུང་གིས་ཨ་རིར་ཁྲིམས་འགལ་དུ་བསྡད་ཡོད་པའི་རྒྱ་གར་བ་ཁག་ཅིག་རང་ཡུལ་དུ་བླངས་ནས་ཌོ་ནལ་ཊམ་གྱི་སྲིད་གཞུང་ལ་མཉམ་འབྲེལ་བྱ་རྒྱུའི་རྣམ་འགྱུར་བསྟན། བདུན་ཕྲག་སྔོན་མར་རྒྱ་གར་གྱི་གསར་འགྱུར་ལས་ཁུངས་ཁག་གིས་སྲིད་བློན་མོ་དྷིའི་གཞུང་གིས་ཨ་རིར་ཁྲིམས་འགལ་དུ་བསྡད་ཡོད་པ་དང་ཨ་རི་ནས་ཕྱིར་ཕུད་གཏོང་རྒྱུའི་མཚམས་སུ་བསླེབས་ཡོད་པའི་རྒྱ་གར་བ་༡༨༠༠༠་རང་ཡུལ་དུ་ལེན་རྒྱུའི་ཁས་ལེན་བྱས་པ་རེད་ཅེས་གསར་འགྱུར་སྤེལ།།
རྒྱ་གར་གཞུང་གིས་ཨ་རིར་ཁྲིམས་འགལ་དུ་བསྡད་ཡོད་པའི་རྒྱ་གར་བ་ཁག་ཅིག་རང་ཡུལ་དུ་ལེན་བྱ་རྒྱུའི་མོས་མཐུན་བྱས་པའི་དམིགས་ཡུལ་ནི་རྒྱ་གར་གྱི་འཕྲུལ་རིག་ཆེད་ལས་པ་ཚོ་ཨ་རིར་ཁྲིམས་མཐུན་དུ་སྐྱོད་ཀྱི་ཡོད་པ་མི་འགོག་པ་དང་རྒྱ་གར་གྱི་དངོས་ཟོག་ལ་སྒོ་ཁྲལ་མི་འགེལ་བའི་ཆེད་དུ་རེད། གལ་སྲིད་རྒྱ་གར་གཞུང་གིས་ཨ་རིར་ཁྲིམས་འགལ་དུ་བསྡད་ཡོད་པའི་རྒྱ་གར་བ་ཚོ་རང་ཡུལ་དུ་མ་བླངས་ཚེ། ཌོ་ནལ་ཊམ་གྱིས་རྒྱ་གར་བ་ཚོར་ཐོངས་མཆན་བཀག་ནས་དངོས་ཟོག་ལ་སྒོ་ཁྲལ་སྤར། སྲིད་བློན་མོ་དྷི་ངོ་ཚ་ཁ་སྐྱེངས་ཀྱི་གནས་སུ་ལྷུང་སྲིད་པར་སྐྲག་གི་ཡོད་པ་རེད་ཅེས་བཀྲལ། རྒྱ་གར་ཕྱི་སྲིད་ལྷན་ཁང་གི་མགྲིན་ཚབ་པ་རན་དྷིར་ཇཱ་ཡེ་ས་ཝལ་(
(Randhir Jaiswal)་གྱིས་ང་ཚོའི་ལངས་ཕྱོགས་ནི་ཁྲིམས་འགལ་གྱི་གནས་སྤོ་ལ་ངོ་རྒོལ་ཡོད། ང་ཚོས་ཨ་རིའི་གཞུང་ལ་མཉམ་འབྲེལ་བྱས་ནས་ཁྲིམས་འགལ་གྱི་གནས་སྤོ་བ་བཀག་སྡོམ་དང་རྒྱ་གར་ནས་ཨ་མི་རི་ཀར་ཁྲིམས་མཐུན་དུ་གནས་སྤོ་བྱེད་ཐུབ་པའི་ཐབས་ལམ་མང་དུ་གཏོང་གི་ཡོད་ཅེས་བསྒྲགས།།
གུ་ཇཱ་ར་ཏ་མངའ་སྡེའི་ཇཱ་སལ་པུར་གྲོང་གསེབ་ཀྱི་ལོ་ན་༥༥་ལ་ས་ལོན་པའི་རྒྱ་གར་བ་ཇཱག་དི་ཤཱི་ཟེར་བ་ཞིག་གིས་ནེའུ་ཡོཀ་དུས་བབ་ཚགས་པར་གྱི་གསར་འགོད་པར་ང་ཚོས་ལོ་ལྔའི་གོང་དུ་ཨ་སྒོར་ཁྲི་ཚོ་༧་འགྲོ་གྲོན་བཏང་ནས་བུ་ཨ་མི་རི་ཀར་བཏང་བ་ཡིན། ཁོ་པ་མེག་སི་ཀོར་ཕྱིན་ནས་ཟླ་བ་༥་ལ་ས་མཚམས་སུ་བསྒུགས་པ་རེད། ངའི་བུ་ཨ་རིར་ཐར་པའི་རྗེས་སུ་འཛིན་བཟུང་བྱས་ནས་བཙོན་ཁང་དུ་ཐེངས་༣་བཅུག་འདུག བཙོན་ཁང་ནས་གློད་གྲོལ་བཏང་བའི་རྗེས་སུ་ཟ་ཁང་ཞིག་ཏུ་གླ་གཡོག་བརྒྱུགས་པ་རེད། ན་ནིང་མནའ་མ་ཡང་ཨ་རིར་ཐར་སོང་། ང་ཚོས་ཁྲག་གསོག་སྣག་གསོག་བྱས་པའི་ཁྱིམ་ཚང་གི་བསགས་དངུལ་བཏང་བ་དང་དེའི་སྟེང་དུ་བུ་ལོན་བསྐྱིས་ནས་བུ་དང་མནའ་མ་གཉིས་ཨ་རིར་བཏང་བ་ཡིན། ངས་གྱོན་གོས་གསར་པ་ཉོ་ཐུབ་ཀྱི་མེད། ངས་གྲོན་ཆུང་བྱས་ནས་ཤིང་ཏོག་དང་འོ་མ་བཟའ་བཏུང་བྱ་རྒྱུ་མཚམས་བཞག་པ་ཡིན། ངས་བུ་ལོན་འཇལ་དགོས་ཀྱི་ཡོད་ཅེས་བདེ་སྡུག་བཤད་གླེང་།།
ཇཱ་སལ་པུར་གྲོང་གསེབ་ཀྱི་ཕྱི་ལོགས་སུ་ཡོད་པའི་ལྷ་ཁང་ཞིག་གི་མདུན་དུ་ར་ཇ་ནི་ཀན་ཏ་པ་ཊེལ་བཟའ་ཚང་གཉིས་དང་གསར་འགོད་པ་ཕྲད། ཁོ་ཚོ་ལོ་མང་གོང་དུ་ཨ་རིར་ཐར་ཏེ་སབ་ཝེ་(Subway)་ཟ་ཁང་ཞིག་གཉེར་གྱི་ཡོད་པ་དང་ལོ་རེར་རྒྱ་གར་ལ་གུང་སེང་དུ་ཐེངས་རེ་ཡོང་གི་ཡོད་ཅིང་། པ་ཊེལ་གྱིས་ཅི་ཞིག་འབྱུང་རྒྱུ་ཡིན་པ་སུ་གཅིག་གིས་ཤེས་ཀྱི་མ་རེད། ཌོ་ནལ་ཊམ་གྱིས་ཅི་ཞིག་བསྒྲུབ་དགོས་པ་རྣམས་བསྒྲུབ་ཤས་ཆེ། ཨ་རི་ནི་རྒྱལ་ཁབ་ཆེན་པོ་ཡིན་པ་དང་ཌོ་ནལ་ཊམ་ལ་ངལ་རྩོལ་བ་དགོས་ངེས་རེད། ང་ཚོ་ནི་ངལ་རྩོལ་བ་ཡིན་པ་དང་ཕྱི་མི་གནས་སྤོ་བ་རྣམས་མེད་ན་སུས་ངལ་རྩོལ་བྱས་ནས་གླ་གཡོག་རྒྱུག་གི་རེད་ཅེས་རང་སེམས་གསོ་ཐབས་སུ་འབད། པ་ཊེལ་གྱི་བུ་མོས་སློབ་ཕྲུག་གི་ཐོངས་མཆན་ཞུས་ནས་ཨ་རིར་ཐར་ཀྱང་ཁྱིམ་ཚང་དེའི་བཟའ་མི་ཚོའི་གནས་སྟངས་དེ་བརྟན་པོ་མེད་པར་སྣང་། པ་ཊེལ་གྱི་ཆུང་མ་ཎི་ལཱ་བྷེན་གྱིས་རྒྱ་གར་དང་ཨ་རིའི་འཚོ་བར་གཏན་ནས་སྡུར་ཐབས་མི་འདུག་ཅེས་ཨ་མི་རི་ཀ་ཕྱོགས་གང་ཐད་དུ་ཡག་ག་ཡོད་པ་ཁས་བླངས།།
གུ་ཇཱ་ར་ཏ་མངའ་སྡེའི་མཱེ་ས་ན་རྫོང་གི་ཁྱིམ་ཚང་ཕལ་ཆེ་བའི་མི་རེ་ཨ་རིར་ཡོད་པ་དང་འགའ་རེ་དགུན་ཁར་འཁོར་ཞག་ཏུ་འབྱོར། མཱེ་ས་ན་རྫོང་གི་རྒྱ་གར་བ་ཚོ་ཨ་རིར་བསྐྱོད་པའི་ལམ་དུ་ཆུས་འཁྱེར་པའམ། ཇག་པས་བསད་པ་རེད་ཅེས་གསར་འགྱུར་ནང་དུ་ལན་མང་ཐོན། ལོ་ཤས་གོང་དུ་རྒྱ་གར་བ་ཁྱོ་ཤུག་ཟུང་དང་ཕྲུ་གུ་༢་བཅས་ཁྱིམ་ཚང་ཞིག་གི་བཟའ་མི་༤་པོ་ཨ་རི་དང་ཁེ་ན་ཌའི་ས་མཚམས་སུ་འཁྱག་ཕྱིད་ཐེབས་ནས་ཤི། ཝི་ཤཱི་ནུ་བྷ་ཡེ་པ་ཊེལ་ཞེས་པའི་སྐྱུར་འབྲས་འཚོང་མཁན་ཞིག་གིས་ང་ཚོའི་ཁྱིམ་ཚང་ལྟར་བཟའ་མི་ཁ་བྲལ་དུ་གྱུར་ཡོད་པ་ཚོར་ཌོ་ནལ་ཊམ་གྱིས་གུ་ཡངས་གཏོང་བའི་རེ་བ་ཡོད། ང་ཚོའི་ཁྱིམ་ཚང་གི་བཟའ་མི་ཕྱེད་ཀ་འདིར་ཡོད། བཟའ་མི་ཕྱེད་ཀ་ཨ་རིར་ཡོད། ངའི་བུ་མོས་ཨ་རིར་བཟོ་བཀོད་ཀྱི་སློབ་སྦྱོང་བྱེད་ཀྱི་ཡོད། སློབ་གྲྭ་ཐོན་པའི་རྗེས་སུ་ཨ་རིར་འདུག་ཆོག་པ་དང་ང་ཡང་ཨ་རིར་ཁྲིམས་མཐུན་དུ་ལེན་ཐུབ་པའི་རེ་བ་འཆང་ཡོད། ངའི་ཕུགས་བསམ་ནི་བུ་མོ་ནམ་ཡང་རྒྱ་གར་ལ་ཕྱིར་ལོག་བྱེད་མི་དགོས་པར་ཤོག་ཅེས་སྨོན་ལམ་བཏབ།།
ཕྱི་ཟླ་དང་པོའི་ཚེས་༢༣་ཉིན་ཨ་རིའི་རླུང་འཕྲིན་ཁང་གིས་གནས་ཚུལ་སྤེལ་བ་ལྟར་ན། རྒྱ་གར་གྱི་ཕྱི་སྲིད་བློན་ཆེན་ཇཱེ་ཤན་ཀར་དང་ཨ་རིའི་ཕྱི་སྲིད་དྲུང་ཆེ་མར་ཀོ་རུ་བྷི་ཡོ་གཉིས་ཐུག་འཕྲད་བྱས་ནས་ཨ་རིར་ཁྲིམས་འགལ་དུ་བསྡད་ཡོད་པའི་རྒྱ་གར་བ་ཁག་ཅིག་རྒྱ་ནག་གཞུང་གིས་ཕྱིར་ལེན་བྱ་རྒྱུའི་གྲོས་མཐུན་བྱུང་། ཕྱི་སྲིད་བློན་ཆེན་ཇཱེ་ཤན་ཀར་གྱིས་ཁྲིམས་འགལ་གྱི་གནས་སྤོ་ལ་རྒྱ་གར་གཞུང་འཐད་པ་མེད། ཨ་རིར་ཁྲིམས་མཐུན་དུ་ཕྱིན་པ་མིན་པ་དང་མི་དེ་རྒྱ་གར་བ་ཡིན་པ་གསལ་པོར་ཤེས་ན་ང་ཚོ་མི་དེ་རང་ཡུལ་དུ་ལེན་འདོད་པ་ཡོད། འདི་ནི་རྒྱ་གར་གཞུང་གིས་རྒྱལ་ཁབ་ཚང་མར་འཛིན་པའི་སྲིད་ཇུས་ཡིན། ད་ལྟ་ང་ཚོས་ཨ་རིའི་གཞུང་གིས་ཕྱིར་ཕུད་བྱ་འཆར་ཡོད་པའི་མི་དེ་ཚོ་ངོ་མར་རྒྱ་གར་བ་ཡིན་མིན་ངོ་རྟགས་གཅོད་ཀྱི་ཡོད་ཅེས་བཀྲལ། ཌོ་ནལ་ཊམ་གྱིས་ལས་ཁུར་དམ་བཅའ་བཞག་པའི་རྗེས་སུ་ཁྲིམས་འགལ་གྱི་ཕྱི་མི་གཞིས་ཆགས་པ་རྣམས་ཕྱིར་ཕུད་གཏོང་དགོས་ཞེས་བཀའ་ཕབ། ཨ་རིས་མེག་སི་ཀོའི་ས་མཚམས་སུ་དམག་དཔུང་བཀྲམ་ནས་ཁྲིམས་འགལ་གྱི་གནས་སྤོ་བ་རྣམས་ཕྱིར་ཕུད་དང་ས་མཚམས་སྲུང་སྐྱོབ་དམ་དུ་བཏང་ཡོད་པའི་གནས་ཚུལ་ཐོན་འདུག
གླེང་སྟེགས།