སྐད་ཡིག་ནི་ལག་ཆ་ཙམ་རེད་ཅེས་པའི་ནོར་འཁྲུལ་ཅན་གྱི་བསམ་བློ་འདི་དོར་ནས་སྐད་ཡིག་ནི་མི་རིགས་ཤིག་གི་རིག་གནས་ཀྱི་སྲོག་ཤིང་དང་རྩིས་ཐང་། རང་དབང་སོགས་ལ་འབྲེལ་བ་ཡོད་པས། སྐད་ཡིག་ནི་མི་རིགས་ཀྱི་བླ་སྲོག་ཡིན་ཞེས་བྲིས་འདུག
ཉེ་ཆར་བོད་ཀྱི་རྩོམ་པ་པོ་དང་ཆབ་སྲིད་བཙོན་ཟུར་ཞིག་གིས་༼སྐད་དང་ཡི་གེ་རང་གི་བླ་སྲོག་ཡིན།༽ཞེས་པའི་རྩོམ་ཡིག་ཅིག་བྲིས་ཏེ་རྒྱ་ནག་གི་སྤྱི་ཚོགས་དྲ་ལམ་ཁག་ཏུ་འགྲེམས་སྤེལ་བྱེད་སྐབས་རྒྱ་ནག་གཞུང་གིས་ནག་བསུབ་དང་བཀག་སྡོམ་བྱས་སོང་ལ། རྩོམ་ཡིག་གི་ནང་དོན་༼ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དྲ་ལམ་བདེ་འཇགས་ཀྱི་ཁྲིམས་༽དང་འགལ་འདུག་ཅེས་བཀོད་འདུག
༼སྐད་དང་ཡི་གེ་རང་གི་བླ་སྲོག་ཡིན་༽ཞེས་པའི་རྩོམ་ཡིག་འདིའི་ནང་དུ་རྩོམ་པ་པོ་སློབ་ཆེན་འགྲིམ་བཞིན་པའི་སྐབས་སུ་སྐད་ཡིག་ནི་ལག་ཆ་ཙམ་ཡིན་པ་ལས། བླ་སྲོག་ཡིན་པར་ངོས་འཛིན་མེད་པར་ད་དུང་སྐད་ཡིག་ནི་བླ་སྲོག་རེད་ཅེས་བརྗོད་མཁན་ཚོར་རྩོད་པ་བྱས་མྱོང་ཡང་། རིམ་བཞིན་རྩོམ་པ་པོ་ཁོང་སྤྱི་ཚོགས་སུ་ཕྱག་ལས་གནང་བའི་རྒྱུད་རིམ་དང་ལྷག་པར་དུ་ཁོང་བཙོན་འཇུག་བྱས་སྐབས་དཔེ་ཀློག་དང་བསམ་གཞིགས་སོགས་ལས་སྐད་ཡིག་ནི་རང་གི་བླ་སྲོག་ཡིན་པར་ངོས་འཛིན་གསལ་བོ་རྙེད་དེ་སྐད་ཡིག་ནི་རང་གི་བླ་སྲོག་ཡིན་པའི་སྒྲུབ་བྱེད་ཁག་ཅིག་བཀོད་འདུག
རྩོམ་པ་པོ་ཁོང་ནི་རྒྱ་ནག་གཞུང་གིས་མི་རིགས་ཁ་བྲལ་གྱི་གཏམ་སྤྱོད་སྤེལ་བའི་ཉེས་འཛུགས་ཀྱིས་ལོ་ཤས་ལ་བཙོན་འཇུག་ཁྲིམས་ཐག་བཅད་མྱོང་བ་ཞིག་རེད་དེ། མུ་མཐུད་དུ་བོད་ཀྱི་སྤྱི་ཚོགས་གནད་དོན་དང་སྐད་ཡིག་གི་གནས་བབ་སོགས་གླེང་སློང་བྱེད་རྒྱུ་མཚམས་འཇོག་བྱེད་མི་འདུག ཐེངས་འདིར་རྒྱ་ནག་གཞུང་གིས་བཀག་པའི་ཁོང་གི་རྩོམ་ཡིག་དེའི་ནང་དུ། སྐད་དང་ཡི་གེ་ནི་མི་རིགས་ཤིག་གི་ལག་ཆ་ཙམ་ཡིན་ན། དེ་ཡི་ཚབ་ལ་སྐད་དང་ཡི་གེ་གཞན་ཞིག་གིས་ཚབ་བྱས་ཀྱང་ཆོག་པ་ཞིག་འདུག་མོད། དེ་ནི་མི་ཆོག་པ་ཞིག་རེད། ཅེས་དང་ཡང་། སྐད་དང་ཡི་གེ་ནི་མི་རིགས་ཤིག་གི་ལག་ཆ་ཙམ་ཡིན་པའི་གཞུང་ལུགས་ཁྱབ་སྤེལ་གཏོང་བ་ནི། མི་རིགས་ཤིག་གི་སྐད་དང་ཡི་གེ་རྩ་མེད་གཏོང་བ་ལ་གཞུང་ལུགས་ཀྱི་རྨང་བཙུགས་པ་རེད། ང་ཚོས་གནས་ལུགས་འདིའི་མཐར་ཐུག་མ་རྟོགས་པ་དེ་སྲིད་དུ། སྒེར་གཅོད་ཀྱི་ལག་པ་གཞན་དག་ཀྱང་ཤིན་ཏུ་མཐོང་དཀའ་ཞེས་བྲིས་འདུག
གཞན་ཡང་མི་རིགས་གཞན་དང་སྲིད་གཞུང་ཞིག་གིས་མི་རིགས་གང་རུང་རྩ་མེད་གཏོང་བར་ལས་དང་བོ་དེ་སྐད་དང་ཡི་གེ་རྩ་མེད་གཏོང་སྲོལ་གྱི་རྩ་བ་གླེང་སློང་བྱེད་སྐབས་ཁོང་གིས། སྒེར་གཅོད་ཀྱི་ལོ་རྒྱུས་དག་ལ་བལྟས་ན། མི་རིགས་རྩ་མེད་དུ་གཏོང་བ་ལ། དེའི་སྐད་དང་ཡི་གེ་རྩ་མེད་གཏོང་བ་ནས་མགོ་བཟུང་བ། དབང་དང་བཙན་གྱིས་སྐྱེ་བོ་སུ་ཞིག་མི་རིགས་རང་གི་སྐད་དང་ཡི་གེ་ལ་འཇུག་པའི་སྒོ་འགོག་པ་ནི་སྒེར་གཅོད་རེད། དམར་པོ་ཁྲག་གི་བྱུང་བ་མཐའ་དག་དེ་དང་དེ་ལྟ་བུའི་སྒེར་གཅོད་ཀྱི་མཇུག་འབྲས་ཡིན་གྱི། གཞན་དུ་ན་རང་དབང་རང་འཐད་དུ་གནས་པའི་སྐྱེ་བོ་དག་ནི་མི་གསོད་ཁྲག་སྦྱོར་གྱི་ལས་ལ་མི་མོས། ཞེས་བྲིས་འདུག་ལ། དེ་མཚུངས་ཡང་རྩོམ་པ་པོ་ཁོང་གིས་བོད་པ་རང་ཉིད་ཀྱི་གྲས་སུ་སྐད་ཡིག་གཞན་འགྱུར་དང་རིག་གནས་གཞན་འགྱུར་ལ་རོགས་འདེགས་ཞུ་མཁན་ཚོར་སྐྱོན་བརྗོད་ཤུགས་ཆེན་བྱེད་དེ་བོད་ནང་གི་རྩོམ་པ་པོ་ཁག་ཅིག་གི་མིང་བཏོན་ནས་ཐེར་འདོན་བྱེད་འདུག་པ་མ་ཟད། དེ་ཚོས་མི་རབས་གསར་བར་བག་ཆགས་ངན་པ་འཇོག་བཞིན་པ་དང་། ཡང་གོ་སྐབས་རིང་ལུགས་པ་ཚོས་སྐད་ཡིག་དང་རིག་གནས་གཞན་བསྒྱུར་ལ་འཁྲབ་སྟོན་བྱེད་བཞིན་པའི་དཔེར་བརྗོད་མང་དུ་བཀོད་འདུག་པའི་ནང་འཁོད་དོན། སྐྱེ་བོ་སུ་ཞིག་མི་རིགས་རང་གི་སྐད་དང་ཡི་གེ་སྦྱོང་མིན་དེ་སོ་སོའི་རང་དབང་རེད། དེ་ལ་བློ་ལྡན་སྐྱེ་བོ་སུས་ཀྱང་དབང་དང་བཙན་བཀོལ་ནས་འདེད་པ་མི་འོས། སྐྱེ་བོ་སུ་ཞིག་རང་གི་སྐད་དང་ཡི་གེ་སློབ་པ་དེའང་སོ་སོའི་རང་དབང་རེད། དེ་ལ་ཁ་ཆེན་དབང་ཆེན་དག་འགོག་པ་དང་བཙིར་བ་སོགས་མི་ཆོག ཡིན་ན་ཡང་དིང་སང་ཨ་གསར་ཅན་རེ་འགས་ཤིན་ཏུ་གསར་མདོག་ཁ་བོས། རང་གི་སྐད་དང་ཡི་གེ་བཀོལ་བ་ལོགས་སུ་བཞག་ནས། གཞན་གྱི་དེ་དག་དང་དུ་ལེན། གཅིག་ཏུ་ན། མི་སེམས་ཀྱི་གཏམ་འདོད་ཚ་བོའི་ཧམ་པ་སོགས་ཀྱིས་བསྐྱེད་པ་ཡིན་སྲིད་མོད། ཞིབ་ཏུ་བསམ་ན། ཧམ་པ་དེ་དག་ཐམས་ཅད་མ་རིག་པས་བསྐྱེད་པ་ཤ་སྟག་རེད། རྨོངས་པའི་རྒྱ་ལས་མ་གྲོལ་བའི་མི་དག་ནི་རང་ཉིད་རྒུད་པའི་ལམ་ལ་ཞུགས་པ་ཡིན་གྱི། ཤེས་རབ་ཅན་གྱི་སྐྱེས་བུ་དག་ནི་དེ་ལྟའི་ལམ་ལ་འཇུག་པ་མི་སྲིད་དོ་ཞེས་བྲིས་ཏེ། ཡང་འབོད་སྐུལ་གནང་དོན། ལར་འདི་དག་ལ་ཤ་ཚའི་གཏམ་སྨྲ་བ་འོས་སུ་མ་བབ་ཀྱང་། རང་གི་རིགས་ལ་ཞེན་པའི་སེམས་ནི་རྟ་རྒོད་ཀྱི་བང་དང་། རི་གཟར་གྱི་རྦབ་བཞིན་འགོག་པའི་སྐབས་ནི་མ་མཆིས་སོ། སྐད་དང་ཡི་གེ་མ་ཤེས་པས་རང་གི་རིག་གནས་དང་ཆོས་ལུགས་ཀྱི་རིན་ཐང་མི་ཤེས། ཆོས་དང་རིག་གནས་ཀྱི་རིན་ཐང་མི་ཤེས་པས་དེ་དག་ཐམས་ཅད་ཐལ་བའི་རྡུལ་བཞིན་འདོར། དེས་ན། སྒེར་གཅོད་ལ་སུ་དང་གང་ཞིག་འཇིགས་མིན་དེ་ཡང་བསམ་གཞིག་གི་སྲང་ལ་འཇལ་རན། ཆོས་རིག་གཉིས་ཀྱི་གཟུང་ཐག་སྐད་དང་ཡི་གེ་ཡིན། ཞེས་བྲིས་འདུག
བོད་ཀྱི་སྐད་ཡིག་ཞབས་ཞུ་ཁང་གི་འགན་འཛིན་ཟུར་བ་དང་རབ་བརྟན་རིག་གནས་ཁང་གི་འགན་འཛིན་ཐུབ་བསྟན་རབ་བརྟན་ལགས་ཀྱིས་༼སྐད་དང་ཡི་གེ་རང་གི་བླ་སྲོག་ཡིན་༽ཞེས་པའི་རྩོམ་ཡིག་དེ་ཀློག་སྐབས་ཁོང་ལ་མྱོང་ཚོར་ཅི་བྱུང་གི་སྐོར་ནས་ཨ་རིའི་རླུང་འཕྲིན་ཁང་ལ་ངོ་སྤྲོད་གནང་དོན། སྤྱིར་བཏང་ང་ཚོས་སྐད་ཡིག་ཟེར་བ་དེ་ང་ཚོའི་མི་རིགས་ཀྱི་ངོ་བོ་དང་ཡང་ན་མི་རིགས་ཀྱི་མང་པོ་ཞིག་རེད་ཅེས་ལབ་གི་ཡོད་རེད་དེ། རྩོམ་ཡིག་འདི་ཀློག་པའི་མྱོང་ཚོར་དུ་སྐད་ཡིག་ནི་མི་རིགས་ཤིག་གི་ཤ་དང་རུས་པའི་གསེང་དུ་འཛུལ་དགོས་པ་ཞིག་དང་། ཤ་དང་རུས་པའི་གསེང་ནས་ཐོན་དགོས་པ་ཞིག ང་ཚོའི་འདུ་ཤེས་ཀྱི་གཏིང་རིམ་དུ་ཡོད་དགོས་པ་ཞིག་ཡིན་པ་ངོ་སྤྲོད་གསལ་བོ་གནང་འདུག དཔེ་མཚོན་ཞིག་ཞུས་ན། རྗེ་རིན་པོ་ཆེ་མ་ཕེབས་པའི་སྔོན་ལ། བོད་ཀྱི་སྔ་རབས་པ་ཚོས་མདོ་སྔགས་གཉིས་འགལ་བ་རེད་ཅེས་པའི་ལྟ་ཚུལ་ཡོད་ཚུལ་བཤད་ཀི་ཡོད་པ་རེད་དེ། རྗེ་རིན་པོ་ཆེ་ཕེབས་པའི་སྐབས་ནས་བཟུང་རྗེ་རིན་པོ་ཆེའི་གསུང་དེ་ཚོའི་ནང་ལ་མདོ་སྔགས་ཡོངས་སུ་ཟུང་དུ་འབྲེལ་བ་ཞིག་གསུང་ཡོང་ཡོད་རེད། དེའི་སྲོལ་འདྲ་བོས་ད་ལྟའི་རྩོམ་ཡིག་འདིས་སྐད་ཡིག་སྐོར་ལ་ང་ཚོས་ནམ་རྒྱུན་སྐད་ཆ་བཤད་བསྡད་པ་དེ་ཚོ་ལས་བརྒལ་ཏེ་ང་ཚོའི་ཤ་ཁྲག་རུས་གསུམ་དང་རང་གི་ངོ་བོ། རང་གི་ཐོབ་ཐང་། རང་གི་རྩིས་ཐང་སོགས་ཡོངས་སུ་རྫོགས་པ་སྲུང་སྐྱོབ་བྱེད་བྱད་ལ་སྐད་ཡིག་དེའི་ཐོག་ལ་འདུག་བསམ་པའི་ངོ་སྤྲོད་གསལ་བོ་ཞིག་གནང་འདུག་ཅེས་འགྲེལ་བརྗོད་གནང་སོང་།
རྩོམ་པ་པོ་ཁོང་གིས་སྐད་ཡིག་ནི་ལག་ཆ་ཙམ་ཞིག་རེད་ཟེར་བའི་བསམ་བློ་འདི་ནོར་འཁྲུལ་ཅན་ཞིག་ཡིན་པར་སྒྲུབ་ཡོད་པ་དེའི་ཐད་ལ་ཐུབ་བསྟན་རབ་བརྟན་ལགས་ཀྱིས་མུ་མཐུད་དུ་གསུང་དོན། སྤྱིར་ལག་ཆ་ཞིག་ཡིན་ན་ལག་ཆ་གཅིག་གི་ཚབ་ལ་ལག་ཆ་གཞན་ཞིག་བཀོལ་སྤྱོད་བྱེད་ཆོག་གི་རེད། ལག་ཆ་གསར་བ་དེ་འདྲ་བེད་སྤྱོད་གཏོང་ཆོག་གི་རེད། ལྷག་པར་དུ་ཚན་རིག་འཕེལ་རྒྱས་དང་བསྟུན་ལག་ཆ་གཅིག་གི་ཚབ་ལ་གཅིག་ལས་ཡག་པོ་དེ་འདྲ་བེད་སྤྱོད་གཏོང་ཐུབ་ཀི་རེད། ཡིན་ན་ཡང་སྐད་ཡིག་ཅིག་གི་ཚབ་ཏུ་སྐད་ཡིག་གཞན་ཞིག་བཀོལ་སྤྱོད་བྱེད་ཐུབ་ཀི་མེད། ཁོང་གིས་ཚིག་དེ་གནད་འགག་ཆེན་པོ་རེད་ཤག (རང་གི་སྐད་ཡིག་གི་ང་རོ་དེ་གཞན་གྱི་སྐད་ཡིག་གི་ཐོག་ལ་ཡོད་པ་མ་རེད་)ཅེས་གསུང་གི་འདུག་ཅེས་དང་། ཡང་ང་ཚོའི་བཙན་བྱོལ་སྤྱི་ཚོགས་སུ་ཡོད་པ་རེད། བོད་སྐད་བཤད་པའི་སྐབས་སུ་དབྱིན་ཇི་ཚིག་འདྲེས་འདྲེས་བཏང་བ་ཡིན་ན་སོ་སོའི་གཟི་བརྗིད་དང་རིན་ཐང་བརྩི་བ་འདྲ་བོ། སོ་སོའི་ཡོན་ཏན་ངོམས་ཀི་ཡོད་པའི་སྲོལ་འདྲ་ཡོང་གི་ཡོད་རེད། དེ་མཚུངས་བོད་ནང་ལ་ཆ་བཞག་ན་ཡང་སྐད་ཆ་ཞིག་བཤད་ཀྱང་རྒྱ་མིའི་སྐད་འདྲེས་པ། ཡང་བོད་རང་གི་སྐད་ཡིག་ནང་ཡོད་པའི་རིག་གནས་གང་འདྲ་ཞིག་ཡིན་ཡང་རྒྱ་མིའི་སྐད་ཡིག་ཏུ་ཕར་བསྒྱུར་ཏེ། ངས་འདི་འདྲ་བསྒྱུར་ཡོད་ཅེས་སྤོབས་པ་བྱེད་བཞིན་པ་འདི་རྣམས་ཉེན་ཁ་ཞིག་ཡིན་པ་ངོ་འཕྲོད་ལ། སྒེར་གཅོད་པ་ཚོས་སྐད་ཡིག་རྩ་མེད་གཏོང་བ་ལ། ཁྱོད་རང་ཉིད་ཀྱི་ངོས་ནས་སྐད་ཡིག་གང་དེའི་ནང་ཡོད་པའི་རིག་གནས་དེ་ཚོ་ཕར་བསྒྱུར་ན་དེ་གཟི་བརྗིད་དང་སྤོབས་པར་རྩིས་པ་ཡིན་ཚེ། ང་ཚོ་དམར་གསོད་བྱེད་མཁན་དང་དེ་ལ་སྦྱོང་བརྡར་བྱེད་མཁན། དཔེར་ན་ཁོང་གིས་འཇེའུ་མི་རིགས་རྩ་མེད་གཏོང་སྐབས། གོང་ནས་བཙིར་སོང་ཞེས་དམར་གསོད་གཏོང་མཁན་ལ་ཉེས་པ་མེད་ཅེས་རྒྱུ་མཚན་དུ་བཀོད་བཞིན་ཡོད་ཀྱང་། འཛམ་གླིང་ཡོངས་གྲགས་ཐོག་ལ་སྒང་ནས་བཙིར་ཡོང་མཁན་དང་དངོས་སུ་དམར་གསོད་གཏོང་མཁན་གཉིས་ཀ་ལག་དམར་ཡིན་པ་ངོས་འཛིན་གཅིག་པ་བྱེད་བཞིན་ཡོད། དེ་འདྲ་སོང་ཙང་ཁྱེད་ཀྱིས་སྐད་ཡིག་གཞན་པ་གལ་ཆེན་མཐོང་ཆེན་ལ་བརྩིས་ཏེ་ང་ཚོའི་རིག་གནས་སྐད་ཡིག་གཞན་དུ་བསྒྱུར་བ་དང་སྐད་ཡིག་གཞན་ཤེས་པའི་ཡིན་མདོག་སྟོན་པ་དེ་ཚོ་ཚང་མ་སོ་སོའི་རང་གི་བླ་སྲོག་མེད་པར་གཏོང་བ་དང་། སོ་སོ་རང་གི་བརྩི་མཐོང་མེད་པར་གཏོང་བ་ཞིག་ཡིན་པའི་སྐོར་ཁོང་གིས་ངོས་འཛིན་གསལ་བོ་གནང་འདུག་ཅེས་གསུང་སོང་།
རབ་བརྟན་ལགས་ནི་དེ་སྔ་བཙན་བྱོལ་དུ་སྐད་ཡིག་ཞབས་ཞུ་ཁང་གི་འགན་འཛིན་གྱི་ཕྱག་ལས་གནང་མྱོང་བ་ལྟར་རང་གི་ཉམས་མྱོང་གཞི་ལ་བཞག་སྟེ། རྩོམ་པ་པོ་ཁོང་གིས་བོད་སྐད་ཡིག་གི་གནས་བབ་གླེང་བའི་རྩོམ་ཡིག་འདི་དང་བཙན་བྱོལ་བོད་མིའི་སྤྱི་ཚོགས་ཀྱི་བོད་སྐད་ཡིག་གི་གནས་བབ་བར་རོལ་དུ་འབྲེལ་ལམ་གང་འདྲ་ཡོད་པའི་དགོངས་ཚུལ་གསུང་དོན། བཙན་བྱོལ་སྤྱི་ཚོགས་ལ་ཆ་བཞག་པ་ཡིན་ན། ཆབ་སྲིད་ཀྱི་དབུ་ཁྲིད་རྣམ་པ་ཡིན་ན་རེད། སློབ་གསོ་གཏོང་མཁན་ཡིན་ན་རེད། གང་ལྟར་མང་པོ་ཞིག་གིས་བོད་ཀྱི་སྐད་ཡིག་དེ་གལ་ཆེན་པོ་རེད། རྩ་ཆེན་པོ་རེད་ཅེས་བརྗོད་བཞིན་ཡོད་ཀྱང་། དོན་དངོས་ལག་ལེན་ཐོག་ལ་སོ་སོའི་ནང་མིས་བོད་ཀྱི་སྐད་ཡིག་བེད་སྤྱོད་དེ་ཙམ་མི་བྱེད་པ། སོ་སོའི་ཕྲུ་གུ་དེ་ཚོ་ཡང་སྐད་ཡིག་གཞན་པ་བེད་སྤྱོད་གཏོང་སའི་ཁོར་ཡུག་ཏུ་གཏོང་དགོས་ཀྱི་རེད་དེ། བོད་ཀྱི་སྐད་ཡིག་ཡག་པོ་ཡོང་བར་འབད་བརྩོན་མི་བྱེད་པ། ཁྱིམ་ཚང་ཞིག་ལ་དཔེ་བཞག་ན་རྒྱ་གར་དུ་སྔོན་མ་དབྱིན་ཇིའི་སློབ་གྲྭ་གཏོང་གི་ཡོད་པ། སོ་སོའི་བོད་པའི་སློབ་གྲྭའི་ནང་མ་ཡིན་པར་སློབ་གྲྭ་གཞན་དུ་གཏོང་བ་ལ་སོགས་པ་འདི་དག་ཡོངས་རྫོགས་ང་ཚོའི་བོད་ཀྱི་སྐད་ཡིག་རྩ་མེད་གཏོང་བའི་ལམ་ཀར་འགྲོ་བཞིན་པ། རྒྱ་ནག་གཞུང་གིས་བོད་ནང་ལ་ཆེད་དུ་གཉེར་ནས་བོད་ཀྱི་སྐད་ཡིག་རྩ་མེད་གཏོང་བའི་སྲིད་ཇུས་ལག་བསྟར་བྱེད་བཞིན་ཡོད། ང་ཚོའི་བཙན་བྱོལ་སྤྱི་ཚོགས་ཀྱི་བྱེད་སྟངས་ཁ་ཤས་ཤིག་མི་རིགས་ཀྱི་ངོ་བོ་རྩ་མེད་འགྲོ་བ་དང་བོད་ཀྱི་ངོ་བོ་ཕྱོགས་ཡོངས་ནས་བརླག་འགྲོ་བའི་ཐོག་ལ་ང་ཚོས་གཞོགས་འདེགས་བྱེད་པ་འདྲ་བོ་ཆགས་ཀི་ཡོད་པའི་གནས་སྟངས་འདི་གཅིག་ཆགས་ཡོད། ཡིན་ན་ཡང་ད་ལྟ་བཙན་བྱོལ་དུ་བོད་ཀྱི་སྐད་ཡིག་སྦྱོང་དགོས་པ་དང་བོད་ཀྱི་སྐད་ཡིག་བརླག་སོང་ན་འགྲིག་གི་མི་འདུག་ཅེས་པའི་ཚོར་བ་འདི་སྔར་དང་བསྡུར་ན་ཤུགས་ཆེ་རུ་འགྲོ་གི་ཡོད་ཅེས་འགྲེལ་བརྗོད་གནང་སོང་།
ཡང་རབ་བརྟན་ལགས་ཀྱིས་བརྗོད་ན་སྤྱིར་བཙན་བྱོལ་དུ་མི་འབོར་ཉུང་ཉུང་ཡིན་པའི་ཐོག་ལ་འཛམ་གླིང་ས་གནས་གང་སར་འཐོར་ཡོད་པར་བརྟེན་ནས་བོད་ཀྱི་སྐད་ཡིག་གི་གནས་བབ་དེ་བརྗོད་ཐབས་བྲལ་བའི་གནས་སུ་ལྷུང་ཡོད་ཀྱང་། ༧གོང་ས་མཆོག་གི་རབ་གསལ་དགོངས་པ་ལས་འཕྲོས་ཏེ་རྒྱ་གར་ནང་བོད་ཀྱི་སྐད་ཡིག་གནས་བབ་ཡག་པོ་ཡོང་བར་རྩ་བ་ཚུགས་ཐུབ་ཡོད་པ་ཡང་ངོ་སྤྲོད་གནང་སོང་བ་མ་ཟད། བོད་དུ་རྒྱ་ནག་དམར་ཤོག་གཞུང་གིས་བཙན་པོའི་དྲག་གནོན་དང་བཙོན་འཇུག་སོགས་ཀྱིས་བོད་མི་ཚོའི་སྙིང་སྟོབས་འཇོམས་ཐབས་བྱེད་བཞིན་ཡོད་ཀྱང་། ཞི་དྲག་གཉིས་ཀྱིས་བསླུ་མ་ཐུབ་ཅིང་སྙིང་སྟོབས་མ་ཞུམ་པའི་༼སྐད་དང་ཡི་གེ་རང་གི་བླ་སྲོག་ཡིན་༽ཞེས་པའི་རྩོམ་ཡིག་འབྲི་མཁན་ཁོང་ལྟ་བུ་མཐོང་ནས་བརྩི་བཀུར་དང་བློ་སྟོབས་ཆེན་པོ་བྱུང་བ་སོགས་ཀྱང་གསུང་སོང་།།
