བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་ཉེ་ལམ་རེས་གཟའ་པ་སངས་ཀྱི་མཚན་མོར་བྱང་ཨ་ཧྥི་རི་ཀའི་རྒྱལ་ཁབ་མོ་རོ་ཀོའི་ནང་ས་ཡོམ་གྱིས་གོད་ཆགས་བྱུང་བར་ཡུལ་དེའི་མི་མང་འདས་སོན་ཡོངས་ལ་ཐུགས་གསོ་དང་གདུང་སེམས་མཉམ་བསྐྱེད་ཀྱི་འཚམས་འཕྲིན་ཞིག་ཕྱི་ཟླ་ ༩ ཚེས་ ༡༡ ཉིན་བཞུགས་སྒར་རྒྱལ་བའི་ཕོ་བྲང་ནས་མོ་རོ་ཀོའི་སྲིད་བློན་ ཨ་ཛི་སེ་ ཨ་ཁཱན་ནོ་ཆི་ མཆོག་གི་མཚན་ཐོག་ཏུ་སྩལ་གནང་ཡོད་ཅིང་། ཐུགས་གསོའི་འཚམས་འཕྲིན་དེའི་ཞིབ་ཕྲའི་ནང་དོན་སྐོར་ལ་འདི་ག་ཨ་རིའི་རླུང་འཕྲིན་ཁང་ནས་དགའ་ལྡན་ཕོ་བྲང་གི་དྲུང་ཆེ་ཆོས་སྐྱབས་པ་འཆི་མེད་རིག་འཛིན་ལགས་སུ་བཅར་འདྲི་ཞུས་པའི་ནང་། ཉེ་ལམ་གྱི་ས་ཡོམ་གོད་ཆགས་དེའི་འོག་འདས་གྲོངས་སུ་ཕྱིན་པ་དང་། རྨས་སྐྱོན་ཕོག་པ། དེ་བཞིན་ལྟོས་བཅས་ནང་མི་ཚང་མར་ཐུགས་གསོ་མཛད་པ་འཁོད་ཡོད་པ་དང་། དེ་བཞིན་མོ་རོ་ཀོ་གཞུང་ངོས་ནས་གོད་ཆགས་ཕོག་མཁན་ཡོངས་ལ་རོགས་སྐྱོར་གནང་བཞིན་པ་དང་དེ་བཞིན་རྒྱལ་སྤྱིའི་རྒྱལ་ཁབ་མང་པོས་རོགས་རམ་གནང་བཞིན་པར་མགོན་པོ་མཆོག་ཐུགས་དགྱེས་ཚོར་ཆེན་པོ་བྱུང་ཡོད་པ་བཀའ་གནང་བ་ཡོད་པ། དེ་དང་ཕྱོགས་མཚུངས་༧གོང་ས་༧སྐྱབས་མགོན་ཆེན་པོས་དུས་རྒྱུན་དུ་འཛམ་གླིང་གང་སའི་དམིགས་བསལ་དགོས་མཁོ་ཅན་གྱི་ཡུལ་ལུང་དེ་དག་ལ་རང་བྱུང་གི་གོད་ཆགས་ནམ་བྱུང་ལ་ཐུགས་གསོ་དང་སྦྲགས་ངལ་སེལ་རོགས་དངུལ་གནང་གི་ཡོད་པ་བཞིན། ད་རེས་ཀྱང་མོ་རོ་ཀོའི་གོད་ཆགས་དེའི་ཁྲོད་གནོད་འཚེ་འཕོག་མཁན་ཡོངས་ལ་གདུང་སེམས་མཉམ་བསྐྱེད་ཚོན་ཆེད་དགའ་ལྡན་ཕོ་བྲང་ཐེབས་རྩ་ནས་ངལ་སེལ་རོགས་དངུལ་རྒྱ་མི་ཆུང་བ་ཞིག་ཀྱང་སྩལ་གནང་རྒྱུ་འཁོད་ཡོད་པ་གསུངས་གནང་སོང་།
གཞི་རྩའི་ཉེ་ལམ་ཟླ་བ་འདིའི་ཚེས་ ༨ ཉིན་གྱི་མཚན་མོར་མོ་རོ་ཀོའི་དབུས་སུ་ཆགས་པའི་ ཧའེཨ་ཊེ་ལ་སེ་ཞེས་པ་ཡུལ་དེའི་གྲོང་ཁྱེར་ཆེ་ཤོས་ མཱ་རུ་ ཀེ་ཤེ་ ཡི་ལྷོ་ཤར་ཕྱོགས་ཀྱི་རི་གྲོང་ཁུལ་དུ་ས་ཡོམ་འགུལ་ཚད་ ༦།༨ བརྒྱབ་སྟེ་ད་བར་རྒྱུས་ལོན་བྱས་པར་གཞིགས་ན་མི་གྲངས་ ༢༡༠༠ ལྷག་རྐྱེན་འདས་སུ་ཕྱིན་ཡོད་འདུག་ལ། མི་གྲངས་ ༢༤༠༠ ལྷག་ལ་རྨས་སྐྱོན་ཕོག་ཡོད་པ་དང་། མི་གྲངས་ ༡༤༠༠ ལྷག་ལ་འཚབ་ཆེའི་རྨན་སྐྱོན་ཕོག་པའི་གནས་སྟངས་འོག་གནས་ཡོད་པ་རྒྱལ་སྤྱིའི་གསར་ལམ་ཁག་ནས་ཐོན་བཞིན་ཡོད་པ་རེད་འདུག
